地产博客 > 资深会员专栏 返回
浏览人次:39546    回应:38
资深会员专栏

专业机构投资者(三)致亚视员工的信

 

珍惜香港

法团专业投资者
SMIEEE.MSc(ICDE)
http://facebook.com/hongkongtruevalue/
2016年3月7日
致各位亚视员工:

近年,亚视嘅变迁,令到各位员工,不知何去何从。我同好多香港人一样,心底里都支持亚视,对大家能够为呢间电视台,坚持到今时今日,非常欣赏。不过,正如汤博士话,支持还支持,现实喺,如果每日,要睇两粒钟亚视呢,又似乎唔太愿意噃!

我谂咗好耐,究竟有乜嘢,比起睇亚视,更有效咁表示,我对各位嘅支持?结果,我写咗呢封信,希望,以一颗明灯,为大家照出个方向。呢封信,喺唔会寄出,只会 PO 响地产网嘅专栏度,对我嚟讲,已经喺最高调。你地见唔见得到,就要随缘啦!

或者,有人会问,支持亚视,点解要写俾员工,而唔喺写俾老板?乜唔喺应该叫亚视嘅老细,唔好咁孤寒,放多啲水咩?钱,唔喺万能,但无钱,就万万不能嘛!

其实今日,亚视嘅问题,已经唔再响钱度。我相信,你地个老细,响有需要嘅时候,就会放水,不过,只喺应付需要,唔会俾多。

司荣彬嘅角色

首先,我想讲下,将呢封信,归入专业机构投资者系列嘅原因。第一篇,我话,唔好对「专业」呢味嘢,太认真,要建立自己嘅一套「投资理念」,而机构投资,喺一盘生意。第二篇,我就提到,生意人,一定要清楚知道,自己赚嘅钱,点样嚟,俾嘅成本,去咗边;而最重要,喺清楚自己,响市场里面,担当乜嘢角色。

咁究竟,呢个最新嘅亚视投资者,怀乜嘢理念,喺乜嘢角色?

最近,有朋友话,呢个司荣彬,叫人做埋呢个月,只肯出呢个月粮,又唔俾人地响呢个月内,追番之前嘅欠薪,咁 CHEAP 嘅,做乜鬼人老细?我静咗一静,跟住反问对方,司荣彬,喺一个内地人,咁点解,冇香港人,肯担当呢个角色?家阵,喺边个 CHEAP 啲?

亚视嘅真正价值

广义嘅投资,唔一定要为咗钱。买入亚视,喺通过一间,名为「中国文化传媒」嘅公司。试问,一间冇咗个牌嘅电视台,仲有乜嘢前途?仲有乜嘢盈利能力?买嚟做乜?唔通亚视,就只剩番,好似汤博士话斋,用嚟承托对手嘅价值?

咁,亚视嘅价值,响边度

我认为,司荣彬买亚视,喺因为睇到亚视嘅价值。亚洲电视,喺香港第一间电视台,俾到香港人,无数集体回忆嘅电视台,佢代表咗,香港六十年嘅传媒文化,而香港嘅文化,亦喺中国文化嘅一部份,有珍贵嘅历史价值。「中国文化传媒」呢个名称,已经喺最大嘅启示。

但讽刺嘅喺,香港人,对自己嘅价值,不以为然;反而一个内地人,就好珍惜。

或者,大家可以将司荣彬,睇成一个,中国文化嘅收藏家。佢喺一个内地人,珍惜亚视嘅历史价值。但要留意,佢对亚视,喺冇历史责任。所以,佢只能够用最有限嘅资源,令亚视得以运作到最后一日,可以做嘅,就只得咁多。亚视嘅历史责任,喺响香港人度,响各位亚视嘅员工度,呢样嘢,唔好要一个内地人,教你地点做。

睇到呢度,大家应该明白,呢封信嘅对象,点解喺亚视嘅员工,而唔喺亚视嘅老细。

泡沫与萤嘅启示

几日前,长河兄一句:在这三月的雨后,就令我谂起《Shirohae 雨后南风》呢首,嚟自火影忍者《六尾发动之章》嘅配曲。唔知有几多人明白,点解我会,赠呢首曲俾亚视

话说,泡沫(ウタカタ),喺六尾犀犬(ろくび さいけん)嘅人柱力。后来邂逅萤(ホタル),几经波折之后,决定同萤远走高飞。可惜到最后一刻,始终逃唔过被追杀嘅命运,临死前吹出一口泡沫,带住叫萤继续生存嘅讯息,幻化成千万泡沫,最后到达怀著欢欣、盼望,等待紧佢嘅萤手里。

