地产博客 > 文亮语 返回
浏览人次:65297    回应:94
文亮语

股市大冧,会不会是细价楼爆煲的催化剂

 

汤文亮博士

纪惠集团行政总裁
2015年7月9日

  有已经离去网友以挖苦态度留言,大赞林一鸣睇股市,楼市都咁准,我绝对同意,不过,林兄虽然是叻仔一名,但始终太过锋芒毕露,在叻仔排行榜只是排第三,如果林兄要讲股票,就应该要等566复牌才讲,否则,讲到天花龙凤都冇用,俾人问一句便立刻哑口无言,现在连新华社都话中国政府救市无效,面对中、港两地股市又大冧,现在话股市进入熊市,咁样讲话阿妈系女人没有分别,但最奇怪竟然得到我那位离去网友大赞,林兄始终有相当魅力,这点我自愧不如,认命。

  如果讲楼市,最好等8月14日才讲,现在形势有变,楼市出现了催化剂,平稳楼市可能会急速下跌,甚至爆煲亦不出奇,催化剂是什么我唔讲大家都应该知道,就是近日股市大跌,有不少挞订个案出现,包括以市价出让的新居屋,在二手市场上亦有不少类似个案,但以现行计算方法,那些取消交易个案早已计算在指数内,不能够被推翻,所以,我认为就算我输,都只不过是输在制度上,如果把那些挞订个案 ,鹿死谁手仍然是未知之数。不过,无论如何,赌约是以8月14日的中原指数为准。

  近几日我问过最近买了细价楼并且已经成交的人,十之八九都会话,如果时光倒流,他们情愿没有买楼,大家千祈唔好觉得很奇怪,唔信问吓身边在近几个月买了楼的人,我再问他们的始末因由,当中有一些话如果没有买楼,就可以买股票,一定会大赚一笔,另外有些人已经感觉到细价楼已经转势,又听到不少挞订个案,虽然现在所买楼宇市价比买入价高,甚至到8月14日的时候仍然高於买入价,但地产商源源不绝供应量,细价楼想继续升都难,要番钱好过,已经买了楼的人有此心态,未买楼的人又会如何。

  我写「细价楼爆煲论」的时候,财务公司是爆煲的主要原因,但在楼市上升轨迹中,六个月是不够时间令楼市爆煲,但在复活节后形势急变,股市人话大时代来临,细价楼业主应利用物业加按,迎接股市大时代,现在大时代变成大春代,即是春秋战国时代,立立乱,把握得好当然赚到盘满砵满,不过,大多数将物业加按迎接大时代的细价楼业主就损失惨重,财务公司已经开始追数行动,是否会令楼市下跌,大家请拭目以待。

 
 
我要回应
我的称呼
回应 / 意见
验证文字
 
回应 / 留言规则
  1. 禁止撰写粗言秽语、诽谤、渲染色情暴力或人身攻击的言论;
  2. 禁止以名称/昵称/绰号/同音字等批评或映射任何人士、机构、公司;
  3. 禁止发布有关招聘、推销、广告等内容;
  4. 禁止公开任何个人资料(如电话号码、电邮地址、即时通讯帐号等)。

敬请留言者自律。本网站保留删除/堵截任何留言的权利。

会员登入
登入ID 或 网名
密码
1. Financial Analyst 2015-07-09 08:38:55

To be honest, I don't think luxury apartment can be immuned from the crisis if small cap flats are being sold off given the much higher price premium of luxury flats. Small cap flats only worth 3-5m, if their values lost half, it was about 1.5-2.5m only(but I can still recieve a proper rental). For the luxury flats, they worth at least 30-50m. If they lost 30%, it would be about 10m-15m(rental yield is low).............

So, if i have both, i must sell the luxury flats first.....

大家请拭目以待...

 

 

 

 

2. 笑啖渴饮 2015-07-09 09:19:21
笑死人咩博士, 我系公司大大声笑左出黎呀大春代。
BTW, 喜见博士细爆论重燃希望,
4. 引刀一快 2015-07-09 09:28:02
股市冧只系序幕,后面陆续有来,细价楼爆硬。
5. 无奈 2015-07-09 09:32:45
好文章,尤其是尾段。就是喜欢博士写文的风格,花样百出。赞!
6. 细价楼必爆 2015-07-09 09:39:56
明白,大春代=春秋战国时代。哈哈!
博士好嘢!
7. hifi 2015-07-09 09:42:55

迎接人造赌卓大时代,五穷六绝七跳楼,班人送你到西方极乐无人怨,政府高官仲帮手后面帮你一把,反而叫人小心楼市就比人闹。

8. 舍神 2015-07-09 09:49:36

我同意细价楼是位高势危, 爆是迟早的事,亦完全同意博士早几个月不是买楼时。

只是为博士6个月打赌有点担心, 是timing问题, 但买唔买的结论是一致的。


卖楼对好多人来说即是割肉, 常人是下不了手, 惟有专业炒家。

楼市要d人供唔起, 走头无路,断供, foreclose, 银主盘......等... 冇半年以上, 不能毒发身亡!

股市下跌, 蒸发大量财富 (其实是proxy of wealth), 影响是即时, 但可惜政府出招后, 成交太少, 对整只大船影响不大!另外整体借贷成数不太高, 像97年一人hold 多层楼的状况大不相同, 97年10月后98年初仲有小阳春 至年尾先大趺!

如博士定一年之约, 胜算甚高! 

但要一个月多d.....14/8, 即使股市续跌, 我想只也得3成胜算 !


9. 丸子 2015-07-09 10:07:14
  1. 其实,博士分析到楼市大势方向,已经对我们受益良多,8月是否指数下跌我觉得冇乜所谓,毕竟投资楼市会看长线方向为主。根本网友们心水好清,明白数据的整理来源,不会被蒙蔽而只是作参考,重要的是市场大围行为方向才最重要。故此,过来人智慧经验的分析,我觉得更加重要。
10. law student 2015-07-09 11:12:15

近日觉得博士大方向估得无错, 但要煞停一列行驶中的火车, 需要的时间被估计所需时间为长, 其实不足为奇. 若把8月14日改后3个月, 胜算可倍增.

11. 离你而去的不是朋友 2015-07-09 11:21:24
博士, PP有料就去论坛发表文章啦! 你都叫佢哋独立D, 成日寄生在你的网中做反派, 边薯真系赞林生?!
12. 山高云低 2015-07-09 11:29:44
得知博士8月1号有个讲座予某银行家及银行客户。小弟有幸在被邀之列。可惜那段日子与家人远行。不能一睹博士风彩。实一憾事!
万望博士把精华撮成文章,予众人能在网站欣赏。HB
13. Johnny 2015-07-09 11:31:58
建议博士唔好再咬住林一鸣唔放,平心而论,不喜勿怪!
首先作为一名读者,只会睇事实与笔者的预测对比是否准确。事实上林生预测细价楼升爆边已经中左,而佢其实系几个月前已经睇港股会转熊,只不过比A股大牛市拉住跌唔落,而家A股PK港股立即遭殃,中晒。
对照博士既爆煲论,虽然set左好多假设,又话如果政府唔出招,如果细价楼继续狂升就会跌,事实上条件唔符合所以跌唔落云云,虽然都算讲得通,但系大部分读者点会理你甘多假设?而且做预测本来就系要将所有既假设考虑晒先给出一个判断,set晒甘多假设难免比人一种“你讲晒啦”既感觉。
对比两位的文章,林生一直没有直接反击或嘲讽博士,仲反过来话博士系做好心劝告实力不足既人咪夹硬上车,而博士就下下咬住566,又话人教坏人高位入细价楼害人乜乜物物,普罗大众比较两者,高下立见。
14. Alan Pepper 2015-07-09 11:35:16
Heard a few people urgently remortgage their homes to cover margins or buy stocks... this is obviously not statistic, but maybe an indication??
15. 路人甲 2015-07-09 11:40:07

香港地, 房屋一直解决不了.
总是听到楼梯响, 还未见影....
博士经常说增加供应, 这点我不否定; 但系, 好似仍然系求过於供.

之前曾荫权乜都唔搞, 已经大落后了几年, 所以呢10年8年都唔会增加到什么供应.
去到思歪才搞, 已经迟了好多步了.

16. chinamanfung 2015-07-09 12:05:20

非常同意 Johnny 兄的意见!

我觉得博士一提出与林博士的比试一刻已输了,往后令人感到汤搏士是那么在意此输睹,再输多浸。即使细价好运地下跌,都已是输了。

此终两位博士只是叻人,但并不是神!




