地产论坛
登入名称
密码
页数:
初心(序)
浏览人次:179518    回应:43

初心(序)

 

珍惜香港

法团专业投资者
SMIEEE.MSc(ICDE)
http://facebook.com/hongkongtruevalue/
2020年11月9日
※珍惜香港※.2020-11-09 10:00【初心(序)】



前言(地产博客)

自《缘结.天玑》之后,发生咗好多事情,香港经历巨变,世界亦发生咗巨变。年几前,我离开【地产博客】,转咗去【头条网】发文。最近返嚟睇睇,原来呢个【资深会员专栏】,都有成大半年冇人出过文,回想过往果段日子,缘来缘去,都真喺几唏嘘。 

或者以前同呢度嘅朋友、网友,互动太多,对网站产生咗感情,个人亦开始变得执著。转咗去头条网之后,尽量避免同果边嘅网友或其他博客直接交流,相比以前,心境的确平静好多。其实对博客而言,专栏只喺一个平台,钟意就写,唔钟意就唔写,而网主作为主场,亦随时可以删除佢认为唔恰当嘅文章,或封锁一啲帐户。但无论如何,大家都喺对等,可谓互不相欠。正如以往,都有经营多年具规模嘅博客网站,话关就关,呢个世界,本来就冇嘢喺永恒,何必咁执著? 

前言(头条网)

话说上月中,突然发觉自己登入唔到头条网,网志文章又全部唔见哂,原来网站封锁咗一大批包括我在内嘅旧帐户,我两次发电邮要求解封,都得唔到回应。记得由【地产博客】转移到头条网出文,都已经有一年多,呢度亦成为咗我主要嘅网志平台。我写文章,一般都好长,有啲要花几日甚至成个礼拜至完成,每篇都喺心血。虽然响 Blogger 有备份,但我其他平台都会连结到呢度,而相关嘅文章连结就自然全部失效。我等咗个几礼拜,都未见有喜色,睇怕真喺要放弃,正想开个新帐户,写返篇告别网站,同各位博客道别,就此作罢。虽然呢一年里面,同你地冇乜交流,但都叫做有缘,我呢份人,唔钟意冇头冇尾 

临开笔之前,我再发电邮俾管理员,谂住碰埋呢次运气啦,点知我嘅帐户跟手就解封咗,网志文章亦全部回复,真喺要多谢管理员,终於肯俾我返生!今次失而复得,可谓百感交集,不过想深一层,其实对博客而言,专栏只喺一个平台,钟意就写,唔钟意就唔写,而管理员亦随时可以删除佢认为唔恰当嘅文章,或封锁一啲帐户。但无论如何,大家都喺对等,可谓互不相欠。正如以往,都有经营多年具规模嘅博客网站,话关就关,呢个世界,本来就冇嘢喺永恒,何必咁执著? 

 Andre Vltchek 1963-2020

就好似 Andre Vltchek 呢位战地记者,今年 9 月 22 日,即喺约个半月前,突然过咗身。我响《中国民族精神》一文里面,都引用过佢嘅言论,估唔到事隔半年,话走就走。记得佢曾经向香港嘅年轻人,发出过一封公开信,仲想约佢地对话添,最后,当然喺冇人睬佢。 
 
 

Andre 一生走遍全球战乱同贫穷之地,响今年五月初,一个访问里面,佢总结咗自己嘅所见所闻。当中就世界嘅发展,佢讲出咗一个重要结论:中国嘅体制,就喺人性惟一希望,如果中国崩溃,整个世界就会崩溃。呢个结论,正好回答咗我响《中国民族精神》文章里面,最后提出嘅果条问题:我地人类嘅文明之路,应该点样去走呢? 

