地產博客 > 文亮語 返回
瀏覽人次:65294    回應:94
文亮語

股市大冧,會不會是細價樓爆煲的催化劑

 

湯文亮博士

紀惠集團行政總裁
2015年7月9日

  有已經離去網友以挖苦態度留言,大讚林一鳴睇股市,樓市都咁準,我絕對同意,不過,林兄雖然是叻仔一名,但始終太過鋒芒畢露,在叻仔排行榜只是排第三,如果林兄要講股票,就應該要等566復牌才講,否則,講到天花龍鳳都冇用,俾人問一句便立刻啞口無言,現在連新華社都話中國政府救市無效,面對中、港兩地股市又大冧,現在話股市進入熊市,咁樣講話阿媽係女人沒有分別,但最奇怪竟然得到我那位離去網友大讚,林兄始終有相當魅力,這點我自愧不如,認命。

  如果講樓市,最好等8月14日才講,現在形勢有變,樓市出現了催化劑,平穩樓市可能會急速下跌,甚至爆煲亦不出奇,催化劑是什麼我唔講大家都應該知道,就是近日股市大跌,有不少撻訂個案出現,包括以市價出讓的新居屋,在二手市場上亦有不少類似個案,但以現行計算方法,那些取消交易個案早已計算在指數內,不能夠被推翻,所以,我認為就算我輸,都只不過是輸在制度上,如果把那些撻訂個案 ,鹿死誰手仍然是未知之數。不過,無論如何,賭約是以8月14日的中原指數為準。

  近幾日我問過最近買了細價樓並且已經成交的人,十之八九都會話,如果時光倒流,他們情願沒有買樓,大家千祈唔好覺得很奇怪,唔信問吓身邊在近幾個月買了樓的人,我再問他們的始末因由,當中有一些話如果沒有買樓,就可以買股票,一定會大賺一筆,另外有些人已經感覺到細價樓已經轉勢,又聽到不少撻訂個案,雖然現在所買樓宇市價比買入價高,甚至到8月14日的時候仍然高於買入價,但地產商源源不絕供應量,細價樓想繼續升都難,要番錢好過,已經買了樓的人有此心態,未買樓的人又會如何。

  我寫「細價樓爆煲論」的時候,財務公司是爆煲的主要原因,但在樓市上升軌跡中,六個月是不夠時間令樓市爆煲,但在復活節後形勢急變,股市人話大時代來臨,細價樓業主應利用物業加按,迎接股市大時代,現在大時代變成大春代,即是春秋戰國時代,立立亂,把握得好當然賺到盤滿砵滿,不過,大多數將物業加按迎接大時代的細價樓業主就損失慘重,財務公司已經開始追數行動,是否會令樓市下跌,大家請拭目以待。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. Financial Analyst 2015-07-09 08:38:55

To be honest, I don't think luxury apartment can be immuned from the crisis if small cap flats are being sold off given the much higher price premium of luxury flats. Small cap flats only worth 3-5m, if their values lost half, it was about 1.5-2.5m only(but I can still recieve a proper rental). For the luxury flats, they worth at least 30-50m. If they lost 30%, it would be about 10m-15m(rental yield is low).............

So, if i have both, i must sell the luxury flats first.....

大家請拭目以待...

 

 

 

 

2. 笑啖渴飲 2015-07-09 09:19:21
笑死人咩博士, 我係公司大大聲笑左出黎呀大春代。
BTW, 喜見博士細爆論重燃希望,
4. 引刀一快 2015-07-09 09:28:02
股市冧祇係序幕,後面陸續有來,細價樓爆硬。
5. 無奈 2015-07-09 09:32:45
好文章,尤其是尾段。就是喜歡博士寫文的風格,花樣百出。贊!
6. 細價樓必爆 2015-07-09 09:39:56
明白,大春代=春秋戰國時代。哈哈!
博士好嘢!
7. hifi 2015-07-09 09:42:55

迎接人造賭卓大時代,五窮六絕七跳樓,班人送你到西方極樂無人怨,政府高官仲幫手後面幫你一把,反而叫人小心樓市就比人鬧。

8. 舍神 2015-07-09 09:49:36

我同意細價樓是位高勢危, 爆是遲早的事,亦完全同意博士早幾個月不是買樓時。

只是為博士6個月打賭有點擔心, 是timing問題, 但買唔買的結論是一致的。


賣樓對好多人來說即是割肉, 常人是下不了手, 惟有專業炒家。

樓市要d人供唔起, 走頭無路,斷供, foreclose, 銀主盤......等... 冇半年以上, 不能毒發身亡!

股市下跌, 蒸發大量財富 (其實是proxy of wealth), 影響是即時, 但可惜政府出招後, 成交太少, 對整隻大船影響不大!另外整體借貸成數不太高, 像97年一人hold 多層樓的狀況大不相同, 97年10月後98年初仲有小陽春 至年尾先大趺!

如博士定一年之約, 勝算甚高! 

但要一個月多d.....14/8, 即使股市續跌, 我想只也得3成勝算 !


9. 丸子 2015-07-09 10:07:14
  1. 其實,博士分析到樓市大勢方向,已經對我們受益良多,8月是否指數下跌我覺得冇乜所謂,畢竟投資樓市會看長線方向為主。根本網友們心水好清,明白數據的整理來源,不會被蒙蔽而只是作參考,重要的是市場大圍行為方向才最重要。故此,過來人智慧經驗的分析,我覺得更加重要。
10. law student 2015-07-09 11:12:15

近日覺得博士大方向估得無錯, 但要煞停一列行駛中的火車, 需要的時間被估計所需時間為長, 其實不足為奇. 若把8月14日改後3個月, 勝算可倍增.

11. 離你而去的不是朋友 2015-07-09 11:21:24
博士, PP有料就去論壇發表文章啦! 你都叫佢哋獨立D, 成日寄生在你的網中做反派, 边薯真係讚林生?!
12. 山高雲低 2015-07-09 11:29:44
得知博士8月1號有個講座予某銀行家及銀行客戶。小弟有幸在被邀之列。可惜那段日子與家人遠行。不能一睹博士風彩。實一憾事!
萬望博士把精華撮成文章,予眾人能在網站欣賞。HB
13. Johnny 2015-07-09 11:31:58
建議博士唔好再咬住林一鳴唔放,平心而論,不喜勿怪!
首先作為一名讀者,只會睇事實與筆者的預測對比是否準確。事實上林生預測細價樓升爆邊已經中左,而佢其實系幾個月前已經睇港股會轉熊,只不過比A股大牛市拉住跌唔落,而家A股PK港股立即遭殃,中曬。
對照博士既爆煲論,雖然set左好多假設,又話如果政府唔出招,如果細價樓繼續狂升就會跌,事實上條件唔符合所以跌唔落云云,雖然都算講得通,但係大部分讀者點會理你甘多假設?而且做預測本來就係要將所有既假設考慮曬先給出一個判斷,set曬甘多假設難免比人一種“你講曬啦”既感覺。
對比兩位的文章,林生一直沒有直接反擊或嘲諷博士,仲反過來話博士系做好心勸告實力不足既人咪夾硬上車,而博士就下下咬住566,又話人教壞人高位入細價樓害人乜乜物物,普羅大眾比較兩者,高下立見。
14. Alan Pepper 2015-07-09 11:35:16
Heard a few people urgently remortgage their homes to cover margins or buy stocks... this is obviously not statistic, but maybe an indication??
15. 路人甲 2015-07-09 11:40:07

香港地, 房屋一直解決不了.
總是聽到樓梯響, 還未見影....
博士經常說增加供應, 這點我不否定; 但係, 好似仍然係求過於供.

之前曾蔭權乜都唔搞, 已經大落後了幾年, 所以呢10年8年都唔會增加到什麼供應.
去到思歪才搞, 已經遲了好多步了.

16. chinamanfung 2015-07-09 12:05:20

非常同意 Johnny 兄的意見!

我覺得博士一提出與林博士的比試一刻已輸了,往後令人感到湯搏士是那麼在意此輸睹,再輸多浸。即使細價好運地下跌,都已是輸了。

此終兩位博士只是叻人,但並不是神!