17. 汤文亮 2015-07-09 12:47:21
楼上两位,
我早已受蔡东豪所托,不再提林一鸣,但有一个大前提,就是网友不要用林一鸣的名字在网上攻击我,昨日pp提及,我一定要反驳,至於566,林一鸣有责任向公众交代,已经停牌两个月,不少人输了很多钱,你们大概知道,林一鸣是566CFO。
pp,
请你不要在我的回应箱内挑拨离间,你自己亦有专栏,你钟意点写都可以,拜托
18. 打工仔 Andy 2015-07-09 13:15:47
A 股是系统不成熟及炒过龙的结果! 希望佢地可以完善一下, 明天会更好! 
我都相信今次股海翻波事件会响楼市, 但又未必会大跌喎!
19. CD一ROM To 13 Johnny 2015-07-09 13:38:25
讲得很好!完全讲出我地呢啲CD一ROM嘅心声。
20. 丸子 2015-07-09 13:47:40
感谢博士一直无私的分享,感恩有前辈肯教导我们(我是70后)。如果大家以互相尊重的态度分享,实在是大家的福气。
21. 无知妇孺 2015-07-09 13:49:01
To 13/F

看事情不要单看表面,林一鸣博士是估中了细价楼单边爆,可这个事实全论坛都知道的,包括博士自己也心知肚明,可身为公众人物发表公衆言论,须同时考虑到对市场所造成的影响,如一个人只考虑提升自家身价,而妄顾公衆利益,这样算什么君子?汤博士声讨小人,又问题何在?想安逸做人,最重要是分清敌我,切寄把间碟当盟人!
22. 学人 2015-07-09 14:47:46
好同意博士所讲,566系大剂到无泡。股票市场太多高级骗徒(容我称佢地为骗徒,因为同呃阿婆买伦敦金无分别),欺诈散户。作为CFO唔上身边个上?
23. 细价楼必爆 2015-07-09 14:48:40
细价楼爆边?不要误导啦!我只看到有几条盲毛用不合理兼创新高的价去买一些3拾几年既细价楼咋!(我讲系得几条)那有爆边呢?!
24. 华特 2015-07-09 15:07:21
我觉得博士在意网友对林生的意见,只是希望大家不要盲目跟随一些评论员的预测而做一些后悔万分的决定,譬如夹硬搵财仔帮上车,其实用心良苦,情况有如阿妈叫个女唔好同个浪子一齐,不过个女未必领情,觉得自己驾御到浪子,仲嬲埋阿妈。我觉得人贵乎徳,博士可不必介怀网友意见,大部分人其实感受到你用意,在下亦觉得你德行高尚,保重身子
26. 良心业主 2015-07-09 18:15:43

        我早在两个月前已表示楼市在今年内必会有所调整,主要原因是由零九年至今,楼价不但没有调整,近一年多以来,反而加促上升,而且幅度颇太,远超一般市民的加薪幅度。现在是消耗市场的剩余购买力;另一方面、四月期间股市大幅上升,亦抽走一部份资金;再加上加息预期,理性分析是不应在现阶段买细价楼,因为值博率不高;供应量正续渐增加,租金回报更是愈来愈低,风险系数较高。。

        我很同意博士提出细价楼爆煲论,只在提醒市民当中存在的风险,现在入市人士当中,佷多是危机意识较为薄弱的一群,他们底受不了楼市长期上升,错过了赚钱的机会,而忽略了蚀钱的风险。当市势逆转时,过程可能是漫长而痛苦的。我并不是说现在绝对不应入市;而是在资金充裕、能力范围许可、又能通过压力测试的情况下,选择较市价低的楼花,才可考虑入市。

27. 按居 2015-07-09 18:53:33
喜见博士文章创意无限 - 我想现在唔只「大春代」,可能是「大秋春代」!

博士仍然咁有火... 送你一首歌:
农夫  《Sam歌》

「...以前话 沉默是金 我惊我转头俾人闹镬甘 
你话笑骂由人 因爲真永是真 
而家唔出声啲人会好易憎你就真 
沉默唔系有胸襟 沉默唔代表中肯...」
28. 新丁 2015-07-09 19:15:11
多谢分享……唱埋落去
时代已经变咗 定系嗰一个香港已经唔见咗
仲边有财神到 搵钱要依正路
拿拿声走去搵嘢做 就买到楼嗰个莫大毛
而家要搵钱要博大雾 太正路听训马路
你今日冇 将来都冇 想买个窗台都要靠父母
现实唔理想 咪索性讲理想唔玩半斤八两
唔怕波士癫过鸡 因为好多时系d人炒老细
讲真 身边人仲边有你讲嘅香港心
铁塔凌云 只系奇闻 个个放假都plan去旅行
除左流感就系游行 冇香港人想留多阵
歌神 有冇可能带我返番去你以前嗰阵
29. 蜕变中嘅懒人 2015-07-09 19:20:03
懒人闭门段旧咕:

会晤会系放孖展2、4、8倍班钱庄大鳄收到风亚爷要去杠杆,预知大煲自己先变空军沽空个市,变成股灾,李克强己早知个中玄机,要班千几家大鳄出钱救市,又唔准其他帮凶沽货走佬,但焗住要先暴力稳定个市,然后逐个空军元凶捉,所以话,中央唔系儍仔,沪港一通班友仔即时起舞,李克强巳算够魄力当机立断,否则迟啲仲大煲。
30. 蜕变中嘅懒人 2015-07-09 19:30:09
懒人谂:今次自制股灾以捉到自己友空军元凶好快落幕,希腊单野多数如博士预料留番喺欧盟,美国借头借路今年都唔加息,开开心心到年尾再战2016,无事嘅,啊弥陀佛。
31. 期待地产论坛文章 2015-07-09 21:17:12
PP, 珍港兄等紧你!

32. 珍惜香港 2015-07-09 21:27:21
珍惜香港

呢几日,手痕痕想写嘢,结果都喺忍住咗。股市连泻几日,而自己又唔沾手股票;写衰,一定俾人话赠庆;写好?中就话啫,唔中又俾人话累街坊。虽然我一向都唔迷信,但一次过俾成千上万嘅人诅咒呢,就真喺想行运都几难罗!今日股市反弹八百几点,要吹下水就依家啦,到听日,容乜易又跌番架!

关於 PP 一小句,算唔算挑衅,就见仁见智;PP 自己,亦心中有数。博士借题出文,都算大方得体嘅,但响自己个回应箱度争拗,就实属不智。点解?上次已经写咗,唔再重复。

其实,大家对「林一鸣」三个字,使乜咁敏感?博士又唔喺同佢有十寃九仇,搞到好似 ALAN FANS 大战 LESLIE FANS 咁,简直不知所谓。依家呢,连亮剑兄都惊埋一份,想 POST 林一鸣啲嘢,都只敢放响陈增涛果边度罗,何必呢?

我认为,一个评论员叻唔叻,唔喺在乎佢估嘅数字有几准,俾你准到连 CCL 果两个小数位都中埋又点?你预测嘅理据,唔合乎现实嘅话,估中都只会害咗信你嘅人。所以点解我话,背后嘅宏观概念,比个结论更重要

林一鸣提出咗一条有趣嘅问题:熊市会否在 11 倍 PE 出现?佢提出呢条问题,真喺好大胆,等同挑战一向为股票长线投资者坚信嘅价值投资理念。早排我响朋友面前,对股票嘅价值投资亦提出过质疑,搞到差啲俾人闹。

林生话,港股响 11 倍 PE 进入熊市,喺有可能嘅。而熊市,即喺高位下挫 20% 或以上,以恒指今年高位 28588 点计算,就喺要跌 5718 点至算喺熊市喎!咦?寻日个市最低位,真喺跌到 22836 噃,同林生嘅预测,只喺差 34 点咋!哗!林一鸣,唔通真喺神人?不过咁噃,今次跌市,根本就唔喺因为佢讲果四点长线因素啫!所以,冇法啦,林生俾汤生串,都无话可说罗!

嗱!我咁讲,喺唔喺好过串林生 566 单嘢呢?做人,应该要有啲风度,上面 22/F 位人兄,未审先判,随便话人地骗徒,就真喺冇乜风度啦!21/F 仲离谱,为咗公众利益,就可以讲大话架?都话,行直线,讲真话,从来都唔会有问题咯;玩曲线,同玩火冇分别嘛!

讨论,喺要针对个议题,唔喺针对人。正如林一鸣提出果四点长线因素,的确不容忽视,至於有冇佢讲到咁严重,话由一线城市,跌成二线城市,我就好有保留。不过,佢讲嘅因素,引申出价值投资最大嘅弱点,而呢个弱点,亦同时喺我早排响朋友面前,对股票价值投资提出质疑嘅原因。

股票,唔喺实在嘅资源,所以佢嘅「值」,喺一个变数。正如我响资源论度话,一斤柴燃烧嘅时间,唔会随著柴价嘅升跌而改变,因为一斤柴,始终喺一斤柴,但喺股票,就冇呢种「绝对值」嘅特性。特别响一个好似香港咁国际化嘅市场入面,上市公司嘅市值同 PE,亦会随著环球经济嘅变化而改变。就以希债问题为例,如果真喺爆煲,咁响一系列撇账之后,恒指成份里面嘅上市公司市值,例如汇丰,会蒸发几多?而 PE,又会升几多?以港股今日嘅 PE,作为对股票价值投资嘅长线评估,有几合乎现实?

话说,阿爷「暴力」救市,搞到中资班资回朝,港股大泻。早前我又同朋友讲,话恒指至少要跌番去占中个位,因为黄虫之患果段时间,有闻中资撑住香港个市,唔俾啲坏人乘机攞著数喎!依家历史任务已经完成,又要回水自救,咁跌番去占中个位,都唔出奇吖?唉!结果,又喺俾人闹。

不过,唔知阿爷「暴力」救市,有几「暴力」?我真喺睇唔出。或者应该喺,佢叫「你」暴力救市,点样救,就唔该请「你」食自己。吓?咁都叫做救市?真喺救嘅,咪 UNDO 番个去杠杆手段罗!哗!傻架?咁大家仲未明?不过,呢场大龙凤,又真喺几精彩,搞到个个都以为阿爷好似一夜之间,由英明神武嘅亚投行揸 FIT 人,变成一个师奶不如嘅股场白痴。坦白讲,今时今日,深思熟虑,谨慎行事嘅阿爷大大,点会出埋啲咁嘅笑话?其实,鬼唔知,内地股真喺太高,必须要调整咩,骑虎难下啫!赖乜鬼外资?赖乜鬼大鳄?你唔做场好戏,容乜易影响到「党」嘅领导架?

