地产博客 > 丝丝细语 返回
浏览人次:20458    回应:1
丝丝细语

买楼等退休

 

左丁山

2021年2月15日

  左丁山本来就唔兴四围去拜年,今年因政府唔鼓励有大型家庭集会,更加冇兴趣去拜年,整个假期预备留在屋企睇报纸、刨马、读吓书。当今智能手机流行,年卅十晚十一时过后,手机WhatsApp涌现大量朋友贺年短讯、短片,尽是从互联上取材嘅。要逐个覆几花时间,自己又唔识自互联网copy and paste,只好借此一角,向各位朋友致意,大家牛年顺景,身体壮健如牛,事事顺遂。

  一位朋友今年退休,前一排见滙丰有一个调查,指普遍香港人希望退休时,有470万积蓄,能享满意退休生活。呢位朋友C短讯话:「我睇曾智华批评过470万退休金完全唔够使,你认为点呢?」朋友C有自己楼,早已供满,自住唔忧冇瓦遮头,几好吖,问470万元够唔够?又几刁钻!唔知滙丰如何得到呢个数字。写够500万元嘞,65岁退休,活到90岁,今时不是奢望,朋友假设还有25年时间,500万元如放在存款户口,目前几乎系零息,每年用20万,每月用16,666,够唔够呢?如果要有菲佣,订齐收费电视节目,Netflix及出外饮茶食饭等等,梗系唔够用啦,如果还要租楼就更加唔够钱用。在香港退休,想生活安定,第一件事就系要有一个单位自住,否则退休后畀租畀到惊,精神紧张,易生病痛,拎400万去买股票,留番100万傍身,买一啲高息股,例如6823香港电讯,现价约有七厘息,一年收息28万,梗系好过每个月搣本金来过活;但买股票当然有风险,好似滙丰咁,以前每股派息4元,小股东唔知几爽,但2020年突然受监管机构所逼,唔派息,退咗休嘅食息股东当然喊都无谓。买公用股收息,突然冇息派嘅机会比较低,值得退休人士考虑,要讲多一次,假设自己退休有楼自住,年青时便要节衣缩食去供楼,以待退休。今日香港经济不景,买新楼仍然有咁多人,一般认为系超低利率所至,但左丁山以为其中一个大因素就系买楼自住长揸不放,等退休,系两代香港人嘅共识。地产发展商其实对此知得更清楚,疫情之下,楼价跌得轻微,系可以解释得到嘅。香港除咗楼价高、租金贵之外,食物与交通费与外地城市比较,其实相对便宜,退休人士大多有二元乘车优惠,老咗仲食得几多吖!

 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 龙虎豹 2021-02-20 07:37:42
要讲多一次,假设自己退休有楼自住,年青时便要节衣缩食去供楼,以待退休。今日香港经济不景,买新楼仍然有咁多人,一般认为系超低利率所至,但左丁山以为其中一个大因素就系买楼自住长揸不放,等退休,系两代香港人嘅共识。
……………………………………………………………………
话需如此,有几多后生肯节衣缩食为十年后打算?

楼系少部分人先可拥有,古今皆然。