地产博客 > 资深会员专栏 返回
浏览人次:83339    回应:9
资深会员专栏

初心(特首篇)

 

珍惜香港

法团专业投资者
SMIEEE.MSc(ICDE)
http://facebook.com/hongkongtruevalue/
2022年7月3日
※珍惜香港※.2022-07-03 22:40【初心(特首篇)】



前日喺香港回归祖国 25 周年,及以李家超先生为首,第六届香港特区政府就职嘅大好日子。响三号风球,强烈热带风暴「暹芭」逐渐逼近,加上新冠疫情第五波放缓后,单日新增确诊数字又再回升,连续三日破二千宗嘅环境之下,今年七一,似乎被笼罩著一股内忧外患嘅气氛。 
 

 

不过,我地嘅国家主席【习近平】先生,仍然亲身嚟到香港,为新任特首及主要官员监誓,同时向新一届特区政府及全港市民,发表重要讲话。我地国家领导人嘅公开言论,一言一词,都喺经过深思熟虑,精简、直接、到位,唔会转弯抹角,所以唔使点解读,亦冇须要解读,因为字面嘅意思,就喺真正嘅意思。自香港回归廿五年以嚟,国家对一国两制嘅坚持同实践,从来冇改变过,对香港市民嘅爱护同包容,亦从来冇变过。正如我响年头嘅《新年祝愿》里面都提过,香港人,其实好幸福,只喺有部份香港市民,身在福中不知福。 

法治嘅初心

今日出文,除咗庆祝香港回归祖国 25 周年,及祝贺李家超先生正式就任香港特首之外,亦借此兑现我年半前所提过嘅,或会为《初心》一文写后续。自潘晓颖响台湾被谋杀至今,已经近四年半,拖到依家政府换届,此案都仲未有迹象解决。关於我对呢件事嘅睇法,文中写得好清楚,我唔再重覆。总之,千错万错,一定唔喺潘妈嘅错,更加唔喺死者嘅错,潘妈就算再出嚟讨千次,甚至万次公道,任何一个香港市民,都唔可以对此讲半句脏话。记得当时我告诫过一啲自命蓝营人士,请佢地自重,但好遗憾,每次潘妈一出场,网上总会爆出一大堆对佢同死者辱骂嘅言论,所以对於呢班人,我唔会再浪费笔墨。今次,不如先同大家重温一下历史。 

话说公元前 207 年,刘邦带兵攻陷秦国首都咸阳,入城后第一件事,就喺废哂所有秦法,即时订立三条人称《约法三章》嘅基础法律:「杀人者死、伤人及盗抵罪」。大家不妨想像一下,如果自己喺刘邦,啱啱推翻咗秦朝,首都市内乱七八糟,你会先立法保障当地人民嘅生命同财产,定喺佢地嘅言论、集会等权利同自由?如果连最基本嘅生命同财产都保障唔到,讲乜嘢权利?讲乜嘢自由? 

所以,法治嘅初心,就喺保障受治者嘅生命同财产,呢个就喺法治嘅基础,法治嘅底线,呢条底线,绝不可破。如果一位受香港法律保障嘅香港市民,俾另一个香港市民杀死,无论案发地点响世上任何一处地方,包括公海甚至喺外太空,只要呢一刻凶手身在香港,咁香港嘅法律制度,就必须确保有能力以谋杀或误杀罪名将佢绳之於法,而唔喺由得佢逍遥法外。 

