地產論壇
登入名稱
密碼
頁數:
茶餐廳亂話(655)決戰在五月天
瀏覽人次:20759    回應:19

茶餐廳亂話(655)決戰在五月天

 

湯文亮博士

紀惠集團行政總裁
2020年3月15日

  今早跑完步去到茶餐廳,有兩位熟客在爭拗,究竟美國幾時會推出人權法制裁名單。一位熟客引用葉劉話美國推出制裁名單的機會很微,美國官員是不想制裁任何香港人;但另一位話泛民議員話美國會在五月推出制裁名單,當中包括特首,保安局局長,警隊一哥等人,但不包括CY,令到CY極不滿意。其實,並不是美國會在五月推出制裁名單,而是香港立法會議員迫美國表態。老闆問我的意見,我話一早已經表態,美國是不會推出制裁名單,五月或者會出一份不滿意香港人權報告,來滿足一下那些立法會議員。可惜那些議員死纏爛打,搞到美國現在落唔到臺,或者有少少可能推出制裁名單。

  老闆大娘開盤,如果五月底之前美國推出任何制裁名單,她在茶餐廳請食晚飯,大娘親自製作,費用全免。但如果在五月底之前美國沒有推出制栽名單,晚飯照食,不過大家夾錢。冇人不同意,一於決戰在五月天。

茶餐廳亂話(655)決戰在五月天
1. 十郎
2020-03-15 15:38


      嘩 ! 菠蘿油 ! 菠蘿飽沒有切斷 , 好有心機。

2. 波蘿油
2020-03-15 18:22
香港仍然係美食天堂,間中食個波蘿油,加上一杯絲襪奶茶,同班朋友吹下水,再睇湯博士嘅文章,確係人生一大享受。多謝湯博士的文章。
3. 儒來
2020-03-15 19:00
金華波蘿油及奶茶出哂名,小弟與老板娘陳太每天一定吹一輪,係好開心,只需不足30元已可擁有一間5000多萬既地鋪,茶博士又熱情招呼,但自從自由行客人多左太多,人手,地方配套又不足應付,所以熟客走哂。
呢個便足以政府借鏡啦。

4. 八十後小蟲
2020-03-15 21:10
儒來大哥 :

原來你每天都食菠蘿油!但小蟲飲食清淡一年只食一兩次。今年就一於去大哥你鍾愛嘅金華試吓吧

大哥的儒雅風度,小蟲哪㕷在滿堂食客中也會ㄧ眼認出的,一定😉

5. 儒來
2020-03-15 22:13
八十後哥哥仔,

上次巳請閣下不要玩我啦,今次又來?
你睇下我的重點🇾,我建議政府以上述事故做警惕呀!
我一定都唔儒雅,冇口德將金華開名。
不用去碰我,我也轉場去了X分X。貪佢好坐價錢又大眾化。

6. 八十後小蟲
2020-03-15 22:57
噢,儒來大哥原來你轉咗場,但多謝你介紹香港老字號,小蟲仍想一試😋

x份x尼就少去,記得好似係用塑膠杯盛載飲品喎

小蟲細細條唔怕逼,一向都唔抗拒內地或世界各地遊客一齊嘆奶茶同食包包嘅
7. 十郎
2020-03-17 07:40


      食菠蘿油 , 我有心得㗎。飽皮要脆要甜得啱之外 , 塊牛油係0魂 ,雪到軟硬適中要多帶點硬 ,厚薄適中要帶點厚 , 這樣才有咬口。圖畫中的牛油略嫌薄了一點。


8. 十郎
2020-03-17 08:16


      食品之中 , 好似C兄們話齋 , 最冇益就最好食 , 麵包我最鍾意椰絲奶油飽。麵包師父個個唔一樣 ,“ 尾深”d包食法好似一侵風咁樣 , 食左都唔記得有冇食過 , 知情者話係專登做成咁樣。有一d師傅做到韌一韌 , 咬好耐才吞得 , 失敗。油炸鬼仲衰 , 油炸鬼要香要脆 , 我食過好似豬仔飽再世 , 真係雞肋 , 好慘 ,  E家9蚊/條。我懷疑佢力大無窮 , 將舊麵粉搓死左。


