高息定存，不放貸，銀行是否囤積居奇

　　有老友問我囤積居奇定義，是否只是適用於商品或者必需品，不適用於金融，我認為以高價買入後不賣，就是囤積居奇，適用於任何商品，必需品，甚至是金融，老友唔同意，從未聽過銀行囤積居奇，我只不過是語不驚人死不休而已。

　　銀行的確很少會出現囤積居奇，很少並不是代表不會，現在有錢去做定存，冇5%都有4%，通脹率不足3%，令到不少人寧願不買樓，不消費，將現金攞去做定存，畢竟高息定存，低通脹率並不是經常會發生，銀行以高息搶定存，只是生意上需要，絕對合情合理，但如果搶到定存之後唔放貸，就有可能是囤積居奇，不過，有人話只是我一廂情願想法，銀行是不會不放貸。

　　不少買了樓的人知道，現在搵銀行借錢超艱難，即使買樓人士所要求的貸款合符金管局的準則，銀行仍然表示不願意放貸，甚至有一些連門面功夫都唔做，申請書都唔接，那些人最後唯有搵非本港銀行甚至財仔幫手，除了利息較高之外，貸款年期亦較短，甚至只得幾個月至一年，以短期貸款買物業，是會令到業主提心吊膽，不少打算買樓的人亦知道這個情況，寧願唔買物業，將準備好資金做定期，講都唔信，當那些將資金攞去做定期的時候，所受到的待遇與問銀行借錢時剛剛相反，不但招呼妥當，而且定存利息甚高，銀行做法令人摸不着頭腦。

　　其實如果只有幾間銀行高息搶定存，不放貸是沒有問題，但現在差不多全部香港銀行都唔借錢俾人買樓，同時又用高息搶定存，難免令人懷疑在銀行之間有冇合謀定價，如果有某種默契，大家一齊唔放貸，令到借錢買樓的人自願多付利息，咁樣情況更加嚴重，不但囤積居奇，甚至屬於卡塔爾式壟斷，所以，銀行盡快回復正常貸款就唔會惹人話柄。

　　有人話，銀行並不是不放貸，而是以前放得太多，可能不符合巴素爾3的規定，現在唯有以高息吸納多些定存，同時減少放貸，直至符合巴3要求，就會回復正常，如果這個是事實，就是最好理由，否則銀行以高息搶定存，又唔放貸，難免令人懷疑銀行囤積居奇兼卡塔爾式壟斷。