五、四、三、二、一 … 新年快樂！！ HAPPY NEW YEAR！！ 

各位，又一年啦！翻睇網站，原來距離上一篇，已經有成十個月。記得當時我話，至少到年中至會考慮再出文，結果呢，又係無了期咁拖。不過拖還拖，每年總有條死線，因為一到元旦日，踏正零時零分，我【珍惜香港】就會準時彈出嚟，率先為大家獻上新年祝願。 

過往三年，我將祝願寫上專欄：2021，我祝各位全年好運；2022，我願大家滿滿幸福；2023，我盼各位勿忘初心。三年過去，唔知道我對你地嘅祝願，有冇實現？ 

食自己

如果你嘅答案係 YES，咁我恭喜你！你既幸運，又幸福之餘，仲守得住初心，唔會因為世界嘅巨變、社會嘅巨變而變咗質，即係話，你係一個充滿正能量嘅人。不過就算冇實現呢，都唔使太灰心嘅，因為當今天下，充滿正能量嘅人，寥寥可數，冇你份，唔怪得你，但就千祈唔好走嚟怪我。點解？ 

好簡單，首先，我寫嘅係祝願，唔係預測，冇得話準唔準。再者，我講嘅幸運，係果，唔係因，要靠自己選擇、自己決定、自己把握；要得到幸福，就要自己先去付出，所以得來不易，要靠自己珍惜；至於初心，就更加唔在講，自己嘅修為，當然要自己堅守，唔通靠我幫你守？ 

車！咪即係食自己！YES！就係食自己。近年我見好多人，尤其係啲投資者，都幾大怨氣，個股市係咁跌，成交額創五年新低，究竟啲資金去咗邊？國家隊去咗邊？我總覺得，大家似乎唔係需要人地嚟救市，你地需要嘅，係一條大水魚。呢個世界，係冇一個國家或者地區嘅政府，會為咗救市去同你瞓身。記得當年亞洲金融風暴，如果港府冇足夠信心擊退炒家，又點會大大手掃港股？要知道，輸咗，會好大鑊，果鋪真係唔講得笑。風雨過後，港府將手頭上嘅股票打包，成就咗今日嘅盈富基金。當年盈富上市，規模四十三億美元，唔單止係果陣亞洲除日本以外，歷來最大型嘅 IPO，仲為香港嘅 ETF 市場，開創咗先河添。 

投資者嘅角色

所以話，做得投資者嘅，就要有自知之明。多年前我寫過一篇《市場嘅角色》，後來呢篇嘢，仲上埋債券通。當時我話，做生意也好，投資也好，最重要係清楚自己，响市場裡面，擔當乜嘢角色。回顧歷史，有邊單大鑊嘢，係由政府埋單？政府唔埋，邊個埋？投資者囉！全球最有能力幫人埋單嘅國家，從來都唔會埋單，只有你同佢埋單。唔好扮失憶，雷曼果劑嘢，你地當中，有冇人中過招？FINE，遠嘅唔講，講近啲，舊年三月，美國矽谷銀行、簽名銀行，相繼倒閉，耶倫一堆廢話，講到尾，咪即係唔想救。不過呢單嘢，我唔多講，費事又俾人老屈成紅粉，話我下下針對老美。我想講嘅，係佢呢個浪，好衰唔衰，捲咗去北大西洋對岸果件瑞士度。瑞信年報一出，股價即插兩成四，央行出哂口術話會救喎，轉個頭呢，咪又係 CALL 佢粒瑞銀埋單。不過人地邊有咁好死，瑞信總值 170 億美元嘅 AT1 債券，連換股都嫌費事，直送狗頭鍘侍候！開鍘 ... 鍘！吓？瑞士，一級信譽品牌，AT1，一級資本債喎！連人稱垃圾債嘅內房，都冇咁狼死。唉，呢鋪真係渣都冇，又唔知邊班投資者中招。 

投資秘笈第一條：有錢齊齊賺，埋單請過主！ 

 

我唔係講笑，世上有邊位投資者，冇幫人埋過單？食得鹹魚抵得渴，最成功嘅投資者，就係賺錢最多，埋單最少。就睇美國政府，每年淨係俾債息，都超過一萬億美元，你估最後邊個埋單？所以一星期前，老友【歷史長河】提到，我話美債可能會終極一爆呢個預期，只不過係簡單嘅宏觀 PROJECTION，至於概率大過武統台灣，係因為有朋友夾硬要我比較啫，唔使太認真。美債幾時爆呢家嘢，係充滿變數，大家唔好咁腦定，因為美國係唔會等到自己冇得揀果陣，先嚟做呢個決定。仲有，邊個話美債爆，一定會好似你地諗果種一次性？人地可以玩局部，玩針對，求其揾個借口，鍘你一大筆，順便大幅減債，又傷唔到自己，你咬佢？就睇 AT1 事件，170 億美元變廢紙，對瑞士、瑞銀，有幾大影響？咪只得一個負面展望咁大把！ 