意识形态嘅初心

回望人类近代史,好多人祸,都喺源於对信仰或意识形态嘅执著。人类追求乌托邦嘅「初心」,针对死后嘅,就形成宗教信仰,针对现世嘅,就演化成意识形态。虽然呢颗初心,本质都喺善良同正义,但就往往同基础人性及自然定律相违背。响追求或体现意识形态嘅过程中,无法摆脱自然定律,基础人性浮现,初心被埋没,最后酿成灾难。 

就睇共产主义,初心非常崇高,人人共存、人人共产,资源平均分配,大家唔使竞争,唔使忧柴忧米,就可以一心一意贡献社会。但可惜呢个初心,假设咗世界上每一个人,都有好似圣人咁嘅修为,无私嘅奉献,根本就唔现实。大自然嘅定律,物竞天择,适者生存,冇咗竞争,人类就失去上游同进化嘅动力。最后,基础人性嘅黑暗面陆续浮现,自私、妒忌、仇恨,一场文化大革命,几乎摧毁咗中国人几千年嘅文化。如果唔喺邓小平搞改革开放,摒弃共产主义,中国十几亿人嘅命运,就真喺不堪设想。 

西方世界又点?率先摆脱帝制同独裁统治嘅捆绑,人民自由得到解放,无界限嘅思想自由引发出创意,再加上顺应大自然定律嘅资本主义制度,经济、科技得以急促发展,从而领先世界。西方社会将自己奉行果套意识形态,归纳成四个价值,自由、民主、人权、法治,称之为普世价值。西方普世价值嘅初心,亦喺非常崇高,目标为缔造一个自由、平等、开放嘅乌托邦。但可惜,响四个价值里面,头三个都喺讲权利,完全冇提义务、责任之类嘅人性素质,只单靠第四个,即喺法治去制衡,不过法治呢,原来又喺由民主制定。咁即喺话,同共产主义一样,西方普世价值嘅初心,都喺假设咗世界上每一个人,都有好似圣人咁嘅修为,无私、自律、具责任心、尊重异己、有同理心,但当然,又喺唔现实。结果,个人自由转化成自私,权利转化成褔利,小数服从多数嘅民主制度,变成人多虾人少,造就出歧视、标签、撕裂、斗争。呢啲基础人性嘅黑暗面,主导咗整个社会,最后将初心完全淹没。 

世上奉行西方普世价值嘅地区,最终都发展成五十比五十嘅撕裂同内斗,无一幸免。人民虚耗大量资源响政治争斗中,政府、政客为保住或争取执政权,亦消耗大量资源取悦人民。民主制度发展成熟嘅国家,普遍都喺入不敷支,债台高筑,但由於佢地走得较前,所以有条件通过科技、经济甚至军事手段,掠夺其他发展中国家嘅血汗同资源,去为自己嘅虚耗埋单。而为咗令到掠夺合理化,西方社会将自己打造成公义嘅乌托邦,通过渗透、宣传、外交、甚至军事行动,将佢地果四个价值,植入对方嘅社会,触发撕裂同内斗,令佢地将自己嘅苦难,归咎於异见阵营或当地政府,西方社会成为拯救佢地嘅英雄,掠夺就变成甘心情愿嘅奉献。 

任何意识形态,都喺嚟自一颗初心,无论个愿景有几漂亮、理念有几完美、目标有几崇高,如果初心根本就已经违背咗基础人性,同自然定律嘅话,最终都一定喺悲剧收场。Andre 见证世上无数灾难同悲剧,最后认定中国嘅体制,就喺人性惟一希望,原因好简单,因为我地嘅祖国,只不过喺遵循著基础人性,同自然定律,以稳定社会,改善人民生活为初心,唔搞乜嘢乌托邦,亦唔讲乜嘢梦想,总之,脚踏实地做好自己,唔须要同啲乜嘢普世交代。 

