地產博客 > 資深會員專欄 返回
瀏覽人次:39643    回應:36
資深會員專欄
初心
 
珍惜香港
法團專業投資者
SMIEEE.MSc(ICDE)
http://facebook.com/hongkongtruevalue/
2020年11月9日
※珍惜香港※.2020-11-09 10:00【初心】
前言(地產博客)

自《緣結.天璣》之後,發生咗好多事情,香港經歷巨變,世界亦發生咗巨變。年幾前,我離開【地產博客】,轉咗去【頭條網】發文。最近返嚟睇睇,原來呢個【資深會員專欄】,都有成大半年冇人出過文,回想過往果段日子,緣來緣去,都真喺幾唏噓。 

或者以前同呢度嘅朋友、網友,互動太多,對網站產生咗感情,個人亦開始變得執著。轉咗去頭條網之後,盡量避免同果邊嘅網友或其他博客直接交流,相比以前,心境的確平靜好多。其實對博客而言,專欄只喺一個平台,鍾意就寫,唔鍾意就唔寫,而網主作為主場,亦隨時可以刪除佢認為唔恰當嘅文章,或封鎖一啲帳戶。但無論如何,大家都喺對等,可謂互不相欠。正如以往,都有經營多年具規模嘅博客網站,話關就關,呢個世界,本來就冇嘢喺永恆,何必咁執著? 

前言(頭條網)

話說上月中,突然發覺自己登入唔到頭條網,網誌文章又全部唔見哂,原來網站封鎖咗一大批包括我在內嘅舊帳戶,我兩次發電郵要求解封,都得唔到回應。記得由【地產博客】轉移到頭條網出文,都已經有一年多,呢度亦成為咗我主要嘅網誌平台。我寫文章,一般都好長,有啲要花幾日甚至成個禮拜至完成,每篇都喺心血。雖然响 Blogger 有備份,但我其他平台都會連結到呢度,而相關嘅文章連結就自然全部失效。我等咗個幾禮拜,都未見有喜色,睇怕真喺要放棄,正想開個新帳戶,寫返篇告別網站,同各位博客道別,就此作罷。雖然呢一年裡面,同你地冇乜交流,但都叫做有緣,我呢份人,唔鍾意冇頭冇尾 

臨開筆之前,我再發電郵俾管理員,諗住碰埋呢次運氣啦,點知我嘅帳戶跟手就解封咗,網誌文章亦全部回復,真喺要多謝管理員,終於肯俾我返生!今次失而復得,可謂百感交集,不過想深一層,其實對博客而言,專欄只喺一個平台,鍾意就寫,唔鍾意就唔寫,而管理員亦隨時可以刪除佢認為唔恰當嘅文章,或封鎖一啲帳戶。但無論如何,大家都喺對等,可謂互不相欠。正如以往,都有經營多年具規模嘅博客網站,話關就關,呢個世界,本來就冇嘢喺永恆,何必咁執著? 

 Andre Vltchek 1963-2020

就好似 Andre Vltchek 呢位戰地記者,今年 9 月 22 日,即喺約個半月前,突然過咗身。我响《中國民族精神》一文裡面,都引用過佢嘅言論,估唔到事隔半年,話走就走。記得佢曾經向香港嘅年輕人,發出過一封公開信,仲想約佢地對話添,最後,當然喺冇人睬佢。 
 
 

Andre 一生走遍全球戰亂同貧窮之地,响今年五月初,一個訪問裡面,佢總結咗自己嘅所見所聞。當中就世界嘅發展,佢講出咗一個重要結論:中國嘅體制,就喺人性惟一希望,如果中國崩潰,整個世界就會崩潰。呢個結論,正好回答咗我响《中國民族精神》文章裡面,最後提出嘅果條問題:我地人類嘅文明之路,應該點樣去走呢? 

意識形態嘅初心

回望人類近代史,好多人禍,都喺源於對信仰或意識形態嘅執著。人類追求烏托邦嘅「初心」,針對死後嘅,就形成宗教信仰,針對現世嘅,就演化成意識形態。雖然呢顆初心,本質都喺善良同正義,但就往往同基礎人性及自然定律相違背。响追求或體現意識形態嘅過程中,無法擺脫自然定律,基礎人性浮現,初心被埋沒,最後釀成災難。 

就睇共產主義,初心非常崇高,人人共存、人人共產,資源平均分配,大家唔使競爭,唔使憂柴憂米,就可以一心一意貢獻社會。但可惜呢個初心,假設咗世界上每一個人,都有好似聖人咁嘅修為,無私嘅奉獻,根本就唔現實。大自然嘅定律,物競天擇,適者生存,冇咗競爭,人類就失去上游同進化嘅動力。最後,基礎人性嘅黑暗面陸續浮現,自私、妒忌、仇恨,一場文化大革命,幾乎摧毀咗中國人幾千年嘅文化。如果唔喺鄧小平搞改革開放,摒棄共產主義,中國十幾億人嘅命運,就真喺不堪設想。 

西方世界又點?率先擺脫帝制同獨裁統治嘅捆綁,人民自由得到解放,無界限嘅思想自由引發出創意,再加上順應大自然定律嘅資本主義制度,經濟、科技得以急促發展,從而領先世界。西方社會將自己奉行果套意識形態,歸納成四個價值,自由、民主、人權、法治,稱之為普世價值。西方普世價值嘅初心,亦喺非常崇高,目標為締造一個自由、平等、開放嘅烏托邦。但可惜,响四個價值裡面,頭三個都喺講權利,完全冇提義務、責任之類嘅人性素質,只單靠第四個,即喺法治去制衡,不過法治呢,原來又喺由民主制定。咁即喺話,同共產主義一樣,西方普世價值嘅初心,都喺假設咗世界上每一個人,都有好似聖人咁嘅修為,無私、自律、具責任心、尊重異己、有同理心,但當然,又喺唔現實。結果,個人自由轉化成自私,權利轉化成褔利,小數服從多數嘅民主制度,變成人多蝦人少,造就出歧視、標籤、撕裂、鬥爭。呢啲基礎人性嘅黑暗面,主導咗整個社會,最後將初心完全淹沒。 

