地产博客 > 资深会员专栏 返回
浏览人次:42357    回应:65
资深会员专栏

专业机构投资者(七)遗憾

 

珍惜香港

法团专业投资者
SMIEEE.MSc(ICDE)
http://facebook.com/hongkongtruevalue/
2016年12月24日

上周日,地产论坛发生咗一件,令我非常遗憾嘅事。《长河乱话(十)- 加息与楼价》整篇文章连同所有回应,被作者一次过全删。要睇番原文,连同首 20 个回应,恐怕只能够引用唔知仲会保留几耐嘅 Google 快取;至於我自己第二、三个回应,亦只可以透过,地产网嘅搜寻功能,见番一部份。

删文嘅原因,大慨喺有人触及咗作者嘅底线,至於喺乜嘢底线,我唔猜测,亦唔评论。一年前,我曾经慨叹,所谓底线,恍惚,没有最低,只有更低。今日,我仍然响地产网出文同回应,喺基於对网站同朋友嘅感情,但唔代表,我喺冇底线。

赚钱从来都唔简单

记得上文一开始,我就提到今年五月初,一位非注册回应者嘅留言。佢第一句喺话:「原本,地产论文是用来讲解投资房地产的成功之道」。虽然所谓成功,喺冇标准,但任何一个人,做出咗成绩,同大家分享,我地都应该抱住学习嘅态度去睇。有人眼见一啲投资者,通过买债赚钱,甚至上埋位,就冷嘲一句:早几年买债嘅人,白痴都可以赚到大钱。真喺想唔到,呢种只有失败者眼红他人成功嘅言论,竟然会出自一个自命投资者嘅笔下。赚钱,从来都喺好难;拥有,亦唔喺必然。寻日,我问一位生意朋友:你会请一个帮你赚钱嘅白痴,定喺一个蚀你钱嘅专家?

经历多年营商,多年管理下属嘅生意人,一个问题,就已经睇穿咗我想讲乜,仲好有共鸣。其实,我写嘅文章,一啲都唔难明,不过有网友认为,投资嘢,楼就楼、股就股、债就债,搞乜一大堆隐喻,转几十个弯将简单事情高深化?咁又喺!我写一啲看似好合理嘅逻辑分析,跟住同你讲,边只 NUMBER 嘅股票会升、边只债高息兼稳阵、边个时刻楼市将会见底,你跟住我嘅「答案」入货,赚咗钱;哗!投资,真喺好简单啊!

朋友,我老老实实话你知,就算你跟足我去买,我会赢,而你就会输,点解?因为我同你,背景唔同、规模唔同、自身情况唔同,不过呢啲,都唔喺最重要。最关键喺,我同你,投资嘅心态,唔一样。你执著嘅,喺一个答案,一个「预期」嘅答案,而我睇嘅,就喺所谓「现在嘅基础因素」。所以当市场转角,而你见到自己投资物个「价」回调果阵,就会触发你祟尚果啲「止蚀」之类嘅所谓投资操作,跟手沽咗去。而长期投机,响市场嘅波浪之中浮沉,有输有赢,就正如早前一位朋友话,最终都喺瞎忙

有如做生意嘅投资之道

至於我,既然已经睇清楚「现在嘅基础因素」,所见到投资物嘅「值」,就自然唔会因为个「价」回调咗而改变。所以我喺可以瞓身,而我嘅风险管理,亦会侧重於好努力咁,去确保自己嘅持货,甚至喺增持嘅能力。呢个投资过程,喺持续性,同创业、搞生意一样,通过行使投资物,为自己带嚟最大嘅利益。

其实,我第一次提三个十倍,就已经带出咗呢个概念,之后,仲公开埋我嘅操作,但我拣嘅题目,唔喺语出惊人嘅「三个十倍」喎,而喺「市场嘅角色」,点解?不如我反问大家,睇咗我嘅文章,喺唔喺就等於,可以随便搞间投资公司,搭呢个棚出嚟?真喺做得到嘅,会唔会喺一个白痴?但「三个十倍」本身,唔喺最重要,我嘅目的,喺要通过自己嘅分享,带出有如做生意一般嘅投资之道。只要心态正确,清楚了解同体现自己,响实体经济里面嘅角色,咁无论事业、生意、以及投资各方面,就算,只喺得三厘半,都一样可以好成功。

所以话,我嘅文章,根本一啲都唔难明。点解我会花咁大篇幅写《归边》?点解《明灯.答案》会成为《归边》嘅序?如果见到我嘅文章,引用咗一系列网友嘅回应,就认定我花咁多心机同时间,喺为咗啲唔知乜恩怨情仇,而睇唔出我为大家,带出咗乜嘢讯息嘅话,咁好遗憾,请恕我直言:你真喺太肤浅!而唔单止喺咁,你仲俾我讲中哂,即喺果句:一个答案嘅执著罗

物业投资嘅贡献

可惜,更遗憾嘅喺,今时今日,社会上好多人,尤其啲主流媒体,都鼓吹呢种态度。难怪会有网友,否定物业投资对社会嘅贡献,反而将啲金融嘢,同创业混为一谈,仲美其名为「多元化」嘅发展喎!试问一个醉心股场嘅人,可以有几创新?可以点创业?日日睇住个市,整日分析埋啲唔知会唔会跑得出嘅,所谓预测,仲剩番几多时空去创新?俾你响股场捞咗一笔,真喺会脚踏实地咁,走去创业咩?