潘妈妈嘅初心

写咗一大堆前言,终於入正题,讲到「初心」,当然唔少得潘妈妈。话说个几月前,潘妈通过录音,质问林郑:你嘅初心去咗边?事缘约一年前,凶手出狱,表示愿意去台湾自首,但事隔近一年,音讯全无,於是潘妈通过传媒,向对方施压。但对方嘅代表牧师,同政府嘅回应,似乎令潘妈觉得佢地想敷衍了事,於是多次通过传媒再继续施压。不过潘妈嘅坚持,就惹起咗坊间嘅抨击,主要喺嚟自所谓蓝营人士。随著事态发展,呢啲负评,越演越过份,包括标签人地做黄丝,甚至连带帽带超带口罩唔用真面目见人呢啲鸡毛蒜皮嘢,都要攞嚟批评。记得 2019 年 2 月中,潘妈同民建联见记者果阵,都喺同一副 LOOK,唔知究竟喺潘妈变咗质,定喺班所谓蓝丝变咗质? 

我谂大家应该知道,潘妈失去女儿果阵,都仲未有修例事件。我地唔可以期望,一个已经心碎嘅人,对之后发生嘅一切社会事件、政治事件,会有同我地一样嘅感觉,甚至可以话,佢唔会有任何感觉。讲真,果一堆大龙凤,又关佢乜事?佢点解要关心?一个杀死自己女儿嘅人,可以连审都唔使审,完全当冇事发生,仲要受警方保护,如果咁都可以接受嘅,又点对得住个死者?呢个唔喺法理问题,喺人性问题。潘妈唔喺要凶手填命,或者一定要佢接受乜嘢形式嘅惩罚,只喺要对方以一个杀人犯嘅身份,面对审判,为自己嘅行为负责,对死者有个最基本嘅交代,呢个就喺潘妈嘅初心。 

我见网上好多自命蓝营人士,对潘妈恶意批评,简直不堪入目。佢地大惑不解,潘妈理应对凶手恨之入骨,点解仲肯同对方求情?於是就认定人地收咗台湾人钱。无他嘅,被仇恨充昏头脑嘅香港民心,又点会理解呢份情操?原来今时今日,只得已经心碎嘅人,先至可以免疫於仇恨嘅洗礼,香港人,真喺好可悲。你地有乜证据,话人地收台湾人钱去迫香港政府做嘢?因为佢封公开信,提到乜嘢「趴趴走」?定喺果 150 万台币补偿金?讲真,就算封公开信,真喺由一个台湾人代笔,又如何?所谓补偿金,喺台方主动提出,人地冇要求过,亦冇话过会收,但就算肯收,咁又点?呢啲只喺环境因素,唔足以代表潘妈有乜嘢企图,凭呢啲东东就屈人地帮台湾做嘢,咁你地同 721、831、新屋岭果班老屈警方嘅「独角脑残」,又有何分别? 

正因为潘妈放下仇恨,愿意为凶手求情,先至令对方再次落实自首,边个话,法理以外,冇嘢可以做?问题喺你有冇心。所以潘妈质疑港府、质疑林郑,唔喺冇道理。你地偶像屈颖妍,都有就呢单嘢批评港府,点解当事人就唔可以批评?仲好怪人地唔闹黑暴,闹黑暴有 Q 用?黑暴会帮佢迫凶手自首咩?潘妈喺受害人,唔喺社评人!更离谱嘅喺,竟然有人攞佢同另一位母亲比,果位母亲喺边位,唔好意思,不值一提。坦白讲,潘妈嚟自一个标准家庭,至少都尽咗做母亲嘅责任,将女儿养育成人,当中付出咗几多母爱。如果因为你嘅政治立场,令你觉得潘妈好碍眼,就随便搵件冇尽过养育责任,个女出问题自己仲走咗去旅行嘅未婚妈妈出嚟吹捧,皆因后者响政治观感上,比较啱你口味嘅话,咁就恕我直言,你唔单止侮辱咗潘妈,仲侮辱埋你自己! 

