今日閱某報，看到有講湯生所言的「賭場莊家必殺三類人」，找回原文，其實是指四類人：

　　首先，就是殺孤寒注，敢輸唔敢贏，贏就贏粒糖，輸就輸間廠，贏就縮，輸就谷，贏就即走，輸就死守。

　　第二，就是虧空公款去賭錢的人，心理質素很弱，在賭場英雄地，莫講是輸死，嚇都嚇死。

　　第三，磨穿蓆就一定輸，大家亦應該知道長賭必輸道理，賭場以抽水為生，長賭的人始終會被抽乾。

　　第四，那些借了高利貸，自己冇得賭而由高利貸代賭的人。

　　這套理論，當然可以套用到其他的投資項目，類比到股市和樓市，可以看到另外四類人：

　　1. 老散雞仔注：在股市中有一類散戶，並不是去研究自己應該買甚麼股票，而是研究「別人」是買甚麼股票，可是十人有十義，結果就會買左一堆股票出來，卻隻隻都係細細注。

　　套用在樓市，有些人堅持要用最少錢去入市，人買私樓佢就買居屋村屋，還要沾沾自喜。他們是將置業當作一種支出，而從沒有以投資角度去分析。

　　2. 無膽借錢：即所謂借「細膽錢」，就係息率不低但風險卻高的借貸。在股市，用孖展戶口利息最低，有些甚至低到P都有得借，而且只要唔借到盡，在爛市執大藍籌，是坐和望贏，就算跌價都可以出售部份股票頂數，不過好多人寧願去買窩輸買牛熊證，都唔肯去用孖展戶口買正股。

　　至於在樓市，如果見到樓價低位又未儲夠首期，大可以去按揭證券公司借二按，只要按時還錢，不會無端端被call loan，連保費都可以上會。不過偏偏他們會堅持，有低息按保不用，卻要求家人將物業到財務機構做物業二按，無錢還就被人釘契。

　　3. 無膽長期持有：賭場專收磨爛蓆，因為在所有的賭博中，莊家的贏面永遠超過50%，作為閒家的贏面永遠低過50%，所謂點豉油都點乾就是這個道理。但是在投資市場，無論股市或樓市，只要選擇優質股票和優質樓，買家就變成莊家，年年都坐和望贏，一路收息、收租或賺住，一路坐享升值。關鍵在於怎樣選擇所謂「優質」的投資產品，要另文再述。

　　4. 捉住手黎賭：有正股不買，卻去買高收費基金，甚至明搵笨的窩輪和牛熊證。道理就像莊家與閒家之別：買基金，無論賺蝕都要找條管理費數，有時可高達每年3-5%，變相像真金白銀都要支付利息，至於去買窩輪和牛熊證，溢價隨時兩三成，打和都輸一截。

　　那些千辛萬苦上了車的人，見層樓升了一百幾萬就見獵心喜賣樓等跌，同時又要租樓住。其實就是捉住手黎賭樓跌，就算樓價無升無跌，交租都每年唔見十幾廿萬。

　　所謂賭場必殺，說穿了就是在贏面低時又要去搏命，孫子兵法有云：「勝兵先勝而後求戰，敗兵先戰而後求勝。」為賭而賭，為投資而投資，多數都沒有好結果。