17. 湯文亮 2015-07-09 12:47:21
樓上兩位,
我早已受蔡東豪所托,不再提林一鳴,但有一個大前提,就是網友不要用林一鳴的名字在網上攻擊我,昨日pp提及,我一定要反駁,至於566,林一鳴有責任向公眾交代,已經停牌兩個月,不少人輸了很多錢,你們大概知道,林一鳴是566CFO。
pp,
請你不要在我的回應箱內挑撥離間,你自己亦有專欄,你鍾意點寫都可以,拜託
18. 打工仔 Andy 2015-07-09 13:15:47
A 股是系統不成熟及炒過龍的結果! 希望佢地可以完善一下, 明天會更好! 
我都相信今次股海翻波事件會响樓市, 但又未必會大跌喎!
19. CD一ROM To 13 Johnny 2015-07-09 13:38:25
講得很好!完全講出我地呢啲CD一ROM嘅心聲。
20. 丸子 2015-07-09 13:47:40
感謝博士一直無私的分享,感恩有前輩肯教導我們(我是70後)。如果大家以互相尊重的態度分享,實在是大家的福氣。
21. 無知婦孺 2015-07-09 13:49:01
To 13/F

看事情不要單看表面,林一鳴博士是估中了細價樓單邊爆,可這個事實全論壇都知道的,包括博士自己也心知肚明,可身為公眾人物發表公衆言論,須同時考慮到對市場所造成的影響,如一個人只考慮提昇自家身價,而妄顧公衆利益,這樣算什麼君子?湯博士聲討小人,又問題何在?想安逸做人,最重要是分清敵我,切寄把間碟當盟人!
22. 學人 2015-07-09 14:47:46
好同意博士所講,566係大劑到無泡。股票市場太多高級騙徒(容我稱佢地為騙徒,因為同呃阿婆買倫敦金無分別),欺詐散戶。作為CFO唔上身邊個上?
23. 細價樓必爆 2015-07-09 14:48:40
細價樓爆邊?不要誤導啦!我只看到有幾條盲毛用不合理兼創新高的價去買一些3拾幾年既细價樓咋!(我講係得幾條)那有爆邊呢?!
24. 華特 2015-07-09 15:07:21
我覺得博士在意網友對林生的意見,只是希望大家不要盲目跟隨一些評論員的預測而做一些後悔萬分的決定,譬如夾硬搵財仔幫上車,其實用心良苦,情況有如阿媽叫個女唔好同個浪子一齊,不過個女未必領情,覺得自己駕御到浪子,仲嬲埋阿媽。我覺得人貴乎徳,博士可不必介懷網友意見,大部分人其實感受到你用意,在下亦覺得你德行高尚,保重身子
26. 良心業主 2015-07-09 18:15:43

        我早在兩個月前已表示樓市在今年內必會有所調整,主要原因是由零九年至今,樓價不但沒有調整,近一年多以來,反而加促上升,而且幅度頗太,遠超一般市民的加薪幅度。現在是消耗市場的剩餘購買力;另一方面、四月期間股市大幅上升,亦抽走一部份資金;再加上加息預期,理性分析是不應在現階段買細價樓,因為值博率不高;供應量正續漸增加,租金回報更是愈來愈低,風險系數較高。。

        我很同意博士提出細價樓爆煲論,祇在提醒市民當中存在的風險,現在入市人士當中,佷多是危機意識較為薄弱的一群,他們底受不了樓市長期上升,錯過了賺錢的機會,而忽略了蝕錢的風險。當市勢逆轉時,過程可能是漫長而痛苦的。我並不是說現在絕對不應入市;而是在資金充裕、能力範圍許可、又能通過壓力測試的情況下,選擇較市價低的樓花,才可考慮入市。

27. 按居 2015-07-09 18:53:33
喜見博士文章創意無限 - 我想現在唔只「大春代」,可能是「大秋春代」!

博士仍然咁有火... 送你一首歌:
農夫  《Sam歌》

「...以前話 沉默是金 我驚我轉頭俾人鬧鑊甘 
你話笑罵由人 因爲真永是真 
而家唔出聲啲人會好易憎你就真 
沉默唔係有胸襟 沉默唔代表中肯...」
28. 新丁 2015-07-09 19:15:11
多謝分享……唱埋落去
時代已經變咗 定係嗰一個香港已經唔見咗
仲邊有財神到 搵錢要依正路
拿拿聲走去搵嘢做 就買到樓嗰個莫大毛
而家要搵錢要博大霧 太正路聽訓馬路
你今日冇 將來都冇 想買個窗台都要靠父母
現實唔理想 咪索性講理想唔玩半斤八兩
唔怕波士癲過雞 因為好多時係d人炒老細
講真 身邊人仲邊有你講嘅香港心
鐵塔凌雲 只係奇聞 個個放假都plan去旅行
除左流感就係遊行 冇香港人想留多陣
歌神 有冇可能带我返番去你以前嗰陣
29. 蜕变中嘅懒人 2015-07-09 19:20:03
懶人閉門段舊咕:

会晤会係放孖展2、4、8倍班錢莊大鱷收到風亞爺要去槓桿,预知大煲自己先变空軍沽空個市,变成股災,李克強己早知箇中玄機,要班千幾家大鱷出錢救市,又唔准其他幫兇沽貨走佬,但焗住要先暴力穩定個市,然後逐個空軍元兇捉,所以話,中央唔係儍仔,沪港一通班友仔即時起舞,李克強巳算夠魄力當机立斷,否則遲啲仲大煲。
30. 蜕变中嘅懒人 2015-07-09 19:30:09
懒人諗:今次自製股災以捉到自己友空軍元兇好快落幕,希臘單野多數如博士预料留番喺歐盟,美國借頭借路今年都唔加息,開開心心到年尾再戰2016,無事嘅,啊弥陀佛。
31. 期待地產論壇文章 2015-07-09 21:17:12
PP, 珍港兄等緊你!

32. 珍惜香港 2015-07-09 21:27:21
珍惜香港

呢幾日,手痕痕想寫嘢,結果都喺忍住咗。股市連瀉幾日,而自己又唔沾手股票;寫衰,一定俾人話贈慶;寫好?中就話啫,唔中又俾人話累街坊。雖然我一向都唔迷信,但一次過俾成千上萬嘅人詛咒呢,就真喺想行運都幾難囉!今日股市反彈八百幾點,要吹下水就依家啦,到聽日,容乜易又跌番架!

關於 PP 一小句,算唔算挑釁,就見仁見智;PP 自己,亦心中有數。博士借題出文,都算大方得體嘅,但响自己個回應箱度爭拗,就實屬不智。點解?上次已經寫咗,唔再重複。

其實,大家對「林一鳴」三個字,使乜咁敏感?博士又唔喺同佢有十寃九仇,搞到好似 ALAN FANS 大戰 LESLIE FANS 咁,簡直不知所謂。依家呢,連亮劍兄都驚埋一份,想 POST 林一鳴啲嘢,都只敢放响陳增濤果邊度囉,何必呢?

我認為,一個評論員叻唔叻,唔喺在乎佢估嘅數字有幾準,俾你準到連 CCL 果兩個小數位都中埋又點?你預測嘅理據,唔合乎現實嘅話,估中都只會害咗信你嘅人。所以點解我話,背後嘅宏觀概念,比個結論更重要

林一鳴提出咗一條有趣嘅問題:熊市會否在 11 倍 PE 出現?佢提出呢條問題,真喺好大膽,等同挑戰一向為股票長線投資者堅信嘅價值投資理念。早排我响朋友面前,對股票嘅價值投資亦提出過質疑,搞到差啲俾人鬧。

林生話,港股响 11 倍 PE 進入熊市,喺有可能嘅。而熊市,即喺高位下挫 20% 或以上,以恆指今年高位 28588 點計算,就喺要跌 5718 點至算喺熊市喎!咦?尋日個市最低位,真喺跌到 22836 噃,同林生嘅預測,只喺差 34 點咋!嘩!林一鳴,唔通真喺神人?不過咁噃,今次跌市,根本就唔喺因為佢講果四點長線因素啫!所以,冇法啦,林生俾湯生串,都無話可說囉!

嗱!我咁講,喺唔喺好過串林生 566 單嘢呢?做人,應該要有啲風度,上面 22/F 位人兄,未審先判,隨便話人地騙徒,就真喺冇乜風度啦!21/F 仲離譜,為咗公眾利益,就可以講大話架?都話,行直線,講真話,從來都唔會有問題咯;玩曲線,同玩火冇分別嘛!

討論,喺要針對個議題,唔喺針對人。正如林一鳴提出果四點長線因素,的確不容忽視,至於有冇佢講到咁嚴重,話由一線城市,跌成二線城市,我就好有保留。不過,佢講嘅因素,引申出價值投資最大嘅弱點,而呢個弱點,亦同時喺我早排响朋友面前,對股票價值投資提出質疑嘅原因。

股票,唔喺實在嘅資源,所以佢嘅「值」,喺一個變數。正如我响資源論度話,一斤柴燃燒嘅時間,唔會隨著柴價嘅升跌而改變,因為一斤柴,始終喺一斤柴,但喺股票,就冇呢種「絕對值」嘅特性。特別响一個好似香港咁國際化嘅市場入面,上市公司嘅市值同 PE,亦會隨著環球經濟嘅變化而改變。就以希債問題為例,如果真喺爆煲,咁响一系列撇賬之後,恆指成份裡面嘅上市公司市值,例如匯豐,會蒸發幾多?而 PE,又會升幾多?以港股今日嘅 PE,作為對股票價值投資嘅長線評估,有幾合乎現實?

話說,阿爺「暴力」救市,搞到中資班資回朝,港股大瀉。早前我又同朋友講,話恆指至少要跌番去佔中個位,因為黃虫之患果段時間,有聞中資撐住香港個市,唔俾啲壞人乘機攞著數喎!依家歷史任務已經完成,又要回水自救,咁跌番去佔中個位,都唔出奇吖?唉!結果,又喺俾人鬧。

不過,唔知阿爺「暴力」救市,有幾「暴力」?我真喺睇唔出。或者應該喺,佢叫「你」暴力救市,點樣救,就唔該請「你」食自己。吓?咁都叫做救市?真喺救嘅,咪 UNDO 番個去槓桿手段囉!嘩!傻架?咁大家仲未明?不過,呢場大龍鳳,又真喺幾精彩,搞到個個都以為阿爺好似一夜之間,由英明神武嘅亞投行揸 FIT 人,變成一個師奶不如嘅股場白痴。坦白講,今時今日,深思熟慮,謹慎行事嘅阿爺大大,點會出埋啲咁嘅笑話?其實,鬼唔知,內地股真喺太高,必須要調整咩,騎虎難下啫!賴乜鬼外資?賴乜鬼大鱷?你唔做場好戲,容乜易影響到「黨」嘅領導架?

