地產博客 > 絲絲細語 返回
瀏覽人次:20439    回應:1
絲絲細語

買樓等退休

 

左丁山

2021年2月15日

  左丁山本來就唔興四圍去拜年,今年因政府唔鼓勵有大型家庭集會,更加冇興趣去拜年,整個假期預備留在屋企睇報紙、刨馬、讀吓書。當今智能手機流行,年卅十晚十一時過後,手機WhatsApp湧現大量朋友賀年短訊、短片,盡是從互聯上取材嘅。要逐個覆幾花時間,自己又唔識自互聯網copy and paste,只好借此一角,向各位朋友致意,大家牛年順景,身體壯健如牛,事事順遂。

  一位朋友今年退休,前一排見滙豐有一個調查,指普遍香港人希望退休時,有470萬積蓄,能享滿意退休生活。呢位朋友C短訊話:「我睇曾智華批評過470萬退休金完全唔夠使,你認為點呢?」朋友C有自己樓,早已供滿,自住唔憂冇瓦遮頭,幾好吖,問470萬元夠唔夠?又幾刁鑽!唔知滙豐如何得到呢個數字。寫夠500萬元嘞,65歲退休,活到90歲,今時不是奢望,朋友假設還有25年時間,500萬元如放在存款戶口,目前幾乎係零息,每年用20萬,每月用16,666,夠唔夠呢?如果要有菲傭,訂齊收費電視節目,Netflix及出外飲茶食飯等等,梗係唔夠用啦,如果還要租樓就更加唔夠錢用。在香港退休,想生活安定,第一件事就係要有一個單位自住,否則退休後畀租畀到驚,精神緊張,易生病痛,拎400萬去買股票,留番100萬傍身,買一啲高息股,例如6823香港電訊,現價約有七厘息,一年收息28萬,梗係好過每個月搣本金來過活;但買股票當然有風險,好似滙豐咁,以前每股派息4元,小股東唔知幾爽,但2020年突然受監管機構所逼,唔派息,退咗休嘅食息股東當然喊都無謂。買公用股收息,突然冇息派嘅機會比較低,值得退休人士考慮,要講多一次,假設自己退休有樓自住,年青時便要節衣縮食去供樓,以待退休。今日香港經濟不景,買新樓仍然有咁多人,一般認為係超低利率所至,但左丁山以為其中一個大因素就係買樓自住長揸不放,等退休,係兩代香港人嘅共識。地產發展商其實對此知得更清楚,疫情之下,樓價跌得輕微,係可以解釋得到嘅。香港除咗樓價高、租金貴之外,食物與交通費與外地城市比較,其實相對便宜,退休人士大多有二元乘車優惠,老咗仲食得幾多吖!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 龍虎豹 2021-02-20 07:37:42
要講多一次,假設自己退休有樓自住,年青時便要節衣縮食去供樓,以待退休。今日香港經濟不景,買新樓仍然有咁多人,一般認為係超低利率所至,但左丁山以為其中一個大因素就係買樓自住長揸不放,等退休,係兩代香港人嘅共識。
……………………………………………………………………
話需如此,有幾多後生肯節衣縮食為十年後打算?

樓係少部分人先可擁有,古今皆然。