其实物业投资,对社会嘅贡献,唔在於投资嘅本身,而喺在於物业对社会、对个人,衍生嘅一系列,有形以及无形嘅「值」。否定物业投资,即喺否定香港人,多年嚟建设香港嘅努力,亦即喺否定咗,香港嘅历史。

我地呢一代嘅人,买物业自住,都只喺为咗一个「家」,而唔喺为咗乜嘢赚钱。稳定自己嘅家人,唔要佢地居无定所,同时锁定支出,先至可以一心一意咁,投身响自己嘅事业同生意度。曾几何时,我根本就唔知乜嘢喺负资产;买咗,就喺买咗;借咗,就喺借咗。欠银行几球,乜唔喺已经负咗咩?借钱买嘢,当然要依时归还,个楼价升升跌跌,关我笔债乜事?唔通唔使还?既然从来都认为自己喺负咗,咁到沙士果阵,啲人讲负资产,我都只喺一笑置之,反正都喺一样咁住,一样咁收租,一样咁还钱。

其实好多生意人,都有买物业收租,佢地将自己嘅积蓄,放哂响啲砖头度。创业嘅第一桶金,通常都喺嚟自好有限嘅储蓄,或者同亲朋戚友借,又或者抵押物业融资,唔够,就几个拍档夹份。结果,离离合合,上得轨道嘅,可能只剩番一两个老细。遇上周转问题,好多时,都要举自己啲物业出嚟,唔喺边个肯借俾你?成功嘅,就成为出色嘅生意人,顺带成为出色嘅物业投资者;而失败嘅,就连自己储蓄多年嘅砖头都败哂,甚至搞到破产。过往几十年,有几多可歌可泣嘅故事,建设成今日嘅香港?香港人,似乎已经忘记哂呢啲往事。

曹伯眼中嘅青春

曹仁超话:年轻人,不要让 500 尺绑住你的青春。一句说话,一个专访,就抹煞哂香港人,几十年嚟嘅努力。就好似,一对盲字都唔识多只嘅父母,辛辛苦苦用一双手,养大自己对仔女。跟住,对仔女同父母讲:你地已经过时啦!各位唔好误会,以为对仔女嘅意思,喺认为父母冇学识,不合时宜。佢地喺话,「努力」呢家嘢,已经过时啦!今日最时兴嘅,唔喺义务,喺权利嘛

所以曹伯话,年青人冇创意,喺因为租金太贵,冇个车房俾佢地思考喎!而香港攞得台湾同 INTEL 果啲二手嘢,就话要搞半导体?嘥气啦!冇顶级国防科技送上门,点开工呀?创业?使乜咁辛苦,左借右借,仲要清哂自己宝贵嘅积蓄,举埋自己啲砖头出嚟?OMG!梗喺要学下人地,搞个 IDEA 攞番一两球美金洗洗先,天跌落嚟嘅钱,唔使负责,即喺冇压力啦!皆因我地啲年青人,有压力果阵,喺谂唔到嘢架!再加埋个车房,轻轻松松咁思考,容乜易搞咗个 FACEBOOK 出嚟?

当日我话,睇完曹伯果篇专访,终於见识到,乜嘢喺「废」,我谂我已经好俾面。无疑,曹伯对时下嘅年青人,宠爱有加,就好似有啲父母,溺爱自己嘅子女一样;又有如董前前特首,呢位老人家咁,都唔知几爱护香港市民,仲话要八成市民有自置物业,出埋钱帮佢地都冇所谓喎!或者佢有所不知,佢想,人地都未必想,做乜强行要八成人置业?虽然我亦好鼓励,有能力嘅人,及早上车,不过唔上车,亦唔使死嘅。呢个世界,总有人买楼,亦总有人租楼,最重要喺,自己冇嘅,千祈唔好眼红人地有,更加唔好眼红人地有多几件收租,话人地霸住哂啲资源。

曹伯对物业投资,作全面嘅否定,认为靠收租嘅社会冇前途。呢位故人,对好多香港人,影响深远,但可惜最后留低嘅,却喺抹煞香港人,几十年嚟努力嘅言论,亦令到物业投资者,以及穷一生之力,贡献社会嘅生意人,含冤受屈。最近汤博士出文,讲新特首嘅首要工作,引嚟一番讨论,当中有人提到内地「房子用来住,不是用来炒」呢个大方向。以前讲炒楼,都喺泛指果班低入高沽,短期赚价嘅投机者。佢地空置物业,浪费资源,被冠以「炒家」嘅污名。今日,就连脚踏实地,买楼收租嘅长线投资者,都受到针对,俾人讲成喺炒楼,真喺可悲。再加辣,最多叫佢地唔再入货啫,但咁都唔够,仲要玩乜新思维,搞乜租管、搞乜房产税之类,强要人地呕番啲货出嚟?咁香港,仲可以有资格,叫做国际金融中心咩?

