如何搞活夜繽紛

　　星期日我去了中環海傍酒繽紛，用200元租了一隻杯，買了8杯酒，有檔口攤檔老闆同我講，根本唔使買酒票，參加的檔主並不是打算做零售生意，而是推廣自己品牌，根本是任飲唔嬲，如果以做零售生意心態，差不多每一個檔口都要蝕錢，但如果以推廣心態，大多數檔口都賺到盤滿砵滿。

　　雖然政府非常落力推廣，但市民對灣仔海傍的夜繽紛評價不高，如果唔轉型，估計很快就會落幕，有人問點解酒繽紛成功，而夜繽紛慘淡，簡單講一句，就是定位不同，酒繽紛是推廣，夜繽紛是零售，參與夜繽紛的是零售，要計成本，左加右加之後，成本就會很高，所賣產品售價亦要很高，20元4粒燒賣就會被人當笑話，其實檔主可能仍然要蝕錢，但如果檔主與醬油公司合作，買4粒燒賣可以得到一支小號醬油，我相信冇人會話貴，而醬油公司又藉此推廣，形成一個雙贏局面，檔主賺利，醬油公司賺名，贏輸只是看定位。

　　其實不止酒繽紛，所有美食展覽、工展會等，都比夜繽紛搞得好，主要原因所有展覽的定位都是推廣而非零售，其實夜繽紛亦要以推廣作為目標，參加檔口食物飲品售價就算貴過市面，亦要送出一些特別贈品，務求幫襯的人覺得非常抵，即使如此，亦不能讓檔口攤主長期佔用攤位，要有一個期限，不應超過兩星期，不斷換檔口才可以吸引市民去完再去，否則就一次起，兩次止。

　　政府官員可以唔知道，一個做推廣的舖位價值遠比做零售為高，所以，如果政府能夠將夜繽紛成功轉型至推廣形式，就已經是贏了，千祈唔好再以廟街、女人街作為夜繽紛的藍圖，因為夜繽紛場地不具備廟街、女人街的條件，一個沒有人流場地，如果以零售作為定位，一定會失敗收場。