呢度引申第二個問題，到底「走水貨」係咪等於「走私」呢？我地香港政黨有咁多律師，點解無人一個人出來同大家講清楚？
「走私」，即係違反法律，不管係香港法律還是內地法律。火四郎馬上去查一查香港海關的網頁，除了藥物或毒品之類的違禁品，有關出口貨品的限制最主要有兩類 – 配方粉與食米。
只要唔攜帶超過15公斤食米《儲備商品（進出口及儲備存貨管制）規例》296A章3條，以及24小時內唔攜帶超過1.8公斤的「細仔奶粉」；理得你係一箱一箱益力多定係檸檬茶，你都唔可以話人「走私」架喎。
係香港，大家只可以利用《香港鐵路附例》第556B章39A條，或者《公共巴士服務規例》第230A章14條，限制尺寸過大的貨品進入交通工具，換句話講，人地坐的士甚至GogoVan，係完全無抵觸過香港法律架喎。
香港無犯法啫，佢地犯咗內地法例，咪係走私漏稅lor。
咁我地睇下內地法例，《中國人民共和國海關旅客進出境行李物品分類表》，任何人都可以攜帶價值人民幣5,000元以下的生活用品；「職業水貨客」精甩尾，又點會咁蠢去違反呢個「價格」的規定？
憎內地人咪直接講lor，唔駛下下都靠屈人地係「走私客」來搶道德高地架。
「咁，水貨客攪到我地民不聊生，成街成市都係藥房，條數又點計先？」
呢個問題，又分兩個層面來睇。
1. 火四郎想問，無論係藥房又好，水貨店又好，到底佢提供到的貨物，係平還是貴？
藥房所賣的嘢相比起超級市場，絕對「平足九條街」，讀者可以問下亞媽，屋企大部份物品，由牙膏牙刷，洗頭水髮泥，洗潔精洗衣粉，去到廁紙垃圾袋，相信大部份都係由呢D俾各位指住來鬧的藥房出售的；係咪將各位趕返入惠康百佳華潤，大家增加返D開支就會皆大歡喜，本土勝利？
2. 至於話到藥房金舖攪到租金上升，民不聊生，香港以往的文具店精品店蕩然無存；火四郎想反問，對於小食店小商戶，你地又願唔願意提供足夠利潤等人地可以經營？生意，永遠要靠幫襯去支持。大家諗下你地好懷念的街坊小店，你地平均幾耐先幫襯一次？有錢賺的生意，又點會肯放棄經營？
雖然香港飽受水貨問題困擾，其實香港應該感恩，內地對奶粉進口係有規制；倘若奶粉商係可以自由進出入地，13億的市場VS 800萬的市場，到時又會唔會風水輪流轉，就好似我地上一代走晒上大陸辦貨落香港，成為被指罵踢行李的一群？
App下載
