贏在起跑線的首次置業者

　　我在澳門松山腳的粵華讀中學，每年都有舉辦環繞松山山腰跑一圈，全程大約1700公尺，學校為免各同學在衝線時相距太遠，在賽前會公佈贏在起跑線計劃，那些賽績不甚好的同學可以提早5至10分鐘出發，到衝線時就會一大堆同學一齊，十分墟冚，唔知情的人以為學生的水準相當平均，其實，有一些同學提早出發，不過很奇怪，不少可以提早出發的同學沒有提早出發，他們認為即使贏都是勝之不武。

　　明日財爺又要恭讀財政預算案，今次大家關注的不是財赤問題，財赤超過千億已是定局，只是千幾億的問題，如果沒有新突破，明年財赤應該更加嚴重，不過，就是因為財赤嚴重，政府才有機會撤銷打擊樓市的辣招，大多數人都認為政府今次會全撤，或者會保留SSD，畢竟SSD是防止短炒，對於買樓自用或者收租的人不會有影響，雖然有人話全撤都冇用，樓價仍然會下跌，既然全撤冇用，就唔應該反對政府撤辣。

　　雖然報紙鋪天蓋地報道不利樓市消息，低價成交亦不絕，但在財政預算案前的一次中原指數，竟然上升了0.48 ％，代表有不了人偷步入市，現在甚至幾個人爭一個單位，那些買家全部都是首次置業者，因為他們知道自己是贏在起跑線，如果財爺撤辣，就有不少人同他們爭，那些人包括已經有住宅單位的香港人，由國內嚟的專才以及學生家長，在不用付辣招稅之下，他們出價必定勇猛，如果唔早點買樓，財政預算案之後就很難買到，不過任何事都不怕一萬，最怕萬一，萬一財爺不撤辣，樓價一定會下跌，現在買樓的人就損失慘重，我亦相信這個可能性很大，但財爺就要面對巨額財赤，唔撤辣就冇人買新樓，地產商的新樓賣唔出，就唔會買地，冇買地收入，財赤只會愈來愈嚴重，我諗財爺唔會同錢鬥氣掛。