有啲嘢,喺冇办法挽回,但既然已经走到呢一步,就好似泡沫咁,最后一口气,都要为爱自己嘅人,作个交代。亚视距离从频道消失嘅日子,剩番唔够一个月。作为亚视嘅员工,当然可以一如既往,重复又重复,播番啲旧嘢,无声无色,藉藉无名咁,直到最后一日,甚至过埋最后果日,都冇人会注意,冇人会关心,亦冇人会记得。但与其喺咁,点解唔用埋最后呢一口气,做番啲有意义嘅事?或者,搞一系列告别特辑,临别之前,向大众、向世界,展示亚视嘅价值,展示香港人嘅价值。160 个撑到最后嘅员工,响频道变黑之前一刻,同大家道别,为亚视,为香港,为历史,作个完满嘅交代。

死,有轻於鸿毛,重於泰山。

各位亚视嘅员工,你地想名留青史,将自己刻上,香港历史嘅里程碑上面,定喺选择,屈屈而终?

香港人嘅迷失.亚视嘅迷失

香港正值多事之秋,好多香港人,感到迷失,开始忘记,自己个价值响边度。以前,冇钱,就冇书读,廉租屋,冇电梯兼几户一厕,但大家反而会更加努力,肯先去付出,不问成果;买楼,点会计乜嘢唔饮唔食几多年?当时富有嘅人,喺穷人嘅目标。今日呢?公屋设施比美私楼,十几年免费教育,消耗几多社会资源?但年青人,上唔到位,就认定喺社会嘅错,不惜走歪,支持暴力;而富有嘅人,就成为穷人嘅敌人。

贫富,从来都喺咁悬殊;深层次矛盾,唔喺靠无止境去满足,就可以解决。正如,再放多几千万,或者几亿水,亚视嘅价值,都唔会改变。只要你地,睇穿呢个道理,就会明白,你地老细,究竟谂紧啲乜。

真正嘅亚视投资者

所以,亚视嘅最大投资者,唔喺司荣彬。你地 160 位,先至喺亚视,最大嘅投资者,而你地对亚视嘅投资,唔喺用钱可以衡量。呢段期间,大家可能觉得迷茫,不知何去何从,但我认为,你地喺最幸福嘅一群。全香港,七百几万人里面,就只得你地 160 位,呢个机会,一生人里面,好难再有下次。而好多时,成功嘅投资,就喺把握一个,千载难逢嘅机会。

我话,一个专业嘅投资者,最重要喺,清楚自己嘅角色。老细,可以换,但你地响亚视嘅角色,喺冇其他人,可以取代;而亚视响香港嘅角色,亦冇其他电视台,可以取代。各位能否成为,一个专业嘅亚视投资者,定只喺,一个失败嘅投资者,就取决於,你地能否了解自己嘅角色,发挥自己嘅角色。

明灯.答案

响地产网发言,已经有两年半。有网友批评我,讲嘢似是而非,佢地会问:咁即喺点?升定跌?入定喺沽?我只能够话,我写嘢,从来俾唔到大家答案,因为我认为,答案,每个人都唔一样。一颗明灯,比任何具体嘅答案,更重要,更珍贵。

我希望各位,用最后呢一口气,话俾香港人知,真正嘅价值,究竟喺乜嘢,大家应该珍惜嘅,又喺啲乜嘢。唔好问我,咁即喺点?你地,先至喺专业。

 对香港,充满感情嘅 .....

珍惜香港

 火影忍者:Shirohae 雨后南风
 
 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. Sugar 2016-03-07 23:20:26

Dear 珍惜香港前辈,     

Thank you for your kind words.

ATV will live in every Hongkonger's heart forever~~~


 

2. 小师妹 2016-03-08 00:27:42
珍港兄语重心长,心系香港,一语道破。
希望迷失了的人可以早日找到正确路向!
感谢用心的指导和分享!
3. 70后小弟 2016-03-08 07:59:00
亚视员工有没有缘份看到这篇文章,从而被感动,有所觉悟,未知之数也。但是,对怎样正面积极面逆境,小弟总算上了一课。每个人都会面对逆境,有迷惘的时候,这文章也许可以为大家带出一个方向,大家好好珍藏。多谢珍兄。
4. 阿戊 2016-03-08 09:26:45
该死又唔肯死, 该执又唔肯执, 阻住地球转,
烂感性, 烂感情, 就算唔关自己事, 睇见都觉得厌恶,
跟唔上时代唔系错, 死霸住个位先系原罪,
亚视早十世都应该执佐佢啦好唔好,
呢世人都怕且搵唔到更反胃既公司,
死都死得样衰过人
5. 打工仔 Andy 2016-03-08 09:42:29
珍兄