呢個世界,有樣嘢,叫守衡定律。希臘唔還錢,自然要搵人填,問題喺,有冇你份?股市大瀉,一定會蒸發一啲嘢,就算之後回升,填補番嘅地方,亦唔會喺當時蒸發咗果處,呢啲就喺所謂嘅財富大轉移。要了解股市升跌,對其他市場嘅影響,就一定要先了解呢個財富大轉移嘅細節,同一切相關嘅人同事。

記得响好耐之前,我話過,樓市已經脫勾股市。依家嘅樓市,喺同本地經濟掛勾,但同股市,就脫離咗直接嘅關係。今日香港樓市嘅主流持貨者喺自住用家,同長線收租佬,炒家已經絕跡。之前有唔少人,成日話,大陸冧,土豪班資回朝,香港樓市就冧;港股冧,香港樓市跟住就冧。佢地漠視咗真正嘅剛性需求,以為所謂剛性需求,只喺心理需要,會隨著市場心理改變而消失。其實,話得喺剛性需求嘅,就即喺住嘅需求,點會消失?最多只會被壓抑同積聚,形成所謂嘅需求泡沫,或者法子兄講嘅,負泡沫囉。

都喺果句,股場蒸發咗嘅,就算回升,都填補唔番。所以,要發生嘅,一定會發生。股市同樓市之間,關係有幾大?喺我望到嘅井口太細,定喺其他人無中生有,好快就知。

學博士話齋,拭目以待啦!
33. 按居 2015-07-09 22:38:42
謝珍惜兄用心出文
34. 村長 2015-07-09 22:53:16
比在係我,就擔心一線地鋪鋪租鋪價, 同豪宅爆煲好過。
35. 自我陶醉 2015-07-09 23:52:29
To 32樓 珍港兄

真係唔講都知你唔識股票投資, 更加肯定你對價值投資概念一無所知, 唔畀朋友鬧你確實萬幸, 呵呵!

PE低過11倍就等於價值投資唔work?  11倍唔可以股災係點定出嚟?  價值投資概念其實就係要用小過1蚊價錢, 買實際值1蚊嘅嘢,  然後等那些唔識貨嘅傻瓜醒覺, 在市場反映真正價值。  如果值1蚊就一定賣到1蚊, 咁嗰啲傻瓜要去邊度搵?  如果值1蚊就一定要賣1蚊, 咁價值投資就真係唔work喇!


36. 無知婦孺 2015-07-09 23:53:21
珍港兄

我從來無話過要因為公衆利益而去講大話,但身為公眾人物,就應該了解自己身份對事情的影響力,什麼應該講,什麼不應該講,應拿捏分寸

正如林生身為566 CFO, 明知公司盤數有問題,但礙於自身角色,緊守崗位,這也無可厚非,所以股東輸錢,罪不於佢,什麼該向股民披露,什麼不該披露,他拿捏得非常好。而事實上,他巳用行動提示了大家,於高位把自己的貨放了,只是大家貪勝不知輸罷了

另外,博士在回應箱內留言,請pp讓路,也不過是不想再多生事端罷了,何來爭拗?過敏了。亮劍兄避重去其他人屋企放林生的文, 這樣很好,令大家舒服,想看的,想討論的,可以去果邊。相反,為何pp一定要進來贈與呢?此舉動用意何在?值得深思!
37. 無知婦孺 2015-07-10 00:12:08
另外,我認我C9無知,珍港兄講既經濟硬道理我真係唔太明,我淨係知,股市跌20%,我仲輸得起,但樓市跌20%,我真係輸唔起,所以好多謝博士係年頭拉停左我
38. 奇妙 2015-07-10 01:18:52
珍港君,謝過。增廣見聞。
39. 奇妙 2015-07-10 01:30:33
爆論後,財貸樓按廣告增加了,甚憂,堪憂。
40. 引刀一快 2015-07-10 01:43:18
股市唔好唔穩定,就話“ 樓市已經脫勾股市

股市大漲,就話樓隨股漲、套股換樓。

都係陪你少年筆耕,今晚勤力下先。
41. 珍惜香港 2015-07-10 02:16:26
珍惜香港TO:40/F 引刀一快

引刀兄,你又嚟呢套?

樓市脫勾股市,我好耐之前都喺咁講,仲講咗好多次,邊個話,個股市唔穩定,我至咁講架!仲有,股市大漲,就話樓隨股漲、套股換樓?乜我有咁話過咩?

你勤力筆耕,就唔該認真啲。再玩老屈嘅話,我唔會睬你!
42. 珍惜香港 2015-07-10 03:26:26
珍惜香港TO:35/F 自我陶醉

自醉兄,雖然我唔玩股票,但都唔喺衰到,連價值投資喺啲乜嘢嚟,都唔知嘅。

價值投資嘅概念,喺好 PERFECT。但問題喺,股票,有冇所謂真正價值?呢點就喺我質疑嘅地方。

正如林一鳴問,熊市會否在 11 倍 PE 出現?佢列出果四個因素,就喺要指出,就算今日,港股喺低水,但將來,當經濟同企業環境轉變咗之後,同一個數字價值,可能就變成太貴啦!

又正如,法子兄嘅衡平比,亦喺價值投資嘅一個參數。記得引刀兄曾經質疑,究竟衡平比,有冇計埋未知或未發生嘅外圍因素?今日,某一個價位,計出嚟抵買,入咗貨;咁將來,外圍因素轉變,同一個價位,會唔會變成太貴?入咗嘅貨,就成咗蟹貨?

引刀兄對衡平比嘅質疑,同我對股票價值投資嘅質疑,概念上喺一樣。

仲有,記得我曾經响度,分享過沙士果陣嘅入貨經歷。對於寜願抬錢,都要賣走啲物業嘅炒家,我話噤價噤到佢地叫苦連天。但我都只喺形容佢地,喺具炒樓心態嘅人;我從來冇諗過,叫佢地做傻瓜
43. 息魔 2015-07-10 03:37:52
樓市仲有排升,只不過系港老無錢無能無能力買,大陸人大把錢,尤其系貪官哥班,幾千百萬簡直系閒錢,對於陸人來講港樓加港妞又cheap又平,港樓升硬...
44. 引刀一快 2015-07-10 07:49:31
珍惜香港

呢幾日,手痕痕想寫嘢,結果都喺忍住咗。股市連瀉幾日,而自己又唔沾手股票;寫衰,一定俾人話贈慶;寫好?中就話啫,唔中又俾人話累街坊。雖然我一向都唔迷信,但一次過俾成千上萬嘅人詛咒呢,就真喺想行運都幾難囉!今日股市反彈八百幾點,要吹下水就依家啦,到聽日,容乜易又跌番架!(咁你咪即係話你唔得實牙實齒囉,邊有人咁講自己架?)

關於 PP 一小句,算唔算挑釁,就見仁見智白紙黑字仲要見仁見智?);PP 自己,亦心中有數。(所有人都心中有數)博士借題出文,都算大方得體嘅,但响自己個回應箱度爭拗 (係人家挑釁上門,喺湯先生回應箱爭狕係對方嘅選擇,你顛倒咗是非黑白)就實屬不智。點解?上次已經寫咗,唔再重複。


其實,大家對「林一鳴」三個字,使乜咁敏感?(我唔知邊個敏感喎)博士又唔喺同佢有十寃九仇,搞到好似 ALAN FANS 大戰 LESLIE FANS 咁,簡直不知所謂。依家呢,連亮劍兄都驚埋一份,想 POST 林一鳴啲嘢,都只敢放响陳增濤果邊度囉,何必呢?

我認為,一個評論員叻唔叻,唔喺在乎佢估嘅數字有幾準,俾你準到連 CCL 果兩個小數位都中埋又點?你預測嘅理據,唔合乎現實嘅話,估中都只會害咗信你嘅人。所以點解我話,背後嘅宏觀概念,比個結論更重要(你終於知道大陸經濟唔好,就算CCL乾升都係冇實質意義,終於有段寫得似様)

林一鳴提出咗一條有趣嘅問題:熊市會否在 11 倍 PE 出現?佢提出呢條問題,真喺好大膽,等同挑戰一向為股票長線投資者堅信嘅價值投資理念。早排我响朋友面前,對股票嘅價值投資亦提出過質疑,搞到差啲俾人鬧。

林生話,港股响 11 倍 PE 進入熊市,喺有可能嘅。而熊市,即喺高位下挫 20% 或以上,以恆指今年高位 28588 點計算,就喺要跌 5718 點至算喺熊市喎!咦?尋日個市最低位,真喺跌到22836 噃,同林生嘅預測,只喺差 34 點咋!嘩!林一鳴,唔通真喺神人?不過咁噃,今次跌市,根本就唔喺因為佢講果四點長線因素啫!所以,冇法啦,林生俾湯生串,都無話可說囉!

嗱!我咁講,喺唔喺好過串林生 566 單嘢呢?做人,應該要有啲風度,上面 22/F 位人兄,未審先判,隨便話人地騙徒,就真喺冇乜風度啦!21/F 仲離譜,為咗公眾利益,就可以講大話架?都話,行直線,講真話,從來都唔會有問題咯;玩曲線,同玩火冇分別嘛!(!)