世上奉行西方普世價值嘅地區,最終都發展成五十比五十嘅撕裂同內鬥,無一倖免。人民虛耗大量資源响政治爭鬥中,政府、政客為保住或爭取執政權,亦消耗大量資源取悅人民。民主制度發展成熟嘅國家,普遍都喺入不敷支,債台高築,但由於佢地走得較前,所以有條件通過科技、經濟甚至軍事手段,掠奪其他發展中國家嘅血汗同資源,去為自己嘅虛耗埋單。而為咗令到掠奪合理化,西方社會將自己打造成公義嘅烏托邦,通過滲透、宣傳、外交、甚至軍事行動,將佢地果四個價值,植入對方嘅社會,觸發撕裂同內鬥,令佢地將自己嘅苦難,歸咎於異見陣營或當地政府,西方社會成為拯救佢地嘅英雄,掠奪就變成甘心情願嘅奉獻。 

任何意識形態,都喺嚟自一顆初心,無論個願景有幾漂亮、理念有幾完美、目標有幾崇高,如果初心根本就已經違背咗基礎人性,同自然定律嘅話,最終都一定喺悲劇收場。Andre 見證世上無數災難同悲劇,最後認定中國嘅體制,就喺人性惟一希望,原因好簡單,因為我地嘅祖國,只不過喺遵循著基礎人性,同自然定律,以穩定社會,改善人民生活為初心,唔搞乜嘢烏托邦,亦唔講乜嘢夢想,總之,腳踏實地做好自己,唔須要同啲乜嘢普世交代。 

潘媽媽嘅初心

寫咗一大堆前言,終於入正題,講到「初心」,當然唔少得潘媽媽。話說個幾月前,潘媽通過錄音,質問林鄭:妳嘅初心去咗邊?事緣約一年前,兇手出獄,表示願意去台灣自首,但事隔近一年,音訊全無,於是潘媽通過傳媒,向對方施壓。但對方嘅代表牧師,同政府嘅回應,似乎令潘媽覺得佢地想敷衍了事,於是多次通過傳媒再繼續施壓。不過潘媽嘅堅持,就惹起咗坊間嘅抨擊,主要喺嚟自所謂藍營人士。隨著事態發展,呢啲負評,越演越過份,包括標籤人地做黃絲,甚至連帶帽帶超帶口罩唔用真面目見人呢啲雞毛蒜皮嘢,都要攞嚟批評。記得 2019 年 2 月中,潘媽同民建聯見記者果陣,都喺同一副 LOOK,唔知究竟喺潘媽變咗質,定喺班所謂藍絲變咗質? 

我諗大家應該知道,潘媽失去女兒果陣,都仲未有修例事件。我地唔可以期望,一個已經心碎嘅人,對之後發生嘅一切社會事件、政治事件,會有同我地一樣嘅感覺,甚至可以話,佢唔會有任何感覺。講真,果一堆大龍鳳,又關佢乜事?佢點解要關心?一個殺死自己女兒嘅人,可以連審都唔使審,完全當冇事發生,仲要受警方保護,如果咁都可以接受嘅,又點對得住個死者?呢個唔喺法理問題,喺人性問題。潘媽唔喺要兇手填命,或者一定要佢接受乜嘢形式嘅懲罰,只喺要對方以一個殺人犯嘅身份,面對審判,為自己嘅行為負責,對死者有個最基本嘅交代,呢個就喺潘媽嘅初心。 

我見網上好多自命藍營人士,對潘媽惡意批評,簡直不堪入目。佢地大惑不解,潘媽理應對兇手恨之入骨,點解仲肯同對方求情?於是就認定人地收咗台灣人錢。無他嘅,被仇恨充昏頭腦嘅香港民心,又點會理解呢份情操?原來今時今日,只得已經心碎嘅人,先至可以免疫於仇恨嘅洗禮,香港人,真喺好可悲。你地有乜證據,話人地收台灣人錢去迫香港政府做嘢?因為佢封公開信,提到乜嘢「趴趴走」?定喺果 150 萬台幣補償金?講真,就算封公開信,真喺由一個台灣人代筆,又如何?所謂補償金,喺台方主動提出,人地冇要求過,亦冇話過會收,但就算肯收,咁又點?呢啲只喺環境因素,唔足以代表潘媽有乜嘢企圖,憑呢啲東東就屈人地幫台灣做嘢,咁你地同 721、831、新屋嶺果班老屈警方嘅「獨角腦殘」,又有何分別? 

正因為潘媽放下仇恨,願意為兇手求情,先至令對方再次落實自首,邊個話,法理以外,冇嘢可以做?問題喺你有冇心。所以潘媽質疑港府、質疑林鄭,唔喺冇道理。你地偶像屈穎妍,都有就呢單嘢批評港府,點解當事人就唔可以批評?仲好怪人地唔鬧黑暴,鬧黑暴有 Q 用?黑暴會幫佢迫兇手自首咩?潘媽喺受害人,唔喺社評人!更離譜嘅喺,竟然有人攞佢同另一位母親比,果位母親喺邊位,唔好意思,不值一提。坦白講,潘媽嚟自一個標準家庭,至少都盡咗做母親嘅責任,將女兒養育成人,當中付出咗幾多母愛。如果因為你嘅政治立場,令你覺得潘媽好礙眼,就隨便搵件冇盡過養育責任,個女出問題自己仲走咗去旅行嘅未婚媽媽出嚟吹捧,皆因後者响政治觀感上,比較啱你口味嘅話,咁就恕我直言,你唔單止侮辱咗潘媽,仲侮辱埋你自己! 

