地產博客 > 資深會員專欄 返回
瀏覽人次:45134    回應:9
資深會員專欄

初心(特首篇)

 

珍惜香港

法團專業投資者
SMIEEE.MSc(ICDE)
http://facebook.com/hongkongtruevalue/
2022年7月3日
※珍惜香港※.2022-07-03 22:40【初心(特首篇)】
前日喺香港回歸祖國 25 周年,及以李家超先生為首,第六屆香港特區政府就職嘅大好日子。响三號風球,強烈熱帶風暴「暹芭」逐漸逼近,加上新冠疫情第五波放緩後,單日新增確診數字又再回升,連續三日破二千宗嘅環境之下,今年七一,似乎被籠罩著一股內憂外患嘅氣氛。 
 

 

不過,我地嘅國家主席【習近平】先生,仍然親身嚟到香港,為新任特首及主要官員監誓,同時向新一屆特區政府及全港市民,發表重要講話。我地國家領導人嘅公開言論,一言一詞,都喺經過深思熟慮,精簡、直接、到位,唔會轉彎抹角,所以唔使點解讀,亦冇須要解讀,因為字面嘅意思,就喺真正嘅意思。自香港回歸廿五年以嚟,國家對一國兩制嘅堅持同實踐,從來冇改變過,對香港市民嘅愛護同包容,亦從來冇變過。正如我响年頭嘅《新年祝願》裡面都提過,香港人,其實好幸福,只喺有部份香港市民,身在福中不知福。 

法治嘅初心

今日出文,除咗慶祝香港回歸祖國 25 周年,及祝賀李家超先生正式就任香港特首之外,亦借此兌現我年半前所提過嘅,或會為《初心》一文寫後續。自潘曉穎响台灣被謀殺至今,已經近四年半,拖到依家政府換屆,此案都仲未有跡象解決。關於我對呢件事嘅睇法,文中寫得好清楚,我唔再重覆。總之,千錯萬錯,一定唔喺潘媽嘅錯,更加唔喺死者嘅錯,潘媽就算再出嚟討千次,甚至萬次公道,任何一個香港市民,都唔可以對此講半句髒話。記得當時我告誡過一啲自命藍營人士,請佢地自重,但好遺憾,每次潘媽一出場,網上總會爆出一大堆對佢同死者辱罵嘅言論,所以對於呢班人,我唔會再浪費筆墨。今次,不如先同大家重溫一下歷史。 

話說公元前 207 年,劉邦帶兵攻陷秦國首都咸陽,入城後第一件事,就喺廢哂所有秦法,即時訂立三條人稱《約法三章》嘅基礎法律:「殺人者死、傷人及盜抵罪」。大家不妨想像一下,如果自己喺劉邦,啱啱推翻咗秦朝,首都市內亂七八糟,你會先立法保障當地人民嘅生命同財產,定喺佢地嘅言論、集會等權利同自由?如果連最基本嘅生命同財產都保障唔到,講乜嘢權利?講乜嘢自由? 

所以,法治嘅初心,就喺保障受治者嘅生命同財產,呢個就喺法治嘅基礎,法治嘅底線,呢條底線,絕不可破。如果一位受香港法律保障嘅香港市民,俾另一個香港市民殺死,無論案發地點响世上任何一處地方,包括公海甚至喺外太空,只要呢一刻兇手身在香港,咁香港嘅法律制度,就必須確保有能力以謀殺或誤殺罪名將佢繩之於法,而唔喺由得佢逍遙法外。 