蓝色初心

有位蓝营 KOL,对潘妈嘅指控,充满阴谋论同假设性,极尽老屈之能事,仲有另一位,内容更加不堪入耳,渲染、挑衅、尖酸刻薄、断章取义,唔知真喺以为睇紧毒果啲报导添。呢两段片,我唔用紫色连结,费事响度污染我嘅文章,我都唔建议你地 CLICK 入去,真喺会睇坏脑。最近杨兄同一班 KOL,都出咗段片讲潘妈事件,应该算喺蓝营之中,少有较规矩嘅评论。但可惜,只有杨兄一个肯为潘妈讲句公道说话,佢叫大家原谅潘妈,又叫大家唔好闹潘妈。不过我想补充两点,第一,潘妈冇做错事,唔好讲乜原谅,佢亦冇必要同市民交代;第二,话佢对凶手恨之入骨,呢个讲法唔正确,佢今日之所以咁坚持,唔喺为咗报仇,只喺要还女儿一个公道 

所以我反而觉得,与其叫潘妈放低,大家倒不如检讨一下自己,家阵究竟喺边个放唔低?修订逃犯条例,已经喺过去式,唔好再成日攞出嚟做挡箭牌,话如果当日通过咗就可以点点点,冇得修例就无能为力。讲真,就算真喺俾你修到例,台湾一样可以唔收人,唔信?睇下依家送埋上门自首都唔肯收,你咬佢?成功修例,唔代表一天光晒,冇得修例,亦唔等於世界末日,唔等於乜叉都做唔到,美国有条《海外反腐败法》,你响外地犯罪,一样照拉,一样照审,何志平就喺咁样中招。真喺冇辨法?定喺冇心?修订逃犯条例,同台湾杀人案,本来就喺两件分开嘅事情,你地睇潘妈唔顺眼,喺因为你地自己唔肯放低,总要将呢两件事死揽埋一齐,何必呢?坦白讲,唔喺建制派对潘妈用完即弃,人地使鬼搞到要孤身作战,受尽各方凌辱?潘妈嘅坚持,理应得到尊重同支持,帮唔到手嘅,就唔该出少句声。你地将自己对黄营、黑暴、港独、台独嘅仇恨,迁怒於一个无辜嘅受害者身上,有云,仇恨一个人,就会变成对方。你地自己睇返果一大堆网评,当中有羞辱潘妈,甚至羞辱死者,话人地点点唔规矩之类,讲真,你地又有几规矩? 

我想问各位,当你标签自己成一只颜色果阵,你嘅初心喺乜?我净喺知道,香港人,只有一个初心,叫「狮子山精神」,唔喺乜嘢颜色斗争。我见好多受欢迎嘅 KOL,满口黄蓝,对任何人事都总要先标签一只颜色,作为立论嘅前设。可能大家已经唔记得咗,抗争、标签、仇恨、歧视、撕裂,喺由你地口中嘅黄丝制造出嚟。如果你嘅初心,唔喺要令香港人觉醒,放下颜色斗争,重拾返狮子山精神,而只不过喺基於你对敌对阵营嘅仇恨,甚至於不择手段,不惜以其人之道反制对方,咁无论你话自己喺乜嘢颜色,响我眼中,你都喺一只黄丝。 

初心与人性

初心,可以大至宇宙,小至微尘。中国体制嘅初心,喺合乎人性。潘妈嘅初心,都喺合乎人性。有啲人可能会好唔满意,潘妈有乜资格同国家相提并论?我当然冇咁嘅意思,不过我想反问大家,点解我地唔可以用尊重同体谅一个国家嘅胸襟,去尊重同体谅一个人?中国秉承合乎人性嘅初心,发展到今时今日,但有啲国家,就因为唔同嘅意识形态,联合起嚟,欺凌、排斥我地嘅祖国,但与此同时,当见到有人坚守住自己嘅初心,争取还一个人性嘅公道,而又冇伤害到其他人,难道我地又可以因为政治观感上唔顺眼,就去欺凌、排斥人地? 