藍色初心

有位藍營 KOL,對潘媽嘅指控,充滿陰謀論同假設性,極盡老屈之能事,仲有另一位,內容更加不堪入耳,渲染、挑釁、尖酸刻薄、斷章取義,唔知真喺以為睇緊毒果啲報導添。呢兩段片,我唔用紫色連結,費事响度污染我嘅文章,我都唔建議你地 CLICK 入去,真喺會睇壞腦。最近楊兄同一班 KOL,都出咗段片講潘媽事件,應該算喺藍營之中,少有較規矩嘅評論。但可惜,只有楊兄一個肯為潘媽講句公道說話,佢叫大家原諒潘媽,又叫大家唔好鬧潘媽。不過我想補充兩點,第一,潘媽冇做錯事,唔好講乜原諒,佢亦冇必要同市民交代;第二,話佢對兇手恨之入骨,呢個講法唔正確,佢今日之所以咁堅持,唔喺為咗報仇,只喺要還女兒一個公道 

所以我反而覺得,與其叫潘媽放低,大家倒不如檢討一下自己,家陣究竟喺邊個放唔低?修訂逃犯條例,已經喺過去式,唔好再成日攞出嚟做擋箭牌,話如果當日通過咗就可以點點點,冇得修例就無能為力。講真,就算真喺俾你修到例,台灣一樣可以唔收人,唔信?睇下依家送埋上門自首都唔肯收,你咬佢?成功修例,唔代表一天光晒,冇得修例,亦唔等於世界末日,唔等於乜叉都做唔到,美國有條《海外反腐敗法》,你响外地犯罪,一樣照拉,一樣照審,何志平就喺咁樣中招。真喺冇辨法?定喺冇心?修訂逃犯條例,同台灣殺人案,本來就喺兩件分開嘅事情,你地睇潘媽唔順眼,喺因為你地自己唔肯放低,總要將呢兩件事死攬埋一齊,何必呢?坦白講,唔喺建制派對潘媽用完即棄,人地使鬼搞到要孤身作戰,受盡各方凌辱?潘媽嘅堅持,理應得到尊重同支持,幫唔到手嘅,就唔該出少句聲。你地將自己對黃營、黑暴、港獨、台獨嘅仇恨,遷怒於一個無辜嘅受害者身上,有云,仇恨一個人,就會變成對方。你地自己睇返果一大堆網評,當中有羞辱潘媽,甚至羞辱死者,話人地點點唔規矩之類,講真,你地又有幾規矩? 

我想問各位,當你標籤自己成一隻顏色果陣,你嘅初心喺乜?我淨喺知道,香港人,只有一個初心,叫「獅子山精神」,唔喺乜嘢顏色鬥爭。我見好多受歡迎嘅 KOL,滿口黃藍,對任何人事都總要先標籤一隻顏色,作為立論嘅前設。可能大家已經唔記得咗,抗爭、標籤、仇恨、歧視、撕裂,喺由你地口中嘅黃絲製造出嚟。如果你嘅初心,唔喺要令香港人覺醒,放下顏色鬥爭,重拾返獅子山精神,而只不過喺基於你對敵對陣營嘅仇恨,甚至於不擇手段,不惜以其人之道反制對方,咁無論你話自己喺乜嘢顏色,响我眼中,你都喺一隻黃絲。 

初心與人性

初心,可以大至宇宙,小至微塵。中國體制嘅初心,喺合乎人性。潘媽嘅初心,都喺合乎人性。有啲人可能會好唔滿意,潘媽有乜資格同國家相提並論?我當然冇咁嘅意思,不過我想反問大家,點解我地唔可以用尊重同體諒一個國家嘅胸襟,去尊重同體諒一個人?中國秉承合乎人性嘅初心,發展到今時今日,但有啲國家,就因為唔同嘅意識形態,聯合起嚟,欺凌、排斥我地嘅祖國,但與此同時,當見到有人堅守住自己嘅初心,爭取還一個人性嘅公道,而又冇傷害到其他人,難道我地又可以因為政治觀感上唔順眼,就去欺凌、排斥人地? 

中國民族發展咗幾千年,本應科技發達,早就上咗太空,但我地中國人嘅文明,自古以來都喺偏重內在嘅人性修為,多於外在嘅物質探求,中國文化嘅初心,在於哲學,而唔喺科技。依家香港地,想搵個唔講粗口嘅都幾難,高學歷嘅,通街都喺,但有修養嘅,又有幾多?我想問各位自命愛國愛港嘅人士,究竟知唔知道,乜嘢喺愛國?慶祝一下國慶,歌頌一下祖國嘅成就,擦下中央政府鞋,就叫愛國?古語有云,修身、齊家、治國、平天下,真正嘅愛國,首先就喺要做好自己,秉承中國文化嘅初心,成為一個有人格、有修養嘅人,如果連呢一點都做唔到,講乜愛國? 

潘媽事件,應該差唔多告一段落,一個普通市民,可以做嘅其實好有限,而社會嘅焦點,亦好快會轉到其他議題。不過希望大家記住,我地每一個人嘅每分言行,都會烙印成自己人格同修養嘅一部份,經群體效應放大之後,就會成就香港人嘅整體文化,決定呢個城市嘅命運,請各位自重! 

