有年轻朋友最近忧心重重,我以为买了虚币,原来是买了楼,本来买楼是好事,但在买了楼之后见到传媒形容买楼的人是接火棒,反而赞卖楼的人可以甩身,所以唔系几开心。
现在传媒经常本末倒置,现在卖楼的人十之八九都唔想卖,不过受形势所迫唔卖唔得,其实已经是一个悲剧人物,传媒反而赞那些卖家甩身,真系唔明白,何谓甩身,唔通卖了楼之后唔使住,就算唔买返都要租楼,要知道最保守的分析员都估计今年租金会升一成,交租畀人供款楼是很辛苦的事,传媒反而赞那些卖家,真系唔知攞景定赠庆。
现在有资格买楼的人,已经被各方面认证,如果唔够资格,银行根本唔会借钱畀他们买楼,不过,即使那些买家合晒资格,在财政上没有问题,但如果冇胆,最好唔好买楼,不少买家在落了订之后周围同人讲,最后被人吓到要挞订,老实说,我见过不少这类人,我问点解要挞订,他们会话有一些朋友话楼市会大冧,否则他唔会买到楼,一个咁讲,两个又系咁讲,连报纸都话买楼是接火棒,想唔挞订都唔得。
有一些人是过份热心,见到买楼的人唔怕,就会向他们的老婆埋手,女人大多数受唔起惊吓,知道楼市会大冧,哦都哦到老公要挞订,很少老公可以顶得住,几年后又会怪责她们的老公冇鬼用,捱了咁多年连楼仔都冇一层,至於叫他们唔好买楼的老友,不但有自住单位,仲有楼收租,老实说,去到这个环境,冇楼的两夫妇没有离婚已经是非常恩爱。
其实买楼同打交都是一样,要求一胆二力三功夫,如果冇胆,话之你一身牛力,连如来神掌都识,始终唔敢打交,所以,即使有钱,熟读投资理论,在香港,如果冇胆,最好唔好买楼,否则一定畀人吓死。