输打赢要嘅歪风

由金融风暴、沙士、金融海啸,到依家呢十几二十年间,香港人,都有好多置业嘅机会。可惜有唔少人,因为执著个预期,执著个答案,屡次错过时机;而有部份人,更沽咗自住楼等跌,搞到上唔番车。积怨之下,就迁怒於物业持份者,仲要影响埋啲年青人,令佢地觉得,自己买唔到楼,就喺社会嘅错,就喺物业投资者嘅错,政府应该要打击佢地,逼佢地平价呕番啲货出嚟。原来呢个世界,真喺几荒谬都有,自己失败,就要成功嘅人埋单。果然,努力呢家嘢,已经过时啦!今时今日,只要够大声,够人多就得。

呢种输打赢要嘅歪风,似乎已经充斥著整个社会,甚至喺全球,尤其以成熟发展嘅经济体,最为严重。话说 CY 响余下呢半年任期里面,会尽力完成佢果三项竞选承诺。呢三味嘢,真喺不敢恭维,就睇当中嘅,取消强积金对冲,我三年前都话过,根本就喺输打赢要。老板供果 5%,本身就喺薪酬以外,储定钱将来赔俾你,只不过劳工界扮失忆,当咗呢啲喺人工嘅一部份啫。家阵反口唔俾攞嚟赔,咁点解要供多 5%?即喺变相加薪 5%?咁都得?香港人,似乎已经忘记咗,以前打工近两年就担心俾人裁嘅日子。市场现实,唔喺你夹硬嚟,就可以改变得到。今日,你输打赢要,他日,就唔好埋怨小企业受打压,年青人创唔到业,财团话哂事,打工仔 NO SAY。

向周光晖致敬

几日前,选委会会计界,选举落败嘅建制候选人周光晖,写咗一篇文章。佢话「会计师公会的新年轻会计师大部份都未置业或未能置业,他们同时亦因为年资、职位及薪水较低要受气而投反建制一票」。唔使多讲,文章一出,即刻惹嚟劣评如潮。啱啱讲开输打赢要呢个话题,大家千祈唔好误会,以为我影射佢,人地只不过讲出咗落败嘅原因,冇话过要改变或者否认选举嘅结果,点会喺输打赢要?相反,我仲非常敬佩,佢嘅勇气同承担。佢对手民綷派关梓谦话佢离地,而我就话,人地都唔知几贴地。当今社会,敢於响年青人面前,直接讲出啲咁逆耳嘅事实嘅人,真喺已经买少见少。

话时话,我都喺属於专业界别,记得早前,亦有慨叹过资讯科技界嘅选举结果,但都冇写得咁直接。我只喺话「IT 界啲选民喺乜嘢人,真喺唔使多讲」啫,至於喺「乜嘢人」呢,心照算啦!既然功能界别啲选民,投票嘅标准,根本就唔喺睇佢地界别长远发展嘅利益,而只喺为咗表达对自己遭遇嘅不满,咁呢班选民,根本就称唔上喺专业人士。即喺话,功能界别,已经发挥唔到平衡各界利益嘅作用,可以取消得啦!

社会嘅精英

我后生嘅年代,香港只有两间大学,大学生,专业人士,都喺社会嘅精英,而今日呢,大学生,已经不外如是,而好多界别嘅专业人士,亦开始出现供应过剩嘅现象。呢啲,唔通又喺社会嘅错?政府嘅错?财团嘅错?十几年免费教育、N 间专上学院提供学位课程,搞到通街都喺大学生,个个以为自己好叻。无论社会、政府、财团,响教育同人才培训方面,投入嘅资源,只会越嚟越多。归根究底,都喺好多香港人,尤其喺年青人,唔肯面对一个,几十年嚟,以及打后几十年,都唔会改变嘅所谓,现在嘅基础因素。吓?乜又喺「现在嘅基础因素」?

只有社会嘅精英,先至有能力上到位,而精英,亦只会喺少数。呢个就喺所谓,现在嘅基础因素,即喺唔会随便受市场变化影响嘅长期因素。一张证书,一个专业资格,唔代表你就喺精英。既然今日,一个可观数量嘅大学生,都只喺有如当年一个文员嘅层次,咁我地就唔可以基於,大学生买唔到楼,而判定今日嘅楼价喺太高。

同样地,真喺白痴嘅,就唔会赚到钱,更加唔会上到位。一个唔起眼,冇乜大志嘅砖头塔利班,当年几十万买咗个地铺,今日身家过亿,月收几十万租。书呆子解释唔到嘅成功之道,就冠以幸运之名,但原来,投资呢家嘢,根本就唔可以单从书本上学到,亦唔喺乜嘢经济学理论可以解释,因为投资要成功,最重要嘅,喺心态!只有,脚踏实地嘅人,先至有能力,睇得穿「现在嘅基础因素」,唔会因为个「价」嘅波动而动摇。冇动摇,绝非喺赚唔够、唔肯离枱,亦绝非喺唔够专业、止唔到蚀,而喺明白到,好多事物嘅「值」,都喺唔可以用「价」去衡量