討論,喺要針對個議題,唔喺針對人。正如林一鳴提出果四點長線因素,的確不容忽視,至於有冇佢講到咁嚴重,話由一線城市,跌成二線城市,我就好有保留。不過,佢講嘅因素,引申出價值投資最大嘅弱點,而呢個弱點,亦同時喺我早排响朋友面前,對股票價值投資提出質疑嘅原因。

股票,唔喺實在嘅資源,所以佢嘅「值」,喺一個變數。正如我响資源論度話,一斤柴燃燒嘅時間,唔會隨著柴價嘅升跌而改變,因為一斤柴,始終喺一斤柴,但喺股票,就冇呢種「絕對值」嘅特性。特別响一個好似香港咁國際化嘅市場入面,上市公司嘅市值同 PE,亦會隨著環球經濟嘅變化而改變。就以希債問題為例,如果真喺爆煲,咁响一系列撇賬之後,恆指成份裡面嘅上市公司市值,例如匯豐,會蒸發幾多?而 PE,又會升幾多?以港股今日嘅 PE,作為對股票價值投資嘅長線評估,有幾合乎現實?(董建華一句“八萬五”,香港樓價就跌幾成,請問八萬五呢三個字係幾多沙、幾多石?)

話說,阿爺「暴力」救市,搞到中資班資回朝,港股大瀉。早前我又同朋友講,話恆指至少要跌番去佔中個位,因為黃虫之患果段時間,有聞中資撐住香港個市,唔俾啲壞人乘機攞著數喎!依家歷史任務已經完成,又要回水自救,咁跌番去佔中個位,都唔出奇吖?唉!結果,又喺俾人鬧。(唔係嘛?成個升市其它資金冇參與???)

不過,唔知阿爺「暴力」救市,有幾「暴力」?我真喺睇唔出。或者應該喺,佢叫「你」暴力救市,點樣救,就唔該請「你」食自己。吓?咁都叫做救市?真喺救嘅,咪 UNDO 番個去槓桿手段囉!嘩!傻架?咁大家仲未明?不過,呢場大龍鳳,又真喺幾精彩,搞到個個都以為阿爺好似一夜之間,由英明神武嘅亞投行揸 FIT 人,變成一個師奶不如嘅股場白痴。坦白講,今時今日,深思熟慮,謹慎行事嘅阿爺大大,點會出埋啲咁嘅笑話?其實,鬼唔知,內地股真喺太高,必須要調整咩,騎虎難下啫!賴乜鬼外資?賴乜鬼大鱷?你唔做場好戲,容乜易影響到「黨」嘅領導架?(你錯喇,叫“暴力救市”的確係合適嘅,其實呢樣嘢經常喺大陸發生,你對大陸情况唔瞭解喞,用强權施壓强制各種單位作出相應救市行動,叫“暴力”好恰當,平時發生嘅時候係“使陰力”,你睇唔到,今次媒體繪聲繪影話拍枱,行動可謂“使盡無情力”)

呢個世界,有樣嘢,叫守衡定律。希臘唔還錢,自然要搵人填,問題喺,有冇你份?股市大瀉,一定會蒸發一啲嘢,就算之後回升,填補番嘅地方,亦唔會喺當時蒸發咗果處,呢啲就喺所謂嘅財富大轉移。要了解股市升跌,對其他市場嘅影響,就一定要先了解呢個財富大轉移嘅細節,同一切相關嘅人同事。(係守定律,要清楚一點,守恆定律係講能量轉化,財富呢類抽象事物不一定適用。希臘唔還錢會有報應,報起上嚟我地亦有機會成爲得益者之一,點轉移點執位,係超過一般人嘅分析能力所能預測嘅,點了解都有錯有對。)

記得响好耐之前,我話過,樓市已經脫勾股市。依家嘅樓市,喺同本地經濟掛勾,但同股市,就脫離咗直接嘅關係。今日香港樓市嘅主流持貨者喺自住用家,同長線收租佬,炒家已經絕跡。之前有唔少人,成日話,大陸冧,土豪班資回朝,香港樓市就冧;港股冧,香港樓市跟住就冧。佢地漠視咗真正嘅剛性需求,以為所謂剛性需求,只喺心理需要,會隨著市場心理改變而消失。其實,話得喺剛性需求嘅,就即喺住嘅需求,點會消失?最多只會被壓抑同積聚,形成所謂嘅需求泡沫,或者法子兄講嘅,負泡沫囉。(香港呢個樓市有相當部份係大陸土豪催化岀嚟嘅,我又學人講下“礦泉水理論,喺沙漠裏面有十一支礦泉水賣,十個人去買,本來相安無事,忽然外面跳出個好有錢嘅人,唔問價買走兩支水,剩低9支,十個人都怕喝死,所以叫價叫到200%,開始有人想搶多支水備用穩陣,最後一輪瘋搶之後,每個人都搶到水,仲發現原來多咗幾支!
原來大家搶嘅時候,有錢人偷偷將水放咗,走埋,有人怕將來買唔到水,離開沙漠,剩番幾個搶水“得手”嘅人,以後可以喺沙漠五折買水!)

都喺果句,股場蒸發咗嘅,就算回升,都填補唔番。所以,要發生嘅,一定會發生。股市同樓市之間,關係有幾大?喺我望到嘅井口太細,定喺其他人無中生有,好快就知。
(5000點跌到3000點叫“蒸發”,3000點升5000點叫“泡沫”,係咪?蒸發泡沫,係咪?)

學博士話齋,拭目以待啦!
45. 引刀一快 2015-07-10 07:55:50
珍港兄

又正如,法子兄嘅衡平比,亦喺價值投資嘅一個參數。記得引刀兄曾經質疑,究竟衡平比,有冇計埋未知或未發生嘅外圍因素?今日,某一個價位,計出嚟抵買,入咗貨;咁將來,外圍因素轉變,同一個價位,會唔會變成太貴?入咗嘅貨,就成咗蟹貨?

引刀兄對衡平比嘅質疑,同我對股票價值投資嘅質疑,概念上喺一樣。”

唔一樣,其中一個好大嘅質疑係點解參數要保密?香港買嘢食都有成份列表,完全將參數保密,即係玩水晶球。
46. 自我陶醉 2015-07-10 08:03:48
To 42/F 珍港兄

我當然記得你喺沙士嗰陣嘅威水經歷喇, 首先要恭喜你嗰時咁成功發咗咁大筆災難財先, 簡直係典範。 唔知點解, 我諗嘢往往都係同你相反, 我就一定唔會叫當時賣樓畀你既人做炒家噤涼薄, 我亦唔會叫佢哋做傻瓜, 因為樓同股票唔同, 樓係用嚟住嘅必需品, 你知唔知嗰時有幾多人連份工都冇咗, 想供樓都供唔起?  你知唔知啲人用自己未來幾十年人工買樓, 見層樓日日跌, 有幾大心理壓力?  嗰時賣樓就係炒家, 咁而家賣樓又係唔係炒家?  請問你賣過樓未呀, 炒家?

所以話你唔識股票投資呢!  唔洗經濟轉差呀, 行業前景轉差, 政治環境改變, 都一樣會影響股票嘅價格, 係真正股票投資者都會知, 當價值改變, 當然係要重組自己投資組合喇, 有咩問題呢?  人哋又冇叫你用9毫9去買1蚊嘅嘢, 你用7毫, 6毫先買, 環境有變都大把時間同水位你走喇!  呢個就係價值投資裏面安全邊際嘅概念。

你話經濟轉差將來股市價值會變, 所以價值投資唔work, 淨係買樓先掂。  如果用你呢個思維模式, 我更加覺得要買股唔買樓。 經濟轉差會影響股票價格, 也會影響樓價, 你層所謂好有價值嘅樓價值會唔會變? 大家都同時知道經濟會轉差, 我買股只須1秒, 你賣樓要幾耐? 經濟有事邊個走得快?  你又有冇諗過, 如果你租客一時諗唔開, 喺屋企做傻事, 你嗰層咁有價值嘅樓又會點?  咁又係咪代表你買樓至啱嘅諗法唔work呀?

47. 引刀一快 2015-07-10 08:04:15
To 41樓 珍惜香港兄

40樓寫漏咗“好友”兩個字,上半截取材于你,下半截部份取材于大好友大寶兄,本來該用“好友”概括兩個出處,係漏咗。
咁我就喺呢度加份補充材料,并非兩句都取材于閣下言論,在此更正并致歉。

既然你已經作出回應,原文我不更改。

48. 引刀一快 2015-07-10 08:07:49
補多兩句,點解引刀咁勤力?係因爲你第二段寫得太醒神。否則未必會逐段陪你討論。
49. 引刀一快 2015-07-10 08:36:33
To 46樓 自我陶醉兄

從正面嘅角度去講,投資股票可以算係投資自己看好嘅相關範疇,不必相關職業、學歷、資格、身份,但係又可以以資金參與自己有興趣嘅項目,錢夠多做大股東仲可以有發言權,除咗經濟角度之外,喺興趣角度亦係一種有質量嘅參與,對自己嘅觀察力、價值觀同世界觀係一種肯定。
50. 賭場買大細,吹漲 2015-07-10 09:02:14
我刀子話,我已買左2年細冇奶油今年重係大,依據而家情況,横掂我在場冇人夠我抝,都係口水注,我可以繼續講下去,遲早實有機會開細,問你死未,兄台就算2016俾你買中又何何呢,包拗頸吹你真不漲,無質素。人地係認真出文,閱讀者自我評估。睇你年紀應該不細,成熟d  thank you.
51. 引刀一快 2015-07-10 09:41:02
你咪閱讀評估囉,你以爲講D咁嘢有用嘅咩?
52. 不如你直接叫d刀法不一的人禁止入此埸 2015-07-10 10:05:19
有刀大唒
53. law student 2015-07-10 10:06:32

珍港兄.