讲起亚记, 小弟也有一点回忆, 小弟电视工程出身, 经常在丽记无记出入! 
时代变了!
6. 怒妇炒鱼柳 2016-03-08 12:24:29
要支持,每人每日睇三个钟,你哋睇到十五分钟我都当你赢,噏就天下无敌,行就有心无力
7. Joe 2016-03-08 19:16:10

又一篇读后令人热泪盈眶、感动人心的文章!

8. 惜缘 2016-03-08 21:06:18

Joe兄, 真有同感啊! 谢谢珍港兄.

【心灵语坊】相遇在天,相守在人,珍惜在心

https://www.youtube.com/watch?v=SRZpZfrqqXs&list=RDHiGgAw9TP3Y&feature=player_detailpage

9. 亚视永恒 执笠嘅系你 2016-03-09 09:22:07
《亚视永恒》

原曲:《爱是永恒》,张学友
作曲:Dick Lee
改词:毛记电视
主唱:河国荣

又有新股东 能受百样痛
难道有合约合同 就会签林峯
这亚洲不可钉盖 废极都有用
Happy birthday to me 岩布仙尼奉送

试睇几秒钟 头部重又重
仍是有误播内容 又抢Fo成功
亚视会 永远都存在
朱慧珊 仲有个何B/有低智森 仲有亢帅克/有宫雪花 仲会掟寿包

*有著我 便有著你 想亚视永不死
穿过咗王征 跨过咗维基
有著我 便有著你
啲节目咁有taste 实预埋你
亚视永恒 熄机无义气*

又播返《富翁》 然后播旧戏
其实佢系有筹旗 就快出人工
每日播 爱国的言论
令我头上 形住有蜜蜂

Repeat*

有著我 便有著你 睇亚视我OK
咪话好难睇 好过睇自己
有著我 便有著你
loop到下个世纪 仲未埋尾
亚视永恒 执笠嘅系你
10. CD ROM 2016-03-09 20:16:45
我反而好深印象亚视播卡通片既辉煌时间,如乱马,入樽,天空战记。系我印象中能与隔离平分秋色既时期。
11. 珍惜香港 2016-03-10 11:13:07
珍惜香港

致亚视员工的信,已经出咗两日。本来写过就算,冇谂过再补充,但我发觉,原来有唔少人,对信嘅内容,唔太明白,或者对出信嘅目的,有所误解。有人以为,我想感动大众,令多啲人支持亚视、多啲人睇亚视;亦有朋友话,我只喺借出信为名,目的喺要劝谏港人,珍惜自己嘅价值。

我以为,信嘅内容,已经写得好白,但睇嚟,我真喺要再写白啲。

首先,我唔喺要呼吁大众,睇多啲亚视,6/F 嘅怒妇,完全捉错哂用神。其实莫讲话十五分钟,我睇一分钟都嫌多,唔钟意都夹硬睇,算乜嘢支持?信中第二段,我写得好清楚,呢封信,已经喺对亚视,最有效嘅支持。

另外要强调,信嘅对象,的而且确喺亚视嘅员工,我真心希望佢地收到。所以今次破例,直接分享於我嘅专页上面,希望多啲人见到同分享。平时,我只会将自己嘅回应同文章,加入留言集个 LIST 里面。

至於信中,提到香港人嘅迷失,的确有劝谏嘅意思。不过我唔喺借出信为名劝谏港人,因为珍惜香港,喺冇号召力,但亚视嘅员工就唔同。我希望佢地,以过来人嘅身份,为港人带出信息。呢个就喺,我信中所提到,用埋最后一口气,做番啲有意义嘅事

点解,要亚视嘅员工,为港人带出信息?

寻日,有线访问筱靖,佢话亚视搞成咁,都喺多得啲大陆股东,引入「大陆嘅方式」,管「香港嘅媒体」喎!我当堂 O 哂咀,依家你怪啲股东,喺大陆人?点解你又唔怪香港人,冇个肯背起呢只镬?股东,主要喺科水,家阵香港人,冇钱咩?果个司荣彬,又几有钱?讲埋啲咁嘢,觉唔觉得惭愧?「香港嘅媒体」,又有几巴闭?唔通喺 HKTV?家阵「大陆嘅方式」,拍嘅内地剧集、电影,质素高,制作严谨,唔怕得罪讲句,HKTV,冇得比!