或者我再讲白啲,如果李家超先生响佢特首任期之内,能够将谋杀潘晓颖嘅凶手,以相等罪名送上法庭,我唔须要再睇佢其他功绩,因为佢已经攞足满分。 

超人嘅期待

我唔喺讲笑,佢真喺做到嘅话,相信香港冇乜嘢问题,喺佢解决唔到,冇乜嘢政策,喺佢执行唔到,亦冇乜嘢目标,喺佢达唔到。 

记得过往我对历届特首嘅评价同要求,都几严苛,曾经以「庸梁」形容 CY、「妹仔」形容林郑,不过讲到严苛,都未及何柱国,佢话如果林郑竞逐连任,就会出嚟参选,质问佢究竟建设咗啲乜喎!其实,我创造呢啲称呼嘅目的,唔喺要当事人难堪或者受辱,而喺想一针见血咁突显佢地作为特首最致命嘅要害,倘若当时佢地能够正视自己嘅要害,及时作出改变,就会喺香港之福。 

今届特首李家超话,施政要以结果为目标,如果套用呢个标准,咁前四任特首之中,表现最优秀嘅,就应该喺曾经俾我尊称为「老曾」嘅曾荫权先生,佢唔单止高票连任,仲喺截至目前惟一能够成功完成两届任期嘅特首,任内令香港经济谷底抽身,港府转亏为盈。至於我对李家超嘅评价,暂时都喺置於中性,主要因为佢冇相关嘅往绩俾我参考,从言论同态度方面,亦睇唔出佢嘅治港同领导风格。或者简单讲,呢位特首城府都几深,颇有领导人风范,如果要为佢拣个简单又到位嘅称号,我会用「阿超」,一个中性,而又带著期待嘅称呼,咁究竟期待啲乜?当然喺超人嘅能力啦!有啲朋友叫佢超哥,但所谓,哥前哥后三分险,我认为唔太吉利。近年香港经历黑暴、疫情,政府再陷财赤边缘,加上中美步入长期矛盾,俄乌开战、环球经济严峻、金融动荡,阿超能否带领香港,再一次谷底抽身,由治及兴,大家拭目以待。 

特首嘅初心

有唔少朋友话,特首呢个位好难做,叫我体谅一下,佢地甚至认为,有能力嘅人,唔会想做特首,呢点我唔认同。如果你有超凡嘅能力,又有鸿图大志为香港作出贡献,有边个岗位可以比美特首,令你对香港发挥到最大嘅影响力?有一点可以好肯定,自香港回归以嚟,冇一位特首喺响唔情愿嘅情况下坐上呢个位置,亦唔存在乜嘢临危受命、顶硬上之类,唔好讲到咁委屈。反之,佢地每一位都好渴望呢个身份,知道自己可以成为特首果刻,都唔知几雀跃。就睇老曾,2005 年接替董伯之前,就俾人影到佢吹哂口哨咁,真喺几风骚;林郑都唔输蚀,连上帝嘅感召都讲得出,心情几 HIGH,可想而知;至於 CY 就更加唔在讲,施政后期搞到左中右不讨好,建制派都唔想佢做多届,可以话喺黯然离任,但原来今届佢又想卷土重来喎!不过,话说习主席今次嚟港,会见 CY,都只喺提到佢卸任特首之后嘅贡献,睇嚟 CY 想做多届,应该无望。 

各位千祈唔好误会,我绝无贬意,所谓人望高处,有野心喺好正常。反之,如果你冇足够野心嘅话,就唔好随便坐呢个位,免得累死人,我唔喺讲笑,真喺会累死人。就好似伟大嘅孙中山,带头起革命,推翻满清王朝之后,就将个总统宝座,让咗俾袁世凯,以为可以避免内战,点知袁世凯弄权,结果又要搞多次革命,之后内战连年,生灵涂炭,直到临终之前,都只能慨叹一句:革命尚未成功,同志仍须努力 

野心,喺成为领导人嘅必要条件,但当你成功坐上特首呢个位置,得到咗荣耀同权力之后,就要谂清谂楚,自己应该以乜嘢心态同理念,去回馈你管治之下嘅香港市民。呢个,就喺特首嘅初心,而我对阿超嘅期望,亦只得一个:就喺爱民! 