呢个世界,有样嘢,叫守衡定律。希腊唔还钱,自然要搵人填,问题喺,有冇你份?股市大泻,一定会蒸发一啲嘢,就算之后回升,填补番嘅地方,亦唔会喺当时蒸发咗果处,呢啲就喺所谓嘅财富大转移。要了解股市升跌,对其他市场嘅影响,就一定要先了解呢个财富大转移嘅细节,同一切相关嘅人同事。

记得响好耐之前,我话过,楼市已经脱勾股市。依家嘅楼市,喺同本地经济挂勾,但同股市,就脱离咗直接嘅关系。今日香港楼市嘅主流持货者喺自住用家,同长线收租佬,炒家已经绝迹。之前有唔少人,成日话,大陆冧,土豪班资回朝,香港楼市就冧;港股冧,香港楼市跟住就冧。佢地漠视咗真正嘅刚性需求,以为所谓刚性需求,只喺心理需要,会随著市场心理改变而消失。其实,话得喺刚性需求嘅,就即喺住嘅需求,点会消失?最多只会被压抑同积聚,形成所谓嘅需求泡沫,或者法子兄讲嘅,负泡沫罗。

都喺果句,股场蒸发咗嘅,就算回升,都填补唔番。所以,要发生嘅,一定会发生。股市同楼市之间,关系有几大?喺我望到嘅井口太细,定喺其他人无中生有,好快就知。

学博士话斋,拭目以待啦!
33. 按居 2015-07-09 22:38:42
谢珍惜兄用心出文
34. 村长 2015-07-09 22:53:16
比在系我,就担心一线地铺铺租铺价, 同豪宅爆煲好过。
35. 自我陶醉 2015-07-09 23:52:29
To 32楼 珍港兄

真系唔讲都知你唔识股票投资, 更加肯定你对价值投资概念一无所知, 唔畀朋友闹你确实万幸, 呵呵!

PE低过11倍就等於价值投资唔work?  11倍唔可以股灾系点定出嚟?  价值投资概念其实就系要用小过1蚊价钱, 买实际值1蚊嘅嘢,  然后等那些唔识货嘅傻瓜醒觉, 在市场反映真正价值。  如果值1蚊就一定卖到1蚊, 咁嗰啲傻瓜要去边度搵?  如果值1蚊就一定要卖1蚊, 咁价值投资就真系唔work喇!


36. 无知妇孺 2015-07-09 23:53:21
珍港兄

我从来无话过要因为公衆利益而去讲大话,但身为公众人物,就应该了解自己身份对事情的影响力,什么应该讲,什么不应该讲,应拿捏分寸

正如林生身为566 CFO, 明知公司盘数有问题,但碍於自身角色,紧守岗位,这也无可厚非,所以股东输钱,罪不於佢,什么该向股民披露,什么不该披露,他拿捏得非常好。而事实上,他巳用行动提示了大家,於高位把自己的货放了,只是大家贪胜不知输罢了

另外,博士在回应箱内留言,请pp让路,也不过是不想再多生事端罢了,何来争拗?过敏了。亮剑兄避重去其他人屋企放林生的文, 这样很好,令大家舒服,想看的,想讨论的,可以去果边。相反,为何pp一定要进来赠与呢?此举动用意何在?值得深思!
37. 无知妇孺 2015-07-10 00:12:08
另外,我认我C9无知,珍港兄讲既经济硬道理我真系唔太明,我净系知,股市跌20%,我仲输得起,但楼市跌20%,我真系输唔起,所以好多谢博士系年头拉停左我
38. 奇妙 2015-07-10 01:18:52
珍港君,谢过。增广见闻。
39. 奇妙 2015-07-10 01:30:33
爆论后,财贷楼按广告增加了,甚忧,堪忧。
40. 引刀一快 2015-07-10 01:43:18
股市唔好唔稳定,就话“ 楼市已经脱勾股市

股市大涨,就话楼随股涨、套股换楼。

都系陪你少年笔耕,今晚勤力下先。
41. 珍惜香港 2015-07-10 02:16:26
珍惜香港TO:40/F 引刀一快

引刀兄,你又嚟呢套?

楼市脱勾股市,我好耐之前都喺咁讲,仲讲咗好多次,边个话,个股市唔稳定,我至咁讲架!仲有,股市大涨,就话楼随股涨、套股换楼?乜我有咁话过咩?

你勤力笔耕,就唔该认真啲。再玩老屈嘅话,我唔会睬你!
42. 珍惜香港 2015-07-10 03:26:26
珍惜香港TO:35/F 自我陶醉

自醉兄,虽然我唔玩股票,但都唔喺衰到,连价值投资喺啲乜嘢嚟,都唔知嘅。

价值投资嘅概念,喺好 PERFECT。但问题喺,股票,有冇所谓真正价值?呢点就喺我质疑嘅地方。

正如林一鸣问,熊市会否在 11 倍 PE 出现?佢列出果四个因素,就喺要指出,就算今日,港股喺低水,但将来,当经济同企业环境转变咗之后,同一个数字价值,可能就变成太贵啦!

又正如,法子兄嘅衡平比,亦喺价值投资嘅一个参数。记得引刀兄曾经质疑,究竟衡平比,有冇计埋未知或未发生嘅外围因素?今日,某一个价位,计出嚟抵买,入咗货;咁将来,外围因素转变,同一个价位,会唔会变成太贵?入咗嘅货,就成咗蟹货?

引刀兄对衡平比嘅质疑,同我对股票价值投资嘅质疑,概念上喺一样。

仲有,记得我曾经响度,分享过沙士果阵嘅入货经历。对於寜愿抬钱,都要卖走啲物业嘅炒家,我话噤价噤到佢地叫苦连天。但我都只喺形容佢地,喺具炒楼心态嘅人;我从来冇谂过,叫佢地做傻瓜
43. 息魔 2015-07-10 03:37:52
楼市仲有排升,只不过系港老无钱无能无能力买,大陆人大把钱,尤其系贪官哥班,几千百万简直系闲钱,对於陆人来讲港楼加港妞又cheap又平,港楼升硬...
44. 引刀一快 2015-07-10 07:49:31
珍惜香港

呢几日,手痕痕想写嘢,结果都喺忍住咗。股市连泻几日,而自己又唔沾手股票;写衰,一定俾人话赠庆;写好?中就话啫,唔中又俾人话累街坊。虽然我一向都唔迷信,但一次过俾成千上万嘅人诅咒呢,就真喺想行运都几难罗!今日股市反弹八百几点,要吹下水就依家啦,到听日,容乜易又跌番架!(咁你咪即系话你唔得实牙实齿罗,边有人咁讲自己架?)

关於 PP 一小句,算唔算挑衅,就见仁见智白纸黑字仲要见仁见智?);PP 自己,亦心中有数。(所有人都心中有数)博士借题出文,都算大方得体嘅,但响自己个回应箱度争拗 (系人家挑衅上门,喺汤先生回应箱争狕系对方嘅选择,你颠倒咗是非黑白)就实属不智。点解?上次已经写咗,唔再重复。


其实,大家对「林一鸣」三个字,使乜咁敏感?(我唔知边个敏感喎)博士又唔喺同佢有十寃九仇,搞到好似 ALAN FANS 大战 LESLIE FANS 咁,简直不知所谓。依家呢,连亮剑兄都惊埋一份,想 POST 林一鸣啲嘢,都只敢放响陈增涛果边度罗,何必呢?

我认为,一个评论员叻唔叻,唔喺在乎佢估嘅数字有几准,俾你准到连 CCL 果两个小数位都中埋又点?你预测嘅理据,唔合乎现实嘅话,估中都只会害咗信你嘅人。所以点解我话,背后嘅宏观概念,比个结论更重要(你终於知道大陆经济唔好,就算CCL干升都系冇实质意义,终於有段写得似様)

林一鸣提出咗一条有趣嘅问题:熊市会否在 11 倍 PE 出现?佢提出呢条问题,真喺好大胆,等同挑战一向为股票长线投资者坚信嘅价值投资理念。早排我响朋友面前,对股票嘅价值投资亦提出过质疑,搞到差啲俾人闹。

林生话,港股响 11 倍 PE 进入熊市,喺有可能嘅。而熊市,即喺高位下挫 20% 或以上,以恒指今年高位 28588 点计算,就喺要跌 5718 点至算喺熊市喎!咦?寻日个市最低位,真喺跌到22836 噃,同林生嘅预测,只喺差 34 点咋!哗!林一鸣,唔通真喺神人?不过咁噃,今次跌市,根本就唔喺因为佢讲果四点长线因素啫!所以,冇法啦,林生俾汤生串,都无话可说罗!

