地產博客 > 資深會員專欄 返回
瀏覽人次:28445    回應:16
資深會員專欄

港燦式茶餐廳 你唔飛,我飛。

 

引刀一快

2019年3月24日

   近排香港仲喺度熱議緊呢個大填海,不過,填唔填唔到你俾意見,填得嚟,何守信汪明荃都死咗喇,真係有百二歲嚟等塊沙地起樓咩?

咁香港飛地又有冇可能呢?近排好似冇乜人講呢樣,就算講,都係打深圳主意,咁就真係唔使諗,深圳係一個狼性嘅社會,對比香港呢個溫室花園,唔吞咗你都祗係因為時機未到咋,地方咁矜貴又點可能俾一忽你?一忽仔都唔會益你。

上年年中,深圳搞咗個“深汕特別合作區”,將汕尾海豐嘅鵝阜、鮜門、赤石、小漠四個鎮食咗,跨過惠州飛地,與深圳市中心距離約100公里度,一通高鐵,唔使半粒鐘就到。


唔好睇見個“鎮”字,就以為好少嘢,總面積一共468.3平方公里,超過三分一個香港,而且係有優質淡水資源嘅區域。咁點解深圳唔直接蠶食惠州,而要飛地去汕尾呢?我相信係步驟問題啫,深圳真係深謀遠慮,非常有狼味,先跨過大亞灣巽寮灣惠東,去攞幾塊巨大山旮旯,係捨難取易,攞一塊本來唔屬於大灣區嘅地方,然後將佢歸入大灣區,一旦搞起咗,往來越來越頻繁,中間嘅地方就易攞得多,結果,沿海都唔知幾多百公里海岸線都係佢嘅。至於惠州,早就係買唔起深圳樓嘅人上車之選,香港就係缺咗咁樣嘅一個地方,唔使出關又通地鐵,人口流動自由。


果啲千零公頃嘅計劃,同人地飛地比,完全係蚊髀同牛髀,將來深圳要發展乜都好,要地有地要人有人,要水有水,要海有海,要海鮮有海鮮,仲唔使俾填海錢。唔使好似香港咁諗到冇得諗,填船灣淡水湖鏟高爾夫球場,損害咁深但又可以應付問題幾耐?再者,到底香港係咪應該一直被動應付,還是要主動創造條件去保持區域優勢?

深圳飛地,可以預見深圳發展嘅可能性會因此得到極大增強,而且絕對唔止量,仲有質,不單廣,還有深!當一個地方得到中國各地不同層次嘅年輕人大量湧入,而呢啲年輕人有合理嘅居住條件,有廣闊嘅空間去實踐計劃,活力點會唔發揮?


香港一直喺度食老本,其他嘅城市就不斷積極拓展,如果繼續懷住呢種自滿嘅心態故步自封,恐怕唔使到2047,香港就優勢盡失,仲有乜揸拿期望阿爺俾你續期。

不過,機會還在,珠海、佛山、惠州、中山,無論位置、人口、連港交通暫時都仲係有飛地可行性嘅四個城市,江門稍遠,廣州人太多,反正港珠澳大橋起咗,上巴士瞌一覺就到飛地,同以前入屯門差唔多啫。香港今日喺法治、平均個人質素、等等,依然有一定嘅優勢,唔好嘥咗佢,好好利用呢啲領先嘅基礎,借飛地配合,開拓新一啲嘅優勢,最起碼保持不落後吖。


最後,係咪應該講句,要珍惜香港呢?


 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 無奈 2019-03-25 07:34:03
沙發
2. 無奈 2019-03-25 07:34:09
沙發
3. 自我陶醉 2019-03-25 09:27:05
引刀兄

橫琴島有大型展覽館、創意園區、大量酒店、消閒及商業大廈建成任用、國際學校、港人港稅,60分鐘內經港珠澳大橋回港,10分鐘從口岸到氹仔碼頭有香港機場check in 櫃檯,全國十幾億勞動力任你請,所有設施年底陸續落成,橫琴口岸一地兩檢到澳門,週邊中山為工業提供大量土地及人力,深中通道落成後,30分鐘運到鹽田港出口,有資源,有動力,有規劃,將會是區內未來廿年工商消閒投資重點,飛唔飛地都唔重要,飛地不如飛資好過喇。

4. 引刀一快 2019-03-25 14:53:25
自我陶醉兄

橫琴係澳門嘅飛地,人地地頭,就算開間工廠,出品都只能係made in Macau,香港自己唔整返塊飛地,好執輸。
5. 自我陶醉 2019-03-25 16:37:38
引刀兄

橫琴管理及規劃都係由中國話事,基本上港人同澳人身份、權利都係對等,況且,對比澳門,香港有更多資金和人才,相信這方面港人有一定優勢。

6. 引刀一快 2019-03-26 06:30:21
自我陶醉兄

問題在此,如果塊地唔係行香港法律,由香港全權管治的話,效果會大打折扣,正如深圳呢塊飛地,將會納入深圳管理範圍,稅收歸深圳,以後有乜產品,都係mark深圳製造,香港個招牌仲係有價值嘅,應該趁早善用,將來慢慢俾大陸人逐漸追貼,香港就會寸步難行。
7. 你唔飛,我收 2019-03-26 08:07:11
樓主想飛地,要解決的問題多如牛毛,如有此魄力,不如直接收回現今的棕地,簡單得多。
8. 引刀一快 2019-03-26 16:17:28
To 7樓 你唔飛我收