爱民与初心

咁点先至算爱民?呢个问题唔容易回答,因为爱民喺心态、喺理念,并冇具体嘅执行模式,而我地嘅祖国之所以强大,就喺因为爱民。一个政策,是否爱民,有几爱民,喺视乎订立政策果刻嘅初心,同埋管治者对呢份初心,有几坚持。就算同一个政策,初心为爱民与否,达至嘅结果,喺可以完全唔一样。 

就以修订逃犯条例为例,记得林郑上任果阵,舆论传有压力要佢响任期之内,启动廿三条立法,至於压力几大,可以参考当时何柱国嘅专访。我响 2017 年中一篇题为《结缘》嘅文章里面,都有提及呢个专访,当时我仲话,个主持问咗佢三次,叫大家睇下何生嘅反应添。倘若修订逃犯条例嘅初心,唔喺因为爱民,唔喺为咗保障市民嘅生命同财产,而只不过喺舍难取易,避过廿三条立法嘅话,咁失败就喺必然。 

爱民,亦唔喺市民要乜你就俾乜,因为好多人认为啱嘅事情,唔一定喺啱,甚至大部分人认为啱嘅事情,都唔一定喺啱,响 2019 年中一封《致曾俊华先生的信》里面,我都有提过呢一点。所以,一个爱民嘅特首,喺唔应该顺应民粹,承诺取消强积金对冲,纵容坊间舆论扭曲强积金成立嘅初衷,将当年承诺帮老板储嚟赔果笔钱夹硬抢走,令打工仔重回未有强积金之前,每两年就惶恐俾人炒嘅年代。 

爱民,喺要为市民做应该做嘅事,同时以真诚去令市民明白,纵使佢地唔喜欢,甚至好抗拒,你都喺为咗佢地嘅福祉而坚持去做,过程可能会好痛苦,但到成果出嚟之后,市民最终会明白。所以政策嘅设计,除咗顾及技术同可行性之外,更要考虑埋市民嘅文化特质同合作性,去决定边方面可以放任佢地自愿去做,边方面要强制。香港第五波疫情,死咗九千几人,话政府冇责任嘅,点都讲唔通。如果明知道市民唔会太合作,都仲要行自愿而非强制性政策,到市民真喺唔合作果阵,就话喺市民嘅问题,自己已经尽哂力,我想问,咁算唔算爱民? 

祝愿

无疑,特首唔易做,不过无论表现如何,国家领导人对香港特区政府同行政长官,永远都喺充份肯定,从呢方面睇,做特首都几幸福。所以阿超千祈唔好辜负国家嘅期望,一定要做位爱民嘅特首。 

香港回归祖国 25 周年,李家超先生就任第六届香港特区行政长官,可喜可贺。最后,我祝愿香港,繁荣稳定,李家超先生,响呢五年任期内,一帆风顺之余,仲可以高票连任,做多一届! 

其实呢个祝愿,已经代表咗好多嘢 …


* 注:按 蓝色连结 开启或跳至相关之参考资讯;
    按 紫红连结 跳至文章上方播放相关影片。


 
 
我要回应
我的称呼
回应 / 意见
验证文字
 
会员登入
登入ID 或 网名
密码
1. 引刀一快 2022-07-04 00:48:52
沙发🛋️
2. AH-HO 2022-07-05 12:32:31
希望未来5年香港能顺顺利利,回复繁荣稳定。也期盼新一届政府如珍兄所言,各政策都能够做到爱民如子。
3. LaLa 2022-07-06 08:47:34
问题是阻力
4. 广府人 2022-07-06 11:35:29
特首不需要爱民。因为,爱到深处必有恨。有爱有恨,便有私心。有私心,即有私情。与天下为公理念相左。

古训有云: 圣人不仁,以百姓为刍狗。翻译成白话就系: 既不爱,亦不恨,无私而已。

特首临机理政,量天时,地利,人和,求事之宜,须自无私始。
5. 广府人 2022-07-06 11:43:17
to 3 楼,

若特首有私心,则阻力大。若特首无私心,则阻力小。


6. CD ROM 2022-07-06 18:04:31
支持珍兄出文~~~

25年其实一转眼已经过左, 回归头20年顺风顺水, 最近的5年才来了比较大的考验. Think positive, 做一点压测, 也是为了走更远的路. 一句"香港不能乱, 也乱不起", 感受是真的入肉..........