嗱!我咁讲,喺唔喺好过串林生 566 单嘢呢?做人,应该要有啲风度,上面 22/F 位人兄,未审先判,随便话人地骗徒,就真喺冇乜风度啦!21/F 仲离谱,为咗公众利益,就可以讲大话架?都话,行直线,讲真话,从来都唔会有问题咯;玩曲线,同玩火冇分别嘛!(!)

讨论,喺要针对个议题,唔喺针对人。正如林一鸣提出果四点长线因素,的确不容忽视,至於有冇佢讲到咁严重,话由一线城市,跌成二线城市,我就好有保留。不过,佢讲嘅因素,引申出价值投资最大嘅弱点,而呢个弱点,亦同时喺我早排响朋友面前,对股票价值投资提出质疑嘅原因。

股票,唔喺实在嘅资源,所以佢嘅「值」,喺一个变数。正如我响资源论度话,一斤柴燃烧嘅时间,唔会随著柴价嘅升跌而改变,因为一斤柴,始终喺一斤柴,但喺股票,就冇呢种「绝对值」嘅特性。特别响一个好似香港咁国际化嘅市场入面,上市公司嘅市值同 PE,亦会随著环球经济嘅变化而改变。就以希债问题为例,如果真喺爆煲,咁响一系列撇账之后,恒指成份里面嘅上市公司市值,例如汇丰,会蒸发几多?而 PE,又会升几多?以港股今日嘅 PE,作为对股票价值投资嘅长线评估,有几合乎现实?(董建华一句“八万五”,香港楼价就跌几成,请问八万五呢三个字系几多沙、几多石?)

话说,阿爷「暴力」救市,搞到中资班资回朝,港股大泻。早前我又同朋友讲,话恒指至少要跌番去占中个位,因为黄虫之患果段时间,有闻中资撑住香港个市,唔俾啲坏人乘机攞著数喎!依家历史任务已经完成,又要回水自救,咁跌番去占中个位,都唔出奇吖?唉!结果,又喺俾人闹。(唔系嘛?成个升市其它资金冇参与???)

不过,唔知阿爷「暴力」救市,有几「暴力」?我真喺睇唔出。或者应该喺,佢叫「你」暴力救市,点样救,就唔该请「你」食自己。吓?咁都叫做救市?真喺救嘅,咪 UNDO 番个去杠杆手段罗!哗!傻架?咁大家仲未明?不过,呢场大龙凤,又真喺几精彩,搞到个个都以为阿爷好似一夜之间,由英明神武嘅亚投行揸 FIT 人,变成一个师奶不如嘅股场白痴。坦白讲,今时今日,深思熟虑,谨慎行事嘅阿爷大大,点会出埋啲咁嘅笑话?其实,鬼唔知,内地股真喺太高,必须要调整咩,骑虎难下啫!赖乜鬼外资?赖乜鬼大鳄?你唔做场好戏,容乜易影响到「党」嘅领导架?(你错喇,叫“暴力救市”的确系合适嘅,其实呢样嘢经常喺大陆发生,你对大陆情况唔了解喞,用强权施压强制各种单位作出相应救市行动,叫“暴力”好恰当,平时发生嘅时候系“使阴力”,你睇唔到,今次媒体绘声绘影话拍枱,行动可谓“使尽无情力”)

呢个世界,有样嘢,叫守衡定律。希腊唔还钱,自然要搵人填,问题喺,有冇你份?股市大泻,一定会蒸发一啲嘢,就算之后回升,填补番嘅地方,亦唔会喺当时蒸发咗果处,呢啲就喺所谓嘅财富大转移。要了解股市升跌,对其他市场嘅影响,就一定要先了解呢个财富大转移嘅细节,同一切相关嘅人同事。(系守定律,要清楚一点,守恒定律系讲能量转化,财富呢类抽象事物不一定适用。希腊唔还钱会有报应,报起上嚟我地亦有机会成爲得益者之一,点转移点执位,系超过一般人嘅分析能力所能预测嘅,点了解都有错有对。)

记得响好耐之前,我话过,楼市已经脱勾股市。依家嘅楼市,喺同本地经济挂勾,但同股市,就脱离咗直接嘅关系。今日香港楼市嘅主流持货者喺自住用家,同长线收租佬,炒家已经绝迹。之前有唔少人,成日话,大陆冧,土豪班资回朝,香港楼市就冧;港股冧,香港楼市跟住就冧。佢地漠视咗真正嘅刚性需求,以为所谓刚性需求,只喺心理需要,会随著市场心理改变而消失。其实,话得喺刚性需求嘅,就即喺住嘅需求,点会消失?最多只会被压抑同积聚,形成所谓嘅需求泡沫,或者法子兄讲嘅,负泡沫罗。(香港呢个楼市有相当部份系大陆土豪催化岀嚟嘅,我又学人讲下“矿泉水理论,喺沙漠里面有十一支矿泉水卖,十个人去买,本来相安无事,忽然外面跳出个好有钱嘅人,唔问价买走两支水,剩低9支,十个人都怕喝死,所以叫价叫到200%,开始有人想抢多支水备用稳阵,最后一轮疯抢之后,每个人都抢到水,仲发现原来多咗几支!
原来大家抢嘅时候,有钱人偷偷将水放咗,走埋,有人怕将来买唔到水,离开沙漠,剩番几个抢水“得手”嘅人,以后可以喺沙漠五折买水!)

都喺果句,股场蒸发咗嘅,就算回升,都填补唔番。所以,要发生嘅,一定会发生。股市同楼市之间,关系有几大?喺我望到嘅井口太细,定喺其他人无中生有,好快就知。
(5000点跌到3000点叫“蒸发”,3000点升5000点叫“泡沫”,系咪?蒸发泡沫,系咪?)

学博士话斋,拭目以待啦!
45. 引刀一快 2015-07-10 07:55:50
珍港兄

又正如,法子兄嘅衡平比,亦喺价值投资嘅一个参数。记得引刀兄曾经质疑,究竟衡平比,有冇计埋未知或未发生嘅外围因素?今日,某一个价位,计出嚟抵买,入咗货;咁将来,外围因素转变,同一个价位,会唔会变成太贵?入咗嘅货,就成咗蟹货?

引刀兄对衡平比嘅质疑,同我对股票价值投资嘅质疑,概念上喺一样。”

唔一样,其中一个好大嘅质疑系点解参数要保密?香港买嘢食都有成份列表,完全将参数保密,即系玩水晶球。
46. 自我陶醉 2015-07-10 08:03:48
To 42/F 珍港兄

我当然记得你喺沙士嗰阵嘅威水经历喇, 首先要恭喜你嗰时咁成功发咗咁大笔灾难财先, 简直系典范。 唔知点解, 我谂嘢往往都系同你相反, 我就一定唔会叫当时卖楼畀你既人做炒家噤凉薄, 我亦唔会叫佢哋做傻瓜, 因为楼同股票唔同, 楼系用嚟住嘅必需品, 你知唔知嗰时有几多人连份工都冇咗, 想供楼都供唔起?  你知唔知啲人用自己未来几十年人工买楼, 见层楼日日跌, 有几大心理压力?  嗰时卖楼就系炒家, 咁而家卖楼又系唔系炒家?  请问你卖过楼未呀, 炒家?

所以话你唔识股票投资呢!  唔洗经济转差呀, 行业前景转差, 政治环境改变, 都一样会影响股票嘅价格, 系真正股票投资者都会知, 当价值改变, 当然系要重组自己投资组合喇, 有咩问题呢?  人哋又冇叫你用9毫9去买1蚊嘅嘢, 你用7毫, 6毫先买, 环境有变都大把时间同水位你走喇!  呢个就系价值投资里面安全边际嘅概念。

你话经济转差将来股市价值会变, 所以价值投资唔work, 净系买楼先掂。  如果用你呢个思维模式, 我更加觉得要买股唔买楼。 经济转差会影响股票价格, 也会影响楼价, 你层所谓好有价值嘅楼价值会唔会变? 大家都同时知道经济会转差, 我买股只须1秒, 你卖楼要几耐? 经济有事边个走得快?  你又有冇谂过, 如果你租客一时谂唔开, 喺屋企做傻事, 你嗰层咁有价值嘅楼又会点?  咁又系咪代表你买楼至啱嘅谂法唔work呀?

47. 引刀一快 2015-07-10 08:04:15
To 41楼 珍惜香港兄

40楼写漏咗“好友”两个字,上半截取材于你,下半截部份取材于大好友大宝兄,本来该用“好友”概括两个出处,系漏咗。
咁我就喺呢度加份补充材料,并非两句都取材于阁下言论,在此更正并致歉。

既然你已经作出回应,原文我不更改。

48. 引刀一快 2015-07-10 08:07:49
补多两句,点解引刀咁勤力?系因爲你第二段写得太醒神。否则未必会逐段陪你讨论。
49. 引刀一快 2015-07-10 08:36:33
To 46楼 自我陶醉兄

从正面嘅角度去讲,投资股票可以算系投资自己看好嘅相关范畴,不必相关职业、学历、资格、身份,但系又可以以资金参与自己有兴趣嘅项目,钱够多做大股东仲可以有发言权,除咗经济角度之外,喺兴趣角度亦系一种有质量嘅参与,对自己嘅观察力、价值观同世界观系一种肯定。
50. 赌场买大细,吹涨 2015-07-10 09:02:14
我刀子话,我已买左2年细冇奶油今年重系大,依据而家情况,横掂我在场冇人够我抝,都系口水注,我可以继续讲下去,迟早实有机会开细,问你死未,兄台就算2016俾你买中又何何呢,包拗颈吹你真不涨,无质素。人地系认真出文,阅读者自我评估。睇你年纪应该不细,成熟d  thank you.
51. 引刀一快 2015-07-10 09:41:02
你咪阅读评估罗,你以爲讲D咁嘢有用嘅咩?
52. 不如你直接叫d刀法不一的人禁止入此埸 2015-07-10 10:05:19
有刀大唒
53. law student 2015-07-10 10:06:32

珍港兄.