或者我再講白啲,如果李家超先生响佢特首任期之內,能夠將謀殺潘曉穎嘅兇手,以相等罪名送上法庭,我唔須要再睇佢其他功績,因為佢已經攞足滿分。 

超人嘅期待

我唔喺講笑,佢真喺做到嘅話,相信香港冇乜嘢問題,喺佢解決唔到,冇乜嘢政策,喺佢執行唔到,亦冇乜嘢目標,喺佢達唔到。 

記得過往我對歷屆特首嘅評價同要求,都幾嚴苛,曾經以「庸梁」形容 CY、「妹仔」形容林鄭,不過講到嚴苛,都未及何柱國,佢話如果林鄭競逐連任,就會出嚟參選,質問佢究竟建設咗啲乜喎!其實,我創造呢啲稱呼嘅目的,唔喺要當事人難堪或者受辱,而喺想一針見血咁突顯佢地作為特首最致命嘅要害,倘若當時佢地能夠正視自己嘅要害,及時作出改變,就會喺香港之福。 

今屆特首李家超話,施政要以結果為目標,如果套用呢個標準,咁前四任特首之中,表現最優秀嘅,就應該喺曾經俾我尊稱為「老曾」嘅曾蔭權先生,佢唔單止高票連任,仲喺截至目前惟一能夠成功完成兩屆任期嘅特首,任內令香港經濟谷底抽身,港府轉虧為盈。至於我對李家超嘅評價,暫時都喺置於中性,主要因為佢冇相關嘅往績俾我參考,從言論同態度方面,亦睇唔出佢嘅治港同領導風格。或者簡單講,呢位特首城府都幾深,頗有領導人風範,如果要為佢揀個簡單又到位嘅稱號,我會用「阿超」,一個中性,而又帶著期待嘅稱呼,咁究竟期待啲乜?當然喺超人嘅能力啦!有啲朋友叫佢超哥,但所謂,哥前哥後三分險,我認為唔太吉利。近年香港經歷黑暴、疫情,政府再陷財赤邊緣,加上中美步入長期矛盾,俄烏開戰、環球經濟嚴峻、金融動盪,阿超能否帶領香港,再一次谷底抽身,由治及興,大家拭目以待。 

特首嘅初心

有唔少朋友話,特首呢個位好難做,叫我體諒一下,佢地甚至認為,有能力嘅人,唔會想做特首,呢點我唔認同。如果你有超凡嘅能力,又有鴻圖大志為香港作出貢獻,有邊個崗位可以比美特首,令你對香港發揮到最大嘅影響力?有一點可以好肯定,自香港回歸以嚟,冇一位特首喺响唔情願嘅情況下坐上呢個位置,亦唔存在乜嘢臨危受命、頂硬上之類,唔好講到咁委屈。反之,佢地每一位都好渴望呢個身份,知道自己可以成為特首果刻,都唔知幾雀躍。就睇老曾,2005 年接替董伯之前,就俾人影到佢吹哂口哨咁,真喺幾風騷;林鄭都唔輸蝕,連上帝嘅感召都講得出,心情幾 HIGH,可想而知;至於 CY 就更加唔在講,施政後期搞到左中右不討好,建制派都唔想佢做多屆,可以話喺黯然離任,但原來今屆佢又想捲土重來喎!不過,話說習主席今次嚟港,會見 CY,都只喺提到佢卸任特首之後嘅貢獻,睇嚟 CY 想做多屆,應該無望。 

各位千祈唔好誤會,我絕無貶意,所謂人望高處,有野心喺好正常。反之,如果你冇足夠野心嘅話,就唔好隨便坐呢個位,免得累死人,我唔喺講笑,真喺會累死人。就好似偉大嘅孫中山,帶頭起革命,推翻滿清王朝之後,就將個總統寶座,讓咗俾袁世凱,以為可以避免內戰,點知袁世凱弄權,結果又要搞多次革命,之後內戰連年,生靈塗炭,直到臨終之前,都只能慨嘆一句:革命尚未成功,同志仍須努力 

野心,喺成為領導人嘅必要條件,但當你成功坐上特首呢個位置,得到咗榮耀同權力之後,就要諗清諗楚,自己應該以乜嘢心態同理念,去回饋你管治之下嘅香港市民。呢個,就喺特首嘅初心,而我對阿超嘅期望,亦只得一個:就喺愛民! 

