记者小G因公事到一个泰国楼盘展销会参观，拿走一袋楼盘资料俾左丁山睇，小G话：「你成日去泰国，有无兴趣买番一个单位呀，呢啲新楼盘资料或者啱你用！」新楼盘位於Sukhumvit（当地人译作素坤逸），虽说位於热门区域，但素坤逸路好长好长，有百几条Soi（横街），条大路嘅交通极不畅顺，塞车系家常便饭，好彩沿路早有BTS（高架铁路）可以疏导吓，但如果住在横街，离开BTS车站远嘅话，出入都几烦。睇售楼书图片就梗系正斗啦，但我地香港公司卖楼啲图片，咪又系「法国海港风情」，同实景相差好远嘅。
前星期泰国A夫妇回港与两女儿及女婿见面，左丁山请佢地一家食饭，A太太就讲起泰国楼，叫我地如果要
买，最好买有落成单位（现楼）可睇嘅，买楼花就要好小心。A太太系泰国人，朱拉隆功大学毕业，系一位醒目女士，结婚时与泰国A在曼谷近郊买一间屋，入伙后就向发展商追讨赔偿一段时间（因部份货不对办），卒之几乎要闹上法庭，大业主先至肯和解了事。住在曼谷近郊系贪屋价便宜好多，负担得起，但返工就惨咯，泰国A经常清晨六点已经要开车去曼谷，晚上回家要等到八点几车龙渐散之后，夫妇每日疲乏不堪。现在有BTS，市区沿綫住宅梗系吊高嚟卖啦。
A太话曼谷有啲新楼嘅厨房与厕所系冇窗嘅，香港人一定唔习惯，买楼前最好先行实地视察，买现货楼就唔会走眼。近曼谷马场，离四面佛只有百零步嘅一个新楼盘就十分方便嘞，A太太推荐俾左丁山，但价钱梗系唔会便宜啦！到外国买楼，究竟有何目标，不出（一）移民，（二）做渡假屋，（三）出租当投资用途。如果上述三个功能都唔啱听，买嚟做乜？
向一位投资移民顾问请教，佢话现时拜太多中国豪客移民所赐，移民热门国家如美加澳纽英，比较困难，每一个国家都提高咗投资移民门槛，譬如英国，投资要高达二百万英镑，加拿大严限移民入境比率，已降低至百分之二至三嘅机会，美国最便宜，投资移民只需50万美元，但特朗普新政府一定敌视移民，预料移民美国会有新困难。去东南亚又点呀？顾问大笑：「益我地公司代理卖楼，不少人话移民马泰系得个讲字嘅啫，最多系讲讲吓就在吉隆坡、槟城、曼谷买咗楼，我地公司代客买楼移民，一条龙服务，几好生意㗎。早期不移民，现在先至搞，寸步难行，买番层海外楼以备急需嘞。」
App下载
