著名经济师陶冬博士（瑞信银行）入市买入擎天半岛一个单位，以2,200万元买入一个六百几尺（实尺）单位，可能系一个市场讯号，因为陶博士在2011年极力唱衰本地楼市，身体力行卖楼收现金，信自己嘅分析。点知十年来楼市冇跌到，陶博士眼镜破碎之余，肯认输，再度入市，即系表示佢睇好啦。唔知呢次佢会唔会又睇错呢？
唔会啩，根据官方数字，城市中原领先指数，本地楼价上升，前星期上升1.65%，逾三年最劲，南华早报於5月1日报导，香港豪宅租金高昂，比纽约高出五成，达到6.7美元一尺，一万美元只租到细於千五平方尺，同样价钱在纽约可以租到2,250平方尺，伦敦平均豪宅尺租系4美元，新加坡系3.3美元。
香港楼市有买有卖，不少人移民之际，楼价不跌反升。上星期五左丁山下午两点半后行经IFC，碰到恒地发售The Henley，IFC系佢地主场，只见人龙由一期入口排到去四季酒店外天桥，真系唔信统计数字都要信吓对眼。
香港新楼为乜咁劲？2019至今，经济差，疫情未消，失业率高，移民者众，照计楼价系要跌嘅，但香港住宅土地供应不足，已成全民共识，大家又唔相信特区政府会放弃高地价政策、压抑楼价，一於有楼就抢，加上超低利率，预期通胀升温，楼价有乜办法唔升！况且林郑早已宣布新开发土地七三分配，七成公共用途，三成供拍卖，一反过去六四成之惯例，即系表示未来土地以兴建公屋为主，买私人新楼要趁早。
如此背景下，讲惯政治嘅叶刘淑仪突然在立法会提出葵涌之货柜码头出现供过於求，竞争力减退，不如减
少码头面积，腾出土地300公顷兴建房屋，解决本地房屋问题。叶刘好少讲脚踏实地嘅建设计划，如此发言，令人愕然。不过此议几年前已有周梁淑怡丈夫周明权（已故）提出，政府当作听唔见，今日不知如何应对了。在货柜码头起屋，快过明日大屿嘅发展大计啩？香港货柜码头吞吐量确系连年下跌，由2010年嘅1,710万个货柜下滑到2020年嘅1,446万个，十年下跌咗15.5%，世界排名已经去到第9名（按：97前曾经系世界第一），货柜业务不断被深圳、广州抢去。睇数字，货柜码头让出部份土地嚟起楼，系有逻辑嘅，问题系林郑政府有冇魄力，有冇新思维啫。
App下载