所以話，如果你仲以為，金融，就等於股市，咁你就真係未見過世面，炒炒賣賣，你輸我贏，算乜投資？算乜金融？作為一名債券投資者，我全盛時期，槓桿去到盡，持貨高度集中，但從來冇忘記過自己嘅角色。早响 2015 年，我就留意到，有啲內房企發債，係為咗爭持土地，而唔係投放資源响土地嘅發展度。直到 2018 年，我已經意識到，內企新債蓋舊債，開始違反我地借錢俾人發展，而唔係攞嚟燒呢個大原則。之後，我地手起刀落，全軍撤退，結果避過咗一劫，跟著幾年都冇再玩債。唔好問我玩乜，如果我話係股票，仲有錢賺，你地信唔信？ 

投資者，從來都係食自己，冇得怨天尤人。最失敗嘅投資者，唔係輸錢，而係輸咗錢，就怨政府無能，怨國家唔肯瞓身救市。就睇內房，一個恆大，負債 2.43 萬億人仔，借咁多錢，又交唔到樓，啲錢究竟去咗邊？歌舞團、足球隊、皇宮屋？定係果一千部電動車？另一邊廂，碧桂園，負債 1.43 萬億人仔，啲錢又去咗邊？前年交咗近 70 萬套房，到舊年年頭，都仲有成 107 萬套未交，各位，係 107 萬套房，唔係 107 萬隻毛公仔！截至上年六月底，內房總負債，高達 53 萬億人仔，同時間美國國債總額，啱啱就突破咗 32 萬億美元，即係話，中國內房總負債，幾乎係成個美國嘅四份之一，人地就可以無限印錢啫，你當自己乜水？叫阿爺救到個市大幅反彈，等你地班投資者返家鄉鬆人？叫國家大幅宰割啲民脂民膏，或者搞到破產，去幫果班花天酒地嘅內房企埋單？現實啲啦！投資者埋單，從來都係不明文嘅國際共識，你唔係今日先至知嘛？ 

微觀束縛、宏觀盲點

所以我睇嘢，係非常客觀，唔好再老屈我紅粉，去掩飾自己嘅偏私。前年年中，內地爆爛尾樓停貸風暴，之後央行以保交樓為目標，推出「救市 16 條」，年底人行又出招，放水兩千億保交樓。你班房企想要錢咩？用嚟交樓就得，其他嘢唔該食自己，出蠱惑嘅就拉人封艇。如果唔係咁，碧桂園又點會咁神心，砸鍋賣鐵去撲水，減薪兼大削開支？所以有評論話，內地救市唔夠力，難阻經濟下滑，唔使你講都知。阿爺救市，係救市民，唔係救市場，房企食自己，投資者埋單，結果股市跌、債市跌。你可以話，中央只係要社會穩定，想保住自己嘅政權啫！我想問，就算係，咁又點？主席有幾愛民，我唔知，但愛民，都要講條件，唔通好似偉大嘅孫中山咁，唔愛權力，結果搞到連愛民嘅條件都冇埋？中國維穩，歐美維票，體制唔同，原理一樣，我用同一標準睇世界，你呢？又有幾重標準？ 

不過講真，無論你點做，廣大嘅中國人民，都未必會感謝你。艱難時期，怨氣沖天，唔鬧政府，唔通鬧自己？世界各地都係咁，自己果碗飯，總係唔夠隔離香。就睇抗疫，有邊個國家或者地區嘅人民，會話自己嘅政府，做得好過人地？尤其係中國內地，互聯網發達，資訊爆棚，一蝸蜂文化、標籤文化，絕對唔比我地香港遜色。話說今日嘅國家總理李強，輿論中嘅一個污點，就係佢响上海封城果兩個幾月，做咗市民嘅出氣筒。我睇嘢，好簡單，整整三年疫情，上海衰極都只係果兩個幾月。我唔認識李強，亦冇必要撐佢，但我唔會因為十個上海朋友裡面，有八個鬧佢，就隨便去否定一個人，亦唔會因為網上一蝸蜂話某樣嘢係事實，就認定係事實。不如我打個比喻，假若你十個香港朋友裡面，有八個話 831 死咗人，你又信唔信？ 