中国民族发展咗几千年,本应科技发达,早就上咗太空,但我地中国人嘅文明,自古以来都喺偏重内在嘅人性修为,多於外在嘅物质探求,中国文化嘅初心,在於哲学,而唔喺科技。依家香港地,想搵个唔讲粗口嘅都几难,高学历嘅,通街都喺,但有修养嘅,又有几多?我想问各位自命爱国爱港嘅人士,究竟知唔知道,乜嘢喺爱国?庆祝一下国庆,歌颂一下祖国嘅成就,擦下中央政府鞋,就叫爱国?古语有云,修身、齐家、治国、平天下,真正嘅爱国,首先就喺要做好自己,秉承中国文化嘅初心,成为一个有人格、有修养嘅人,如果连呢一点都做唔到,讲乜爱国? 

潘妈事件,应该差唔多告一段落,一个普通市民,可以做嘅其实好有限,而社会嘅焦点,亦好快会转到其他议题。不过希望大家记住,我地每一个人嘅每分言行,都会烙印成自己人格同修养嘅一部份,经群体效应放大之后,就会成就香港人嘅整体文化,决定呢个城市嘅命运,请各位自重! 

后语

今日呢篇文章,会响头条网嘅【BlogCity】,以及地产博客嘅【资深会员专栏】同步发表,从此以后,我都会响呢两个平台同时出文。随著缘来缘去,往事烟消云散,都喺果句,专栏只喺一个平台,感情喺应该投入去文章度。我写嘢,从来都喺睇 MOOD,曾经有朋友问我,点解唔写短啲、写密啲?近期发生咗咁多大事,理论上应该有唔少题材,但我反而冇乜 MOOD。因为眼疾等问题,我写嘢嘅时空好有限,坊间多人认同或热烈讨论嘅事物,多我一笔唔多,少我一笔唔少,唔值得我浪费时空去写。 

就好似美国大选,呢排成为全球焦点,但我都只喺当戏咁睇,剥下花生,其实唔太关心。有朋友开局猜边个胜出,我都冇兴趣参加,五五波嘅大选,输赢都只不过喺运气。呢场根本就唔喺特佬与拜登之争,而喺人民与人民之间,五十比五十嘅撕裂同内斗,所谓民主大国,都喺不外如是。至於中美关系,呢几年已经写咗好多,我亦曾多次警告各位,又叫过你地 CHOOSE YOUR SIDE,唔肯听嘅,再讲都冇意思。今次拜登胜出,唔好以为一天都光晒,民主党又好,共和党又好,美国人都喺唔妥我地中国人,分别只喺出招有几快,有几狠,同去得几尽。再者,凡事有两面,既然拜登相对温和,即喺唔见得会好似特佬咁得罪自己啲盟友,西方联盟就可以更团结对付中国。总之,中国要响各方面,尤其喺科技领域上,尽快摆脱对美国嘅依赖,至於香港,就要尽快摆脱对美元嘅依赖 

都差唔多要收笔啦,下次唔知几时有 MOOD 再写。通常引发我出文意欲嘅,都喺为世人所忽略,但我就认为喺非常重要嘅人或事。每当我写文章嘅时候,都总会重复问自己,写咁多嘢,究竟为乜?相信呢条问题嘅答案,就喺我出文嘅初心。 

天变地变,初心不变!

心境 .....(点击播放》》》》》



* 注:按 蓝色连结 开启或跳至相关之参考资讯;
    按 紫红连结 跳至文章上方播放相关影片。


初心(序)
1. 尽快摆脱对美元嘅依赖。
2020-11-09 10:29
摆脱左啦。
2. 平常、常平
2020-11-09 11:22
古语有云:「人弃常、则妖兴」,「平常心是道,道是心常平」。
3. CD ROM
2020-11-09 18:20
久违珍兄既鸿文~~~

顺便浮面同网友们问句好!!!
4. Joe
2020-11-09 20:08
原来世界怎么变 珍兄初心不损
潮流混乱也不乱 大家始终劝勉👍🏻👍🏻😊😊
5. 封笔
2020-11-09 21:13
有口齿的人才有资格讲初心。
6. 历史长河
2020-11-13 20:57
珍兄在谈初心,也有网友在谈论食狗肉。这让我想起一篇微小说「初心」。分享下,祝大家周末愉快!



