地產博客 > 絲絲細語 返回
瀏覽人次:26060    回應:2
絲絲細語

豪宅無錢莫睇

 

左丁山

2020年11月24日

  老闆P司機車左丁山到九福同老闆P飲茶食蝦餃,講起抽新股與螞蟻IPO,老闆P話佢認為螞蟻必要擁有,借咗好多孖展去抽,點知螞蟻IPO被中央叫停,乜錢都賺唔到,好彩證券行話唔收孖展利息,佢都冇乜損失。左丁山問佢有冇買iBond,佢話每一手iBond利息,唔夠在九福食三碟點心!這個當然,iBond係政府送畀中產,自然不入老闆P法眼。

  老闆P話去年為咗買一間屋畀阿爸住,周圍睇樓,卒之在大埔區買咗一間獨立屋,正在裝修,要特別為阿媽設計,客廳飯廳、浴室,沿住牆都有扶手,以防止阿媽行路跣親,老人家跌倒骨裂,好麻煩嘅啫,老人家最怕一個唔覺意跌在地上,隨時骨折,一定要入醫院做手術,有排先至復元。左丁山話:「駛唔駛去房協長者屋參觀吓,參考房協為長者精心設計之居住設施?」老闆P話又唔駛咁大陣仗,為阿媽即係為自己,因已年近六十,他日亦會搬入阿媽間屋。

  因為去年至今年第二季睇得樓多,經紀與佢相熟咗,不停叫佢去睇豪宅,最近有一個樓盤,呎價在六七萬元之間,於是遊說老闆P去睇吓鍾唔鍾意,但要首先出一張銀行本票二百萬畀發展商律師樓,先至可入內。老闆P對經紀講:「我銀行今日啱啱有二百一十萬存款,有資格買一張二百萬本票,但買本票要手續費,睇完唔買,律師樓幾耐先至可以退番本票畀我?好麻煩啫。買得起億幾兩億銀一個單位嘅香港人(依家冇晒大陸新客),你地電腦大概有晒資料啦,駛唔駛要睇本票呀?」

  經紀無言以對,其實先收本票後准睇樓呢一招,係要用嚟阻止無聊人齋睇唔買嘥時間啫,但正如老闆P咁講,買億幾兩億嘅樓,身家應有二三十億起碼,經紀應該識得不少,知道邊啲係石九公充斑嘅啫,根本難以出現無聊人踩爛示範單位嘅境況,真正有幾十億身家之人邊會有興趣買張二百萬本票嚟睇樓噃!基本上,睇豪宅先要交本票,乃物以罕為貴嘅現象,供應少,內地富豪要求多,超級豪宅於是亂叫天價。美國大明星、球星住佔地幾十畝之五六千呎豪宅,亦不過三四千萬美元而已,未必買得起香港山頂一間獨立屋。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 經紀無言以對 2020-11-24 11:00:14
反應慢,點會無言以對啫?呢啲咪叫滯脹囉,又唔肯平買,又唔俾人睇,咪冇交易囉,冇交易咪貴囉。
2. 十一哥 2020-11-26 09:36:34
美國名D幾千萬所謂豪宅、價值在實體…建築裝修、香港價值在…路畸唇。