愛民與初心

咁點先至算愛民?呢個問題唔容易回答,因為愛民喺心態、喺理念,並冇具體嘅執行模式,而我地嘅祖國之所以強大,就喺因為愛民。一個政策,是否愛民,有幾愛民,喺視乎訂立政策果刻嘅初心,同埋管治者對呢份初心,有幾堅持。就算同一個政策,初心為愛民與否,達至嘅結果,喺可以完全唔一樣。 

就以修訂逃犯條例為例,記得林鄭上任果陣,輿論傳有壓力要佢响任期之內,啟動廿三條立法,至於壓力幾大,可以參考當時何柱國嘅專訪。我响 2017 年中一篇題為《結緣》嘅文章裡面,都有提及呢個專訪,當時我仲話,個主持問咗佢三次,叫大家睇下何生嘅反應添。倘若修訂逃犯條例嘅初心,唔喺因為愛民,唔喺為咗保障市民嘅生命同財產,而只不過喺捨難取易,避過廿三條立法嘅話,咁失敗就喺必然。 

愛民,亦唔喺市民要乜你就俾乜,因為好多人認為啱嘅事情,唔一定喺啱,甚至大部分人認為啱嘅事情,都唔一定喺啱,响 2019 年中一封《致曾俊華先生的信》裡面,我都有提過呢一點。所以,一個愛民嘅特首,喺唔應該順應民粹,承諾取消強積金對沖,縱容坊間輿論扭曲強積金成立嘅初衷,將當年承諾幫老闆儲嚟賠果筆錢夾硬搶走,令打工仔重回未有強積金之前,每兩年就惶恐俾人炒嘅年代。 

愛民,喺要為市民做應該做嘅事,同時以真誠去令市民明白,縱使佢地唔喜歡,甚至好抗拒,你都喺為咗佢地嘅福祉而堅持去做,過程可能會好痛苦,但到成果出嚟之後,市民最終會明白。所以政策嘅設計,除咗顧及技術同可行性之外,更要考慮埋市民嘅文化特質同合作性,去決定邊方面可以放任佢地自願去做,邊方面要強制。香港第五波疫情,死咗九千幾人,話政府冇責任嘅,點都講唔通。如果明知道市民唔會太合作,都仲要行自願而非強制性政策,到市民真喺唔合作果陣,就話喺市民嘅問題,自己已經盡哂力,我想問,咁算唔算愛民? 

祝願

無疑,特首唔易做,不過無論表現如何,國家領導人對香港特區政府同行政長官,永遠都喺充份肯定,從呢方面睇,做特首都幾幸福。所以阿超千祈唔好辜負國家嘅期望,一定要做位愛民嘅特首。 

香港回歸祖國 25 周年,李家超先生就任第六屆香港特區行政長官,可喜可賀。最後,我祝願香港,繁榮穩定,李家超先生,响呢五年任期內,一帆風順之餘,仲可以高票連任,做多一屆! 

其實呢個祝願,已經代表咗好多嘢 …


* 註:按 藍色連結 開啟或跳至相關之參考資訊;
    按 紫紅連結 跳至文章上方播放相關影片。


 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2022-07-04 00:48:52
沙發🛋️
2. AH-HO 2022-07-05 12:32:31
希望未來5年香港能順順利利,回復繁榮穩定。也期盼新一屆政府如珍兄所言,各政策都能夠做到愛民如子。
3. LaLa 2022-07-06 08:47:34
問題是阻力
4. 广府人 2022-07-06 11:35:29
特首不需要爱民。因为,爱到深处必有恨。有爱有恨,便有私心。有私心,即有私情。与天下为公理念相左。

古训有云: 圣人不仁,以百姓为刍狗。翻译成白话就系: 既不爱,亦不恨,无私而已。

特首临机理政,量天时,地利,人和,求事之宜,须自无私始。
5. 广府人 2022-07-06 11:43:17
to 3 楼,

若特首有私心,则阻力大。若特首无私心,则阻力小。


6. CD ROM 2022-07-06 18:04:31
支持珍兄出文~~~

25年其實一轉眼已經過左, 回歸頭20年順風順水, 最近的5年才來了比較大的考驗. Think positive, 做一點壓測, 也是為了走更遠的路. 一句"香港不能亂, 也亂不起", 感受是真的入肉..........

