地產論壇
登入名稱
密碼
頁數:
借地不是捐地
瀏覽人次:22418    回應:1

借地不是捐地

 

左丁山

2020年1月20日

  香港自去年六月發生反送中修例運動之後,社會撕裂,黃色藍色互鬥不休,林鄭政府斷錯症下錯藥,以為年輕人上街係因為冇錢買樓,輪唔到公屋,心內怨憤之故,於是放寬八百萬元以上樓宇之按揭上限,最高可借錢九成,同時又向地產商施壓,強力遊說捐地興建過渡性房屋。地產商心領神會,於是擁有農地甚多之新世界、恒基、會德豐及新鴻基先後宣佈捐地,合共加埋可提供起碼一萬伙過渡房屋,各大地產商之中,唯獨是長實冇乜動靜,於是一啲藍絲又有嘢講,諸多意見,要長實表態。

  所謂社會責任,各有不同詮釋,長實集團素來透過私人擁有之李嘉誠基金會做善事,歷年捐款過百億元,係本港富豪家族之冠,近月為咗幫助受重大打擊嘅餐飲業,喳一聲就派錢十億元,派錢速度之快,手續之簡單,前所未見,餐飲界人人讚好,又唔見其他地產商跟風?有農地就捐地,有銀紙就捐現金,各自表述,豈不更合乎自由選擇原則?

  前日在德輔道中行街,碰到測量師C。2000年新年前佢離開大公司,自立門戶做老闆,對香港地產市道繼續睇好(呢個時候創業,梗係要有樂觀態度嘅),左丁山唔問佢生意如何嘞,只問佢一句:「你對地產商捐地有何睇法?」測量C立即糾正:「你講捐地,係錯嘅,報紙係咁講捐地,亦係錯嘅,捐地即是放棄晒對一幅土地之擁有權、使用權,送晒畀政府。但白紙黑字嘅事實就係地產商借地,不是捐地,恒基新鴻基等借地畀政府興建過渡性房屋,皆有到期條款,一般係8年,即係話政府攞到幅農地,搞三通一平之後,興建臨時性房屋畀公屋輪候冊上之人士搬入去居住,六至八年後,佢哋可以上樓入住公屋,免卻在輪候期間,捱劏房貴租之苦,計劃係好㗎,幫到有需要之人,但竅妙在8年之後,政府一定要能夠有足夠公屋,畀住在借地上過渡房屋居民可以上樓。」左丁山立即接住問:「到時唔夠公屋,呢班居民上唔到樓咁又點?」測量C話:「你都諗到呀?到時如果上唔到樓,居民唔肯走,咪有強行拆遷囉,之不過,地產發展商夠膽如期收回借地咩?」梗係唔敢啦!8年後收地雖有法理依據,但到時輿論會講人情,唔講合約精神嘅嘞!原來借地都有風險,然則利益何在?測量C騎騎笑:「到時生農地已變成熟地,拆咗過渡性房屋,可以立即起私樓,幾妥當!」哦!拉闊啲畫面睇,借地又幾高招喎。

借地不是捐地
1. 引刀一快
2020-01-23 14:51
https://mp.weixin.qq.com/s/WgSTkYERyP0pTbwjsM9s_A

呢啲叫做“解鈴還須繫鈴人”
豬年用豬瘟整你唔死,鼠年用竹鼠蝠鼠海狸鼠整死你。
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。