初 心


邻居老王养的狗死了,老王悲伤不已,他不想土葬,他说想给它火葬,把骨灰撒回大海,让它回到母亲的怀抱。

谁知道那玩意儿越烤越香,后来他就去买了两瓶啤酒……

很多事情,走著走著,就忘了初心。


7. 历史长河
2020-11-13 21:20
4楼系老朋友 Joe 兄,定系拜登兄?
8. 八十后小虫
2020-11-13 21:45
小虫记得珍惜兄公开讲过要封笔bye bye喎,但之后多次出尔反尔咩玩法?当地产网读者系儍㗎?

诚信已完全破产,即使再长篇大论也无用
9. 八十后
2020-11-13 22:15
珍兄 别来无恙?过去一年香港经历风风雨雨,大家也好吗?

长河兄 很久不见阁下 风趣幽默嘅足迹!
10. 引刁一快
2020-11-13 22:49
长河兄久违了,风采依然,秋意浓,天渐凉,祝君安康 😄
11. 引刀一快
2020-11-14 00:53
长河san

久违,身体可安好?

病死狗、车死狗,食得当然唔好嘥,冇所谓初心唔初心,初心系不杀,死尸一条,考虑卫生同法律就够。
12. Joe
2020-11-14 00:56
回河兄: 拜兄上来拜读鸿文都唔出奇嘅,不过小弟依然系珍兄和河兄嘅忠粉,特此前来拜会...😅😅
13. 向泛民说不
2020-11-14 12:47
又系一只黄人扮中立垃圾,台湾本身对香港就有落地签证啦,点解唔比一个未定罪的陈同佳去台湾啊。责任系台湾啊,黄人,

还有林郑有咩责任啊,黄人,香港没有逃犯条例,陈同佳在香港已经完成了他的法律程序,他是一个自由人,林郑可以点送他去台湾受审,如果林郑可以这样做,林郑也可以将肥佬黎和河童送去大陆受审啊,黄人日日叫法治,什么叫法治,我真系唔明。
14. 向泛民说不
2020-11-14 12:58
珍惜香港对建制派,对政府,非常仇恨。但是他却要用所谓的初心来显示他的客观。

珍惜香港,除下的有色眼镜,带住有色眼镜,睇唔到所有的光谱。

无错有逃犯条例,如果台湾一样有可能唔接收,香港政府也是无奈,但是这是台湾人的责任。但是最低限度香港政府可以有法律途径去处理这单刑事案。现在没有逃犯条例,香港政府没有任何手段去处理这单野,甚至香港政府也不可能主动去叫陈同佳去台湾投案,香港政府点可以叫一个系香港没有犯罪的人去台湾啊,香港的所谓法治精神不是无罪假设吗?你告诉我啦,珍惜香港,香港政府试图叫一个无罪的人去台湾受审,基本上犯了黄人讲的人权精神。为了一个刑事罪,为了抹黑政府,建制派,黄人连人权也可以放弃吗?
15. 向泛民说不
2020-11-14 13:08
Joe,点解黄人甘讨厌,甘低能,香港的位置根本就应该低调,中立,不要去挑战大陆,也不要得罪美帝。这才符合香港人的利益。啊爷比香港一国两制,系要香港人可以享受两种制度的好处,但是香港人却将两制解释为可以独立。有无甘on 车啊。

黄人却要香港倒向美帝,夺取政权,真系发梦啊,用下脑啦,黄人知唔知道乜叫地缘政治啊,墨西哥怎么会无奈的叫离上帝太远,离美帝太近啊,美洲其他国家点解无得发展工业啊,尼迫尔,不丹等印度周围小国比印度点玩啊、对香港来讲,大陆就是一个超级大国,黄人的选择等于推香港人去死啊。明唔明啊。
16. Joe
2020-11-14 17:50
阿饭兄,我都睇咗你咁多年,点会唔明呀😅
17. 一点冷知识
2020-11-14 23:14
“香港的位置根本就应该低调,中立,不要去挑战大陆,也不要得罪美帝。”

