新年十大屋苑零成交絕不出奇

　　有人話，今次香港樓市大鑊了，新年期間，十大屋苑竟然零成交，其實有甚麼好大驚小怪，在新年期間，有超過一百萬港人離開香港，當中包括業主，買家甚至物業代理，單物業成交，就需要這三類人，唔齊腳，生意就很難做得成，況且物業代理知道，唔使幾耐，就會有大量新樓盤供應，不但佣高糧準，又唔需要仔細介紹，一切有地產商職員代勞，代理又點會在新年期間浪費精力，介紹那些二手樓盤，不如養精蓄銳，留返啲精力推銷地產商新樓盤。

　　無論業主或者買家，他們都知道在2月底，財爺恭讀財政預算案時，有很大機會將所有打擊樓市辣招撤銷，甚至將正常印花稅減半，刺激市民買樓意慾，在這情況下，無論是賣家或者買家，甚至連地產商都不會在這個時候買／賣樓，連地產商都不推出新樓盤，一般打算買樓的人又點會現在買樓，遲兩三個禮拜有可能慳返一百幾十萬。

　　業主又點解現在唔賣樓，業主知道，政府如果撤辣，買家就有機會慳返高達15%印花稅，出價就會勇好多，如果現在賣樓，萬一政府在2月底撤辣，不但成交量急升，成交價亦會上升，正所謂執輸行頭，慘過敗家，現在無論買樓抑或賣樓，比行頭仲要企前一步，除非迫不得已，點解現在買／賣樓。

　　有人話，物業代理阿頭，對前景很灰，那些人唔明白，物業代理是靠成交量維持生計，如果零成交，淨係輸人工燈油火蠟都輸死，不過，急也急不來，一定要等2月底財政預算案之後，如果政府唔撤辣，樓市會繼續下跌，成交量亦會維持在低水平，冇人買新樓，地產商就唔會買地，政府就要考慮開徵新稅項以及推行緊縮政策，香港就真正冇運行。