後語

今日呢篇文章,會响頭條網嘅【BlogCity】,以及地產博客嘅【資深會員專欄】同步發表,從此以後,我都會响呢兩個平台同時出文。隨著緣來緣去,往事煙消雲散,都喺果句,專欄只喺一個平台,感情喺應該投入去文章度。我寫嘢,從來都喺睇 MOOD,曾經有朋友問我,點解唔寫短啲、寫密啲?近期發生咗咁多大事,理論上應該有唔少題材,但我反而冇乜 MOOD。因為眼疾等問題,我寫嘢嘅時空好有限,坊間多人認同或熱烈討論嘅事物,多我一筆唔多,少我一筆唔少,唔值得我浪費時空去寫。 

就好似美國大選,呢排成為全球焦點,但我都只喺當戲咁睇,剥下花生,其實唔太關心。有朋友開局猜邊個勝出,我都冇興趣參加,五五波嘅大選,輸贏都只不過喺運氣。呢場根本就唔喺特佬與拜登之爭,而喺人民與人民之間,五十比五十嘅撕裂同內鬥,所謂民主大國,都喺不外如是。至於中美關係,呢幾年已經寫咗好多,我亦曾多次警告各位,又叫過你地 CHOOSE YOUR SIDE,唔肯聽嘅,再講都冇意思。今次拜登勝出,唔好以為一天都光晒,民主黨又好,共和黨又好,美國人都喺唔妥我地中國人,分別只喺出招有幾快,有幾狠,同去得幾盡。再者,凡事有兩面,既然拜登相對溫和,即喺唔見得會好似特佬咁得罪自己啲盟友,西方聯盟就可以更團結對付中國。總之,中國要响各方面,尤其喺科技領域上,盡快擺脫對美國嘅依賴,至於香港,就要盡快擺脫對美元嘅依賴 

都差唔多要收筆啦,下次唔知幾時有 MOOD 再寫。通常引發我出文意欲嘅,都喺為世人所忽略,但我就認為喺非常重要嘅人或事。每當我寫文章嘅時候,都總會重複問自己,寫咁多嘢,究竟為乜?相信呢條問題嘅答案,就喺我出文嘅初心。 

天變地變,初心不變!

心境 .....(點擊播放》》》》》



* 註:按 藍色連結 開啟或跳至相關之參考資訊;
    按 紫紅連結 跳至文章上方播放相關影片。


 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 盡快擺脫對美元嘅依賴。 2020-11-09 10:29:20
擺脫左啦。
2. 平常、常平 2020-11-09 11:22:13
古語有云:「人棄常、則妖興」,「平常心是道,道是心常平」。
3. CD ROM 2020-11-09 18:20:45
久違珍兄既鴻文~~~

順便浮面同網友們問句好!!!
4. Joe 2020-11-09 20:08:55
原來世界怎麼變 珍兄初心不損
潮流混亂也不亂 大家始終勸勉👍🏻👍🏻😊😊
5. 封筆 2020-11-09 21:13:23
有口齒的人才有資格講初心。
6. 歷史長河 2020-11-13 20:57:17
珍兄在談初心,也有網友在談論食狗肉。這讓我想起一篇微小說「初心」。分享下,祝大家週末愉快!



初 心


鄰居老王養的狗死了,老王悲傷不已,他不想土葬,他說想給牠火葬,把骨灰撒回大海,讓牠回到母親的懷抱。

誰知道那玩意兒越烤越香,後來他就去買了兩瓶啤酒……

很多事情,走著走著,就忘了初心。


7. 歷史長河 2020-11-13 21:20:43
4樓係老朋友 Joe 兄,定係拜登兄?
8. 八十後小蟲 2020-11-13 21:45:30
小蟲記得珍惜兄公開講過要封筆bye bye喎,但之後多次出爾反爾咩玩法?當地產網讀者係儍㗎?

誠信已完全破產,即使再長篇大論也無用
9. 八十後 2020-11-13 22:15:53
珍兄 別來無恙?過去一年香港經歷風風雨雨,大家也好嗎?

長河兄 很久不見閣下 風趣幽默嘅足跡!
10. 引刁一快 2020-11-13 22:49:45
長河兄久違了,風采依然,秋意濃,天漸涼,祝君安康 😄
11. 引刀一快 2020-11-14 00:53:27
長河san

久違,身體可安好?

病死狗、車死狗,食得當然唔好嘥,冇所謂初心唔初心,初心係不殺,死屍一條,考慮衛生同法律就夠。
12. Joe 2020-11-14 00:56:54
回河兄: 拜兄上來拜讀鴻文都唔出奇嘅,不過小弟依然係珍兄和河兄嘅忠粉,特此前來拜會...😅😅
13. 向泛民说不 2020-11-14 12:47:50
又系一只黄人扮中立垃圾,台湾本身对香港就有落地签证啦,点解唔比一个未定罪的陈同佳去台湾啊。责任系台湾啊,黄人,

还有林郑有咩责任啊,黄人,香港没有逃犯条例,陈同佳在香港已经完成了他的法律程序,他是一个自由人,林郑可以点送他去台湾受审,如果林郑可以这样做,林郑也可以将肥佬黎和河童送去大陆受审啊,黄人日日叫法治,什么叫法治,我真系唔明。
14. 向泛民说不 2020-11-14 12:58:11
珍惜香港对建制派,对政府,非常仇恨。但是他却要用所谓的初心来显示他的客观。