关於 PP 一小句,算唔算挑衅,就见仁见智;(首先PP果一"小"句算唔算挑衅, 大家心知肚明, 我自己就谂唔到有咩其他用意或讨论价值. 而博士回果一小句我就反而唔明点解珍兄觉得不智)


其实,大家对「林一鸣」三个字,使乜咁敏感?博士又唔喺同佢有十寃九仇,搞到好似 ALAN FANS 大战 LESLIE FANS 咁,简直不知所谓。依家呢,连亮剑兄都惊埋一份,想 POST 林一鸣啲嘢,都只敢放响陈增涛果边度罗,何必呢?(珍兄以ALAN FANS 大战 LESLIE FANS 黎比喻呢度既网友未免有点看轻人, 以我接触, 呢度大部分网友都在自己领域独当一面, 何需当人家fans, 仰人鼻息? 好话唔好听, 我的偶像只有为国为民的大人物, 财经领域的我只会欣赏, 谈不上当谁的fans, 相信呢度大部分网友亦如此)

54. Jerry 2015-07-10 10:26:35

TO: 42/F 珍惜香港

珍兄, 小弟一直欣赏阁下既言论, 因为它能带起有思义既讨论。

关於你质疑既价值投资,小弟有以下想法。何为价值投资? 老实说我也在摸索中。虽然小弟不是一个纯正既价值投资信徒,但相信价值投资系最安全既投资方法。醉兄话假设一只股票值一元, 因为市场的不理性、不识货, 令他可以用低於其价值的价格去买便宜货。有时折扣可能系七折、五折、甚至一折。珍兄的质疑系如何计算一间公司既真正价值? 我用内房作一个例子,珍兄系相信土地才有真正价值(断估), 咁内房既土地储备价值(净动)、在建和在卖的楼房价值(净动)、银行既存款,扣除所有负债, 仍然NAV折让30-80%。另一个例子: 市面有好多净现金公司, 公司扣除所有负债,现金仍然比市值高, 那它又有没有价值? 无论熊市或牛市,市面上仍然有低PE高派息率、年年派息、行业周期变化不大的行业。价值投资者只会当行业前景改变,或价格已远超过其核心价值而沽出。

 

至於林一鸣话以下四个因素会令便宜既港股进入熊市: 1)经济将会走下坡;(2)预计未来企业盈利将会下跌;(3)很多成份股连11倍的PE也不值;(4)该地区在金融市场的地位下跌,例如从以前的一线城市,有机会变成二线城市。

如果林先生言中、咁楼市为何不会调整? 经济差意味著会裁员和减人工,失业率上升、企业盈利下降咁即系租金会下跌、咁楼市仲唔会调整? 所以博士寸佢系有道理。另外、经济逆转, 企业过去买既楼房会唔会系现家呢个高位变现? 另外,用高杠既物业投资者仲会唔会HOLD 住咁多贷,会唔会去杠杠?

珍兄,我想任何投资都很难有絶对价值, 价值会跟著人们的心态改变而改变其价格。我并不是反对资源论,也没有反对楼既真正价值。(我也相信它们是有真实价值) 但如果你没有真实持有价值型股票,而你又去对它作出质疑,这样会否对价值投资者不公平?

55. Jerry 2015-07-10 10:30:30
错别字改成: 珍兄小弟一直欣赏阁下既言论因为它能带起有意义既讨论。
56. 中国式QE 2015-07-10 11:11:53

最近A股及港股大跌引致中国政府暴力救市。减息,降准务求托市,因大陆经济在转形中,中国一定全力救市,最终还可以跟大队印银纸 。这一切说明了一大点就是住后的货币政策将会异常宽松,结果是引致另一波的资产泡沬。

故此我返而看好香港的资产,因此次A,港股大跌香港在各方面比大陆优胜百倍,法治,资产保护远比国内好,宽松货币政策下的热钱更加流入香港买货,因若我是有钱强人都会选香港吧。故此除非股市引致内乱或政权变动,似乎对香港资产有长远性正面影响。



57. 珍惜香港 2015-07-10 11:58:58
珍惜香港

赶出门,先简覆几位:

TO:38/F、39/F 奇妙

奇妙兄何不考虑注册?我有留意阁下发言,例如你写 QE、写无产者嘅悲哀,都好精彩。你又写过星记,仲话饮完早茶,会写埋香记添,不过你好似唔记得咗喎。请多分享!

TO:36/F 无知妇孺、53/F law student

关於 PP 一小句,博士文章首段已经回咗,亦大方得体。我讲嘅不智,喺指 17/F13/F16/F 嘅回应,喺冇必要,而且有引发争拗嘅风险,将焦点移咗去林一鸣度,令原文嘅主旨被分散或曲解。呢一点,另一篇已经解释过,所以我喺出於好意,两位唔好误会。而我写 FANS,只喺比喻,希望大家针对议题,唔好搞到「林一鸣」三个字,响博士嘅主场度,变成禁语。

TO:46/F 自我陶醉

我谂你对我沙士果阵嘅经历,有严重嘅误解。我的确喺响灾难中入货,但我响 97 高峰期,亦有入货。所以,我根本冇谂过要发乜嘢灾难财,亦唔喺要乜嘢捞底。总之,有能力就入,只不过沙士果阵,我更加有能力啫,边会咁麻烦去谂,打后个市会升番定喺仲会再跌?

而我亦最少讲过两次,沙士果啲悲惨故事,都只喺响报纸见到,反而自己遇过嘅卖家,个个实力都唔嘢少。佢地唔喺冇 CASH,佢地啲 CASH,分分钟多过我,只不过,佢地拣抬钱卖楼,而我就拣俾首期入货啫!
58. 引刀一快 2015-07-10 13:13:35
大方得体,系对平辈晚辈嘅评价。

买物业,可以唔考虑升跌:”边会咁麻烦去谂,打后个市会升番定喺仲会再跌?“

珍港兄看来比王健林嘅公子更任性。
59. Oscar Lam 2015-07-10 14:07:41
珍惜香港、自醉、Jerry,

小弟也是一名价值投资者的信徒。首先我认为,不管是物业或股票,均有其价值。但价值本身是一个很主观、很抽象的概念,正因为如此,我们才会用价格去厘定一项资产的价值。任何资产包括珍惜兄所讲的资源,例如土地、物业的价值(或价格)均有机会被高估或低估。价值投资者会在资产价格被高估时沽出资产,会在资产价格被低估时购入资产,这个做法很普遍,投资任何资产都一样。

因此,一项资产是否值得投资,与这项资产是否属於资源无关,关键在於这项资产是否被低估?是否还有升值空间?小弟这二天在苏格兰看到连绵不绝土地,在种草、养牛、养羊,这样的资源,小弟认为投资价值不高,绝不会投资。

至於物业价格和股票价格的关系,影响二者价格的因素虽不尽相同,但二者息息相关,均会受经济影响。如果经济差影响股市,那楼市也不会好到哪里!因此,我们没有必要去讨论投资物业好,还是投资股票好?而是问问自己,自己喜欢或者适合投资物业还是股票?
60. 自我陶醉 2015-07-10 14:17:32
To 54/F Jerry 兄

讲得好!  只当股票系赌博工具嘅人系唔会明咩系价值, 我以前讲过买1只2010嘅股, 当时买1.7附近, 前日跌到1.52, 市值只系22亿, 睇番盘数, 上年底现金已经有19亿人仔, 加埋今年宣布配股两次, 净现金至少有30亿, 即日买起间公司已经执咗8亿, 嗰日PE连3倍都唔到, 仲每年收息4厘几, 呢啲唔系价值又系咩?  靠估嘅人系永远都唔会明嘅!

61. law student 2015-07-10 14:59:11

to 59. Oscar Lam ,

同意"因此,我们没有必要去讨论投资物业好,还是投资股票好?而是问问自己,自己喜欢或者适合投资物业还是股票?"

投资世界五花百门, 就算最专业的投资者, 只要熟悉一两个市场或领域便可. 要投资, 首先要问自己是那一类人, 最重要是找对自己的领域才可事半功倍.

至於投资方法, 各施各法, 唔理黑猫定白猫,只要捉到老鼠嘅就系好猫.

62. Oscar Lam 2015-07-10 15:49:14
To: 60/f 醉兄,

有一只这么好的股票怎么不介绍给我?你可以放心,我不是一名投机者,也会自行评估其价值,并承担风险。嘻嘻!
63. 自我陶醉 2015-07-10 16:41:04
To 62/F Oscar 兄

唔讲得㗎, 我惊你真系买起成间公司, 到时我1手都买唔到就惨喇!

讲真, 一般冇跟开股票嘅朋友, 唔会敢喺嗰啲日子入市, 佢哋见到一路跌, 只会越来越惊, 喺低位先震番出嚟, 仲会闹我一餐, 上次都讲过, 有个亲戚我叫佢2蚊楼下买, 佢唔买仲话我想靠害,所以我真系唔敢乱教人㗎! 