最难明之解

响《归边》一文里面,我话:好多人,唔甘心於「现在」,不惜押注於「预测」,因为佢地以为,只要心目中嘅「答案」跑出,就可以跟自己「预期」一样,突破「现在」嘅规范。但原来,佢地最唔甘心果啲,先至喺最能够引领佢地,成功靠边嘅重要元素。

唔知上面呢段,算唔算喺《归边》最难明嘅部份?对现状不满嘅人,多不胜数。例如,点解要用「我」啲钱赔番俾我?取消对冲咪得罗!咁「预期」打工仔就会更有保障啦!又例如,点解大学生、专业人士都买唔起楼?加辣咪得罗!咁「预期」楼价就可以跌到个个大学生都买得起啦!又例如当年,点解得咁少人上到大学?加多几间大学,开多啲学位课程咪得罗!知识,改变命运嘛!到时个个都喺大学生,「预期」个个都赚到钱啦!又例如,买咗楼自住,楼价就下跌,人地迟买嘅,住大咗,仲供少咗喎,好唔抵啫!梗喺「止蚀」沽咗去,租住先,等楼价「预期」跌番三五七成,再入番咪得罗!

以「改变」,以「CHANGE」作为旗号上场嘅政治家,多不胜数,但到头来真喺改变到啲乜嘢?到最后,果啲咁渴望改变嘅人,可以得到佢地「预期」嘅结果咩?CY 上场,顺应民綷,搞消极施政,同大地产商对著干,将地产霸权拉落嚟;今日,中资高价投地。或者大家唔满意地产霸权,FINE,NO PROBLEM,换咗做中资霸权罗!各位满意未?都喺果句,任何市场发展,都喺趋向归边,夹硬嚟,喺唔会有作用。失败者,唔肯面对现实嘅话,永远都只能做失败者。

其实呢个世界,有好多嘢,都喺因为须要存在而存在。就好似老板供果 5%、楼价嘅高企、学位嘅有限供应,仲有你自己住紧果间自置物业等。对於呢啲现状,你可能觉得唔甘心,但原来,你肯面对、接受、同配合呢啲现状,改进自己嘅话,咁你最唔甘心果啲嘢,反而就成为引领你,成功靠边嘅重要元素。就好似,周光晖写嘅第三点:「你有否考虑拿着会计师专业衔头及相关工作经验及人脉网络,会加快为你在离开会计师事务所后的晋升机会及薪酬」?所以点解我话,呢位自称已退休兼无求嘅,会计师公会前会长,都唔知几贴地啦

告别回应箱

回看删文事件;回看曹伯留低果篇,令时下年青人鼓掌嘅专访;再回看周光晖被人唾骂嘅文章,除咗遗憾之外,就只有遗憾。现实,从来都喺咁唔啱听,而勇於发表嘅人,亦已经越嚟越少。记得我曾经话过,网站,只喺社会嘅缩影,社会要变化,网站亦会随之改变。我谂起《》,谂起《十四篇后感》,而到咗今日,已经喺第三个里程碑,真喺好唏嘘。

三年光景,昔日良朋,以文深交,不再

想当年,有朋友话,睇回应箱,甚至比起睇原文,获益更多。

滚滚长江东逝水,浪花淘尽英雄,是非成败转头空。青山依旧在,几度夕阳红。
白发渔樵江渚上,惯看秋月春风,一壶浊酒喜相逢。古今多少事,都付笑谈中。

各位,我要告别回应箱啦!

不过告别回应箱,唔代表告别论坛嘅。我仍然会继续出文,就好似其他作者咁,唔回应,就避免咗好多同议题无关嘅争拗,咁我有限嘅时空,就可以集中番响出文嘅主题度,而唔出文果阵,亦唔好阻我同屋企人温馨嘅宝贵时间。至於高调宣布,千祈唔好误会,我唔喺要引起争论,只喺为咗封印自己,唔想自己将来忍唔到手啫。

希望大家明白我嘅难处,并继续拥跃回应,拥跃讨论,就算只喺,路过留一声招呼,我已经好感激。你地所有回应,我保证一定睇哂。虽然唔会立即回覆,但一切疑问同讨论,将会响下一篇交代,以及成为我之后出文嘅题材。

长期嘅祝福

呢个决定,亦意味著,我一年两次新年祝愿嘅习惯,已经划上句号。

不过临近圣诞,都要同大家讲声,圣诞快乐!

虽然冇咗新年祝愿,但我仍然会响心里面,永远祝福大家!等等 ...「永远」似乎夸张咗啲,再者,我喺「长线」投资者,唔喺「永远」投资者嘛

咁我就响有生之年,长期祝福大家啦!