珍惜香港,除下的有色眼镜,带住有色眼镜,睇唔到所有的光谱。

无错有逃犯条例,如果台湾一样有可能唔接收,香港政府也是无奈,但是这是台湾人的责任。但是最低限度香港政府可以有法律途径去处理这单刑事案。现在没有逃犯条例,香港政府没有任何手段去处理这单野,甚至香港政府也不可能主动去叫陈同佳去台湾投案,香港政府点可以叫一个系香港没有犯罪的人去台湾啊,香港的所谓法治精神不是无罪假设吗?你告诉我啦,珍惜香港,香港政府试图叫一个无罪的人去台湾受审,基本上犯了黄人讲的人权精神。为了一个刑事罪,为了抹黑政府,建制派,黄人连人权也可以放弃吗?
15. 向泛民说不 2020-11-14 13:08:17
Joe,点解黄人甘讨厌,甘低能,香港的位置根本就应该低调,中立,不要去挑战大陆,也不要得罪美帝。这才符合香港人的利益。啊爷比香港一国两制,系要香港人可以享受两种制度的好处,但是香港人却将两制解释为可以独立。有无甘on 车啊。

黄人却要香港倒向美帝,夺取政权,真系发梦啊,用下脑啦,黄人知唔知道乜叫地缘政治啊,墨西哥怎么会无奈的叫离上帝太远,离美帝太近啊,美洲其他国家点解无得发展工业啊,尼迫尔,不丹等印度周围小国比印度点玩啊、对香港来讲,大陆就是一个超级大国,黄人的选择等于推香港人去死啊。明唔明啊。
16. Joe 2020-11-14 17:50:57
阿飯兄,我都睇咗你咁多年,點會唔明呀😅
17. 一点冷知识 2020-11-14 23:14:59
“香港的位置根本就应该低调,中立,不要去挑战大陆,也不要得罪美帝。”

主要係中美斗法,美帝自己唔敢单挑大陆,就怂恿亚太班靓,例如日本,澳洲,艰难大,印度去行先死先。其实美帝自己曾经也不是懦夫,50年代韩战,和60年代的越战,美帝都身先士卒,同大陆死过。但结果都系.....,空留遗憾。后来学精佐,转花式,玩和平演变,89年,曾经一度觉得有希望,点知又.......。到特普上场,搞新冷战,搞封锁制裁,其实係和平演变的相反版。声势好劲,又怂恿台湾英文菜,以及香港班饭桶民,同大陆对决。香港黄友,即刻上曬头,决定落踏,肥黎仲话如果成功,特无普可以办好多个落贝奖俾佢。于是冲锋陷阵,借住陈同学个引渡條例,搞到铜湾尖咀,汽油弹乱飞,最后......,成功为港人争取到国安法,今次唔慌唔發。

点知,真係唏嘘的感慨一年年........。一觉瞓醒,“特总统”已经变成“前总统”。

听闻依家特前总统要尝试特赦自己。自己特赦自己?咁都得?可能得架,美帝真係可能得。但香港未必得勒,止可以找黄官帮手轻判。班黄人可能有排烦。最惨肥黎仲去搞人家候任拜登个仔。搞完又话唔关佢事。我就信唔关佢事,但唔知拜登信唔信勒。

睇来都系澳门,醒家波,Nippon,越南,马拉,非宾,哥rea,够低调,够定力。肥蓬周围游说,都唔肯落踏上特普條船。五眼嘅艰难大,同袋鼠国就比较尴尬。但毕竟人家堂堂区域大国,就算得罪大陆,都仲有筹码,容易掹翻。

香港班黄人,先係投机,跟住,已经洗湿佐个头,最终,人在江湖,身不由己。 

何出此言?

89年64开始,黄人前身民主派,买重注落北京老赵个边,点知赢嘅係老邓个派,之后嘅江胡习,都系呢一派。89年后,本来大把机会转翻老邓那边。但又畀“定康彭”勾引上床,仲搞大埋个肚,自此孕育佐港独呢个孽种。到今日,同大陆已经冇回旋余地,因为领土完整,大陆不容触碰。而且北京有足够筹码在手,唔怕同你玩。

黄人学人玩政治,但本身筹码唔够,于是揽炒香港全社会,以为越多人企自己个边就越安全,好一厢情愿姐。你想揽住人,人家未必愿意俾你揽住。于是搞到要暴力灭声,黒暴装修。香港不宁。学人投机,但见势色唔对,又唔识搵位走翻去赢家个边。睇下人家英文菜,之前撑衡特普,依家已经發贺电俾拜登,当然拜登点安排英文菜係另一回事。如果拜登小器,要惩罚英文,咁就唔洗唏嘘。衰要认,打要企定。荣华富贵可以俾得你,就可以收得翻走。

讲翻香港班黄人,政治上好幼稚。净识冲,唔识妥协,当然最容易俾人利用。日本就老狐狸。去年台湾朝野,瞓身撑香港黄人,韩国就保持官方冷静,民间传媒就撑衡黄营。反而日本的传媒报道,竟然明显偏蓝。点解?自己唔思考,唔动脑,学咩人玩政治。唔通架仔嘅政治智慧咁低,连黄人都不如。

最后,玩还玩。唔好揽炒香港其他人。政治斗争就係赌博,赌输佐,请一人做事一身当。正如肥黎把口都话一切野,唔关佢两个仔嘅事,同理。

我曾经係呢到地产版呼吁年轻人远离政治,唔需要投靠任何势力,清茶淡菜,已经好过人家锦衣玉食。理得佢老邓定老赵,特普定拜登,关人隐士。食下花生唔落场,不睹就是赢。

若真係想落场玩,就唔该有翻少少脑,係时候妥协,就要果断妥协。係政治斗争面前,唔好扮纯情,不要用所谓“良知”做挡箭牌,唔好自己呃自己,你係赌,你係投机,你们冇所谓“良知”,可能顾面子的江湖义气,倒係有少少,但那不是“良知”。