只有真正了解什么是价值投资嘅人, 才会见佢越跌就买得越开心, 而且, 赚钱只系其次, 自己发掘出嚟成功感会更大嘛! 以你嘅专业知识, 如果有心钻研, 功力一定会比小弟高百倍, 待你回港后我们可多交流经验, 到你练成神功后, 还要请你多多关照才对。


64. 自我陶醉 2015-07-10 17:26:08
To 57/F 珍港兄

其实你沙士期间嘅经历, 都唔系咁惨啫, 最起码都仲有能力借到钱买平楼, 点都好过好多人连楼都供唔起, 仲有啲因为一时投资失利要走上绝路呀!  无论你有冇谂过发灾难财, 但始终都系受益者嘛! 唔好再话人沙士卖楼就系炒家喇, 人哋有钱过你佢就系炒家, 如家佢穷过你, 咁你又系唔系变咗炒家呀?  你又会唔会见佢咁可怜, 唔㩒佢价再加多10%畀佢周转呀?

答案梗系唔会喇!  


65. Oscar Lam 2015-07-10 17:45:56
醉兄,

你真会开玩笑!有机会大家研究、研究。
66. 新淡友 2015-07-10 17:53:28
长期不在港,打字亦唔快,所以小留言,但见咁多人出声,亦参与一下。

之前讲过股市会系三至六个月内爆煲,而家好大机会成真。

只要股市一日重系咁多成交,负和游戏之下无论升跌,股市系人民财富既绞肉机,中国过去十年行左一条吊丝打肿面扮富二代既路,而家冇得返转头。
中国式既一窝蜂同内斗,就算人均同外国冇分多,人多起来问题就必然更严重。

引刀有句好深刻的说话,大概系话系神洲大地,做人渣会有好好既回报,好多事都因此被扭曲到外人无法理解既地步,例如早两日申请停牌既公司竟真系可以减小损失,令投资者改沽香港股票,就系一个例子。中国成个社会长期系咁,唔少人被迫参与要做坏人去提高回报既负和游戏,而表面风光重有五六成要靠先驶未来钱,短期内真系好难睇好。

由同上次留言到现在有两点更新:
1, 中国经济最后两大引擎系金融同科技,而家金融好快又会熄火,只剩科技,或者就系而家深圳楼又比人炒到破顶既原因,估计系内幕聪明钱由股市转去楼市,而个人认为深圳会系四大一线中可以回复得最快。
深港最终会同城化,不存在谁被取代的问题,深圳本身就系一个东方矽谷,香港则系老外心中世界第三大金融中心,今次既内地股灾会令外资对香港更有信心。香港作为集资同生活城市既地位会更重要,正如700小马哥都系深圳工作香港生活。想像一下未来既矽谷变同纽约连接,潜力会有几大?不过短期衰退系在所难免,北京同上海或者可以透过吸收其他城市既资料保得住,但政府错误带来既浪费会令佢地长远输比深港连合。

2, 豪宅情况远比细价楼不妙,除左供应外,好多细价楼都系自用,供款亦系小业主可以用积蓄同节衣细食去补,但豪宅就唔得,持有豪宅既土豪业主要出货可以不问价,供款亦唔系买少个袋就可以解决,我估可能细价跌两三成,豪宅跌三四成咁上下,但衰退过后,长远来讲香港同深圳重系好值得投资。
67. 引刀一快 2015-07-10 21:00:03
投资嘅嘢,识得玩果瓣就有价值,唔识唔熟嘅就价值低,系好个人化嘅,讲自己专长嘅好处冇问题,否定别人所专长嘅就会俾人反驳。
68. 引刀一快 2015-07-10 21:06:32
To 66楼 新淡友兄

的确,呢个系三反五反文革嘅遗害,心黑手贱脑精灵嘅人,最常被冠以“潜力股”嘅头衔。

但系我发现,呢种风气慢慢喺香港滋长紧。
70. 珍惜香港 2015-07-11 02:36:10
珍惜香港TO:64/F 自我陶醉

阁下呢段回应,令我感到莫名其妙

我几时话过,自己响沙士期间嘅经历,喺好「惨」

仲有,关於炒家,关於炒楼心态,我以前都提过好多次(1234 ...)。

不过,我冇一次话过,比我有钱嘅,就喺炒家!
71. 珍惜香港 2015-07-11 04:38:26
珍惜香港TO:54/F Jerry、59/F Oscar Lam

都喺果句,投资呢样嘢,喺好个人化嘅。

要澄清一下,我只喺质疑股票嘅价值投资,并唔喺否定,所以我嘅言论,唔算对价值投资者唔公平。再者,以价值投资嘅理念,响股场赚到钱嘅,亦大有人在。既然有人咁成功,我又点敢去否定?

资源论,喺我从整个营商同长线投资生涯中,体会出嚟嘅一个世界观。简单讲,即喺将事物嘅「值」,通过最原始嘅以物易物慨念,从货币系统嘅面纱后面,揭露出嚟。Jerry 兄提到企业资产净值,其实就喺资源通过企业包装之后,计算出嚟嘅数字价值;呢样嘢,就好似基金包装一系列金融产品一样。每一层包装,都会令真正嘅「值」被馍糊化,而投资者,就需要有更深入嘅知识,同更精湛嘅技巧,先至可以剖析到一个近似嘅「值」。

资源论为基础嘅投资,会趋向直接持有资源嘅本体,及通过资源交换慨念,嚟衡量资源嘅「值」。所以,一个人,要赚六年钱至买到嘅嘢,而另一个人,只要赚三年钱就买到嘅话,咁响两者嘅眼中,果样嘢嘅「价钱」,虽然一样,但个「值」,就好唔同。因为任何人,一生里面,都只能创造及拥有有限嘅资源。明白呢个道理嘅话,就可以睇得通我果个中六合彩嘅比喻。

所以,Oscar 兄话,响苏格兰,睇到连绵不绝嘅土地,种草、养牛、养羊。问题喺,呢啲资源,对你嚟讲,究竟有冇「用」?你会唔会想持有?你肯用乜嘢资源交换?你话,你认为投资价值唔高,绝对唔会投资。我就话,呢啲资源,只喺「响你手上」,个「值」唔高;而你手头上,又冇适当嘅资源,同呢啲嘢产生协同效应,从而衍生更高「值」嘅资源。不过,你冇啫,唔代表其他某啲人冇喎!

投资,可以好简单,亦可以好高深。

投资物业好?还是投资股票好?冇一定嘅答案,亦喺好个人化
72. 自我陶醉 2015-07-11 06:47:04
To 70, 71 楼 珍港兄

唔通真系我记错?  定系我误会你意思?  你话沙士时有人告你, 仲几乎破产, 后来仲要自辩, 系咪?  又唔知点解仲可以用啲咩非常手法去银行借钱买楼, 系咪?  

我知, 你喺长长长...线收租佬呀嘛, 唔系炒家。  咁又点?  炒家一定系衰人?  一定要畀你㩒?你抬钱去买就得, 人哋抬钱卖就唔得?  就当人地唔系惨先卖楼, 人地觉得买错咗或者想减仓卖有咩问题?  唔通要揽住层楼同归於尽先得? 你又洗唔洗咁鄙视人卖楼先?  

如果楼价年年跌, 租金又年年跌, 最后好似日本同底特律啲空城咁, 你又买唔买楼呀? 喺我眼中, 买就是炒升, 卖就是炒跌, 至於长线短线只系时间上嘅分别, 行为本质上都是买入后想赚钱,毫无分别,唔好五十步笑百步喇!  如果你系唐僧可以做到清心寡欲就唔同。

既然你都知用价值投资响股场赚到钱嘅,亦大有人在, 就应该质疑之前先深入了解究竟系咩。你估个个人都系靠运就得咩?
73. 引刀一快 2015-07-11 08:08:15

资源论,喺我从整个营商同长线投资生涯中,体会出嚟嘅一个世界观。简单讲,即喺将事物嘅「值」,通过最原始嘅以物易物慨念,从货币系统嘅面纱后面,揭露出嚟。Jerry 兄提到企业资产净值,其实就喺资源通过企业包装之后,计算出嚟嘅数字价值;呢样嘢,就好似基金包装一系列金融产品一样。每一层包装,都会令真正嘅「值」被馍糊化,而投资者,就需要有更深入嘅知识,同更精湛嘅技巧,先至可以剖析到一个近似嘅「值」。”

呢个所谓嘅”值“,只系当下此刻未进入市场嘅值,若果投资以此为首要,咁就好似以前D国营商店卖嘢咁,净系谂成本加利润去计价格,变相系慈善事业。
投资系看未来,系预观物品经过重重包装之后嘅附加价值并同通过时间同市场环境演化所産生嘅综合值。

举例,一间铺,你到底睇水泥钢筋嘅成本价,现时售价,还是未来发展后将会达到嘅价?
74. e_kam 2015-07-11 08:46:48
沙士时卖住宅楼可以有千万个理由。但可以几肯定佢地唔系炒家。

沙士时买住宅楼只有两个埋由。一系自用  一系博升 如果话比人听为长线收租,应该会比人话系白痴。

博升。wait for capital gain. 乃价值投资法也。你觉得市场错价,所以买入博升  就系咁简单。

博得到就系赢家。  博唔到就比人叫儍仔 (因为当时你同大市对著干)









75. 引刀一快 2015-07-11 09:03:04
To 72楼 自我陶醉兄

唐僧唔系清心寡欲架,三个手下凶神恶煞,摆明就系暴力团伙,撩完蜘蛛精又撩白骨精,江湖新绰号叫飞天蠄蟧骨精强。
76. 引刀一快 2015-07-11 09:08:01
e_kam兄,近排变咗稀客喎,得闲多D出文喇。
77. e_kam 2015-07-11 09:48:55
刀兄早晨。是的近来好少留言  可能因为无乜话题。
78. 自我陶醉 2015-07-11 10:42:07
To 75/F 引刀兄

吓, 唔系啩?  人哋徒弟唔乖都入埋佢数唔多公平喎!  我见到唐僧都会90度敬礼㗎。  最少唔会畀佢啲徒弟丙呀!  哈哈!
79. 蜕变中嘅懒人 2015-07-11 11:53:17
哗!好热闹!见到呢两三日几位高人师兄久违了嘅热烈君子辩论,其实好想买鲩鱼尾搭吓咀,奈何懒人才料有限、出尽力研究咗几铺都唔多明。

结论系:高人过招、出神入化、懒人O咀、目定口呆!