問題當然多,不過只要阿爺一聲令下,萬事通行。最大問題,其實係到底有冇足夠嘅人重視香港前途。
棕地係辦法之一,不過全部都係得幾百公頃,攞嗮都只係可以緩解房屋需求,而飛地就可以俾機會香港有新展望新發展。
9. 無奈 2019-03-27 13:24:57
港珠澳大橋開通,不如飛地去台山,果邊還未開發,不過公路網相當唔錯。按刀兄想法,之後珠海中山均為港所有了。

此乃飛象過河新解也。
10. 引刀一快 2019-03-27 16:58:58
無奈兄

你漏咗澳門喎,哈哈哈

台山正呀,黃鱔、龍虱、桂花蟬、生蠔、沙蟲,不失為一個好地方,可惜太遠。

不過香港嘅政治地位又點可能同深圳比,飛得成地已經皇恩浩蕩,仲得一想二?
11. 刀粉 2019-04-03 03:01:33
不如把廣東省倂入香港,由香港管理,咁以後啲廣東BB可以吃到安全奶粉,打到安心疫苗,廣東女人子宮終於有救,因為有香港疫苗可以打。

而且以後學校只能講廣州話,粵語承傳問題得到解決。

廣州富豪來香港買樓也不須俾三成BSD,香港人買廣州樓也不被限購。爽😊


12. 引刀一快 2019-04-03 08:34:06
可以呀,叫彭定康返嚟開工,到時英國做埋中國殖民地㖭啵。😂😂
13. 打工仔 Andy 2019-04-09 23:00:20
刀兄

小弟近日忙到抽筋, 原來刀兄出了文,大灣區計劃香港只是陪跑, 得益是内地城市。
14. 引刀一快 2019-04-10 01:06:45
Andy兄

好耐冇見,忙對你嚟講係開心嘅,因為你係一個好積極正面嘅人。
大灣區對香港有冇好處,就取決於香港人是否爭取,香港人願意走出去,又點會冇好處呢。我呢個學渣,廿幾年前就係摒除一般人對大陸嘅偏見,肯走出去,今日好歹都有所收穫。
表面上,大灣區令內地城市受惠於香港,其實不盡然,有冇諗過,如果大灣區係9+1冇香港份,情況就會好尷尬,對香港有乜影響真係講唔埋。香港應該趁早規劃向內地進軍,利用內地條件發展自己實力,以優勢保持優勢,否則,好似依家咁自以為無與倫比,遲早俾人過頭。


15. 珍惜香港 2019-04-10 01:49:45
珍惜香港2019-04-10 01:49《大灣區起公屋》

引刀兄,我近排少上地產網,MISS 咗你呢篇文章。你既然提到「珍惜香港」,而你講嘅嘢,我又好 LIKE,咁我就响度寫返幾隻字啦!

都喺果句,香港,只喺一個城市,成個國家咁大,一個城市,又點會有土地問題

點解新加坡要大量填海,喺因為人地喺一個國家,唔填就真喺冇地。好多香港人,包括一眾磚家、學者,一啲政府官員,甚至喺特首級嘅領導人,唔知點解,都仲夠膽死攞香港同新加坡比,唔通佢地認為,香港,喺一個「國家」?

困獸鬥思維,同「港獨」思維,根本就喺同出一轍。呢班人,學阿爺話齋,真喺要深切反省!

倫敦,使唔使大量填海?紐約,又使唔使大量填海?乜香港,唔喺要同呢啲「城市」比咩?做乜去同一個「國家」比?

每日 150 個新移民,只喺代表 150 張身份證啫,唔知啲人搞乜咁睇唔順眼。今時今日,揸住張香港身份證,都唔一定要住响香港啦!

我唔喺反對填海,不過都喺果句,填海造地,應該以經濟發展為目標,而唔喺要將香港變成一個集中營。搞乜嘢七成公屋嘅話,就真喺唔填好過填啦!香港一啲擁有天時地利嘅產業,就好似互聯網數據中心咁,喺需要大量嘅土地,但如果三句唔埋就舉啲劏房小朋友出嚟,咁即喺乜都唔使搞。不如索性拆咗個禮賓府嚟起公屋,阿特首大大一個人使鬼霸咁大地方咩,求其响政府總部頂劏個房住咪得囉,仲方便返工添!

我喺妹仔嘅話,就梗喺同阿爺密斟,部署响大灣區起公屋,就算喺買地,都比起用香港嘅貴地化算啦!

依家距離 2047,仲有唔夠三十年,PLAN 得嚟都差唔多,仲可以成就中港融合呢個重要國策,可謂一舉兩得!
16. 引刀一快 2019-04-10 05:43:08
珍惜香港兄

歡迎歡迎,我諗大家最有共識嘅地方,就係都希望香港可以延續輝煌,愛護香港過去一切點滴。
的確,本來就係一國,按國家標準,買地應該可以有70年期,無論是否延續一國兩制,塊地上面嘅物業可以用到2090再傾續期,公屋、養老院之外,私樓工廠、醫院、學府、研究所、碼頭、運動場,乜都可以有。若果係租地,咁就一定要特例特辦,最大可能係划地或者撥地。