關於 PP 一小句,算唔算挑釁,就見仁見智;(首先PP果一"小"句算唔算挑釁, 大家心知肚明, 我自己就諗唔到有咩其他用意或討論價值. 而博士回果一小句我就反而唔明點解珍兄覺得不智)


其實,大家對「林一鳴」三個字,使乜咁敏感?博士又唔喺同佢有十寃九仇,搞到好似 ALAN FANS 大戰 LESLIE FANS 咁,簡直不知所謂。依家呢,連亮劍兄都驚埋一份,想 POST 林一鳴啲嘢,都只敢放响陳增濤果邊度囉,何必呢?(珍兄以ALAN FANS 大戰 LESLIE FANS 黎比喻呢度既網友未免有點看輕人, 以我接觸, 呢度大部分網友都在自己領域獨當一面, 何需當人家fans, 仰人鼻息? 好話唔好聽, 我的偶像只有為國為民的大人物, 財經領域的我只會欣賞, 談不上當誰的fans, 相信呢度大部分網友亦如此)

54. Jerry 2015-07-10 10:26:35

TO: 42/F 珍惜香港

珍兄, 小弟一直欣賞閣下既言論, 因為它能帶起有思義既討論。

關於你質疑既價值投資,小弟有以下想法。何為價值投資? 老實說我也在摸索中。雖然小弟不是一個純正既價值投資信徒,但相信價值投資係最安全既投資方法。醉兄話假設一隻股票值一元, 因為市場的不理性、不識貨, 令他可以用低於其價值的價格去買便宜貨。有時折扣可能係七折、五折、甚至一折。珍兄的質疑係如何計算一間公司既真正價值? 我用內房作一個例子,珍兄係相信土地才有真正價值(斷估), 咁內房既土地儲備價值(淨動)、在建和在賣的樓房價值(淨動)、銀行既存款,扣除所有負債, 仍然NAV折讓30-80%。另一個例子: 市面有好多淨現金公司, 公司扣除所有負債,現金仍然比市值高, 那它又有沒有價值? 無論熊市或牛市,市面上仍然有低PE高派息率、年年派息、行業周期變化不大的行業。價值投資者只會當行業前景改變,或價格已遠超過其核心價值而沽出。

 

至於林一鳴話以下四個因素會令便宜既港股進入熊市: 1)經濟將會走下坡;(2)預計未來企業盈利將會下跌;(3)很多成份股連11倍的PE也不值;(4)該地區在金融市場的地位下跌,例如從以前的一線城市,有機會變成二線城市。

如果林先生言中、咁樓市為何不會調整? 經濟差意味著會裁員和減人工,失業率上升、企業盈利下降咁即係租金會下跌、咁樓市仲唔會調整? 所以博士寸佢係有道理。另外、經濟逆轉, 企業過去買既樓房會唔會係現家呢個高位變現? 另外,用高槓既物業投資者仲會唔會HOLD 住咁多貸,會唔會去槓杠?

珍兄,我想任何投資都很難有絶對價值, 價值會跟著人們的心態改變而改變其價格。我並不是反對資源論,也沒有反對樓既真正價值。(我也相信它們是有真實價值) 但如果你沒有真實持有價值型股票,而你又去對它作出質疑,這樣會否對價值投資者不公平?

55. Jerry 2015-07-10 10:30:30
錯別字改成: 珍兄小弟一直欣賞閣下既言論因為它能帶起有意義既討論。
56. 中國式QE 2015-07-10 11:11:53

最近A股及港股大跌引致中國政府暴力救市。減息,降準務求托市,因大陸經濟在轉形中,中國一定全力救市,最終還可以跟大隊印銀紙 。這一切說明了一大點就是住後的貨幣政策將會異常寬鬆,結果是引致另一波的資產泡沬。

故此我返而看好香港的資產,因此次A,港股大跌香港在各方面比大陸優勝百倍,法治,資產保護遠比國內好,寬鬆貨幣政策下的熱錢更加流入香港買貨,因若我是有錢強人都會選香港吧。故此除非股市引致內亂或政權變動,似乎對香港資產有長遠性正面影響。



57. 珍惜香港 2015-07-10 11:58:58
珍惜香港

趕出門,先簡覆幾位:

TO:38/F、39/F 奇妙

奇妙兄何不考慮註冊?我有留意閣下發言,例如你寫 QE、寫無產者嘅悲哀,都好精彩。你又寫過星記,仲話飲完早茶,會寫埋香記添,不過你好似唔記得咗喎。請多分享!

TO:36/F 無知婦孺、53/F law student

關於 PP 一小句,博士文章首段已經回咗,亦大方得體。我講嘅不智,喺指 17/F13/F16/F 嘅回應,喺冇必要,而且有引發爭拗嘅風險,將焦點移咗去林一鳴度,令原文嘅主旨被分散或曲解。呢一點,另一篇已經解釋過,所以我喺出於好意,兩位唔好誤會。而我寫 FANS,只喺比喻,希望大家針對議題,唔好搞到「林一鳴」三個字,响博士嘅主場度,變成禁語。

TO:46/F 自我陶醉

我諗你對我沙士果陣嘅經歷,有嚴重嘅誤解。我的確喺响災難中入貨,但我响 97 高峰期,亦有入貨。所以,我根本冇諗過要發乜嘢災難財,亦唔喺要乜嘢撈底。總之,有能力就入,只不過沙士果陣,我更加有能力啫,邊會咁麻煩去諗,打後個市會升番定喺仲會再跌?

而我亦最少講過兩次,沙士果啲悲慘故事,都只喺响報紙見到,反而自己遇過嘅賣家,個個實力都唔嘢少。佢地唔喺冇 CASH,佢地啲 CASH,分分鐘多過我,只不過,佢地揀抬錢賣樓,而我就揀俾首期入貨啫!
58. 引刀一快 2015-07-10 13:13:35
大方得體,係對平輩晚輩嘅評價。

買物業,可以唔考慮升跌:”邊會咁麻煩去諗,打後個市會升番定喺仲會再跌?“

珍港兄看來比王健林嘅公子更任性。
59. Oscar Lam 2015-07-10 14:07:41
珍惜香港、自醉、Jerry,

小弟也是一名價值投資者的信徒。首先我認為,不管是物業或股票,均有其價值。但價值本身是一個很主觀、很抽象的概念,正因為如此,我們才會用價格去釐定一項資產的價值。任何資產包括珍惜兄所講的資源,例如土地、物業的價值(或價格)均有機會被高估或低估。價值投資者會在資產價格被高估時沽出資產,會在資產價格被低估時購入資產,這個做法很普遍,投資任何資產都一樣。

因此,一項資產是否值得投資,與這項資產是否屬於資源無關,關鍵在於這項資產是否被低估?是否還有升值空間?小弟這二天在蘇格蘭看到連綿不絕土地,在種草、養牛、養羊,這樣的資源,小弟認為投資價值不高,絕不會投資。

至於物業價格和股票價格的關係,影響二者價格的因素雖不盡相同,但二者息息相關,均會受經濟影響。如果經濟差影響股市,那樓市也不會好到哪裡!因此,我們沒有必要去討論投資物業好,還是投資股票好?而是問問自己,自己喜歡或者適合投資物業還是股票?
60. 自我陶醉 2015-07-10 14:17:32
To 54/F Jerry 兄

講得好!  只當股票係賭博工具嘅人係唔會明咩係價值, 我以前講過買1隻2010嘅股, 當時買1.7附近, 前日跌到1.52, 市值只係22億, 睇番盤數, 上年底現金已經有19億人仔, 加埋今年宣佈配股兩次, 淨現金至少有30億, 即日買起間公司已經執咗8億, 嗰日PE連3倍都唔到, 仲每年收息4厘幾, 呢啲唔係價值又係咩?  靠估嘅人係永遠都唔會明嘅!

61. law student 2015-07-10 14:59:11

to 59. Oscar Lam ,

同意"因此,我們沒有必要去討論投資物業好,還是投資股票好?而是問問自己,自己喜歡或者適合投資物業還是股票?"

投資世界五花百門, 就算最專業的投資者, 只要熟悉一兩個市場或領域便可. 要投資, 首先要問自己是那一類人, 最重要是找對自己的領域才可事半功倍.

至於投資方法, 各施各法, 唔理黑貓定白貓,只要捉到老鼠嘅就係好貓.

62. Oscar Lam 2015-07-10 15:49:14
To: 60/f 醉兄,

有一只這麼好的股票怎麼不介紹給我?你可以放心,我不是一名投機者,也會自行評估其價值,並承擔風險。嘻嘻!
63. 自我陶醉 2015-07-10 16:41:04
To 62/F Oscar 兄

唔講得㗎, 我驚你真係買起成間公司, 到時我1手都買唔到就慘喇!

講真, 一般冇跟開股票嘅朋友, 唔會敢喺嗰啲日子入市, 佢哋見到一路跌, 只會越來越驚, 喺低位先震番出嚟, 仲會鬧我一餐, 上次都講過, 有個親戚我叫佢2蚊樓下買, 佢唔買仲話我想靠害,所以我真係唔敢亂教人㗎! 

