地產博客 > 散文集 返回
瀏覽人次:6494    回應:2
散文集

點解港樓購買力咁勁?啲錢邊度嚟?幾時回流股市?

 

帥哥
東網產經專欄作者

2021年6月18日 (東方)

  近季香港樓市交投暢旺,有股友位於九龍站上蓋的物業放盤數年,一路唔肯減價所以賣唔出,最近竟然合價成交,可見啲購買力真係番晒嚟!

  二手豪宅有人吼,首期相對低的新盤就更加好似唔使錢咁,搶到買。至於窮人恩物--公屋居屋,亦喺新白居二的需求帶動下,頻現高價成交。總之,樓市暢旺,與疫下經濟不景背道而馳,點解會咁?

  首先,全世界「水浸」,銀紙太多,利率超低,持有現金只有貶值一途,刺激物業投資需求。其次係,全球通脹猛如虎,揸磚頭保值,係唔少成功港人的金科玉律,眼見經濟差,樓價卻不跌反升,表現回勇,更能提起有財之士的興趣。第三,樓市瘋狂,是全球現象,香港今年的樓價升勢算是相對落後,不少這兩年按兵不動的購買力,按奈不住,一擁而上。

  此外,近年都有唔少炒家,炒虛擬貨幣和炒股發達,唔想身家蒸發,見樓市氣氛好,買樓收租由虛轉實,一旦博到坐2、3年樓市唔爆,話唔定屆時沽貨又可以執番一大筆。

  另外,仲有一個心態,就係如今全世界都資產泡沫化,有基本經濟知識和投資概念的人,都不難理解,眼前泡沫難長,但大家都冇水晶球,唔知個泡幾時爆。反正,全球攬炒是遲早問題,滅亡前的市況永遠係最瘋狂,可以豁出去盡情炒,曾經擁有都是美好的。反正最終大部分財富效應都會隨着爆泡而蒸發,全世界都難幸免,欠銀行錢,大不了4年後又一條好漢,生意難撈,一於以去盡槓桿投資,錢搵錢,博一博冇頻撲。當然,呢種係末日投資心態,不要得,但卻又不脫眼前現實。叫人量力而為,不要冒險,跟在大食會叫人節食,一樣咁唔受歡迎!

  股樓股樓,樓市有大起色,股市幾時可以再起航,打破上落市格局?筆者認為,內地對於去槓桿的取態明顯,A股升勢受限,中資股佔比重的港股變相亦難突圍,炒股唔炒市仍為主調。所以唔少人都經已頂唔順港股悶局,轉炒美股。股民可能都要調整吓心態,別老是睇指數表現,專心發掘個股出擊更實際。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 鳥6 2021-06-19 14:50:23
林南冧居然仍然未被東方炒?不可思議。   應該把林先生的樓評放在娛樂板比較合適。笑死人🤣🤣🤣
2. 淡友真面目 2021-06-20 09:36:49
無論改筆名叫「冧冧冧」定係「帥哥」,都只係主觀願望,男人幾時會希望可以企喺度屙尿?因為與生俱來,只有樣衰成日想變好樣囉。

呢個世界通常事與願違,呵呵!