有老友問我做了地產咁多年，雖然冇乜成績，但多少都學到一些皮毛，可唔可以講最強的銷售策略。我話這個世界沒有最強的銷售策略，因事制宜就是最強，如果見到市況不佳，仍然抱殘守缺，唔改變銷售策略，即是唔肯減價，想賣得出都艱難。不過話分兩頭，很多時減價並不是最好，加價的效果反而更佳。如果減價，打算買樓的人會認為業主仲有得減，寧願等多一陣，但如果加價，買家擔心業主會繼續加價，如果唔即時做決定，日後恐怕要俾更多錢，近日，有不少追價成交，買家都是有這個心態。
不過，因事制宜並不是最高銷售策略，是兵法中的形勢篇，如果連形勢都唔識睇，就唔好做銷售。
我同老友講，我講出最強銷售策略，他一定唔會相信，很多人亦唔會相信，就是一個字「等」，是對方等，或者是要比較著緊的一方等。以新樓為例，當然是買新樓的人比較著緊，地產商不是不著緊，而是唔能夠俾買樓的人知道，否則就很難賣得出，或者要大減價。
打算買新樓的人有一個心態，就是很興奮，但興奮的程度各有不同，所以，地產商會淘汰那些興奮力度不足的人，辦法就是將那些人集中在一起，叫那些人學葉蒨文唱歌，由下午三點等到十點，如果仲未走代表他們不但仍然興奮，但恐怕力度仍然不足，於是再由十點等到早上三點，十二小時過去，仍然在等的人已經筋疲力盡，但興奮支持他們不倒下，如果地產商願意賣樓，那些人一定會買，否則他們覺得浪費了十幾個小時，好似那些大媽揀平價名牌一樣，揀了一輪，就算唔啱都會買。老友叫我唔好再講落去，否則會被人打。
App下載