呢個世界，係充滿假象，同無數謬誤。世人對世事嘅所見所聞，加上自身遭遇，往往就形成咗一道微觀束縛，對宏觀世界產生盲點，以致失去方向，或者走錯方向，嚴重嘅話，甚至會進化成所謂「獨角腦殘」。至於乜嘢係獨角腦殘，我唔重複解釋，未聽過嘅，就自己 CLICK 去睇。我話過，鑒於時空有限，我嘅文章，只會寫啲為世人所忽略嘅重要人事，即係所謂宏觀嘅盲點。通過展示出，响背後推動緊呢個世界嘅，宏觀因素，同因果關係，為大家掃除盲點。其中一項，我取名為「現在嘅基礎因素」，即係當下唔會隨便受市場變化影響嘅長期因素。 

香港樓市，有得救

宏觀因素，看似高深，但其實只不過係有如，人望高處，水向低流，啲咁簡單嘅道理。不過原來，你話人望高處，水向低流，都仲會有人唔明。最麻煩嘅，就係狂追問你，憑乜嘢咁講？有乜嘢證據？有乜嘢數據？我真係唔識得點答。無他嘅，微觀嘢，始終係太貼身、太真實，束縛之緊，盲點之深，牢不可破。所以我終於明白，點解不時會有人話我寫啲嘢，好深，或者好玄。記得多年前，我响網站談論樓市，話今時唔同往日，唔好再用埋哂啲舊思維去諗嘢。當時有位署名【自我陶醉】嘅網友，寸我提出嘅所謂新常態，話係樓價將會好堅，但係堅得嚟又會跌，跌得嚟又堅，總之就係堅，唔可以再用舊思維分析啦！跟住另一位【西門吹雪】，就話我講嘢好難明，睇唔明所以冇得回應喎。 

我話香港樓市堅固，但冇話過樓價冇得跌，呢兩句，看似矛盾，但其實好合理。港樓長期供不應求，呢個「現在嘅基礎因素」，多年來都冇變過。一個長期供不應求嘅市場，當然堅固，但唔代表個價唔會跌，因為樓價只係反映當下市場嘅信心同購買力，响我嘅字典裡面，屬微觀因素。就睇最近香港嘅樓價，已經從兩年半前嘅歷史高位，下跌咗超過兩成，但住宅租金指數，就創四年新高。呢個正正就引證咗港樓供不應求，但樓價下跌呢個矛盾現象。至於內房又點？坊間評論，好多時候會將香港樓市，同內地樓市比較，甚至係掛勾。但其實，兩者嘅基礎性質唔同，內地樓市嘅問題，係供過於求，係冇得救，或者換句話講，只能夠用政策穩住，然後慢慢回復。所以，救市民，唔救市場，又或者先救市民，後救市場，你維唔維穩，呢個都係 ONLY SOLUTION。 

但香港嘅情況唔同，港樓長期供不應求，所以香港樓市，有得救。 

既然港樓長期供不應求呢個宏觀基礎因素不變，樓價下跌只係基於信心同購買力兩項微觀因素，香港樓市，當然有得救。不過我好疑惑，港府究竟係唔識得救，定係唔想救，定係認為冇必要救。兩個幾月前，阿超响佢份施政報告裡面，宣佈咗一啲到喉唔到肺嘅減辣措施，果然，減辣兩個月，樓市全無起色，仲創下七年新低添。不過最抵死嘅，係响十一月頭，阿茂果段風涼話，佢話，俾市場冷靜一下，係好事嚟，至於負資產囉喎，死唔去嘅，準時供樓，銀行又點會 CALL 你！聽完之後，我真係呆咗，阿茂你究竟知唔知，樓價每跌 1%，會有幾多中小企俾人 CALL？ 

救市唔係街市買菜

作為手握香港命脈，兩位最高級嘅政府官員，阿超阿茂呢對夢幻組合，可謂一絕。香港政府，可以無所作為，但就絕對唔可以冇危機感。記得我响年半前，阿超啱啱上任特首果陳，寫咗《初心（特首篇）》，當時我已經好精準咁指出，香港將會面對嘅問題：政府再陷財赤邊緣，加上中美步入長期矛盾，俄烏開戰、環球經濟嚴峻、金融動盪，阿超究竟有冇聽書？我期望佢能夠好似當年【老曾】咁，帶領香港，再一次谷底抽身。話說金融海嘯果年，銀行出現擠提，港府辟謠後，跟手就將存款保障，提升至無上限，掃除咗因為信心危機，引發連鎖反應嘅風險。但如果當時港府只係出半招，係咁易提升少少到五十萬，你估後果會點？ 

