有行家同我講，汪敦敬真係唔抵，在三年前曾經講過，如果當日唔買樓，三年後就會後悔，今日樓價比三年前下跌了17%，立刻俾人封佢做新燈神，代替了剛剛退休的大C，被人叫新燈神當然唔開心，但叫佢做新燈神的人，99 ％都老汪咁有錢，行家搞錯，是100 ％，因為有錢過老汪的唔會叫佢做新燈神。
行家話，老汪有舖有樓，咁都被人叫新燈神，只會在香港發生，好似老汪咁樣，有50舖位以及住宅單位，身家一
定超過一億美元，可以列入億萬富豪，叫佢做新燈神都唔嬲，由此可見，香港人的心胸的確很廣闊，行家搞錯了，並不是心胸廣闊，我經常亦會被人叫做燈，而且明知叫我做燈的人連一個自住單位都冇，但我唔敢嬲，如果我嬲，就會被人話咁少氣，都唔講得笑，被人笑不如自己笑，一笑置之。
香港人唔明白叫一個有錢人做燈，即是話俾其他人知自己很窮，如果唔信，去澳門賭場睇吓，那些贏到盤滿砵滿，一大堆籌碼的人會不會被人叫做燈，其他賭仔只會跟紅，跟著那人落注，反之那些輸到面青口唇白，落注時揸唔定主意，唔知買莊買閒，如果輸咗就要跳樓，那些人才是燈，所以，叫人做燈即是咒人去死，點解要咁樣做，澳門人唔會叫人做燈。
其實，做評論員只是按自己分析做預測，經常都會預測錯誤，如果錯了就被人叫做燈，試問又點會有人做評論員，市場只有一種聲音，就好似現在，大家就一窩蜂講樓市下跌，在七、八年前，就一窩蜂講樓市上升，令大家失去警覺性，到最後損失的是一般市民，今日錯失了入市機會，七、八年前就入錯市。講到明燈，始終比較適用於偏門，樓市是正行生意，用燈做指引並不恰當。
App下載