Natalie Cole:Someone That I Used To Love

 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 原来如此 2016-12-24 02:35:08
若有战,召必回。
2. 元朗人 2016-12-24 04:15:46
多谢珍惜兄出文。

十分同意珍惜兄告别回应箱做法,博士大致也如此。

双星报喜开场白,可能几落后但是依然过瘾:

点到你吾服

点解我要服


3. 引刀一快 2016-12-24 07:11:26
果然犀利,一面队人一面讲明唔回应。




4. 引刀一快 2016-12-24 07:43:39
文章抨击他人,又要挂免战金牌,珍港,你都得架喇你。

记住,细路仔都应该要识嘅规矩,想免战就唔好撩人,呢D唔系常识,系教养。

然而,你唔回应唔表示人家唔可以驳你,呢度几大嘅博主都会俾人反驳,你唔好奢望一个超然嘅地位。

攞得尾彩,就应该预咗俾人追数。
5. 路人xx 2016-12-24 09:08:22
刀兄,人家花时间花心机分享经验,啱听嘅咪睇下罗,唔啱听嘅咪唔好睇罗,又要睇又要闹,点解要咁作贱自己呀?而且仲系为咗闹而闹,冇point,好似街市啲八婆喺度讲是非咁样,唔够人哋讲又爆人哋私隐,你几多岁啊?成年人嚟架你,你好得闲咩?再唔系,自己有料嘅,咪自己写返篇文章罗。睇吓有冇咁多人Like? 有冇咁多人尊重你?你留言咁耐,一直睇错市,事实摆在眼前,你方向错,方法又错,你有冇料,大家有眼睇㗎!
6. AH-HO 2016-12-24 09:51:52
圣诞快乐。
以现在回应箱的普遍情况来说,支持你这个决定。
7. 费青旧友 2016-12-24 10:39:04
支持,珍重。
8. 向饭民说不 2016-12-24 10:43:15
5楼,你同个食假米食到傻下傻下的黄尸认真,你就输啦。
9. 八十后 2016-12-24 11:08:35
谢谢啊!
珍港兄!
10. MMC 2016-12-24 11:16:19
感激丶无言、无奈!
11. 引刀一快 2016-12-24 11:39:28
路人xx

等你做评判,郭晶晶就一个金牌都攞唔到,我讲得好明,“文章抨击他人,又要挂免战金牌”“想免战就唔好撩人

明显你都冇睇博文内容喇,唔系点会有咁嘅问题?
12. 顺民 2016-12-24 11:41:12

论文章和见地,珍港兄可说是在此论譠,谁与争锋 ? 令人佩服 !

若有心挑战者须自知量力 !

13. 向饭民说不 2016-12-24 11:56:58
不过精英,你还是要觉醒,5年叙利亚的黄尸精英,在Aleppo发动颜色革命,为什么选择Aleppo,因为这里就像香港比较开放,又很多接受了西方思想的年轻人。他们反对体制,所以在老美的支持下,和提供武器之下,发动颜色革命,结果呢?今日Aleppo变成点。

香港的两年前的占中,其实都是一样,幸亏老美只是提供雨伞,不是武器。不然香港现在肯定变成了大陆和美国人的新式武器实验厂。

CY无错,以为玩民粹,就可以提升民望,这是传统共产党夺权的方式,不过时代不同。他玩民粹,结果被饭民的更大民粹玩返转头。至于SSD,BSD也不要怪他了,事实上台北,加拿大,澳洲,大陆和新加波很多大城市都实施了这样的政策。其实讲返转头,这其实是去杠杆化的手段,在美国的QE之下,你没有SSD和BSD政策,好容易被美国佬刮毛。有钱佬,不要那么自私和无知啦。可能你们以为可以杀鸡取卵,因为香港崩溃,你们可以在加拿大,澳洲美国,不过放过我们,我们还是要在香港生活。

还有关于租管,他应该是抵挡了政府内部和饭民民粹的压力,所以没有推出租管。

黄尸,比条路我们行,每次看到阿拉伯之春,伊拉克,叙利亚,利比亚,乌克兰,那些被老美黄尸玩的颜色革命,现在人民的生活,我就庆幸香港有CY,有人民解放军。虽然不支持什么限奶令等等民粹政策。
14. 引刀一快 2016-12-24 11:57:59
系咁劲驶咩一面抨击人,一面挂免战金牌?

自知量力?论坛就如此,不能面对辩论者更须“自知量力”。
15. 小明 2016-12-24 13:17:22
引刀,你可能唔明,或者觉得唔顺气,但你似永远唔会明,沈默的大多数包括小弟,欣赏珍港的不只是经验或理念,而系一颗将自己认为正确的想法分享的勇气及热情。我只可以讲,他那每篇包连结的文章,显示的,只是想将他的一路思想架构清楚的作出敍述,不论同意否,这是其的网友也是不能不比下去的。

每个人也可以有自己的理念,你不同意他的,冇问题,但问题系,你的理念又是什么?就是什么刚需吗?对不起,那顶尽是一个点子或看法,不是一个思想架构。你又叫其他人支持你什么?而最重要是你给了什么心机让人支持你呢?