出招，從來都係要狠，邊有話出半招？廿年前，港府為救樓市，拋出舉世聞名嘅孫九招，九招一出，連幾乎化成骨灰嘅樓市，都要彈返起身。後世將樓價高企，歸咎於孫九招，我想問，落重藥去救一個垂死嘅病人，唔通仲要斟酌埋隻藥有乜副作用？人都要賣蛋啦，仲講乜副作用？如今樓市基礎堅固，樓價仲未跌到觸發連鎖經濟效應嘅臨界點，唔好話我知你冇辦法，除非你冇心。如果你問我，有乜嘢辦法，我唔係專家，不過以下五招，就一招都唔少得。 

。辣招全撤，SSD 年期縮至一年
。高調剎停明日大嶼，集中資源發展大西北
。永久放棄發展高球場，已收土地發還球會
。大幅放寬住宅樓按壓測
。响聯繫匯率框架外，為住宅樓按放低息水 

呢五招，係最基本，救市唔係街市買菜，邊有價講。如果唔係為咗繼續封鎖炒臨約嘅行為，就連 SSD 都可以撤埋，至於第二、三招，就係救市兼撥亂反正。我唔係睇死你香港政府，但你真係冇能力同資源，同時搞掂明日大嶼加大西北，倒不如集中火力搞好一邊，順便收一收個供應預期，刺激下個市。再者，全球債市供過於求，金融環境勢必長期動盪，加上政府財力大不如前，明日大嶼又涉及大量融資及不確定性風險，早就應該要剎停。至於高球場，本身擁有無可替代嘅歷史價值，以及具地標性嘅國際化商業及體育交流價值，一開始就唔應該擺佢上枱。 

至於最後兩招，就係要釋放購買力，具體點做，你揾啲專家諗掂佢，唔好問我。我已經講過好多次，香港自身嘅經濟結構，係冇條件加息。加息，完全係為咗保住聯繫匯率，一個即將過時嘅貨幣政策，代價就係犧牲香港嘅經濟民生。早响 2017 年頭，中美矛盾始現雛形果陣，我就提出咗一個「痴人說夢」建議，改革聯匯，以港幣暫時充當國際貨幣嘅角色，三年後，我話呢個痴人說夢，已經變成燃眉之急。香港政府，就算唔改革聯匯，都應該為將來關乎聯匯嘅變數同風險做準備，就算唔做準備，都應該為聯匯帶嚟對經濟民生嘅負面影響，制定一系列化解措施，而唔係乜叉都唔去做。 

完全冇危機感

上星期老友【歷史長河】果篇文章，寫得真係冇錯，呢對夢幻組合，自我感覺良好，完全冇危機感。話說港府 2023-24 年度上半年，累計財赤達 2,243 億，仲好意思講乜嘢 1,777 億，你估香港係美國，借咗等於賺咗？財政儲備呢，截至上年九月底，得返六千幾億，就以半年當一年推算，即係三年後，香港可以埋單。吓？咁仲派乜嘢消費券？唔好話你冇早知，就連我呢隻蟻民，早响阿超上任特首果刻，就已經知道港府正陷財赤邊緣，阿茂你究竟有冇聽書？十個月前，我話唔讚成政府再派消費券，因為當消費券成為慣性，就已經失去咗提振經濟嘅作用，再派都只係燒錢。 

不過阿茂派得嘅，就梗係要攞，點解？各位大小業主，翻睇一下上季果張差餉單，你就知我講乜。記得當年，一聽到林鄭搞乜嘢「理財新哲學」，我就知道好大鑊，尤其係經常性開支，易加難減，佢就偏偏要針對呢件嚟加。半個月前，財政預算案展開公眾諮詢，阿茂透露，响林鄭任期之內，每年嘅政府開支，由 4,700 多億，暴增四成至 6,600 多億，每年洗多果兩千億，減唔減得返先？上年度，你揾馬會開刀，明明係自己理財不力揾人埋單，仲要係威係勢，叫人地諗掂佢；來年度，你又會揾邊個開刀？中小企？業主？定係中產？會唔會又叫佢地諗掂佢？ 