话时话,“良知”呢个两个字,源自明朝著名儒学家王阳明所极力宣扬的阳明心学,与宋朝朱熹,合称宋明理学,属于哲学范畴,都几深下。阳明引禅入儒,所以心学注重内修,并不好斗。同泛民推销的西方民主思想制度,完全冇关系。当年的独裁者蒋介石倒曾经极力推崇阳明心学,不过今日英文菜的民主台湾,已经不是蒋某人的独裁台湾。口讲西方民主,不真正了解西方。口讲“良知”,却不知如何“致良知”,不晓“知行合一”为何物。香港黄人,张冠李戴,点方便点来,则纯粹是政治投机了。


18. 向泛民说不 2020-11-15 12:53:19
17 楼,香港最可悲的就是选民基础有60%基本上是仇恨大陆,拒绝和大陆妥协,而这些人的逻辑思维就是这位珍惜香港。本人不怀疑珍惜香港爱香港,但是就是他们将香港带向失败。
10年时候左右,泛民和中央谈了区议会进入立法会的安排,本来对泛民是利好,但是却被珍惜香港这类选民文宣洗脑成出卖香港,从此温和泛民失去支持,结果导致极端派崛起。从此泛民不敢和中央沟通,所以越来越极端。

但是政治现实是香港需要和大陆沟通和妥协,为什么这些号称高智商,学历高的香港人竟然会去仇恨中国。
还有当初泛民反对逃犯条的时候,其中最核心就是担心林郑会受不到中央压力,将香港人送去大陆受审,但是今日为什么珍惜香港这类香港人竟然会叫林郑去送一个无罪的香港人去台湾受审。此例一开,林郑一样可以送香港人返大陆受审,而且是在没有法律基础下送去外地受审,我就想问珍惜香港,当初你们泛民为什么反对逃犯条例,为什么你们今日又会支持这样的无法无天。
19. 珍惜香港 2020-11-24 11:02:07
珍惜香港2020-11-24 11:02《心境》

很高興見到一些熟識的名子,除了 Joe 兄,應該是舊網友,新網名,可以的話,給些提示吧?

各位風采依然,至於對文章內容的一些評論,我不回應了,因為《初心》或有後續。不過要聲明一點,這並非承諾,免得又給說成是什麼口齒誠信之類。總之,有 MOOD 就寫,無 MOOD 作罷。

另外,有朋友問我《心境》的來頭,其實這是一齣陸劇的背景配樂。

傳聞中的陳芊芊:心境
20. 給些提示吧? 2020-11-24 11:07:09
你好, 禾叫欲來, 隨心所欲的欲, 隨心所欲的來的來。
21. 打工仔 Andy 2020-11-24 13:24:48
珍兄
好耐無見!
22. 打工仔 Andy 2020-11-24 13:25:27
引刀兄你好!
23. 八十後小蟲 2020-11-24 13:34:06
珍惜兄  

乜你想用語言偽術來抵賴宣佈封筆件事呀?唔該你翻查下當時自己篇文點講,小蟲記得有不少網友挽留同送別你喎,唔通大家誤會曬你咩

你的文章小蟲以前都有睇,但你做為前輩咁厚面皮反囗覆舌,真系令人咋舌。

24. 向泛民说不 2020-11-25 12:01:07
珍惜香港,果然就是典型的黄香港人,不过估计他觉得自己非常中立,非常可观。

东南亚主导的RCEP,啊爷决定加入了,其实阿也都知道会有咩问题,原因就系大陆的血汗工厂会搬去越南等东南亚地方,也就是对低学历的就业机会会减小,所以美帝恐吓越南唔好做大陆的中转站。

其实这也是973/94年之后香港的问题,当时香港的血汗工厂搬去了大陆,但是香港却因为饭民配合美帝反对香港搞高科技,所以没有工业升级。工业完全消失,对于大陆来讲,问题都系一样,不过10年前,每年进入就业市场大概有3000万人,主要是低学历,所以当时需要血汗工厂,但是今日每年进入就业市场的大概是1500万,有一半是大学生,所以现在大陆要搞的是高科技产业,对于中央来说,大学生的就业将会是最大的挑战。

珍惜,香港要点先可以转型?大陆就搞高科技。
25. 珍惜香港 2020-11-25 20:08:06
珍惜香港2020-11-25 20:08《香港的出路》TO:13/F、14/F、15/F、18/F、24/F 向泛民说不 

我見閣下寫了那麼多,就姑且回應一下。你是多年以來,我熟識的那位說不兄吧?那麼你應該看過我不少文章,大概知道我的立場。你這幾段回應的內容,我大部份認同,而對於香港的角色,我們之間亦沒有矛盾。但如果因為我批評政府、批評建制、批評藍營,你就把我標籤成「黃人」,那麼戴了有色眼鏡的,是你,不是我。 

世上沒有一個人,永遠是對,或永遠是錯。批評並不等於仇恨,批評政府、批評建制,是幫他們,不是害他們。因為只有他們才有能力左右大局,但如果他們走歪,香港就完了。 

說不兄,我從來沒說過自己中立,我也有我的立場,中立,只不過是一個標籤,與黃、藍等標籤無異。關於「初心」,我已經寫得很清楚,香港人的初心,只有一個,叫「獅子山精神」。我只希望大家回想起,香港在未有佔中、未有顏色鬥爭之前,是什麼狀況。當年的我們,對一個眾所周知的殺人犯,絕對不會姑息,但今日,兇手逍遙法外,還可以被說成是理所當然,受害者甚至飽受輿論欺凌,是什麼使我們改變了?是政治?是顏色? 

