苹果加价至每份8元之后，不知有冇影响销路呢？朋友M嘅爸爸系基层退休公务员，好识知悭识俭嘅，退休后家中只买一份报纸，就系苹果，加价至8蚊之后，M爸爸唔高兴，转番睇近期有曝光率嘅「成报」，其实M爸睇咗「成报」几十年，至「成报」易手，韩中旋老总退休后，佢先至转睇苹果嘅啫。据朋友M讲，M爸爸睇咗一个星期「成报」，不声不响转而每日买超级拥梁报，拥梁报新闻故事多，几唔错，但M爸爸与几位昔日政府同事一致话顶唔顺拥梁报之拥梁言论，唔高兴，又转买知识分子报，三日后，朋友M发觉爸爸突然肯多花十毫子，每日买番苹果噃。朋友M於是问爸爸：「点解咁破费呀？」爸爸叹一口气：「知识分子报有啲高深，甚么静态焦点新闻太多，唔啱我。」
加一蚊价，其实好少啫，应该影响不大，毕竟苹果长期读者转睇其他日报嘅话，一定会发觉口味不同。左丁山每日睇12、13份报纸，清楚了解香港言论逐渐归边，苹果成为某方眼中钉，除之而后快，故此出现大量政治性抽广告、实行杯葛，形式与泰国总理他信当权时代，他信政府对待唔听指挥棒嘅报纸，实施广告杯葛一样；现在嘅军政府就索性「幕后训斥」，要报纸识做。
连美国民选总统都出呢一招。候任总统特朗普先后叫晒美国各大主流传媒嘅总编辑、主播到Trump Tower
训话，指佢地在选举之前讲大话，抹黑佢，点名当面批评CNN总裁容许记者做「假新闻」，此乃美国近数十年未见之候任总统「强势表现」，擦惯鞋嘅霍士新闻台主播节目主持人Hannity更落井下石，乘机踩多CNN几脚，呼吁特朗普入主白宫后驱逐CNN记者，不准CNN采访，如此痛駡同行，几令人侧目。特朗普先拒绝纽约时报到Trump Tower参加「训话」，继而亲自到纽约时报与编辑部见面，跟住与老板闭门会议，究竟讲啲乜，纽时守口如瓶。以后美国新闻界是否真系会听话，归边，跟住特朗普指挥棒走？佢正式上任后就会更清楚，但特朗普决意约束美国传媒之心，无可怀疑，如果美国新闻自由失守，影响深远，俄罗斯与中国政府会掩住嘴偷笑。今天世界奇事怪事多，一位白人亿万富豪第二代，凭自由立场环境赚大钱，但竟然得到大量白人无产阶级工人支持，当选为总统后，未上任就伸出干预之手，阻止Carrier（开利）将部份工序搬至墨西哥，唔通在美国都会出现一个独裁者？
App下载