懒人读书少,经济理论、数学根底、哲学思维、世界视野........百无、悪补又太老。
投资世界中赖以保命嘅绝技,只剩得坐喺张音椅度段嚿咕,无嘞,惭愧。

不过,懒人仲有绝招未出--懒人仔--希望在明天。
80. 引刀一快 2015-07-11 12:59:19
懒人兄

你咁歉做乜?你出口就地动山摇,又唔系未露过一手。(嘻嘻,呢句到此爲止)


81. 珍惜香港 2015-07-11 13:49:08
珍惜香港TO:72/F 自我陶醉

就算我唔喺一个生意人,买嘢噤价,都好正常啫。或者我话,噤到佢地叫苦连天,喺凉薄咗啲嘅。

所谓慈善,喺帮助响先天基础上有真正需要嘅人,而唔喺为作出错误或消极决定同选择嘅人埋单。

虽然我话,今日,你若以一个投机心态嚟对待你嘅物业,他日,你就会成为推倒市场嘅一个害人精,但喺,我唔认为,「炒家」即喺「衰人」。所谓害人精,只喺果,唔喺因。或者你未见过,沙士当时,我见到果班卖家嘅面口;你唔明白,我唔怪你,而我亦好难解释。佢地只喺市场巨兽之下嘅一堆棋字,冇话边个好,亦冇话边个衰。我同佢地,无仇无怨,但在商言商,我亦冇必要,对呢种人施以同情。

仲有,原来阁下以为,我同大家分享经历,喺要证明俾人睇,自己有几「惨」,同「惨」过人地几多。

我谂,我同你对人生嘅睇法,真喺分歧好大。

好多人,成日觉得自己好「惨」,又话自己输咗起跑线,见到人地成功,就话人地好运喎!

我话,我响 97 前高峰期上车,当时嘅息口仲喺 P+,到沙士果阵,我喺负资产。我希望大家明白,每一个人生里面,都有无数个 MILESTONE,起跑线,只喺其中一个 MILESTONE,唔喺决定命运,唔喺决定一切。


我从来唔认为,自己嘅经历,有几「惨」,又或者「惨」过人地。正因为我唔认为自己「惨」,先至会响每一个 MILESTONE 度,作出正确嘅决定;成日觉得自己几「惨」几「惨」,成日觉得自己「惨」过人地嘅,咁就算我个起跑线,好过之前几多几多,亦去唔到今时今日。

懒人兄果然喺高人,好似预知道我会写乜咁:希望在明天。故事,一日未写完,个结局,都仲未决定嘅。

我有一个出生入死多年嘅同伴,所谓,人生得一知己,死而无憾。有好多朋友,见到我地嘅战友关系,都话好羡慕喎。

不过,如果我冇果种人生嘅态度,我根本就唔会遇上佢。
82. Oscar Lam 2015-07-11 13:54:37
To: 71/f 珍惜香港

小弟尝试对你所说的几个要点谈谈自己的见解:

你说:
"要澄清一下,我只喺质疑股票嘅价值投资,并唔喺否定"

小弟认为:任何投资产品均有其投资价值,包括股票。一家公司的投资价值取决於其赚钱能力、健康的财务状况、好的管理团队,公司经营业务的前景、和公司在行业的领导地位等等。只是要找出一家有价值的公司并不容易,需要更加专业的知识。


你说:
"以资源论为基础嘅投资,会趋向直接持有资源嘅本体,及通过资源交换慨念,嚟衡量资源嘅「值」。"

小弟认为:这样的投资概念未免过於狭窄。以价值为基础嘅投资,会趋向持有有价值嘅资产,及通过资产交换概念,嚟增加资产嘅「值」。资产包括你说资源、还有股票、货币...........

至於投资资源、股票、货币或其他资产哪个较好则因人而异,取决於个人的喜好、性格和专业知识。


最后小弟同意你说的:

"投资,可以好简单,亦可以好高深。"

不过,不要把一些原来简单的事情搞得太高深。

83. 珍惜香港 2015-07-11 15:09:23
珍惜香港TO:82/F Oscar Lam

关於阁下第一点,我可以用番 71/F 里面嘅内容回覆:

每一层包装,都会令真正嘅「值」被馍糊化,而投资者,就需要有更深入嘅知识,同更精湛嘅技巧,先至可以剖析到一个近似嘅「值」。

至於阁下认为,以资源论为基础嘅投资过於狭窄,我唔认同。资源论,喺基於原始嘅世界观,突破货币演绎嘅限制,直接比较事物嘅「值」。所以,呢样嘢,好宏观,莫讲话唔狭窄,佢甚至喺好广阔,以此引申嘅投资手法,更喺无穷无尽。正如你话果啲苏格兰嘢,一口咬定投资价值不高,绝对唔会投资,但如果你对唔同嘅资源有足够了解,以及睇通佢地之间嘅协同效应,咁话唔定,你可以之创造出新嘅思维,甚至喺新嘅金融挂勾操作添。

或者,我话趋向直接持有资源嘅本体,令你被误导咗,以为只有资源嘅本体,至值得投入。其实,万物归於实体,正如,我亦持有债券,呢样嘢,可以用两个唔同角度去睇,而呢两个角度,都喺引用咗资源论。所以点解,我对风险嘅理解,会同传统有分别。人地认为风险高嘅,响我眼中,可能喺低风险,反之亦然。

投资,可以好简单,亦可以好高深。

其实,我呢一句,已经包含埋你回应最后果句嘅意思。
84. Oscar Lam 2015-07-11 16:02:14
To: 83/f 珍惜香港,


阁下认为,资源论,喺基於原始嘅世界观,突破通过货币演绎嘅限制,直接比较事物嘅值。阁下是否认为我们应该回到原始以物换物的年代?如果没有了一个客观的标准(货币),又如何可以比较事物嘅值?

我话果啲苏格兰嘢,投资价值不高,绝对唔会投资,是基於价值投资法下我个人的判断。我在上文说过,投资何种产品取决於个人的喜好、性格和能力。

我知道阁下在投资债券方面非常成功,希望你能够分享一下,如何将资源论运用在投资债券上面。

谢谢!

85. 引刀一快 2015-07-11 18:29:58
Oscar Lam兄

我插插嘴,其实我系资源关注者,单项世界性资源嘅掌握好困难,或者説要跟得好贴,但系宏观世界资源,或者单项国家资源,就冇咁伤神。资源投资,我睇法系要掌握由资源到”钱“中间嘅各个环节,气象、地理、政治......,咩都揩到D。
你讲唔钟意苏格兰嘅草原,系我最钟意最睇好嘅嘢之一,不过,要搬咗嚟广东先有得玩。
喺欧洲冇人吼嘅自然资源,一系有规限,一系有短板,若然可以预视呢D规限、短板嘅消失,会有好大投资价值,欧洲咁成熟嘅社会,兼且中国人去咗咁多年,可以变钱嘅嘢,大概唔会剩多少。
引刀睇淡,好大程度同资源变化有关,中国嘅自然资源同人力资源都进入严重衰退状态,往后嘅考验唔细,源头已经打折,后面环节嘅效率必须超发挥先可以维持。
资源嘅价值,不在于原地而在最终消费者手上。
86. Oscar Lam 2015-07-11 19:50:36
回85引刀,

你对资源的看法很有深度。资源的投资价值在於是否可以被充分利用,继而生产出更有价值的产品,或者可以在合理时间内被出售,赚取合理的升值利润。

对个人而言,苏格兰草原并不具准这些条件。因此,我认为不值得投资。在中国,土地是一项宝贵的资源,但随着经济发展,土地被过度利用,要在较繁荣地区取得土地并不容易。
87. 自我陶醉 2015-07-11 21:36:26
To 81 楼 珍港兄

我发觉我哋唔止对人生睇法有分歧, 对大部份嘢睇法其实系完全相反至真,  我估我去学柔道, 你一定会学空手道。呵呵!  