正如你問,香港應怎樣轉營?閣下在 15/F 已經自己回答了,香港的位置應該是低調、中立,也就是說,香港人不應該政治化,必須放下顏色鬥爭,回歸未有佔中、未有顏色之前的狀態,重拾「初心」,才會有出路。
 
26. 八十後小蟲 2020-11-25 21:09:23
珍惜兄你這堆冠冕堂皇的大道理誰不會講呢?問題是由誰來講人無信而不立!!!唔系存心批評你,查實小蟲以前也認同你的愛香港理念,但漸漸見到你的言行不一所以有所保留罷了既然你封筆的初心已改,何不正式鄭重聲明一下重出江湖的決定?總比出文叫讀者唔好執著,易受落些。
27. 向泛民说不 2020-11-26 10:28:11
26楼,可以见到黑莓洗脑的可怕,好多人被洗脑到极度仇中,但是却觉得自己好中立,好客观,要知道上年区议会投票比饭民的选民,大部分都系极端的选民。为什么香港没有温和的饭民选民,黑莓在过去20年,控制了话语权,洗脑式的传播仇恨,以至于今日在中美对立的时候,饭民选择了美帝,逼使大陆实行国安法。其实对于香港长大的香港人,我们还是觉得香港自己立23条,肯定好过由大陆去立国安法,就像澳门那样,有什么不好?相信03年让无牙老虎的23条通过,今日饭民和香港都会输到甘惨。可惜今日饭民将大陆洗脑到像魔鬼一样,绝对不可以妥协。这就是最大的问题,政治是妥协的艺术,吾妥协就只有战争,就是谁大谁恶谁正确,就像最近的亚里米亚和阿塞战争一样,亚里米亚需要刮地赔偿,香港有没有实力啊?

最近有饭民文宣话点解大陆人要拼命讲大话,这句话真系非常讽刺,如果系外国生活过,鬼佬对中国人的评价就是内敛,意思就是中国人太老实。阿差和鬼佬基本上作大讲大话已经成为他们的生活一部分。鬼佬作大讲大话基本上吾使经过思考。

其实系人都知道今次美帝选举一定有舞弊,但是美帝的选举根本也包括舞弊,赢就是赢。就像阿扁说的那样。

饭民友最无耻就是要求对手绝对道德正确,自己就咩都得。
29. 辛普 2020-11-26 12:35:59
陳同學案已經高度政治化,現在將陳同學移交台灣,能否保証陳同學獲得公正公平的審訊。這事實上係一個大疑問。

台灣從檢察官,到法官,到辦案的警察,全部都係綠營蔡英文嘅人。有大量証據顯示蔡英文利用2019年香港發生的反引渡條例社會運動,來幫助自己造勢,從而連任總統。而引渡條例的緣起,就是陳同學案。也就是説,蔡政府曾經利用過陳同學案。

這個疑點,對被告人陳同學,很有利。因爲疑點利益歸於被告。香港的法官,不論“黃官”定“藍官”,恐怕好難支持引渡。最後可能上訴到終審。你估終審會點判。

所以這件事,不是那麼簡單,由特首可以決定的事。

30. 八十後小蟲 2020-11-26 13:14:22
向泛兄

小蟲唔係泛民派亦都對珍惜兄系咩政治陣營無深究,只以讀者角度去睇件事。

你自己唔講究道德但請唔好以偏概全。公道自在人心,今次珍惜兄的忠粉Joe兄同長河兄都來問候佢,但一致無為珍惜兄反口之舉護短,是非黑白各人心中有數。湯博士每天出文會知道封筆件事,佢最近連出兩篇星爺打官司文章,強調信用的重要,敬重博士敢於捍衛做人基本的操守。

珍惜兄看到小蟲評論後無再反駁,我覺得佢會自省的,如果無估錯就真系好,希望能認真考慮小輩建議。

31. 向泛民说不 2020-11-26 15:26:19
30楼,睇你的回答,当然知道你非饭民啦。

美帝最喜欢用道德绑架。美帝同你讲,你要老实,你要有道德,但是其实他们最不道德。

所以平常心对待道德,不要被道德绑架。明末的那些东林党人一样好讲道德,但是最后明也是被东林党人总结。
32. 向泛民说不 2020-11-26 16:51:44
梁文道,一个仇中的公知,一样吾比饭民接受,单单睇标题,还以为是红粉写的,但是看了内容才发现原来是来自揽炒派文宣。其实梁文道应该是比较温和的反中人士,但是香港的饭民支持者大部分都系极端派。

為什麼梁文道令人討厭?
https://medium.com/@tangchingkin/%E7%82%BA%E4%BB%80%E9%BA%BC%E6%A2%81%E6%96%87%E9%81%93%E4%BB%A4%E4%BA%BA%E8%A8%8E%E5%8E%AD-e624d6d9fa06
33. 向泛民说不 2020-11-26 16:55:08
中国对反对派真的很宽容,英国人又找到给钱给反中公知了,难怪众筹可以上千万;美帝一定不会包容这样的人。难怪河童可以住豪宅,去5星级酒店玩女。

方方获BBC“巾帼英雄”奖,陈丹青,梁文道前往祝贺。公知大聚会。诺贝尔炸药奖和戈尔巴乔夫

https://www.youtube.com/watch?v=uigRq3qTal0
34. 向泛民说不 2020-11-27 08:47:08
30楼,本人原本都被程序正义洗脑,所以都非常推崇法治,但是过去20年,香港人玩法治几乎玩到非常之迂腐,其实同满清时强调的之呼者也有咩唔同。古时的封建思想有咩唔同,不要忘记以前的读书人甚至可以为道德而死。但是结果就是中国不能进入工业化时代。
法治是需要,但是不是泛民强调的那种迂腐的法治。
35. 珍惜香港 2020-11-27 14:31:01
珍惜香港2020-11-27 14:31《回歸的回應》TO:8/F、23/F、26/F、30/F 八十後小蟲 