話說上月初，穆迪將港府嘅信用評級展望，降至負面，即時惹起輿論熱議。我唔意外，一個地區嘅財政實力同理財能力，係信用評級嘅最首要參考因素，港府單係呢方面，就已經夠哂負面。不過奇怪嘅係，穆迪反而認為港府財雄勢大，理財有道，仲大讚果隻就嚟過時嘅聯匯制度，可靠兼穩定添。吓？既然香港咁堅，有乜負面？哦！原來又係國安法、選舉制度呢抽嘢，搞到香港各方面冇哂自由喎！仲有，你同自己果道強大後盾，即係你嘅國家呢，走得太埋啦！YOU HAVE CHOSEN THE WRONG SIDE！你地應該同國家劃清界線，甚至脫勾，咁就夠哂正面啦！ 

最初，我都仲係一頭霧水，但見到一大班香港傻仔，竟然真係將個矛頭，指哂向人地想佢地指果處度，咁我就終於明白哂！原來再早一個月前，穆迪將美國嘅評級展望，下調至負面，但個負面理據，就好正常。人地真係針對美國財政實力同赤字嘅情況，作為展望嘅首要參考因素。不過美國政府，就當然唔係好高興啦，穆迪好大都係一間美國公司，你唔做返啲功課，唔使旨意有運行。今次見你地班香港人，個個係咁怨國安法，遷怒自己嘅國家，拜登話：穆迪，GOOD JOB！我既往不咎！ 

所以有時候，都唔可以完全怪哂政府嘅，我地香港人自己，又幾有危機感？一見到人地，反其道而行，就要認清形勢，唔好人地叫你踩，就一蝸蜂走去踩。人地想你忽略，唔想你著意嘅，甚至大讚你果啲，政府嘅財力，聯匯制度，呢兩味，先至係最大鑊！ 

國際投資中國中心

不過話分兩頭，穆迪始終係間有頭有面嘅國際評級機構，香港人俾佢老點，情有可原。但原來，連內地網民嘅爛 GAG，都可以搞到你滿城風雨。話說舊年八、九月間，內地嘅社交平台，開始出現將香港眨成「國際金融中心遺址」嘅講法，呢個講法，甚至仲上埋維基百科添。經過幾個月發酵，港府高官，以及一眾名人，紛紛回應。許局長話，遺址講法站唔住腳，香港機遇大於挑戰；富衛主席馬時亨，就直頭話係廢話。不過我最欣賞嘅，就係金管局總裁余偉文，佢話，得啖笑，可謂一針見血。 

我都話，如果你以為，金融，就等於股市，咁你就真係未見過世面。回應者之中，係得余總講得出重點，金融，係包括貨幣同資本市場，而股市只不過係後者嘅一個部份，只不過呢部份，大家都見得到，仲日日係咁盯住添。其他更大甚至更重要嘅部份，例如銀行體系、貨幣市場、債券市場等，同香港實體經濟嘅關係，其實仲比股市密切。如果响你眼中，只係得股市嘅話，咁香港由始至終，根本就唔係乜嘢國際金融中心。中資股嘅市值同成交額，已經佔咗港股八成，餘下嘅主要都係港企，外國公司只佔港股極小部份，咁即係話，香港只不過係一個「國際投資中國中心」啫！ 

其實，世界各地嘅公開金融市場，都係國際資金投資當地嘅市場，只有美國，先至係真正嘅國際金融中心，點解？因為美元，係國際貨幣囉！所以，能夠動搖香港國際金融中心呢個地位嘅，就只有上海同深圳，別無其他。除非中國金融全面開放，又或者同世界脫勾，否則香港都係國際投資中國嘅惟一樞紐，係 MONOPOLY。呢個就係支撐住我地，作為國際金融中心地位嘅「現在嘅基礎因素」，只要呢個因素不變，香港嘅地位，穩如磐石，分別只不過係個 SIZE 有幾大、有幾細嘅問題。 

香港已經算係咁

所以早前彭博社報導，印度股市排名直迫香港，甚至將會超越香港，只係大勢所趨，唔係香港自己做得唔夠好。過往中國經濟發展過快，快到連個世界都配合唔到，甚至出現咗抗體，依家已經進入調整期，而印度就啱啱進入高速發展階段，啲國際資金，就梗係走哂去人地果邊。講真，印度要大搞金融，驚果個唔係香港，而係新加坡！仲有，如果你只係因為一個股市嘅排名，就認定印度經濟，迫近香港，甚至好過香港，咁我都係果句，你真係未見過世面。 