就算我97高位入咗市买楼, 我都绝对唔会用“害人精”, “市场巨兽嘅棋子” 嚟形容将楼平买嘅人, 我只会检讨点解自己会在最高位先入市, 到底自己嘅决定喺边度出咗问题, 同埋以后点样避免再犯相同错误, 咁我交咗嘅学费就会值得喇!  而对抬钱嚟卖楼畀我嘅人, 更加唔会觉得佢哋系害人精同怪兽, 而且仲会心存感激, 冇佢哋边有可能执到平货? 多谢佢都嚟唔切。

至於你所讲嘅milestone, 我一定会问自己如果我喺更合适嘅时机先做, 我完成第二个milestone到底会快几多年?

珍港兄,你系我认识第一个同我所有想法完全相反嘅人。 幸会,幸会!  我住南极呀, 你系咪住喺北极?
88. 引刀一快 2015-07-12 02:00:55
自我陶醉兄

珍港兄比较喜欢用感性思维,加上浪漫嘅笔触,将大家带入梦幻国度,遇著不解风情嘅猪肉佬,如引刀,或喜欢求真嘅各位,难免会出现思维不协调。
当年引刀不才与珍港兄在文笔上结下梁子,就系出于珍港兄引用生态上汰弱留强理论用得太独特,而引刀对自己皮毛所知又好执著,结果自然系穿插回应,恶斗连篇。
有时,遇上和自己思想完全相反嘅人,特别系喺论坛,其实系好事,尤其是好似珍港兄咁舍得慢慢陪人打字嘅对手,我会珍惜,因爲论证起嚟黑白好分明。

89. Sugar 2015-07-12 15:54:11

回85#引刀先生

颇同意你对中国天然资源衰竭方面的观察,值得关注.

最近事忙少看论坛,偶尔瞥一眼都会看看你的发言.喜见你坚持己见之余渐见谦厚,呵呵......


90. 引刀一快 2015-07-12 17:05:23
Sugar兄

偶尔卖弄一下文字玩意,也是消闲乐趣呢,呵呵....
91. 无奈 2015-07-12 17:53:57
Oscar:开班授徒时切勿忘了让小弟也学习下,看来是时候要重投股海了。
92. 自我陶醉 2015-07-12 18:08:05
To 88/F 引刀兄

非常同意, 珍港兄文笔了得, 思维清晰, 用心出文及回应, 确实是论坛上少有的好对手。
93. Oscar Lam 2015-07-12 19:09:43
To: 91/f 无奈兄,

兄台误会了!开班授徒的应该是自醉兄。事实上,小弟很喜欢投资股票,但却很少投资,主要原因是股票市场波动大,投资物业虽然较闷,但周期长,较适合本人。

我现在正努力向各师兄学习投资股票之道,适当时候也会投资一些。
94. 珍惜香港 2015-07-13 20:17:58
珍惜香港TO:85/F 引刀一快、84/F Oscar Lam

最近冇乜时间,所以咁迟至回覆你地两位。

引刀兄 85/F 嘅回应,令我有啲意外惊喜。可能因为阁下喺资源关注者,资源论呢味嘢,就算未必完全认同,都会比较容易明白。其实,资源嘅缺乏、衰退、滥用、浪费,唔单止响中国发生,而喺全球性。人类随智慧发展,开始变得高傲、自大,以为真喺人定胜天。我地把口,就话背负地球之主嘅责任,保卫大自然;但实际上,我地嘅行为,往往违反原始至今,恒久不变嘅自然定律。就好似美国咁,话说,最近确认咗同性婚姻,举世欢腾喎。我听到呢个消息,第一个反应就喺:美国好快要灭亡啦!

我地唔可以因为自己想点,或者觉得应该要点,就随便漠视自然定律。人类最错嘅,就喺为咗要违反自己唔钟意嘅自然定律,就私下创造定律,凌驾於自然定律之上。所以,Oscar 兄 84/F 度问,唔通要番到去原始以物换物嘅年代?我唔喺咁嘅意思。货币作为事物值嘅数字标准,当然有需要存在,但响人类唔同族群之间嘅利益考虑之下,货币系统嘅设计,已经偏离事物值嘅客观性,脱离金本位就喺一个例子。

今时今日,我地基於货币系统,已经衍生咗无数嘅数字定律。但难道呢啲数字定律,真喺可以正确反映到,各项有形及无形资源嘅,同佢地之间嘅互动关系咩?所以,当我地衡量一件事物嘅值果阵,一定要突破货币演绎嘅限制,先至可以发现佢地潜在嘅值,究竟被高估,定喺被低估。但就算喺咁,都只喺好基础,因为,原来资源嘅值,都喺相对嘅,呢种相对性,我响 71/F 第四段已经举例说明过。

所以,引刀兄 73/F 嘅问题,亦只喺针对咗最基础嘅部份。通过资源交换,以物易物,获得新嘅资源,的确同成本加利润去计价格好相似,但原来,成本嘅值,同成品嘅值,都喺因人而异。成本嘅值,喺基於你原来嘅能力,而成品嘅值,就喺基於你拥有之后,有冇能力充分行使佢嘅实用值

就以阁下嘅一间铺为例,水泥钢筋呢啲成本,极其量只作参考,因为呢啲喺人地嘅资源交换,唔喺你嘅资源交换。不过当然要考虑呢件嘢嘅结构同设施,会唔会有所不足,而令你要多付资源去修葺,咁就变成同你嘅资源交换有关啦。坦白讲,投资工商铺,我完全喺外行,一窍不通,但以一个长线投资者嘅角度,我会睇佢嘅实用值。所谓实用值,即喺话,呢间铺有冇人「用」,边啲人会用,兼容性几大,位置同人流之类。点样睇一间铺嘅实用值,Oscar 兄喺实战专家,一定比我清楚好多。

所以,会唔会以现时售价投资,就要睇呢个现时售价,令我行使嘅资源交换,相对得番嚟嘅实用值,抵唔抵。但呢样嘢,因人而异,因为有啲人,喺有能力制造协同效应,「活化」资源。例如,购入整个商场、整条街道,集中管理,或发展一个小区。如果自己冇呢种能力,只喺凭对将来发展嘅估计,作出投资,咁呢种估计,喺冇保证,因为人地发展与否,点样发展,唔喺由你决定

真正嘅投资,喺增持有价值之物,同沽走即将丧失价值之物。而最重要,就喺持有果一段时间内,必须充分行使投资物嘅价值,以带嚟最大嘅利益。

所以,投资最重要嘅部份,唔喺入同沽果两刻,而喺持有果段时间嘅回报。如果只喺著眼於前者,漠视后者,就只能算喺投机,唔算投资。以前,一张临约就可以攞嚟炒,又有啲人,买砖头番嚟空置搏升值,佢地认为,放租好麻烦,会搞到沽楼唔方便,呢啲就喺「炒家」。炒家空置物业,浪费资源,对社会同经济,都喺好负面。只有放租,先至可以充分运用资源嘅实用值,取之社会,亦用於社会,先算喺真正嘅投资

同样地,一个浪费资源嘅企业,喺唔会有前景Oscar 兄话我投资债券方面非常成功,实不敢当,我只喺一只小蚊,响基金扫货潮果排,真喺一张都攞唔到。至於点样运用资源论,响投资债券上面,会喺一个太大嘅 TOPIC。不过,我手持重货嘅高息债券,发债者,都喺重视资源,同会发展资源嘅企业。有啲内房企,发债,喺为咗争持土地,而唔喺为咗投放资源,响土地嘅发展度。呢啲企业,资源嘅持货量,可以好大,但佢地浪费资源,同抄家冇分别。

我借你未来钱,喺因为你会将借贷,用於资源发展项目上面,从而创造更有用嘅资源,获取更大嘅长线利益。正因为呢个原因,我先至会相信,你会俾得起,同埋愿意俾,咁高嘅债息。
95. 引刀一快 2015-07-14 14:27:25
珍惜香港兄

呢几日我都唔得闲,先简短回应你“其实,资源嘅缺乏、衰退、滥用、浪费,唔单止响中国发生,而喺全球性。人类随智慧发展,开始变得高傲、自大,以为真喺人定胜天。”呢个睇法。

资源衰竭唔系因为人觉得可以胜天,而系人觉得可以食人!有时间我都打篇嘢讲讲呢个问题。
96. Oscar Lam 2015-07-15 00:18:55
回94珍惜香港,

阁下是理论派,小弟是实战派。虽然如此,无阻大家互相交流、学习。

阁下文章写得很好,小弟真心佩服,哈哈!
97. CD ROM 2015-07-15 18:26:46
呢一篇引申出来几位大师兄既不断讨论, 老实讲我真系日日追!!! 而当中涉及好多conceptual既野我直头要反覆睇好多次你地既回应先能掌握~~~

有样野, 我真系有d唔明... 价值投资, 同珍兄既资源论, 我觉得系无冲突, 甚至乎适合同时使用tim~~~ 因为有一个共同目标, 就系去睇穿投资物既 "买唔买得过?".

最大既分别, 系用完全唔同既单位(unit)去做分析jel~~~ 资源论, 令我想起Big Mac Index!!!

当然, 对於价值投资, 同资源论, 我既认识实在太太太有限, 冒昧留个言, 旨在答谢师兄我又学到d新野喇~~~

本想多写一段物理试题既比喻, 但系呢个时间身在深圳公司, 实在需要早D走返香港喇, 希望有时间再写~~~~