一年前嘅雇员,依家讲埋啲风凉话,唔追欠薪,就话费事同啲更惨嘅员工争,好伟大噃!讲得咁风骚,我就不妨直说,唔好唔记得,冇亚视,冇亚姐选举,你有今时今日?做人,千祈唔好忘本,家阵亚视得番唔够一个月,真喺有心嘅话,就亲身过去支持下,客串演出,一毫子都唔好收,我就俾个 LIKE 你!

依家香港人,尤其果十六万,加埋果六万六,恃住底够厚,就唔记得哂,自己之所以个底咁厚,喺佢地睇唔起果班,唔多学识嘅前人,好努力咁争取番嚟。十几年免费教育、比美私楼嘅公屋,边个俾钱?冇经济效益,啲钱会由天跌落嚟架?冇地产霸权、冇零售,会有最低工资?呢班香港人,可以巴支闭,大大声话,高铁、三跑,唔希罕!今日,垂手可得嘅,他朝,你跪地求饶,都冇人会俾你。

呢个世界,好现实,你冇价值,人地点解要俾你?

今时今日,亚视剩番嘅,就只得历史价值,既然只得历史价值,咁再放几多水,都唔会有分别,即喺话,莫讲俾多 2500 万、800 万、400 万,就算喺十蚊都嫌多。唔少人对亚视,都好似 4/F 果类人咁,讲啲尖酸刻薄嘅说话,针对嘅,喺亚视嘅员工,唔喺亚视嘅老细,点解?因为每日为亚视频道,安排一幕幕画面嘅,就喺亚视嘅员工,唔喺老细;而听到呢啲说话,最难受嘅,亦喺亚视嘅员工,唔喺老细!

今日亚视,明日香港

香港人,故步自封,但内地各大城市,就一日千里。乜「大陆嘅方式」、乜「香港嘅媒体」,讲得咁风骚?他日香港,只喺得番历史价值,阿爷俾十蚊都嫌多果阵,十几亿人口就会对香港,讲番 4/F 堆说话:该死唔肯死、阻住地球转、睇见都厌恶、跟唔上时代、死霸住个位、搵唔到更反胃、死得样衰过人,之类之类。到时香港人,就可以体会到,亚视员工,今日嘅感受。而当 4/F 果类人果十六万果六万六,走过亚视呢个巨大历史里程碑面前嘅时候,记起当年亚视员工嘅劝谏,都只能俯首而过,唔再抬得起头。

我想问,呢 160 位员工,既然被遣散咗,点解仲肯再签番果份,张建宗评为,唔可取嘅临时约?做到最后一刻,究竟为乜?仲投资响亚视,又喺为乜?你地究竟,喺乜嘢角色?对亚视、对社会,仲可以有乜贡献

如果,只喺一如既往,重复又重复咁,播番啲旧嘢,或者好似司荣彬话斋,搞埋个亚姐选举就算,坦白讲,我都会喺果句,睇一分钟都嫌多。

我希望各位员工,就亚视从频道消失之前,把握呢个最后机会,总结亚视嘅历史、香港嘅历史,通过面对历史,为香港人,带出信息,劝谏港人,话俾佢地知,真正嘅价值,究竟喺乜嘢,大家应该珍惜嘅,又喺啲乜嘢。咁嘅话,你地先有资格称之为,真正专业嘅亚视投资者,名留青史;而亚视,就唔单止喺,一个历史价值咁简单,而将会喺,香港,一个重要嘅里程碑

我已经讲得好白,亦唔会再补充。各位有心嘅话,请将呢封信嘅 FB 分享,再分享出去。虽然话喺随缘啫,但我都希望,增加亚视员工,收到嘅机会。

谢谢各位!

http://facebook.com/hongkongtruevalue/posts/527562907405064
12. 亮剑 2016-03-10 12:57:22
香港某些人以为画地为牢,然后河水不犯井水,咁他们就会重拾往日美好时光,实在太幼稚😓 

呢个世界实在有太多蠢人,以为拉倒港珠澳大桥;整瓜高铁;打沉三跑就可弄到中共垮台,实在中毒太深😰 

事实系香港呢家无左大陆不能生存,反之大陆无左香港仲可以识行识走😨
13. BC 2016-03-10 13:23:06
Good to see 亮剑兄。 Pls share more option
14. 引刀一快 2016-03-10 13:26:17
亮剑兄

好耐冇见!挂念得很。

其实你呢种睇法,先至系正中下怀。

拒绝同祖国亲近嘅人,系一种偏激,而你呢种对事情过敏嘅睇法,系一种对立嘅偏激。

两种偏激广泛喺社会同时出现,就破坏社会和谐。

咁就正中下怀!

