地產博客 > 精英文集 返回
瀏覽人次:8784    回應:1
精英文集

公屋輪候排長龍 過渡房屋等餐懵

 

2021年12月1日 (東方)

裝假狗,瘀到嘔!政府口中嘅「民生無小事」,推動公營房屋嘅興建,庸官都係經常廢噏當秘笈,一時「有得意嘅想法」;一時又話已覓到「足夠土地」;一時又話目標「只有一步之遙」!查實基層仍然「房事不通,活得陰功」!

 

各位,截至今年9月底,公屋一般申請者平均輪候時間延長至5.9年,長者一人申請平均輪候時間則為3.8年,兩者均創22年新高。庸官至叻推搪卸責,譬如話疫情影響房屋編配工作,好似駿洋邨及暉明邨被用作隔離檢疫中心,令公屋住戶無法如期入住云云。之不過,唔好忘記喺疫情之前,公屋嘅輪候冊都水蛇春咁長,基層望到眼出血、頸都長都係上唔到樓!                                                                                                                                                    

 

阿哥!實情公屋建成單位向來無法追上公屋申請數字,長遠而言,亦大幅落後於《長遠房屋策略》所訂定嘅供應目標。為解決市民嘅「房事」,又要表示政府關心「重中之重」嘅居住問題,於是又着力於小修小補「過渡性房屋」政策;運房局早前稱已覓得足夠土地提供原先嘅承諾目標1.5萬個單位,預計將於2023年興建完成喎!

 

各位,「好打得」嘅林鄭自2017年上任後,主推由社福機構主導嘅「過渡性房屋」,截至2019年相關單位仍然不足1,000個,相對幾十萬個劏房戶可謂杯水車薪;林鄭遂於當年提出,將喺20202023年間提供一萬個過渡性房屋單位,後來又加碼至1.5萬個,之不過,又係口爽爽,含住粒糖,卻遲遲未見達標!

 

呢個政府向來講就無敵,做就無力!根據公屋聯會資料,今年第4季將有97個過渡性房屋單位竣工,至於2022年共有約4,890個有關單位,5,000個都冇;去到2023年達到近年高峰,亦不過有9,201個過渡性房屋單位竣工。講真,咁嘅進度點稱得「理想」吖?唔好忘記,一般而言,住戶只可喺過渡性房屋住兩至三年,之後未必輪候到公屋,一般家庭輪候時間冇6年你都咪旨意會上到樓,即係佢哋大有可能又要「過渡」回到環境惡劣嘅劏房!以首個組合社會房屋「南昌220」為例,其租約只有兩年,並將於明年8月屆滿,屆時租戶若未能上樓,意味佢哋又要蝸居劏房,試問情何以堪?

 

公屋聯會建議政府將過渡性房屋單位增加至3萬個,同時安置即將於過渡房屋屆滿嘅租戶。其實,政府若然有作為,本報大早又為政府覓得大把棕地又獻船灣淡水湖發展藍圖,政府若捋起衣袖努力建屋,已大庇香江劏房戶俱歡顏矣!一天光晒,基層「房事」暢通,生活輕鬆,怨氣頓消,祥瑞自來,想唔政通人和都難喇!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
4. onclerkclerk 2021-12-22 15:22:21
唉!又是講極都唔聽,在香港動甚麼也不能動水資源。