曾经,有人话过...
It is not the critic who counts; not the man who points out how the strong man stumbles, or where the doer of deeds could have done them better. The credit belongs to the man who is actually in the arena, whose face is marred by dust and sweat and blood; who strives valiantly; who errs, who comes short again and again, because there is no effort without error and shortcoming; but who does actually strive to do the deeds; who knows great enthusiasms, the great devotions; who spends himself in a worthy cause; who at the best knows in the end the triumph of high achievement, and who at the worst, if he fails, at least fails while daring greatly, so that his place shall never be with those cold and timid souls who neither know victory nor defeat.

呢个有少少似小弟对你的感觉。当然你可以唔同意。
16. 2011年开始 2016-12-24 13:20:48
多谢珍港兄无私分享,受益良多.
17. 回楼上引刀 2016-12-24 13:26:03
唔洗急,笔者已承认冇引刀咁劲:今时今日,只要够大声,够人多就得。睇怕仲要加埋“够多时间". 引刀嚟此昼夜洗板、宇宙无敌



18. Goal Keeper 2016-12-24 13:41:24
感激珍兄!
19. 叶子 2016-12-24 14:00:44
谢谢珍港兄,
我同你一样都系价值投资者, 睇你篇文章后好有共鸣
我同身边既朋友讲投资, 十个有九个都唔会明价值投资
大部份都系想低买高卖, 所以最后都无兴趣同佢地讲
唯有等佢地自己参透, 横点赚蚀都唔关人地事
见到佢地,吹吹水就算, 
你咁有心机写文, 真系佩服
20. 鱼蛋仔 2016-12-24 14:03:53

尊重珍兄决定,感谢过去分享!受益良多!

21. 打工仔 Andy 2016-12-24 15:37:04
珍兄

讲得好! 其实系呢到真系学到好多野, 无论是好是淡都有各自嘅论点! 

谢谢珍兄 
22. 小师妹 2016-12-24 16:18:04
感谢珍港兄出文及分享亦尊重您不回应的决定!一切尽在不言中,多多珍重!
23. 引刀一快 2016-12-24 17:58:47
小明

呢个一直系好友场,淡友长期俾人恶意攻击,分享咩?你会唔会要求笑爆嘴同拉拉队同你分享?唔通你敢话笑爆嘴唔系有血有肉有思想嘅人?净系好友IQ正常?咪幼稚喇。

喺论坛写得嘢,就要有被否定、反驳嘅准备,呢个系蒲论坛嘅基本素质,遇到反驳就只会埋怨反驳者唔俾面。

作为淡友,想喺好友场得到嘅唔系恭维,而系答案,当你地写出漏洞百出嘅帖,我自然会提问,通常得到嘅都唔系答案,而系更多嘅疑问。
呢度所有淡友以及部分看官一定有同感。

临尾仲要攻击一下对手跟住话免战,呢种下三滥手段得到全面包容,只因呢个系好友场。
24. 荣仔 2016-12-24 19:22:36
珍兄,一直有睇你的文章
很感激你无私的分享,愿意花咁多时间打咁长的文章
你的文章很能刺激读者的思维,
看你和其他高手(历史长河兄、亮剑兄、PP兄等)的文章和回应,不是求一个预期的答案。
高手一个接一个离开,确实有点可惜
我同意网站是社会的小缩影,现在的社会确实很民粹,支持珍兄的决定,希望可以很快再读到你的文章,谢谢!圣诞快乐!!

PS我很小在论坛留言,但以前每天都会在本网站吸收各高人的分享,应算是沉默的一群吧,哈哈
25. 亮剑 2016-12-24 20:37:17
与珍港兄相比,小弟只系蛋散一件,能结识倒真正高手如珍港兄,系我毕生的荣幸。

26. 也是路过 2016-12-24 22:11:28

珍港兄,

谢谢过往分享。虽然有时觉得你的文章太长篇,有点沉闷,但可看到你用心的分享,再次谢谢。

刀兄,

觉得论坛无需分所谓好友、淡友,希望大家回应多写观黠看法,无须理会不友善之言论。

27. Sugar 2016-12-24 22:16:23
多谢珍港前辈分享 !
28. 认同引刀自我 2016-12-24 22:50:37
超,楼主不过系有几个钱好彩就以为可以扮劲,PI好劲咩!
打交,一横一直
投资,低买高卖,就系咁多,驶乜扮高深。
早几年买债买楼,C9都变高人啦!
我估引刀同自醉如果同楼主同一起点,一定有钱三个十倍!
29. 荣仔 2016-12-25 00:36:32
亮剑兄,你太谦虚了
小弟80后,2013年中有缘在本网站读到你们的文章
被你们启发了,2013年年尾买了第一层楼(小弟当时只是个廿零岁的黄毛小子)
到今天已经有2.5层楼,小弟真的很感激这论坛的高人无私的分享
多谢你们!!
(刚才遗忘了另一高手法子兄)
30. MSK 2016-12-25 01:02:36
多谢珍兄一路以来的分享亦支持你的决定,我一向系价值投资策略的拥护者,在下睇咗论坛三年时间从真正有战绩及经验的投资者身上分享获益良多,而非靠把口连香港置业都搞唔掂留言离晒题的所谓投资者身上学嘢,每逢呢位八婆留言近半年已必飞唔睇,因为感觉上佢似我以前曾追看但已罢买的壹传媒一样靠大声发放负能量达到收视目的,简单的讲系无耻。
正所谓同枱食饭各自修行,啱听就学唔啱听就算这是个人修养问题,珍兄相信已看清大局,愿你继续分享好文章。
31. 引刀一快 2016-12-25 04:18:46
路人xx