靠反对起桥都可以令执政党垮台?有冇谂过系边个谂多咗呀?
15. 惜缘 2016-03-10 14:20:03
亮剑兄

好耐冇见! 非常挂念,希望亮剑兄和各师兄师姐多多分享。

16. 打工仔 Andy 2016-03-10 14:52:24
亮剑兄

好耐冇见! 非常挂念 ! 
17. 小师妹 2016-03-10 14:52:36
亮剑兄,

好耐冇见!好高兴见到你留言,也希望往后你可以多些分享你的意见!
18. Gordy 2016-03-10 16:56:37
珍港兄,从字里我感觉到你澎湃的情感,亦有孤注一掷的悲壮。多谢你令我改观。

一个少睇亚视的人上
19. 元朗人 2016-03-13 11:59:10
小弟亦算是亚视拥趸,近一年翻看过几套剧:追族、天蠺变、鳄鱼泪、亚视百人等,还是非常欣赏。期望奇迹出现令它有得继续玩。
20. 天灵 2016-03-13 12:07:15
好想睇返 恐怖片 天灵
21. Sugar 2016-03-13 12:19:40

元朗人前辈 :

久未见您 , 甚念 ! 愿一切安好 .

我前阵子追看了 " 浮生六劫 " 和 "大内群英 " , 真是日以继夜 ,夜以继日......^^

同望奇迹啊 ,但看来机会渺茫.

22. 元朗人 2016-03-13 18:48:46
Dear Sugar

谢谢祝愿。不经不觉在此网站留连五载了,近期真的看得较疏,但仍关注这里的一切,犹其等待你的新作,希望不用我们等待太久吧。觉得你悄悄已为此站万人迷,加油呀^^


23. Sugar 2016-03-13 22:32:11

元朗人前辈 :

阴霾霾的天气真叫人萎靡不振 ,见到您就像是见到了骤雨中的阳光 !

@.@万人迷???这美梦太好, 不愿早醒 , 且容我多醉一会儿......只怕现实是 "周身债 ,万条数 " 喎^^

最近公私两忙呢 .但 ,既然您想看 ,就为您而写吧 !

24. 珍惜香港 2016-04-03 01:24:36
珍惜香港

亚视,终於关咗灯啦!真喺好失望,算啦,预咗!

寻日,睇 TVB 讲清讲楚,提到香港嘅旅游,要吸引海外旅客多啲,定喺内地客多啲?

不如问下各位,究竟,香港人,内地人,定喺外国人,最珍惜香港嘅,历史价值

记得不久之前,同一间卖旧嘢嘅相熟店主吹水,讲开呢个话题。店里面,有一个胶制钱箱,形状仿制咗旧嘅汇丰银行大厦。店主话,呢件旧嘢,好罕有,亦好有历史价值。我问佢,卖几钱?佢话,五千蚊,之前有好几个外国人问过,一听到价钱就掉头走。香港人呢?反应喺,哗!镶金架?最后,俾个大陆熟客睇中,已经留咗俾佢。原来,好多内地人,专程落嚟香港,揾啲高价旧嘢,尤其有历史价值果啲!

佢话,旨意本地人?去哂堆填区啦!
25. 引刀一快 2016-04-03 02:02:10
所以我一直劝人买多间大陆屋,唔等驶嘢大把地方放,过几十年,分分钟值钱过间屋喇。
26. CD ROM 2016-04-03 02:52:59
珍兄,系咪成个深红色ga?

好似曾几何时家里出现过wor
27. 亮剑 2016-04-22 15:16:22
珍惜香港及引刀兄……你们对袁弥昌这篇文章有何看法?

