地產博客 > 脫苦海‧梁隼 返回
瀏覽人次:18951    回應:22
脫苦海‧梁隼
脫苦海‧梁隼
千萬富翁調查報告讀後感
梁隼
2021年4月9日

  有銀行發表年度千萬富翁調查報告,從隨機訪問的4000人中推算出香港淨資產超過1000萬港元,同時流動資產超過100萬港元的人有51.5萬人。

  過去一年,股票市場大起大跌,不過買中爆升股的人,身家隨時上升十倍八倍,坊間亦出現了很多教人投資的KOL,反而樓市就相當淡靜。但是千萬富翁報告告訴你,要成為富翁,必定要有層樓打底,千萬富翁的資產分佈中,有71%就分佈在物業上,過去一年在股票市場獲利的人,應該會為樓市帶來一定的購買力。

  千萬富翁的流動資產如何分佈,也反映了他們有幾渴望在市場上買筍貨。流動資產中有54%分佈在現金或存款,27%在股票,其餘不足兩成就在基金、債劵及其他項目。把80%的流動資產放在已變現或容易變現的項目,一有買筍貨的機會也容易把握。

  一些有關樓市問題的答案也很有趣,15%的人覺得樓價未來12個月會上升,36%的人覺得樓價平穩,49%的人覺得會跌。問被訪者想買樓嗎?只有8%的人想買,24%的人中性,69%的人不想買,問被訪者現時是否買樓時機?10%的人覺得是,52%的人中性,38%的人覺得不是,照以上數字,看似很多人看淡樓市或者食花生等方向,只要把千萬富翁的流動資產分佈一拚分析,就可以看到這些樓市問題的答案未必是真誠回答,說到底個個都想買平貨,又怎會大聲向人說看好樓市?

  另一條樓市問題,問被訪者有興趣買那地的樓?只有8%的人想在香港置業。看來個個都想移民,所以未必以香港物業為目標吧。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2021-04-09 23:55:52
價升值跌,唔知叫做睇好還是睇淡?
2. 向飯桶說不 2021-04-10 00:54:35
拜登政府狂印銀紙,想唔升都難,除非解除聯匯。
3. 網中人 2021-04-10 01:10:14
//只有8%的人想在香港置業//
嘩!8%???,不得了,短期內哪有這麼多供應? 難怪,噚氣的再講,多少的供應也僅為一小撮人購買。
4. SYB 2021-04-10 09:53:38
一千萬?除了一層自住樓,二三百萬未够退休交管理費,地租差餉水電,衣食住行幾十年。都要回國内慳住用😱😱
5. 鳥6 2021-04-10 12:30:06
原來有8%富翁想買樓,咁就大鑊,8%即係有4萬人,香港今年新樓供應只有一萬幾千伙,供不應求,難怪近日咁多人出嚟買樓。

博士,不如你估下今年第三季還是等四季中原指數才會創歷史新高。我估第三季。

香港樓價通常在多人移民的年份會升到飛天,唔信睇下80年代同90年代樓價表現。


6. 龍虎豹 2021-04-10 15:32:33
我剛走個租客租我單位接近4年,淨租金支出已超過70萬。

佢曾經擁有兩個單位,在十年前覺得好賺賣晒等跌,之後越搬越細,到租我度時入息証明已經是兩年前,六十歲人沒有正職,如果不是AA認識佢力薦話係好客我不會租畀佢。
7. 識唔識計數架? 2021-04-10 16:28:23
原來想買樓嗰8%富翁,扣除手上自住物業資產後,所剩唔夠三、四球,都唔夠畀首期同買家印花稅,仲要生活費同供樓,點買呀?識唔識計數架?哈哈
8. 引刀一快 2021-04-10 18:29:44
龍虎豹兄

你個租客,就係失手在當年冇攞錢去珠三角買平樓,否則,三分之一賣樓款,依家可以換返兩間港樓返嚟。
9. 龍虎豹 2021-04-10 19:27:10
刀兄,我由2009年起買過兩間樓一間舖,現在只揸港樓。
10. 龍虎豹 2021-04-10 19:28:58
賺不多,慶幸走得甩。
11. 龍虎豹 2021-04-10 19:39:50
大陸樓,到真係打算搬上去長住才買未遲,大把選擇,而且租金奇低,租抵過買。
12. 龍虎豹 2021-04-10 19:59:26
06年,我睇中屯門碼頭一個每間425呎頂樓自製相連居屋,叫價200萬未講價,但我睇樓時嫌電梯聲太嘈放棄了,今天每間值五百多萬。
13. 龍虎豹 2021-04-10 21:04:20
三年前第一行港珠澳大橋,在珠海關口看到《格力海岸》的展銷廳很吸引,看完個約800多呎的望海單位很喜歡,不過成四萬一平方總價要400多萬人仔,雖然仍平過港樓但已經不可當買咗得閒上去打掃的渡假屋了,投資太大,到我上去住我寧願租,二三千人仔一個月。