我依家先睇到,我几时爆人隐私?你咪屈人喇,下流。
32. 命中财 2016-12-25 09:51:15
凡人往往认为财富是靠自身学识投资技巧而得,而不知命中根本是有的。
故自以为了不起,偏执自己的见解,不能回答就肆意批评攻击,也不知这会减损自己的福报。
33. 可惜的圣诞 2016-12-25 10:57:45
本人也是靠此纲的C兄鼓励 一位叫Oscar ,挨了几年完成一生三宅,有尽力有能力去马,但是鼠辈横行,多位前辈弃坛而去,真可惜。
34. 路人xxxx 2016-12-25 15:14:43
引刀的回应一定不看。自己会舒服D。但这个引刀只是为反驳而反驳。完全没有中心主旨。
珍惜前辈的文章识得仔细阅读。获益良多。
35. 引刀一快 2016-12-25 19:01:08
哈哈哈哈
36. 路人xxx 2016-12-25 21:13:38
引刀你几时都厚面皮。又赖皮,成日想118,又话同人被印花税,又无了影。。。
37. 历史长河 2016-12-25 22:22:32
一点伤感,些许无奈,不变的的仍是犀利同挚著。

也许,选择性的回应效果会好一点。从今次的回应箱留言来睇,读者可谓心如明镜,分得清楚什么是合理提问求证,什么是无理挑衅恶意攻击。对前者可以通过回应嚟深化自己的论点,对后者则可以 ignore.

原来删除的文章还可以揾到,如此我就重新发出吧,毕竟是自己一字一句写出的,反映了当时的想法。多谢珍兄。
38. 引刀一快 2016-12-26 00:23:24
什么是无理挑衅恶意攻击。

长河san驾轻就熟喇。
39. 小米米 2016-12-26 00:38:35
选委会,系选特首,应该以全港利益为依归;选委会委员若只强调各自功能界别的利益,当立法会议员咁选,当然好难被选上!
40. 历史长河 2016-12-26 00:44:32
刀兄,欢迎对号入座,哈哈
41. 历史长河 2016-12-26 01:02:46
荣仔,

恭喜你先。
小弟自认同珍港及「三傻」不在同一层次,不过相同的是对砖头的热爱及乐於交流。以后还望多多上来交流。

42. 引刀一快 2016-12-26 01:23:07
长河san,边个可以撼动你嘅宝座吖。
43. 元朗人 2016-12-26 08:55:42
愚见认为论坛气氛不应围住任何人来转,有壮志凌云好,有收租收冇大志好,观点放在这里,时间便做见证。

政府屡出辣招,强力阻止新收租公/婆加入,现有收租人士要多多珍惜,就算今天话你冇鬼用乜投资都吾识,希望将来受人尊敬多少少啦。

百忍成金,忍耐忍耐,博士都话收租行业好闷㗎,互勉之!


44. 自我陶醉 2016-12-26 09:09:51
42楼 引刀兄,同君子讲嘢就唔洗攞证据,不过同呢度某几个人讲嘢,最好就攞埋佢讲嘅说话出嚟佢面前,然后睇佢继续撑饭盖个样,有时都几有趣。哈哈! 

例如:
 "5. ....,引刀兄继续等浪。" 唔知算唔算系挑衅呢?



47. 惜缘 2016-12-26 11:41:44
好同意43楼元朗人兄所讲, 在下认为, 搞到论坛回应箱如斯地步的双方个别人士只不过系「半斤」与「八两」之分, 唔客气讲句,对於这些人的言论除了讨厌,还是讨厌!!!

另外,谢谢珍港兄的分享,在下除了感恩,还是感恩!
48. 向饭民说不 2016-12-26 12:17:03
43楼,你话引刀死鸡撑饭盖。同意。不过你地几个黄尸集团互相撑。都几搞笑。
49. 引刀一快 2016-12-26 12:39:38
惜缘兄

请问你讨厌先发动攻击者,还是讨厌还击者?还是两个都讨厌?还是要求被攻击者不还击?

我相信佛祖会同意,凡事应该讲道理。
50. 自我陶醉 2016-12-26 13:11:09
49楼 引刀兄

佛祖有割肉喂鹰的故事,耶稣也说:“有人打你的右脸,连左脸也 转过来由他打。” 还手当然系错,罪过罪过! 不如你都试试。

清代金缨格言联壁亦有云:“静坐常思己过,闲谈莫论人非。” 这已经是最简单要求,一样好多人做唔到。哈哈哈!