9. 十郎
2020-03-17 09:10


      講開唔停得 , 我去飲茶 , 最怕叫腸粉食 , 我怕d腸粉“削” , 有d“削”到夾唔起 , 我唔嘥野 , 又食唔落 , 真慘。我既做法係試一碟 , 唔掂就永遠唔幫襯呢一間d腸粉。有d師傅仲師爺 , 加少少糯米粉落去 , 韌韌地“雌”住唔斷 , 好似糯米糍 , 豬腸粉標榜“爽滑” 。最失敗莫過於此。


10. 十一哥
2020-03-17 09:30
十哥   腸粉有餡係捉蟲大敗筆、葱花蝦米就錦上添花、猪膏油自溝靚豉油、混醬芝麻就各適其式。

11. 引刀一快
2020-03-19 03:54
十郎,腸粉加強口感係溝馬蹄粉。另外,中醫有句:甘、脆、香、濃乃腐腸之藥。

十一仔,腸粉嘅餡點會係捉蟲,餡嘅水平係關鍵,大灣區嘅半夜剛離肚豬雜,切厚薄同粉漿熟嘅時間相若,豬膶豬腰口感、加咗馬蹄粉嘅粉皮索咗肉汁,渾然天成,係打更佬專享,同飲早茶果班食到嘅,兩碼事。
12. 儒來
2020-03-19 10:59
八十後小蟲哥哥仔,

吃波羅油之享受,已由樓上十郎兄具體說出,我也不必多口水,熱杯奶茶更是孖寶兄弟,我轉場是不得矣,因為坐了15分鐘左右便要結帳,冇左果種嘆的味道。
13. 十郎
2020-03-19 12:01


      儒來兄 ,講開奶茶 , 我又有野講。以前飲唔到一杯靚茶 , 起碼唔啱我。後來在筲箕灣一間茶餐廳搵到 , 佢用有耳杯 , 最絕係有一個大蒸籠蒸著d杯 , 沖一杯取一個 , d奶都要熱住。因為d茶沖落一只凍杯同凍奶 , 溫度立即急降 , 影響口味好大。

14. Philip wong
2020-03-19 12:31
以前一直以為香港的奶茶,是全世界獨有的最美味飲品,后來去緬甸旅行,發現在緬甸街邊巷頭,到處都有奶茶供應,味香而濃,一張矮櫈,圍在小檔口,五蚊港幣,可享有一杯十分美味的奶茶,當然也可以選擇咖啡,那種咖啡、奶茶幾乎是緬甸人的全民文化,比香港的奶茶文化之普及更甚。
15. 儒來
2020-03-19 13:37
十郎兄,
請告訴我街名號碼,我會抽空去試飲,好的奶茶真的一杯難求。
去不了緬甸,筲箕灣也不太遠,反正遲D可以2元交通。
諗起也開心
16. 十郎
2020-03-19 13:46


      飲奶茶 , 會上癮㗎。餐廳d奶茶係由幾種茶葉混合而成 , 可以話間間舖頭都唔同。茶葉之中 , 有些有味好“鞋” , 有些冇味好滑 , 有些有色有味 , 老闆魔術師攪埋一齊 , 佢話家傳秘方。


17. 十郎
2020-03-19 13:58


      儒來兄 , 這是盤古初開的時代 , 我都好懷念。以前d人才有呢d時間同情懷。

      我還有一個壞習慣 , 每見到燒臘飯店或者茶餐廳 , 都要入去食一碗燒鵝瀨粉 , 我要搵出一間最好食的 , 呢d係童年回憶 , 以前d人好有心機攪食物 , 攪出名堂就等於識印銀紙。威靈頓街就係咁。


18. 儒來
2020-03-20 10:22
十郎兄,

你挑起小弟喝欲便説一句盤古時代?
空歡喜一場。
至於燒鵝乃,好多餐廳以鴨代鵝。
幾年前小弟出筲箕灣地鐵望7仔出口有一間新開專門鵝店,我便入去試下,60元一碗鵝飯,不算貴,但上枱肯定是鴨,我眼神堅定告訴茶博士,你肯定是鵝嗎?他入廚房跟手換一碗真鵝。小弟細路哥時假假地在街市踎過差不多十年,走不了法眼。
19. 引刀一快
2020-03-21 06:29
儒來兄

如果打住燒鵝嘅餐廳以燒鴨頂替,我諗呢間嘢今日應該已經消失咗,呢樣嘢喺以前嘅燒臘行內好多,有啲仲會塞舊肥豬肉落鴨頭扮鵝。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。