只有真正了解什麼是價值投資嘅人, 才會見佢越跌就買得越開心, 而且, 賺錢只係其次, 自己發掘出嚟成功感會更大嘛! 以你嘅專業知識, 如果有心鑽研, 功力一定會比小弟高百倍, 待你回港後我們可多交流經驗, 到你練成神功後, 還要請你多多關照才對。


64. 自我陶醉 2015-07-10 17:26:08
To 57/F 珍港兄

其實你沙士期間嘅經歷, 都唔係咁慘啫, 最起碼都仲有能力借到錢買平樓, 點都好過好多人連樓都供唔起, 仲有啲因為一時投資失利要走上絕路呀!  無論你有冇諗過發災難財, 但始終都係受益者嘛! 唔好再話人沙士賣樓就係炒家喇, 人哋有錢過你佢就係炒家, 如家佢窮過你, 咁你又係唔係變咗炒家呀?  你又會唔會見佢咁可憐, 唔㩒佢價再加多10%畀佢周轉呀?

答案梗係唔會喇!  


65. Oscar Lam 2015-07-10 17:45:56
醉兄,

你真会开玩笑!有机会大家研究、研究。
66. 新淡友 2015-07-10 17:53:28
長期不在港,打字亦唔快,所以小留言,但見咁多人出聲,亦參與一下。

之前講過股市會係三至六個月內爆煲,而家好大機會成真。

只要股市一日重係咁多成交,負和遊戲之下無論升跌,股市係人民財富既絞肉機,中國過去十年行左一條吊絲打腫面扮富二代既路,而家冇得返轉頭。
中國式既一窩蜂同內鬥,就算人均同外國冇分多,人多起來問題就必然更嚴重。

引刀有句好深刻的說話,大概係話係神洲大地,做人渣會有好好既回報,好多事都因此被扭曲到外人無法理解既地步,例如早兩日申請停牌既公司竟真係可以減小損失,令投資者改沽香港股票,就係一個例子。中國成個社會長期係咁,唔少人被迫參與要做壞人去提高回報既負和遊戲,而表面風光重有五六成要靠先駛未來錢,短期內真係好難睇好。

由同上次留言到現在有兩點更新:
1, 中國經濟最後兩大引擎係金融同科技,而家金融好快又會熄火,只剩科技,或者就係而家深圳樓又比人炒到破頂既原因,估計係內幕聰明錢由股市轉去樓市,而個人認為深圳會係四大一線中可以回復得最快。
深港最終會同城化,不存在誰被取代的問題,深圳本身就係一個東方矽谷,香港則係老外心中世界第三大金融中心,今次既內地股災會令外資對香港更有信心。香港作為集資同生活城市既地位會更重要,正如700小馬哥都係深圳工作香港生活。想像一下未來既矽谷變同紐約連接,潛力會有幾大?不過短期衰退係在所難免,北京同上海或者可以透過吸收其他城市既資料保得住,但政府錯誤帶來既浪費會令佢地長遠輸比深港連合。

2, 豪宅情況遠比細價樓不妙,除左供應外,好多細價樓都係自用,供款亦係小業主可以用積蓄同節衣細食去補,但豪宅就唔得,持有豪宅既土豪業主要出貨可以不問價,供款亦唔係買少個袋就可以解決,我估可能細價跌兩三成,豪宅跌三四成咁上下,但衰退過後,長遠來講香港同深圳重係好值得投資。
67. 引刀一快 2015-07-10 21:00:03
投資嘅嘢,識得玩果瓣就有價值,唔識唔熟嘅就價值低,係好個人化嘅,講自己專長嘅好處冇問題,否定別人所專長嘅就會俾人反駁。
68. 引刀一快 2015-07-10 21:06:32
To 66樓 新淡友兄

的確,呢個係三反五反文革嘅遺害,心黑手賤腦精靈嘅人,最常被冠以“潛力股”嘅頭銜。

但係我發現,呢種風氣慢慢喺香港滋長緊。
70. 珍惜香港 2015-07-11 02:36:10
珍惜香港TO:64/F 自我陶醉

閣下呢段回應,令我感到莫名其妙

我幾時話過,自己响沙士期間嘅經歷,喺好「慘」

仲有,關於炒家,關於炒樓心態,我以前都提過好多次(1234 ...)。

不過,我冇一次話過,比我有錢嘅,就喺炒家!
71. 珍惜香港 2015-07-11 04:38:26
珍惜香港TO:54/F Jerry、59/F Oscar Lam

都喺果句,投資呢樣嘢,喺好個人化嘅。

要澄清一下,我只喺質疑股票嘅價值投資,並唔喺否定,所以我嘅言論,唔算對價值投資者唔公平。再者,以價值投資嘅理念,响股場賺到錢嘅,亦大有人在。既然有人咁成功,我又點敢去否定?

資源論,喺我從整個營商同長線投資生涯中,體會出嚟嘅一個世界觀。簡單講,即喺將事物嘅「值」,通過最原始嘅以物易物慨念,從貨幣系統嘅面紗後面,揭露出嚟。Jerry 兄提到企業資產淨值,其實就喺資源通過企業包裝之後,計算出嚟嘅數字價值;呢樣嘢,就好似基金包裝一系列金融產品一樣。每一層包裝,都會令真正嘅「值」被糢糊化,而投資者,就需要有更深入嘅知識,同更精湛嘅技巧,先至可以剖析到一個近似嘅「值」。

資源論為基礎嘅投資,會趨向直接持有資源嘅本體,及通過資源交換慨念,嚟衡量資源嘅「值」。所以,一個人,要賺六年錢至買到嘅嘢,而另一個人,只要賺三年錢就買到嘅話,咁响兩者嘅眼中,果樣嘢嘅「價錢」,雖然一樣,但個「值」,就好唔同。因為任何人,一生裡面,都只能創造及擁有有限嘅資源。明白呢個道理嘅話,就可以睇得通我果個中六合彩嘅比喻。

所以,Oscar 兄話,响蘇格蘭,睇到連綿不絕嘅土地,種草、養牛、養羊。問題喺,呢啲資源,對你嚟講,究竟有冇「用」?你會唔會想持有?你肯用乜嘢資源交換?你話,你認為投資價值唔高,絕對唔會投資。我就話,呢啲資源,只喺「响你手上」,個「值」唔高;而你手頭上,又冇適當嘅資源,同呢啲嘢產生協同效應,從而衍生更高「值」嘅資源。不過,你冇啫,唔代表其他某啲人冇喎!

投資,可以好簡單,亦可以好高深。

投資物業好?還是投資股票好?冇一定嘅答案,亦喺好個人化
72. 自我陶醉 2015-07-11 06:47:04
To 70, 71 樓 珍港兄

唔通真係我記錯?  定係我誤會你意思?  你話沙士時有人告你, 仲幾乎破產, 後來仲要自辯, 係咪?  又唔知點解仲可以用啲咩非常手法去銀行借錢買樓, 係咪?  

我知, 你喺長長長...線收租佬呀嘛, 唔係炒家。  咁又點?  炒家一定係衰人?  一定要畀你㩒?你抬錢去買就得, 人哋抬錢賣就唔得?  就當人地唔係慘先賣樓, 人地覺得買錯咗或者想減倉賣有咩問題?  唔通要攬住層樓同歸於盡先得? 你又洗唔洗咁鄙視人賣樓先?  

如果樓價年年跌, 租金又年年跌, 最後好似日本同底特律啲空城咁, 你又買唔買樓呀? 喺我眼中, 買就是炒升, 賣就是炒跌, 至於長線短線只係時間上嘅分別, 行為本質上都是買入後想賺錢,毫無分別,唔好五十步笑百步喇!  如果你係唐僧可以做到清心寡欲就唔同。

既然你都知用價值投資响股場賺到錢嘅,亦大有人在, 就應該質疑之前先深入了解究竟係咩。你估個個人都係靠運就得咩?
73. 引刀一快 2015-07-11 08:08:15

資源論,喺我從整個營商同長線投資生涯中,體會出嚟嘅一個世界觀。簡單講,即喺將事物嘅「值」,通過最原始嘅以物易物慨念,從貨幣系統嘅面紗後面,揭露出嚟。Jerry 兄提到企業資產淨值,其實就喺資源通過企業包裝之後,計算出嚟嘅數字價值;呢樣嘢,就好似基金包裝一系列金融產品一樣。每一層包裝,都會令真正嘅「值」被糢糊化,而投資者,就需要有更深入嘅知識,同更精湛嘅技巧,先至可以剖析到一個近似嘅「值」。”

呢個所謂嘅”值“,祇係當下此刻未進入市場嘅值,若果投資以此為首要,咁就好似以前D國營商店賣嘢咁,淨係諗成本加利潤去計價格,變相係慈善事業。
投資係看未來,係預觀物品經過重重包裝之後嘅附加價值并同通過時間同市場環境演化所産生嘅綜合值。

舉例,一間鋪,你到底睇水泥鋼筋嘅成本價,現時售價,還是未來發展后將會達到嘅價?
74. e_kam 2015-07-11 08:46:48
沙士時賣住宅樓可以有千萬個理由。但可以幾肯定佢地唔係炒家。

沙士時買住宅樓只有兩個埋由。一係自用  一係博升 如果話比人聽為長線收租,應該會比人話係白痴。

博升。wait for capital gain. 乃價值投資法也。你覺得市場錯價,所以買入博升  就係咁簡單。

博得到就係贏家。  博唔到就比人叫儍仔 (因為當時你同大市對著幹)









75. 引刀一快 2015-07-11 09:03:04
To 72樓 自我陶醉兄

唐僧唔係清心寡慾架,三個手下凶神惡煞,擺明就係暴力團伙,撩完蜘蛛精又撩白骨精,江湖新綽號叫飛天蠄蟧骨精強。
76. 引刀一快 2015-07-11 09:08:01
e_kam兄,近排變咗稀客喎,得閑多D出文喇。
77. e_kam 2015-07-11 09:48:55
刀兄早晨。是的近來好少留言  可能因為無乜話題。
78. 自我陶醉 2015-07-11 10:42:07
To 75/F 引刀兄

吓, 唔係啩?  人哋徒弟唔乖都入埋佢數唔多公平喎!  我見到唐僧都會90度敬禮㗎。  最少唔會畀佢啲徒弟丙呀!  哈哈!
79. 蜕变中嘅懒人 2015-07-11 11:53:17
嘩!好熱鬧!見到呢兩三日幾位高人師兄久違了嘅熱烈君子辯論,其實好想買鯇魚尾搭吓咀,奈何懒人才料有限、出盡力研究咗幾鋪都唔多明。

結論係:高人過招、出神入化、懒人O咀、目定口呆!