51. 引刀一快 2016-12-26 13:16:51
自我陶醉兄

人家都开始用删题嚟毁灭证据,好明显根本冇谂过以理相搏。删题、人海战术、选择性失明、选择性失忆、选择性失踪,然后涌一堆粉丝岀嚟摇旗呐喊,最后必然有人岀嚟慨叹论坛沦落全因淡友。

不如我地扮埋好友算啦,一系干脆唔再用蓝色注册笔名发言,等佢地开心下。

浪嚟咗都一直夹硬唔认,祗因爲长河san佢最怕睇论坛嘅人感受到大陆嘅隐忧,所以我对佢呢类轻佻举措表示理解,佢一心靠激人希望对手失态,呢类惯技就系呢类人嘅特色,我又点可以要求佢唔用呢?
52. 引刀一快 2016-12-26 13:30:07
To 50楼 自我陶醉兄 

有人打我右边脸,我就打返佢左边脸,因爲右手好力D。


53. 怀念以前的论坛回应和博士的观点互相辉映 2016-12-26 22:30:54
怀念以前的论坛回应和博士的观点互相辉映,一个初哥每天必看的!
54. 引刀一快 2016-12-27 05:04:04
最后必然有人岀嚟慨叹论坛沦落全因淡友。
55. 讲真 2016-12-27 06:10:10
最后必然有人岀嚟慨叹论坛沦落全因引刀一快。
56. 引刀一快 2016-12-27 07:47:56
荣幸荣幸!
57. 正本清源 2016-12-27 09:11:04
论坛日日嘈嘈闭,此乃贫富之争,请对号入座。
58. 亮剑 2016-12-27 15:44:34
历史长河兄,小弟只系乱咁噏,对楼市只限於低层次的评论而矣。
喺呢5~6年,我对香港嘅楼市睇法始终如一,就系政府出错招、落错药!
回想二十多年前,香港因为有中英联合声明的每年 50 公顷批地限制,引致楼市炽热,回归后特首董建华希望「拨乱反正」人人可上车,怎知碰上亚洲金融风暴,令到楼市彻底崩溃,间接引发中产上街。
中央政府不想香港沉沦,就找曾荫权出来收拾烂摊子,曾特首的方案就系「一刀切」。佢首先大减公私营楼宇及土地供应,然后放宽信贷甚至连地都唔做去力挽狂澜,这又引致由一个极端去到另一个极端。
呢七八年香港楼价升到阿妈都唔认得,追源究始内部原因系土地供应不足,而外在原因系美国引发金融海啸,搞到全球争相量寛,热钱四处流窜之下,个个争持砖头自保。
因此呢几年小弟不断提出,一个年轻人买唔买到楼,不是看你的收入而系看你的家底,有无「父干」!
其次系政府你要同地产商有商有量,才能令佢哋嘅农地储备变成楼宇。
最后系政府要将某部分土地的地价,以分期付款方式向小业主收取,以免地价被人为抢高到不合理水平!

59. 屯门厂佬 2016-12-27 15:57:51

珍港兄,

获益良多

珍重!

60. 肥婆四 2016-12-27 16:51:52
感谢珍兄鸿文,多年的文章回应,获益良多。不回应就多保重身体吧,渴望见到您的文章!
61. 香港土著 2016-12-27 18:45:32
好友言论就应该啱就听唔啱听都唔好出声;淡友言论就令论坛好友唔出声。高见!挛挛的心真系容不下不同声音?
62. 二少 2016-12-27 19:05:56
如果连边个系小人边个你君子都分唔出,又点能够做出正确投资,珍兄又何必为咗无耻师徒而影响心情呢?不值啊!
63. 引刀一快 2016-12-27 22:11:20
香港土著兄

我刚嚟呢个场嘅时候,淡友真系超弱势,得笑爆咀久唔久讲两句,记忆中其他淡友都唔多,少有固定笔名长驻者。
冇几耐之后自我陶醉兄来了,跟住其他淡友逐一出场,淡友嘅声音先开始受到注意。
不过,基本上系敌视式注意。我记得有次讲识得一个乌坎村嘅人,咁平常嘅事都会俾人连番质疑,任何分享,都会俾人攞嚟做话柄攻击。
基本原因,系因爲呢几年楼市癫,佢地已经习惯高高在上,睇淡会触动佢地神经。
我希望呢种情况可以维持落去,



好玩呀!
64. 不明白 2016-12-27 23:24:32
真很难明白到底这是好友场还是淡友场。
现时好友已经很少发言及分享,大部份由个别看淡人士洗板。
65. 小凤 2016-12-28 11:40:12

珍港大师告别回应真是可惜呀。不过您大概会像这篇文章一样, 以出文章的方式回应反驳对手的观点吧。 远离泥浆混战,以作者姿态予以还击,这招真是高招啊! 支持您!!

66. 引刀一快 2016-12-28 13:38:50
再高招都可以拆你,就睇愿唔愿意花时间啫,新年大把时间,拭目而待。
67. Jerry 2016-12-28 15:17:54
珍港兄:

字数足够出小说了,哈哈!^^谢谢用心分享,坚持己见!

无论系投资者、投机者、创业者、打工仔,要成功,怎可能只靠运气?


成功的人,总有值得学习既地方。感谢!