我地評論一個地方嘅經濟好壞，往往會引用一啲宏觀數據，果啲數據，個名就叫宏觀，但其實好微觀。例如通漲，唔代表經濟一定好，通縮，亦唔代表經濟一定差，要睇埋推動通漲或者通縮背後，一系列宏觀因素，從而了解大局嘅現狀同趨勢，先至可以評定。尤其係股市，根本就反映唔到當地嘅經濟，恆指兩萬點，今日就叫高啫，他日由四萬點急跌至兩萬，就係叫股災。700 股價六百幾果陣，騰訊賺大錢，最近跌破三百，騰訊又係賺大錢，呢間巨企，跟本就冇衰過，只係賺好多，定係賺好好多嘅分別。美股屢創新高，但紐約，就通街都係流浪漢；港股再試新低，但港人差極都仲有劏房住。 

最近香港，失業率創三年新低，十月份港人北上消費，再創單月新高，啱啱呢個聖誕節，三日就有百三萬人次離境，我想問，香港嘅經濟，有幾差？因為個股市？因為個樓價？各位仲記唔記得廿年前，香港係乜境？真係差嘅話，大家就龜縮哂响屋企，一分錢都唔願洗；真係差嘅話，「勞工界」就會走出嚟，要求取消最低工資。環觀全球各地，香港嘅經濟民生，已經算係咁，只不過呢期旺打公仔，而中小企就有啲艱難，但又未至於撈唔掂，大企乘機削減成本，至於啲大地產商，就梗係揸住你香港政府條頸，等執平地啦！ 

真正嘅危機

咦？咁即係香港好掂，唔使驚啦！非也！真正嘅危機，邊有咁易俾你見到。香港人好學唔學，走去學埋人地果啲，一蝸蜂文化、標籤文化，聽到啲乜嘢遺址、排名，就走出嚟開哂 PARTY。講真，咁易俾你睇得穿嘅，又點會係堅？歷史已經證明，危機從來都係冇預警，就算有，都係國家機密，做乜要話你知。所以點解穆迪，要反其道而行，因為人地美國，都有國家安全法架！ 

唔知道大家仲記唔記得，响 2020 年元旦日，我話中西大戰，係我地嘅地球，注定要面對嘅命運，仲拋出咗 CHOOSE YOUR SIDE 呢個錦囊添。一個月後，我發表《核彈篇》，除咗對 CHOOSE YOUR SIDE 作出解說之外，仲提出「金融核彈」呢個預言。不過後來，我發覺有部份人，原來由始至終，都冇明白過我講緊啲乜。我既唔係財演，亦唔係磚家，我著眼嘅，係宏觀因素，同因果關係。認識我嘅朋友都知道，我從來唔預測股市、債市、樓市，而我嘅文章內容，亦唔會有呢啲預測。所以如果你以為，我講 CHOOSE YOUR SIDE，即係話港股升、美股跌、內房債升、美債跌、或者叫你買港股、沽美股、買內房債、沽美債，咁你唔單止係大錯特錯，仲錯到離哂大譜！ 

所謂 CHOOSE YOUR SIDE，只不過係作為一個中國人或者華裔身份嘅「風險」考慮，同你愛唔愛國冇關，亦同你投資乜嘢會賺錢，乜嘢會蝕錢無關。我 SIT 响香港呢個國際金融中心裡面，一樣可以投資世界各地，使乜將自己嘅資金調離香港，又或者將自己嘅資產、生意，放响啲唔知幾時會俾人封殺嘅地方？上月中，美國眾議院通過國防授權法，中港澳成為「海外敵對勢力」，唔單止係香港官員，甚至連港商都可以被查封，正正就應驗咗我响《核彈篇》裡面所講，就連同美國做生意，都會變成極高風險。咦？唔知道美國果班 FRIENDS，又會唔會跟？ 

多年來，我對中西文化，以及意識形態之間嘅矛盾，以致發展到，中西大戰，影響成個地球，呢個宏觀趨勢嘅預言，基本上已經逐步應驗，家陣就只差一個「金融核彈」。當日我話，個掣，係响人地果度。穆迪當然唔敢話你知，你政府嘅財力，同聯匯制度，有幾大鑊。唔通叫佢同你講，美國已經將隻手，擺定响個掣隔離，就等你幾時乾塘，到時機成熟，就一手拍落個掣度？呢個係重大國家機密，响美國，洩露國家機密呢條罪，仲大過你香港國安法！ 