懒人讀書少,經濟理論、數學根底、哲學思维、世界視野........百無、悪補又太老。
投資世界中賴以保命嘅絕技,只剩得坐喺張音椅度段嚿咕,無嘞,慚愧。

不過,懶人仲有絕招未出--懶人仔--希望在明天。
80. 引刀一快 2015-07-11 12:59:19
懶人兄

你咁歉做乜?你出口就地動山搖,又唔係未露過一手。(嘻嘻,呢句到此爲止)


81. 珍惜香港 2015-07-11 13:49:08
珍惜香港TO:72/F 自我陶醉

就算我唔喺一個生意人,買嘢噤價,都好正常啫。或者我話,噤到佢地叫苦連天,喺涼薄咗啲嘅。

所謂慈善,喺幫助响先天基礎上有真正需要嘅人,而唔喺為作出錯誤或消極決定同選擇嘅人埋單。

雖然我話,今日,你若以一個投機心態嚟對待你嘅物業,他日,你就會成為推倒市場嘅一個害人精,但喺,我唔認為,「炒家」即喺「衰人」。所謂害人精,只喺果,唔喺因。或者你未見過,沙士當時,我見到果班賣家嘅面口;你唔明白,我唔怪你,而我亦好難解釋。佢地只喺市場巨獸之下嘅一堆棋字,冇話邊個好,亦冇話邊個衰。我同佢地,無仇無怨,但在商言商,我亦冇必要,對呢種人施以同情。

仲有,原來閣下以為,我同大家分享經歷,喺要證明俾人睇,自己有幾「慘」,同「慘」過人地幾多。

我諗,我同你對人生嘅睇法,真喺分歧好大。

好多人,成日覺得自己好「慘」,又話自己輸咗起跑線,見到人地成功,就話人地好運喎!

我話,我响 97 前高峰期上車,當時嘅息口仲喺 P+,到沙士果陣,我喺負資產。我希望大家明白,每一個人生裡面,都有無數個 MILESTONE,起跑線,只喺其中一個 MILESTONE,唔喺決定命運,唔喺決定一切。


我從來唔認為,自己嘅經歷,有幾「慘」,又或者「慘」過人地。正因為我唔認為自己「慘」,先至會响每一個 MILESTONE 度,作出正確嘅決定;成日覺得自己幾「慘」幾「慘」,成日覺得自己「慘」過人地嘅,咁就算我個起跑線,好過之前幾多幾多,亦去唔到今時今日。

懒人兄果然喺高人,好似預知道我會寫乜咁:希望在明天。故事,一日未寫完,個結局,都仲未決定嘅。

我有一個出生入死多年嘅同伴,所謂,人生得一知己,死而無憾。有好多朋友,見到我地嘅戰友關係,都話好羨慕喎。

不過,如果我冇果種人生嘅態度,我根本就唔會遇上佢。
82. Oscar Lam 2015-07-11 13:54:37
To: 71/f 珍惜香港

小弟嘗試對你所說的幾個要點談談自己的見解:

你說:
"要澄清一下,我只喺質疑股票嘅價值投資,並唔喺否定"

小弟認為:任何投資產品均有其投資價值,包括股票。一家公司的投資價值取決於其賺錢能力、健康的財務狀況、好的管理團隊,公司經營業務的前景、和公司在行業的領導地位等等。只是要找出一家有價值的公司並不容易,需要更加專業的知識。


你說:
"以資源論為基礎嘅投資,會趨向直接持有資源嘅本體,及通過資源交換慨念,嚟衡量資源嘅「值」。"

小弟認為:這樣的投資概念未免過於狹窄。以價值為基礎嘅投資,會趨向持有有價值嘅資產,及通過資產交換概念,嚟增加資產嘅「值」。資產包括你說資源、還有股票、貨幣...........

至於投資資源、股票、貨幣或其他資產哪個較好則因人而異,取決於個人的喜好、性格和專業知識。


最後小弟同意你說的:

"投資,可以好簡單,亦可以好高深。"

不過,不要把一些原來簡單的事情搞得太高深。

83. 珍惜香港 2015-07-11 15:09:23
珍惜香港TO:82/F Oscar Lam

關於閣下第一點,我可以用番 71/F 裡面嘅內容回覆:

每一層包裝,都會令真正嘅「值」被糢糊化,而投資者,就需要有更深入嘅知識,同更精湛嘅技巧,先至可以剖析到一個近似嘅「值」。

至於閣下認為,以資源論為基礎嘅投資過於狹窄,我唔認同。資源論,喺基於原始嘅世界觀,突破貨幣演繹嘅限制,直接比較事物嘅「值」。所以,呢樣嘢,好宏觀,莫講話唔狹窄,佢甚至喺好廣闊,以此引申嘅投資手法,更喺無窮無盡。正如你話果啲蘇格蘭嘢,一口咬定投資價值不高,絕對唔會投資,但如果你對唔同嘅資源有足夠了解,以及睇通佢地之間嘅協同效應,咁話唔定,你可以之創造出新嘅思維,甚至喺新嘅金融掛勾操作添。

或者,我話趨向直接持有資源嘅本體,令你被誤導咗,以為只有資源嘅本體,至值得投入。其實,萬物歸於實體,正如,我亦持有債券,呢樣嘢,可以用兩個唔同角度去睇,而呢兩個角度,都喺引用咗資源論。所以點解,我對風險嘅理解,會同傳統有分別。人地認為風險高嘅,响我眼中,可能喺低風險,反之亦然。

投資,可以好簡單,亦可以好高深。

其實,我呢一句,已經包含埋你回應最後果句嘅意思。
84. Oscar Lam 2015-07-11 16:02:14
To: 83/f 珍惜香港,


閣下認為,資源論,喺基於原始嘅世界觀,突破通過貨幣演繹嘅限制,直接比較事物嘅值。閣下是否認為我們應該回到原始以物換物的年代?如果沒有了一個客觀的標準(貨幣),又如何可以比較事物嘅值?

我話果啲蘇格蘭嘢,投資價值不高,絕對唔會投資,是基於價值投資法下我個人的判斷。我在上文說過,投資何種產品取決於個人的喜好、性格和能力。

我知道閣下在投資債券方面非常成功,希望你能夠分享一下,如何將資源論運用在投資債券上面。

謝謝!

85. 引刀一快 2015-07-11 18:29:58
Oscar Lam兄

我插插嘴,其實我係資源關注者,單項世界性資源嘅掌握好困難,或者説要跟得好貼,但係宏觀世界資源,或者單項國家資源,就冇咁傷神。資源投資,我睇法係要掌握由資源到”錢“中間嘅各個環節,氣象、地理、政治......,咩都揩到D。
你講唔鍾意蘇格蘭嘅草原,係我最鍾意最睇好嘅嘢之一,不過,要搬咗嚟廣東先有得玩。
喺歐洲冇人吼嘅自然資源,一係有規限,一係有短板,若然可以預視呢D規限、短板嘅消失,會有好大投資價值,歐洲咁成熟嘅社會,兼且中國人去咗咁多年,可以變錢嘅嘢,大概唔會剩多少。
引刀睇淡,好大程度同資源變化有關,中國嘅自然資源同人力資源都進入嚴重衰退狀態,往後嘅考驗唔細,源頭已經打折,後面環節嘅效率必須超發揮先可以維持。
資源嘅價值,不在于原地而在最終消費者手上。
86. Oscar Lam 2015-07-11 19:50:36
回85引刀,

你对資源的看法很有深度。資源的投資价值在於是否可以被充分利用,继而生產出更有价值的產品,或者可以在合理時間内被出售,賺取合理的升值利潤。

对個人而言,蘇格兰草原並不具準這些條件。因此,我認為不值得投資。在中國,土地是一項宝貴的資源,但随着经濟發展,土地被过度利用,要在较繁榮地區取得土地並不容易。
87. 自我陶醉 2015-07-11 21:36:26
To 81 樓 珍港兄

我發覺我哋唔止對人生睇法有分歧, 對大部份嘢睇法其實係完全相反至真,  我估我去學柔道, 你一定會學空手道。呵呵!  