而且當時珠海樓是不批准賣給非本地户口人士,那些北方富豪買了都係同KFS簽私約講個信字,AA話等到政策改變時便可正式在房產局登記,同任你買的地區相比,珠海是限購的,國內叫香港人任買的地區,肯定沒有本地人接貨,國內人喜歡新房子,除非是地區和格局無可替代的樓王物業,才會有人接貨畀你賺。
14. 龍虎豹 2021-04-10 23:37:29
在我失諸交臂的大灣區樓,肯定是04年深圳南山區的《漾日湾畔》和《蔚藍海岸》,當時100至120平米總價不到100萬人仔,我在攪搬錢落訂手續時被帶我上去睇樓那朋友,在關口截停我,他由92年已投資大陸樓一路買,在04年已經有兩三個三四十萬600呎到中價深圳物業,佢見我咁狼一買就成千幾呎當時咁貴的(蛇口)樓覺得風險太大制止我。

馬後炮就那兩個物業今天要成八球(可能有價冇市),我肯定就算買了到升一倍一定放了,點估到今天升八倍?

所以用個别股票或樓盆的最大升幅來造文章,其實冇意思,唔通玩股就一定買中股王,重係最低價時入揸到最高時冇放?大灣樓咪一樣,有幾多港人當年買南山區豪宅揸到今日賺盡?
15. 龍虎豹 2021-04-10 23:53:57
我買大灣樓都叫有賺,但肯定不及同期用同價買的港樓賺得多。

我識得嘅朋友中,買賣大陸樓都冇得賺最多打和,你可以話時機不對,或者識得人少。
16. 引刀一快 2021-04-11 00:43:08
龍虎豹兄

06年嘅貨,依家係十到十三倍,用走得甩形容似乎怪怪地。
限購要睇時段,好多嘢係唔會喺媒體正式報道嘅,呢個就係多同地代聯繫嘅重要性。
17. 龍虎豹 2021-04-11 00:58:55
講起個地舖,72平方5M高樓底,買入價86萬還要full paid,擺空兩年才租出收1900人仔一個月,回報慘淡。

那租客是同樓盆業主開(棋牌)室,即打麻將架步,最好笑係樓盆對面係一堆農民房,和我們樓盆間買舖時sells話政府會起的6行車綫主道終於動工,但租客通知我大家去維權,原來對面的農民房業主和某部門人士相熟,強行將原本平我們樓盆的路面抽高2米去遷就對面農民房的水平高度,完工後我那舖和樓盆落雨時肯定水淹,好在最終是維持原設計路面低我舖那盆300mm正常落差,這故事教訓我一定别信所謂(未來)優勢,一定要看完成實物才决定。
18. 大灣刀 2021-04-11 08:11:29
港人搬番大灣住的另一大好处,就係減壽5至10年,大大減低退休成本。死得快,好世界。

住係香港壽命太長,退休成本高。
21. 龍虎豹 2021-04-11 10:29:32
世事豈能完美,針冇兩頭利。

大灣樓平係相對港樓來算,如果純退休想住下在香港享受不到的大空間,大灣樓是不俗。

但未退休的打工仔,要朝9晚5在港返工加埋子女讀書返學,想買間大灣平樓代替貴港樓係不切實際。
22. 引刀一快 2021-04-11 13:26:25
龍虎豹兄

鋪同樓係兩碼事,做樓嘅地代,百里挑一去做鋪,完全兩個市場。
大灣區嘅屋,應該以提升生活質量為目的,金錢回報反而係附帶。
中港同質化係大勢所趨,十到十五分之一嘅價錢,香港好多人住劏房住貴屋,假如港樓樓價不變,係一世冇機會買港樓,但係儲錢買大陸屋唔難,買咗大陸屋可以平衡一下香港居住空間嘅艱辛,生活質量提升,對社會絕對係正面嘅。
23. 龍虎豹 2021-04-11 13:42:54
刀兄:

同意。人各有志,買得起港樓始終係社會小部分人,任何年代都一樣。

好多住緊劏房的新移民係睇中香港的揾食機會,佢地好多在大陸都有自住物業,如低成本的祖屋或農民房,佢地會唔會花50到100萬去大灣區買間商品房呢?我覺得機會不大。

至於租貴屋的港人買間大灣樓平衡下,我識得嘅朋友中都有人做咗,近到深圳都有,但後來佢地都越來越少上去玩,丢空一輪後都賣走了。
25. 引刀一快 2021-04-11 16:29:29
龍虎豹兄

我講緊嘅嘢,一樣有朋友做緊,揾我幫手揾筍盤,揾到又返唔到嚟睇樓,又唔敢隔山買牛。
越玩越少去嘅人,有好大程度係唔識揾地方,唔識調配兩個生活嘅地方,否則唔會丟空間屋。