蟲兄言重了,重回地產網一事,沒什麼大不了,用不著要鄭重聲明吧 

閣下或許有些誤會,我並沒有封筆,只不過是轉了平台而已。在《緣結.天璣》一文裡面,及之後的一個回應中,我亦有提過,不是我不想寫文章,只是我不想在此平台發文。與這個網站的專欄作家、網友、朋友等之關係,為我的寫作帶來了沉重的壓力和感情負擔,既然寫得不開心,就惟有離開。這是一段頗長的往事,但隨著緣來緣去,往事煙消雲散,我不想重提,亦沒有必要重提。閣下有興趣的話,可以自己翻查一下,沒興趣,也不打緊的。不過,你不了解這段往事,就當然沒資格批評我的去留了。坦白說,我要離開,大可以一走了之,無須要告訴大家,但我這份人,不喜歡沒頭沒尾,我知道有人經常留意我的文章,甚至在等我出文,所謂告別,只不過為他們作出一個交代,一片好心,談不上什麼承諾。你既不了解整件事情的來龍去脈,又把交代看作承諾,這明顯是你的執著,不是我的問題。 

如果閣下還是不明白,我可以打個比喻,一對情侶,曾經海誓山盟,但分手了,是誠信問題嗎?分手之後,又復合了,也是誠信問題嗎?分手一刻,女方對男方說:我以後不再見你了!一年之後,他們復合,是女方失信嗎?我寫文章只為興趣,沒錢收,沒名沒利,我與網站之間,與網友之間,沒有利益關係,可謂互不相欠,所以無論我以何種形式告別網站,也不等於許下了什麼承諾。記得我還最後加了一句「我會永遠懷念這個地方」,這的確是我當時的想法和感受,但正如女方那句「我以後不再見你了」一樣,感性的表達,根本代表不了什麼。還有,我為了「寧人負我,莫我負人」的原則,免受拉走網友去其他平台之嫌,延遲了三個月才公佈自己轉了去【頭條網】。我與網站既沒有利益關係,其實根本沒必要這樣做,但我還是選擇做了,我自問對得起網站有餘。所以你借用其他專欄作者的言論,把我對號入座,是沒有意義的,其他人怎樣看,我不關心,亦沒有興趣知道,反正我問心無愧。 

關於我的回歸,在《初心》的前言中,已經交代得清清楚楚。離開了年幾後,放下心結,對網站的感情淡化了,回來看看,眼見【資深會員專欄】變得冷清。既然我還有寫文章,何不在兩邊同步出文,為這裡討回一點生氣?就是這麼簡單,純粹出於善意,沒有其他。如果這裡有人,看得不順眼的話,是他們自己心胸狹窄,小人之心,與我何干? 

蟲兄說「反駁」,言重了,說「回應」好些吧?我不回應,是因為回歸一事,根本沒什麼大不了,我不想在這問題上糾纏,但既然你如此執著,我就姑且補充一下。所謂,明者已明,不明者,怎說也不明,如果你硬要執著於什麼誠信問題的話,我寫什麼,你也只會視之為語言偽術,倘若如此,你就當我沒寫過這篇回應吧。反正,你有你執著的自由,還是那句,與我何干? 

還有一點,Joe 兄、河兄,不是我的忠粉,請你尊重這裡的網友。在這個網站,我沒有粉絲、讀者,只有網友、朋友,我們之間的身份,都是對等的。他們沒必要為我護航,而我亦不願見到他們為了些芝麻綠豆事,在回應箱內糾纏。 

我從來認為,寫專欄沒什麼了不起,在我而言,寫專欄和寫回應,沒多大分別。我所寫的,並不是如你所言,什麼冠冕堂皇的大道理,我只寫出了自己的真實想法和感受,你認同,我開心,你不認同,也不打緊。閣下問,誰不會講?此言差矣!肯為潘媽抱不平的,可謂黃藍不討好,你可以在網上搜一搜,舍我其誰?所謂知音難求,你找到的話,煩請告知。坦白說,以我的文筆,天天出文痛罵黑暴、黃屍、港獨,搏取掌聲,廣納粉絲,有何難?不好意思,名利如浮雲,我志不在此。 

已經寫得太多了,如果閣下對我回歸此事,還有任何不滿的話,很抱歉,我沒什麼可以回應了。
 
36. 引刁一快 2020-11-27 15:15:11

珍兄乃性情中人,你的長文都一定睇,個人意見是其實不需拘泥各網友的留言,鍾意覆就覆。

國安法一出,香港應續漸恢復理性,應走的會走,犯錯的要坐亦走唔甩,請繼續出文鼓動人心。

長河兄亦請勿吝嗇,你的文字週時一針督正,咭一聲笑出嚟。😂

37. 八十後小蟲 2020-11-27 17:52:46
珍惜兄

多謝你認真咁回覆小蟲。了解你以前情緒不好才咁高調宣佈唔再系專欄出文,雖然不是法律承諾,但君子一言駟馬難追,讀者心水清都明白是怎麽一回事,之後無兌現,給人觀感一定差。

原先小蟲對你的批評是嚴厲的,因為對你今次文章首一兩段那種欠缺合理解釋仲振振有辭態度好憤怒!不過睇咗你對向泛兄回應後我無咁生氣(執著?)啦,只希望你再向讀者清楚交代下,始終你有心寫文章關心香港亦是好事。

你總會有些自圓其說想淡化件事,這小蟲預計到,但人之常情吧!我的初衷只希望你能多少反省下,而從你回應感到你都系會考慮讀者意見的人,所以也就不再來回爭論了。