Really the time for a new page~~~
7. 向泛民说不 2022-07-07 09:01:59
4楼,今时今日的环境,有无私心这类是口号来的。真正原因是香港人不认清谁是真正爱你,谁是害人。

香港人其实称大陆是阿爷,但是心中却鄙视。虽然没有给选香港人选特首,但是在经济上是完全支持的,比如金融业,比如不断要求香港人搞创科。甚至给自由行。其实如果没有大陆支持,香港肯定菲律宾化。好多人认爲菲律宾的走弱是因爲贪腐,但是东南亚有哪个不贪腐。真正原因是60年代产业搬离菲律宾转移到四小龙之后,菲律宾并没有产业升级。结果连金融业也搞不起来。最后只能大学生也要来香港做女佣教香港小朋友英文。回归后,如果没有大陆支持香港金融业,港女一定是像菲律宾那样,要出国做女佣,还有90年后,新加波不断撬香港墙脚,透过税务等优惠抢跨国企业亚太区总部,很多原来系香港的跨国企业搬去了新加波。而香港政府还是那一句积极不干预。所以去到97后,系香港的跨国企业减小了很多,加上产业消失。如果没有阿爷系03年开放自由行和资金,香港人真系可以点揾食?其实新加波也一直想撬香港金融业墙脚,但是大陆对这个假中国人不放心,香港才是亲生仔。

相反的,回归后,美国养的走狗,日日叫民主豉油,但是却不断的拖香港发展产业的后腿。而97后香港转差,根本就是因爲香港被西方踢出他们供应链之外,所以想问下究竟谁真正为香港。

还有最近大陆已经放风了,香港目前的制度在47年之后,都会维持,因爲这符合大陆的利益,香港金融业会继续,而有大陆产业背后支持,香港金融业必定比新加波强,还有大陆给市场,给人才等帮助香港搞科技产业,所以估计香港创科会加快发展,其实香港的基础科学一直都很好,5间大学的高等教育都很强,只是以前没有产业,所以人才只能去大湾区或者移民,所以大家见不到。但是如果他们留在香港发展,香港经济肯定加速发展。

当然产业发展必须和大陆融合,香港人准备好未?

最后香港人真正的风险就是日日叫民主豉油的美国佬,同时在97后将香港踢出他们供应链之外的美国佬,这个海盗囯会晤会因爲香港发展太好而制裁呢?打击香港的金融业?

8. 珍惜香港 2022-07-09 17:01:11
珍惜香港2022-07-09 17:01《爱民与私心》TO:4/F、5/F 广府人 

我说领导人爱民,是心态、是理念,但不包括感情,所以并不存在爱到深处必有恨的问题。 

至於无私,更为不切实际。正如野心,也是一种私心,没有野心,就连当上领导人的资格也没有。任何凡人,皆有私心,若强行遏止,处处避嫌,势必绑手绑脚,诸事不行。 

记得在 2014 年初一篇回应里面,我曾反问大家,董伯撑物流,是否为以权谋私益行家?唐英年之红酒政策,是否为以权谋私饮平酒?CY 推测量师仲裁,又是否为以权谋私益自己人?难道有亲友从事环保行业,老曾就不能推环保优惠政策?很多时候,私心引发灵感与动力,使政策更有效、更贴地。 

所以,领导人对待私心,不能逃避,亦不能否定,应该以正面心态,坦然面对之,才得以取其益,去其害。
 
9. 向泛民说不。 2022-07-09 21:18:36
8楼,一个没有私心的肯定是躺平的人,点解要从政。需知政治是最肮脏的。
当今领导估计是要留名千古。所以吾怕得罪资本。