就算我97高位入咗市買樓, 我都絕對唔會用“害人精”, “市場巨獸嘅棋子” 嚟形容將樓平買嘅人, 我只會檢討點解自己會在最高位先入市, 到底自己嘅決定喺邊度出咗問題, 同埋以後點樣避免再犯相同錯誤, 咁我交咗嘅學費就會值得喇!  而對抬錢嚟賣樓畀我嘅人, 更加唔會覺得佢哋係害人精同怪獸, 而且仲會心存感激, 冇佢哋邊有可能執到平貨? 多謝佢都嚟唔切。

至於你所講嘅milestone, 我一定會問自己如果我喺更合適嘅時機先做, 我完成第二個milestone到底會快幾多年?

珍港兄,你係我認識第一個同我所有想法完全相反嘅人。 幸會,幸會!  我住南極呀, 你係咪住喺北極?
88. 引刀一快 2015-07-12 02:00:55
自我陶醉兄

珍港兄比較喜歡用感性思維,加上浪漫嘅筆觸,將大家帶入夢幻國度,遇著不解風情嘅豬肉佬,如引刀,或喜歡求真嘅各位,難免會出現思維不協調。
當年引刀不才与珍港兄在文筆上結下樑子,就係出于珍港兄引用生態上汰弱留強理論用得太獨特,而引刀對自己皮毛所知又好執著,結果自然係穿插回應,惡鬥連篇。
有時,遇上和自己思想完全相反嘅人,特別係喺論壇,其實係好事,尤其是好似珍港兄咁捨得慢慢陪人打字嘅對手,我會珍惜,因爲論證起嚟黑白好分明。

89. Sugar 2015-07-12 15:54:11

回85#引刀先生

頗同意你對中國天然資源衰竭方面的觀察,值得關注.

最近事忙少看論壇,偶爾瞥一眼都會看看你的發言.喜見你堅持己見之餘漸見謙厚,呵呵......


90. 引刀一快 2015-07-12 17:05:23
Sugar兄

偶爾賣弄一下文字玩意,也是消閑樂趣呢,呵呵....
91. 無奈 2015-07-12 17:53:57
Oscar:開班授徒時切勿忘了讓小弟也學習下,看來是時候要重投股海了。
92. 自我陶醉 2015-07-12 18:08:05
To 88/F 引刀兄

非常同意, 珍港兄文筆了得, 思維清晰, 用心出文及回應, 確實是論壇上少有的好對手。
93. Oscar Lam 2015-07-12 19:09:43
To: 91/f 無奈兄,

兄台誤會了!開班授徒的應該是自醉兄。事實上,小弟很喜歡投資股票,但卻很少投資,主要原因是股票市場波動大,投資物業雖然較悶,但周期長,較適合本人。

我現在正努力向各師兄學習投資股票之道,適當時候也會投資一些。
94. 珍惜香港 2015-07-13 20:17:58
珍惜香港TO:85/F 引刀一快、84/F Oscar Lam

最近冇乜時間,所以咁遲至回覆你地兩位。

引刀兄 85/F 嘅回應,令我有啲意外驚喜。可能因為閣下喺資源關注者,資源論呢味嘢,就算未必完全認同,都會比較容易明白。其實,資源嘅缺乏、衰退、濫用、浪費,唔單止响中國發生,而喺全球性。人類隨智慧發展,開始變得高傲、自大,以為真喺人定勝天。我地把口,就話背負地球之主嘅責任,保衛大自然;但實際上,我地嘅行為,往往違反原始至今,恆久不變嘅自然定律。就好似美國咁,話說,最近確認咗同性婚姻,舉世歡騰喎。我聽到呢個消息,第一個反應就喺:美國好快要滅亡啦!

我地唔可以因為自己想點,或者覺得應該要點,就隨便漠視自然定律。人類最錯嘅,就喺為咗要違反自己唔鍾意嘅自然定律,就私下創造定律,凌駕於自然定律之上。所以,Oscar 兄 84/F 度問,唔通要番到去原始以物換物嘅年代?我唔喺咁嘅意思。貨幣作為事物值嘅數字標準,當然有需要存在,但响人類唔同族群之間嘅利益考慮之下,貨幣系統嘅設計,已經偏離事物值嘅客觀性,脫離金本位就喺一個例子。

今時今日,我地基於貨幣系統,已經衍生咗無數嘅數字定律。但難道呢啲數字定律,真喺可以正確反映到,各項有形及無形資源嘅,同佢地之間嘅互動關係咩?所以,當我地衡量一件事物嘅值果陣,一定要突破貨幣演繹嘅限制,先至可以發現佢地潛在嘅值,究竟被高估,定喺被低估。但就算喺咁,都只喺好基礎,因為,原來資源嘅值,都喺相對嘅,呢種相對性,我响 71/F 第四段已經舉例說明過。

所以,引刀兄 73/F 嘅問題,亦只喺針對咗最基礎嘅部份。通過資源交換,以物易物,獲得新嘅資源,的確同成本加利潤去計價格好相似,但原來,成本嘅值,同成品嘅值,都喺因人而異。成本嘅值,喺基於你原來嘅能力,而成品嘅值,就喺基於你擁有之後,有冇能力充分行使佢嘅實用值

就以閣下嘅一間舖為例,水泥鋼筋呢啲成本,極其量只作參考,因為呢啲喺人地嘅資源交換,唔喺你嘅資源交換。不過當然要考慮呢件嘢嘅結構同設施,會唔會有所不足,而令你要多付資源去修葺,咁就變成同你嘅資源交換有關啦。坦白講,投資工商舖,我完全喺外行,一竅不通,但以一個長線投資者嘅角度,我會睇佢嘅實用值。所謂實用值,即喺話,呢間舖有冇人「用」,邊啲人會用,兼容性幾大,位置同人流之類。點樣睇一間舖嘅實用值,Oscar 兄喺實戰專家,一定比我清楚好多。

所以,會唔會以現時售價投資,就要睇呢個現時售價,令我行使嘅資源交換,相對得番嚟嘅實用值,抵唔抵。但呢樣嘢,因人而異,因為有啲人,喺有能力製造協同效應,「活化」資源。例如,購入整個商場、整條街道,集中管理,或發展一個小區。如果自己冇呢種能力,只喺憑對將來發展嘅估計,作出投資,咁呢種估計,喺冇保證,因為人地發展與否,點樣發展,唔喺由你決定

真正嘅投資,喺增持有價值之物,同沽走即將喪失價值之物。而最重要,就喺持有果一段時間內,必須充分行使投資物嘅價值,以帶嚟最大嘅利益。

所以,投資最重要嘅部份,唔喺入同沽果兩刻,而喺持有果段時間嘅回報。如果只喺著眼於前者,漠視後者,就只能算喺投機,唔算投資。以前,一張臨約就可以攞嚟炒,又有啲人,買磚頭番嚟空置搏升值,佢地認為,放租好麻煩,會搞到沽樓唔方便,呢啲就喺「炒家」。炒家空置物業,浪費資源,對社會同經濟,都喺好負面。只有放租,先至可以充分運用資源嘅實用值,取之社會,亦用於社會,先算喺真正嘅投資

同樣地,一個浪費資源嘅企業,喺唔會有前景Oscar 兄話我投資債券方面非常成功,實不敢當,我只喺一隻小蚊,响基金掃貨潮果排,真喺一張都攞唔到。至於點樣運用資源論,响投資債券上面,會喺一個太大嘅 TOPIC。不過,我手持重貨嘅高息債券,發債者,都喺重視資源,同會發展資源嘅企業。有啲內房企,發債,喺為咗爭持土地,而唔喺為咗投放資源,响土地嘅發展度。呢啲企業,資源嘅持貨量,可以好大,但佢地浪費資源,同抄家冇分別。

我借你未來錢,喺因為你會將借貸,用於資源發展項目上面,從而創造更有用嘅資源,獲取更大嘅長線利益。正因為呢個原因,我先至會相信,你會俾得起,同埋願意俾,咁高嘅債息。
95. 引刀一快 2015-07-14 14:27:25
珍惜香港兄

呢幾日我都唔得閑,先簡短回應你“其實,資源嘅缺乏、衰退、濫用、浪費,唔單止响中國發生,而喺全球性。人類隨智慧發展,開始變得高傲、自大,以為真喺人定勝天。”呢個睇法。

資源衰竭唔係因為人覺得可以勝天,而係人覺得可以食人!有時間我都打篇嘢講講呢個問題。
96. Oscar Lam 2015-07-15 00:18:55
回94珍惜香港,

閣下是理論派,小弟是實戰派。雖然如此,無阻大家互相交流、學習。

閣下文章寫得很好,小弟真心佩服,哈哈!
97. CD ROM 2015-07-15 18:26:46
呢一篇引申出來幾位大師兄既不斷討論, 老實講我真係日日追!!! 而當中涉及好多conceptual既野我直頭要反覆睇好多次你地既回應先能掌握~~~

有樣野, 我真係有d唔明... 價值投資, 同珍兄既資源論, 我覺得係無衝突, 甚至乎適合同時使用tim~~~ 因為有一個共同目標, 就係去睇穿投資物既 "買唔買得過?".

最大既分別, 係用完全唔同既單位(unit)去做分析jel~~~ 資源論, 令我想起Big Mac Index!!!

當然, 對於價值投資, 同資源論, 我既認識實在太太太有限, 冒昧留個言, 旨在答謝師兄我又學到d新野喇~~~

本想多寫一段物理試題既比喻, 但係呢個時間身在深圳公司, 實在需要早D走返香港喇, 希望有時間再寫~~~~