小弟始终认为,今后几十年系大陆发围起 pair 的时代,如果我们中国人能抓紧机遇,便能成就百年盛世。

http://paper.hket.com/article/1412685/%E4%B8%80%E5%B8%B6%E4%B8%80%E8%B7%AF%20%E5%8A%A9%E8%8F%AF%E6%93%BA%E8%84%AB%E8%A1%B0%E8%90%BD%E5%AE%BF%E5%91%BD
28. CD ROM 2016-04-22 15:49:31
亮剑兄, 别来无恙呀嘛???
30. 袁弥昌 2016-04-22 22:18:06


http://paper.hket.com/article/1412685


31. 引刀一快 2016-04-23 09:56:07
To 27楼 亮剑兄

亮剑兄,引刀好挂住你呢。

一带一路如果可以成功的话,无疑系一个全新嘅形势,但系依家大陆实际上最大问题系文化问题,我一直认爲,今次经济低走,正系教育国民嘅好时机,中国人口够晒多,文化上到去就基本上乜都唔怕。

大陆对香港嘅政策走向,毫无疑问一定系俾你富贵但唔俾你吃重,除非佢自己好唔掂。
32. 萧峰 2016-04-23 10:17:19
引刀兄

「系依家大陆实际上最大问题系文化问题,我一直认爲,今次经济低走,正系教育国民嘅好时机,中国人口够晒多,文化上到去就基本上乜都唔怕」

冇玩了,经济上唔去,文化更加上唔去。经济差,影响社会稳定,人心浮动时,人民受教化?

讲的唔好听d,经济基础决定上层建筑,文化属於意识形态,没有基础,妄论意识形态。

33. 历史长河 2016-04-23 10:21:51
刀兄又在搬龙门,不过搬来搬去,都喺大陆唔掂。
34. 引刀一快 2016-04-23 10:23:39
长河san

系你捻概念啫,大陆终须一跌,我几时都冇改口风。
35. 引刀一快 2016-04-23 10:27:07
萧峰兄

你讲紧呢样嘢,够我喺论坛出三到五篇文喇。

全中国都系一致认爲经济上而国民文化未上,包括文化未上嘅人自己都系咁讲!

经济唔跌,何来教育机会?
36. 历史长河 2016-04-23 10:28:47
终须一跌?升5倍跌2成算吗?
37. 引刀一快 2016-04-23 10:30:54
又捻数字。
38. 萧峰 2016-04-23 10:46:51
引刀兄

你出三到五篇文,我一定捧场!

国民文化的确未跟上,但以经济跌之后来讲文化,颠倒了。

39. 珍惜香港 2016-04-24 03:07:06
珍惜香港

TO:26/F CD ROM

的确喺深红色,有两个 SIZE。仲响度嘅话,就好好保存,呢啲嘢,攞去放就平,人地卖就贵。仲有好多旧嘢,都好值钱,例如九龙火柴、香港火柴啦,特别喺多合一装。

TO:27/F 亮剑

关於亚投行、一带一路,我谂,成或败,好难定义;点先叫成,点先叫败?我嘅睇法,好简单,只要用於发展,用於创造可持续发展嘅资源,咁前景,就一定喺正面。当然,呢啲大 PROJECT,会涉及融资、借钱之类,不过我从来都话,数字嘢,喺可以处理嘅。虚拟数字,点搬都得,但创造咗嘅资源,一旧旧摆哂响度,唔通会倒转头消失番咩!

点解我唔睇好欧洲?因为佢地借钱,唔喺用嚟发展,而喺攞嚟烧

所以,我对中国嘅评价,喺好正面。有啲评论员,成日话大陆会冧喎!咁,乜嘢叫冧?股市跌叫冧?楼市跌叫冧?资产价格,总有起跌,但国民嘅生活,喺不断改善中。三十年前嘅中国人民,断估唔到今时今日,国家会发展成依家咁,我地又点可以,用今日嘅眼光,睇三十年后嘅中国?担心 2047,喺完全不切实际

我睇好中国,喺因为国家,仍然发展中,世界,仍然发展中,仲有好多空间。凡事,都有两面,迟起步嘅,当然要追,但迟亦有迟嘅好处。眼见西方各国,因渐趋成熟,而出现嘅种种致命问题,发展中嘅大国,就可以引以为鉴。所以点解我话,庆幸中国,未有民主,未有福利主义,呢啲恐怖嘢,喺要靠压榨他国嚟填,而可以压榨嘅地方,已经买少见少。唔通阿爷仲会咁傻仔,走去行呢条死路?

增持资源,至喺王道。亚投行、一带一路,就喺增持资源嘅手段,香港能够参与其中,一定喺好事。亮剑兄,中国人,能否百年盛世?我谂,唔在於亚投行,亦唔在於一带一路,而喺在於,呢啲大 PROJECT,引证咗中国领导层,已经好清楚,国家,喺需要啲乜嘢,人民,喺需要啲乜嘢

只要香港,响国家发展嘅过程中,搵出自己嘅角色,充分担当好自己嘅角色,咁就会同国家一样,百年盛世。