Really the time for a new page~~~
7. 向泛民说不 2022-07-07 09:01:59
4樓,今時今日的環境,有無私心這類是口號來的。真正原因是香港人不認清誰是真正愛你,誰是害人。

香港人其實稱大陸是阿爺,但是心中卻鄙視。雖然沒有給選香港人選特首,但是在經濟上是完全支持的,比如金融業,比如不斷要求香港人搞創科。甚至給自由行。其實如果沒有大陸支持,香港肯定菲律賓化。好多人認爲菲律賓的走弱是因爲貪腐,但是東南亞有哪個不貪腐。真正原因是60年代產業搬離菲律賓轉移到四小龍之後,菲律賓並沒有產業升級。結果連金融業也搞不起來。最後只能大學生也要來香港做女傭教香港小朋友英文。回歸後,如果沒有大陸支持香港金融業,港女一定是像菲律賓那樣,要出國做女傭,還有90年后,新加波不斷撬香港牆腳,透過稅務等優惠搶跨國企業亞太區總部,很多原來係香港的跨國企業搬去了新加波。而香港政府還是那一句積極不干預。所以去到97后,係香港的跨國企業減小了很多,加上產業消失。如果沒有阿爺係03年開放自由行和資金,香港人真係可以點揾食?其實新加波也一直想撬香港金融業墻脚,但是大陸對這個假中國人不放心,香港才是親生仔。

相反的,回歸後,美國養的走狗,日日叫民主豉油,但是卻不斷的拖香港發展產業的後腿。而97后香港轉差,根本就是因爲香港被西方踢出他們供應鏈之外,所以想問下究竟誰真正為香港。

還有最近大陸已經放風了,香港目前的制度在47年之後,都會維持,因爲這符合大陸的利益,香港金融業會繼續,而有大陸產業背後支持,香港金融業必定比新加波強,還有大陸給市場,給人才等幫助香港搞科技產業,所以估計香港創科會加快發展,其實香港的基礎科學一直都很好,5間大學的高等教育都很強,只是以前沒有產業,所以人才只能去大灣區或者移民,所以大家見不到。但是如果他們留在香港發展,香港經濟肯定加速發展。

當然產業發展必須和大陸融合,香港人準備好未?

最後香港人真正的風險就是日日叫民主豉油的美國佬,同時在97后將香港踢出他們供應鏈之外的美國佬,這個海盜囯會晤會因爲香港發展太好而制裁呢?打擊香港的金融業?

8. 珍惜香港 2022-07-09 17:01:11
珍惜香港2022-07-09 17:01《愛民與私心》TO:4/F、5/F 广府人 

我說領導人愛民,是心態、是理念,但不包括感情,所以並不存在愛到深處必有恨的問題。 

至於無私,更為不切實際。正如野心,也是一種私心,沒有野心,就連當上領導人的資格也沒有。任何凡人,皆有私心,若強行遏止,處處避嫌,勢必綁手綁腳,諸事不行。 

記得在 2014 年初一篇回應裡面,我曾反問大家,董伯撐物流,是否為以權謀私益行家?唐英年之紅酒政策,是否為以權謀私飲平酒?CY 推測量師仲裁,又是否為以權謀私益自己人?難道有親友從事環保行業,老曾就不能推環保優惠政策?很多時候,私心引發靈感與動力,使政策更有效、更貼地。 

所以,領導人對待私心,不能逃避,亦不能否定,應該以正面心態,坦然面對之,才得以取其益,去其害。
 
9. 向泛民说不。 2022-07-09 21:18:36
8楼,一个没有私心的肯定是躺平的人,点解要从政。需知政治是最肮脏的。
当今领导估计是要留名千古。所以吾怕得罪资本。