金融核彈、債券疑雲

不過我見阿茂，都唔知幾腦定，上年度佢決定再派消費劵，講到庫房問題果陣，佢話，NO PROBLEM，發債囉！隔離債務佔 GDP 比例超過 130% 都冇事啦！我諗阿茂已經唔記得咗，卓慧思係點樣落台，日不落國都搞成咁，你香港乜水？就算隔離債務佔 GDP 比例，超過 300%，人地都唔會有事，係你香港先至有事，點解？因為半個地球對面果隻金融核彈，唔係對住你隔離囉！ 

今日，港府庫房水頭充足，你發埋啲銀債、綠債，都只係買下花戴，順便俾啲市民收下息，不易樂乎。但將來你發債，係為咗要開飯果陣呢，個世界，就會唔同哂。到時候，你會發美元債，定係港元債？你想發美元債，向外資借錢，但人地個核彈頭指住你，點算？咁港元債呢？國際市場受唔受先？所以點解我响 2018 年頭嘅《緣結．天璣》一文裡面，特別提到，要優化港元資產，將港元債券嘅國際地位，提升至國家級別，咁就算搞唔成個「痴人說夢」，都可以為聯匯拆彈。我寫每一篇文章，都係非常認真，你以為我得閒無事做，吹下水？ 

不過唔緊要，仲有香港市民嘛，果啲顏色債，反應唔錯吖！無他嘅，市民踴躍認購，係因為穩陣又有息收。但家陣你等錢洗喎，你估啲評級機構，會雪中送炭，定係落井下石？到時候，債價跌一半，唔知市民會有乜嘢反應？其實都唔使等到果陣，你再公佈多一、兩次財赤，啲評級機構就會開始做你。吓？左唔得，右唔得，咁點先至得？仲有最後一招嘅，CALL 阿爺幫拖囉！啱哂，人地半個地球對面果件，正係等緊你出呢招，跟手就拍埋落第二個掣度，一石二鳥，CHECKMATE！ 

宏觀因果、連鎖效應

乜講到好似捉棋咁？大國角力，本來就係一盤大棋。你估特首、財爺，咁易做？金融風暴、沙士、金融海嘯、佔中、黑暴、新冠，回歸以嚟，有邊位特首，未中過大鑊嘢？點解你會例外？前車可鑑，若心存僥倖，完全冇危機感，就真係賣咗蛋都仲未知乜事。你搞夜繽紛、廟街，上哂電視，粉飾太平，但呢抽嘢，做你庫房件甜品都未夠班。依家中小企經營困難，真係有心幫幫忙嘅，就應該趁呢期旺打工仔，撥亂反正，拆走哂前前朝果堆民粹消極施政，例如取消限奶令，還原強積金對沖等。不過，同民粹對著幹，從來都係唔討好，呢個醜人，你願唔願意做先？ 

講返正題，香港依家面對嘅結構性危機，只有一個，就係金融核彈，別無其他。而香港能夠抵擋金融核彈嘅護盾，亦只得一個，就係庫房，別無其他。多年以嚟，港府嘅財力，都係靠地產食糊，正正因為咁，香港先至可以維持低稅率，呢個最重要嘅競爭力因素，但從唔知邊屆開始，港府就總係要同地產對著幹。呢個世界，只有房地產最暢旺嘅地方，先至係經濟最暢旺嘅地方。內房就算冇得救，阿爺都係一招接一招，見招拆招。邊有一處國家或地區，係都要搞到個房地產一潭死水至安樂？有，香港囉！官商，從來都係要勾結，民粹，唔通可以當飯食？你咁好骨氣，有乜嘢 ALTERNATIVES 先？連做甜品都未夠班嘅，就無謂講啦，你果「八大中心」，只得一個係 MONOPOLY，仲係現成嘅添，至於其他果幾件，唔係面對緊國內外激烈競爭，就係十劃都未有一點，你想靠邊件食糊？ 

我地觀察宏觀，最重要嘅，就係當中嘅因果關係，要救香港，就要鎖定最關鍵嘅因，即係個 START 掣。宏觀，係好 MASSIVE，就算國家領導人、美國總統，都係冇能力扭轉宏觀大勢，只可以順勢而行。人地盤大棋，正係因為睇穿咗宏觀因果嘅連鎖效應，順勢就 KO 你，既然人地可以，點解我地唔得？好多香港人，見到依家個境，都以為樓價跌，係因為股市跌：股市跌，所以經濟差，所以樓價跌。呢種邏輯，有個名堂，叫因果錯配，因為股市同本土經濟，其實冇直接關係，就算有，股市都只會係果，而唔係因。多年前我已經指出過，樓市，就係香港經濟實體，最後防線嘅一度指標，要注意，我係講樓市，而唔係樓價。 

