地產博客 > 絲絲細語 返回
瀏覽人次:21033    回應:1
絲絲細語

樓價仍升

 

左丁山

2020年1月4日

  大公報12月28日頭版大字標題:「暴亂唔停業主慘情,CCL自11年表現最差」,幾嚇人。不過大公報頭版又有一個附表:CCL指數過去12年表現:2008年跌15.2%,09年升29%,2010年升2.07%,11年升8.1%,12年升19.8%,13年升2.8%,14年升11.2%,15年升2.6%,16年升7.7%,17年升12.8%,18年升5.7%,19年升1.85%。

  所謂11年最差,原來係指升得最慢,升咗1.85%箒,其實睇咗呢個表,左丁山可以另寫一個標題:「逆權運動唔停樓價照升!CCL連升11年!」你鍾意邊個標題?睇報紙唔細心,會嚇到早餐都食唔落。

  計吓數,假設CCL在2007年年底係100,2008年年底就係84.8,09年升番上109.4,2010年係111.65,如此類推,到2019年就升到258.1,12年間樓價指數升咗158%,假設2007年買樓用咗400萬,到2019年已升至1032萬,業主應該笑到四萬咁口啦,邊度會覺得慘情啫,不過藍色報紙要奉命唱淡,唯有高呼好慘。2018年年底有分析師唱淡2019樓市(當時未知有送中條例),係以為進入加息周期,點知加息如曇花一現,眨吓眼已重返減息零息時代,嗰啲唱淡分析師咪錯晒囉。

  去年6月以來嘅社會運動,最重傷嘅行業係旅遊業,零售業與繁盛地區餐飲業,總之與外來遊客有關嘅公司、商店,及銅鑼灣、灣仔、尖沙咀、旺角餐飲,皆損失嚴重,其他支柱行業如貿易及航運,只受中美貿易戰影響,最重要嘅金融證券,可以講得係絲毫無損,嗱,香港係2019年IPO世界冠軍,恒生指數重回二萬八千點,成交額與2018年差不多,樓市成交不見大幅萎縮,樓價仍然上升,藍絲想極力唱淡,但數據並不支持。

  至於旅遊業有關行業大受打擊,可能係與自2004年自由行開始有關,自由行一打開閘門,內地客如洪水決堤,大量湧入,令香港零售業(特別係珠寶、化粧品、藥房)成為暴發行業,於是大量擴充,廣設店舖,造成旺角彌敦道兩邊馬路有半打珠寶店咁誇張,三星酒店(由工業大廈改建)亦如雨後春筍般出現,幾年前已有冷靜觀察家認為此情況不可持續,一旦內地人多去泰國,少來香港,旅遊業就會出現教科書所言之「過度擴充」over-expansion危機,2019年逆權運動就是催化劑,將大氣球刺破,以後旺區之過高租金必然下跌,珠寶店化粧連鎖店回歸理性經營,暴發大茶飯時代已經過去了。

  至於樓價股價在2020年會否繼續上升?股市走勢受美國、內地影響,應該係有調整,不大跌,可上升嘅局面;樓市就因為利率低,新樓供應受土地限制,仍有支持力,只怕失業率急升,一般淡友唱淡跌兩成,難啲咯,2008年有金融海嘯都只係跌15.2%啫,2020年唔駛咁驚。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 升少當輸 2020-01-12 14:38:01
快進入負利率時代,揸現金冇數,供應又已经绝望,而一大堆新股今年又會上市,所以銀行又水浸。港樓今年升少當輸。