主要系中美斗法,美帝自己唔敢单挑大陆,就怂恿亚太班靓,例如日本,澳洲,艰难大,印度去行先死先。其实美帝自己曾经也不是懦夫,50年代韩战,和60年代的越战,美帝都身先士卒,同大陆死过。但结果都系.....,空留遗憾。后来学精佐,转花式,玩和平演变,89年,曾经一度觉得有希望,点知又.......。到特普上场,搞新冷战,搞封锁制裁,其实系和平演变的相反版。声势好劲,又怂恿台湾英文菜,以及香港班饭桶民,同大陆对决。香港黄友,即刻上晒头,决定落踏,肥黎仲话如果成功,特无普可以办好多个落贝奖俾佢。于是冲锋陷阵,借住陈同学个引渡条例,搞到铜湾尖咀,汽油弹乱飞,最后......,成功为港人争取到国安法,今次唔慌唔发。

点知,真系唏嘘的感慨一年年........。一觉瞓醒,“特总统”已经变成“前总统”。

听闻依家特前总统要尝试特赦自己。自己特赦自己?咁都得?可能得架,美帝真系可能得。但香港未必得勒,止可以找黄官帮手轻判。班黄人可能有排烦。最惨肥黎仲去搞人家候任拜登个仔。搞完又话唔关佢事。我就信唔关佢事,但唔知拜登信唔信勒。

睇来都系澳门,醒家波,Nippon,越南,马拉,非宾,哥rea,够低调,够定力。肥蓬周围游说,都唔肯落踏上特普条船。五眼嘅艰难大,同袋鼠国就比较尴尬。但毕竟人家堂堂区域大国,就算得罪大陆,都仲有筹码,容易掹翻。

香港班黄人,先系投机,跟住,已经洗湿佐个头,最终,人在江湖,身不由己。 

何出此言?

89年64开始,黄人前身民主派,买重注落北京老赵个边,点知赢嘅系老邓个派,之后嘅江胡习,都系呢一派。89年后,本来大把机会转翻老邓那边。但又畀“定康彭”勾引上床,仲搞大埋个肚,自此孕育佐港独呢个孽种。到今日,同大陆已经冇回旋余地,因为领土完整,大陆不容触碰。而且北京有足够筹码在手,唔怕同你玩。

黄人学人玩政治,但本身筹码唔够,于是揽炒香港全社会,以为越多人企自己个边就越安全,好一厢情愿姐。你想揽住人,人家未必愿意俾你揽住。于是搞到要暴力灭声,黒暴装修。香港不宁。学人投机,但见势色唔对,又唔识搵位走翻去赢家个边。睇下人家英文菜,之前撑衡特普,依家已经发贺电俾拜登,当然拜登点安排英文菜系另一回事。如果拜登小器,要惩罚英文,咁就唔洗唏嘘。衰要认,打要企定。荣华富贵可以俾得你,就可以收得翻走。

讲翻香港班黄人,政治上好幼稚。净识冲,唔识妥协,当然最容易俾人利用。日本就老狐狸。去年台湾朝野,瞓身撑香港黄人,韩国就保持官方冷静,民间传媒就撑衡黄营。反而日本的传媒报道,竟然明显偏蓝。点解?自己唔思考,唔动脑,学咩人玩政治。唔通架仔嘅政治智慧咁低,连黄人都不如。

最后,玩还玩。唔好揽炒香港其他人。政治斗争就系赌博,赌输佐,请一人做事一身当。正如肥黎把口都话一切野,唔关佢两个仔嘅事,同理。

我曾经系呢到地产版呼吁年轻人远离政治,唔需要投靠任何势力,清茶淡菜,已经好过人家锦衣玉食。理得佢老邓定老赵,特普定拜登,关人隐士。食下花生唔落场,不睹就是赢。

若真系想落场玩,就唔该有翻少少脑,系时候妥协,就要果断妥协。系政治斗争面前,唔好扮纯情,不要用所谓“良知”做挡箭牌,唔好自己呃自己,你系赌,你系投机,你们冇所谓“良知”,可能顾面子的江湖义气,倒系有少少,但那不是“良知”。