香港個 START 掣，就係响個樓市度。所以點解今日，我文章裡面，花咗兩大節去講香港樓市。其實所謂救市，只不過係將樓市嘅堅固，反映返哂响個樓價度，就係咁簡單。我提出果五招，係要回復樓市交易嘅流動性，以及增強市場信心，同釋放購買力。具體上，港府應該 CALL 埋啲專家，甚至係各大地產商，一齊拆掂佢，唔好成日怕俾人鬧官商勾結，反正無論你點做，都一樣會俾人鬧，咁點解唔去盡啲？只要响一季之內，樓價回升一成，呢個 START 掣，就會觸動一串宏觀因果鏈，到時候你就會知道，個連鎖效應有幾震撼。我唔係講笑，就連半個地球對面果隻手都會震埋，點解？因為佢知道，當你修好個護盾之後，下一步，就係拆金融核彈。到時候，人地惟有變陣，而下一個角力，就正式開始。 

行星組曲。木星篇

BY THE WAY，今日呢篇祝願，恐怕已經打破哂以往新年祝願最長嘅紀錄。我寫嘢，從來唔會敷衍大家，為各位，解除束縛、掃除盲點，我已經使出混身解數。但如果，你總係用有色眼鏡，去睇我文章嘅話，你只會一次又一次，證明你對我嘅偏見係正確，但就永遠收唔到我俾你嘅真實訊息。記得我响 2018 年一篇回應裡面話，當一隻井底蛙，認定自己睇到果一小部份，就係天空嘅全部，咁就算佢最終跳出咗口井，亦只會用佢認定果一小部份，去演繹整個天空，希望大家引以為鑑。 

今日，我為各位準備咗一份新年禮物，就係由英國作曲家 Gustav Theodore Holst，响 1914 到 1917 年之間創作，名為《The Planets 行星》嘅管弦樂組曲，當中第四章《Jupiter, the Bringer of Jollity 木星，歡樂使者》中段，兩分鐘嘅部份，配以 NASA 一系列木星嘅實照，供大家觀賞。 

木星，屬太陽系裡面，排行第五，體積最大嘅行星。英文名 Jupiter，拉丁文 Iuppiter（朱比特），係古羅馬神話裡面嘅眾神之王，即係對應古希臘神話嘅 Zeus（宙斯）。佢嘅質量為太陽嘅千分之一，但已經係其餘七大行星加埋嘅兩倍半，體積又係我地地球嘅千三倍，可以話係八大行星中嘅巨無霸。由於高速自轉，木星表面大氣層形成咗色彩繽紛嘅雲帶、湍流同風暴，當中著名嘅 Great Red Spot（大紅斑），係至少已經存在咗幾百年嘅巨型反氣旋風暴，單係呢個風暴，就已經大到裝得起成個地球。 

話說木星嘅強大引力，清理咗太陽系裡面 95% 以上嘅大小隕石同彗星，所以呢顆巨無霸，被譽為太陽系嘅清道夫，大大降低咗地球被撞擊嘅機會。1992 年，彗星 Shoemaker-Levy 9，簡稱 SL9，運行到離木星四萬公里果陣，就俾佢強大嘅引力，扯成廿一塊直徑五公里左右嘅碎片。到 1994 年，呢串碎片以時速廿一萬公里，撞向木星嘅南半球，而威力最大果次撞擊，就等同六兆噸 TNT 炸藥，即係全球核武器儲備總和嘅 750 倍。 

風調雨順

宏觀之下，莫講話一個城市，就算一個國家，甚至成個世界，都係好渺小，我地今時今日嘅存在，只係宏觀世界一系列因嘅果。我諗過祝願世界和平，但好快就放棄咗呢個咁天真嘅念頭。和平，本來就唔現實，正如宇宙，係危機四伏，世界，亦充滿風風雨雨。與其指望無風無雨，倒不如盼望風雨，來得合時。所以我將 2024 年嘅祝願主題，定為《風調雨順》。 

响呢個元旦日，夜闌人靜嘅零時零分，我送大家一首《行星組曲。木星篇》。 

祝各位，身體健康，心想事成；祝香港，風調雨順；祝祖國，國泰民安！ 

行星組曲。木星篇（點擊播放）