话时话,“良知”呢个两个字,源自明朝著名儒学家王阳明所极力宣扬的阳明心学,与宋朝朱熹,合称宋明理学,属于哲学范畴,都几深下。阳明引禅入儒,所以心学注重内修,并不好斗。同泛民推销的西方民主思想制度,完全冇关系。当年的独裁者蒋介石倒曾经极力推崇阳明心学,不过今日英文菜的民主台湾,已经不是蒋某人的独裁台湾。口讲西方民主,不真正了解西方。口讲“良知”,却不知如何“致良知”,不晓“知行合一”为何物。香港黄人,张冠李戴,点方便点来,则纯粹是政治投机了。


18. 向泛民说不
2020-11-15 12:53
17 楼,香港最可悲的就是选民基础有60%基本上是仇恨大陆,拒绝和大陆妥协,而这些人的逻辑思维就是这位珍惜香港。本人不怀疑珍惜香港爱香港,但是就是他们将香港带向失败。
10年时候左右,泛民和中央谈了区议会进入立法会的安排,本来对泛民是利好,但是却被珍惜香港这类选民文宣洗脑成出卖香港,从此温和泛民失去支持,结果导致极端派崛起。从此泛民不敢和中央沟通,所以越来越极端。

但是政治现实是香港需要和大陆沟通和妥协,为什么这些号称高智商,学历高的香港人竟然会去仇恨中国。
还有当初泛民反对逃犯条的时候,其中最核心就是担心林郑会受不到中央压力,将香港人送去大陆受审,但是今日为什么珍惜香港这类香港人竟然会叫林郑去送一个无罪的香港人去台湾受审。此例一开,林郑一样可以送香港人返大陆受审,而且是在没有法律基础下送去外地受审,我就想问珍惜香港,当初你们泛民为什么反对逃犯条例,为什么你们今日又会支持这样的无法无天。
19. 珍惜香港
2020-11-24 11:02
珍惜香港2020-11-24 11:02《心境》

很高兴见到一些熟识的名子,除了 Joe 兄,应该是旧网友,新网名,可以的话,给些提示吧?

各位风采依然,至於对文章内容的一些评论,我不回应了,因为《初心》或有后续。不过要声明一点,这并非承诺,免得又给说成是什么口齿诚信之类。总之,有 MOOD 就写,无 MOOD 作罢。

另外,有朋友问我《心境》的来头,其实这是一出陆剧的背景配乐。

传闻中的陈芊芊:心境
20. 给些提示吧?
2020-11-24 11:07
你好, 禾叫欲来, 随心所欲的欲, 随心所欲的来的来。
页数:
我要回应
我的称呼
回应 / 意见
验证文字
 
回应 / 留言规则
  1. 禁止撰写粗言秽语、诽谤、渲染色情暴力或人身攻击的言论;
  2. 禁止以名称/昵称/绰号/同音字等批评或映射任何人士、机构、公司;
  3. 禁止发布有关招聘、推销、广告等内容;
  4. 禁止公开任何个人资料(如电话号码、电邮地址、即时通讯帐号等)。

敬请留言者自律。本网站保留删除/堵截任何留言的权利。

声 明

所有议题/文章由其作者提供,大部份回应/留言是即时上载,少部份未注册为会员的回应/留言会经我们的系统过滤,所有议题/文章/回应/ 留言/资讯及评论并不代表地产资讯网(Property.hk)立场和观点。由於本【地产论坛】受到「即时上载留言」运作方式所规限,故不能完全监察 所有留言,若读者及用户发现有留言出现问题,欢迎以留言或电邮方式与我们联络(admin@property.hk),我们有权删除/堵截任何留言 (删除/堵截留言前不会作事先警告及通知), 如有任何争议,本网站管理员拥有最终的诠释权 。