怎樣才算是炒家

法子兄日前話懒人個腦係哺乳腦，諗野嘅方式係哺乳腦法則，我好唔鍾意有呢個腦，以為法子兄刻意為懒人創造個貶義詞，反應大咗啲，後來再睇先知係早己有嘅理論，而且係好野嚟，己經向法子兄道歉，好彩唔係爬蟲腦。

好多謝小楊開解同鼓勵，又讚懒人勤力，令懶人開心之餘，又諗番起以前買股票嘅慘痛經歷。

懒人讀書唔成去做地盤工，辛苦賺努力慳，儲到啲錢學人去投資，乜都唔識唯有搭親友買，貪平買垃圾股，初時升两三格，遲啲得番0.01格，有啲直頭即買即跳水再唔蒲頭，领咗幾次野，好彩都係小試牛刀，懒人諗力不到不為財，於是買報紙刨財經，參考財經高人貼士，結果都係嘥精神加輸多多贏少少，後來先知原來有啲財經高人係演員打手，專業昆羊生羊太，懒人條氣唔顺，走去逛書店買两本投資股票書睇，先知道理論多如天上繁星，保力加通道、平均綫、陰陽燭，支持位，波浪理論、黃金數字，双頂回落，双底回升，旗形待變、PE值、BOOKVALUE、派息率…….. 多到唔想再寫。

小楊無讚錯，懒人其實好勤力，前後買咗成百本書，日刨夜刨一輪，以為醒咗好多，同話自己買股票醒嘅親友研究切磋攞料，參考埋財經資訉，配合埋自己明啲唔明啲嘅理論，訂下投資策略出擊，結果係股市好野過我，佢快我慢，我諗完决定咁做時股市己經掉轉頭行，好似股市以正弦波形式前進，我就以反正弦波形式買賣，死晒，蝕到两眼發光。

痛定思痛，懒人檢討自家投資歷史，覺得股市變化太快，投入時間又多，啲理論又多又深，懒人咁低學歷應該學嚟無用，再諗，樓市慢好多，唔學理論去學睇人點做重好，可以慢慢諗，諗完又諗都再手都未遲，由於買樓要本錢多好多，我一面努力儲錢一面諗，到我儲夠錢俾首期供第一個單位時，我個腦基本上己經形成咗玉石買手段嚿估嘅思维法則，直到現在應該有啲經驗基礎。

法子兄，老實講我始终唔接受我有個5萬年前嘅哺乳腦，話我個腦係哺乳腦改良版，玉石段嚿估腦我會鍾意啲。

懒人靠估，覺得衙門剛巧於鯇魚開賣前宣佈延長DSD期限以利換樓客，時機與之前加乘哥開盤同拆售酒店時之巧合有異曲同工之妙，值得諗諗：

1. 鯇魚盤源以大單位為主，以換樓客為主要對象，但近期市場以細單位較熱賣，理應以先推细單位為上著，之前亮劍兄己有提及，但反觀鯇魚卻出乎意表，步處以3、4房大單位為先，食正水流主打換樓客，示範單亦己预先造定大單位，似乎春江水暖鴨先知。

2. 波叔之前力斥講鐵流標不合作，之後講鐵從善如流，以超音速完成康城4期投標程序，加上近期坊間有要求放寬DSD時限，甚至要求開始撤招，衙門適時將DSD延限，實有顺水推舟、投桃報李、順應民意一舉3得之效，簡直係無縫高招。

懒人再估，衙門呢次只係將DSD延限，唔係取消，加上對按揭限制寸步不讓，只會對早己在計劃中嘅換樓客有啲鼓舞作用，對處於边沿实力嘅換樓客毫無幫助，對擁有強大購買實力、擁有一個單位以上而想添食、等待中嘅投資客、等待跌市伺機再為業主嘅交租客毫無刺激作用。

除非附加換樓按揭寬容措施，否則预算單憑DSD延限，就足以誘使更多人換樓而釋放出更多細單位回歸市場，刺激樓市價量齊升仍有待考證。

博士:

我認為有物業者，無論持有多少物業，現在應該如你所講持盈保泰，不變應萬變，而時移世易，時機已大不相同，現時亦無須逢三退一。除非財政問題又作別論。

相反，若財力許可，可嘗試增持。

目的是做大做強。

同理，現時政府要做的也是做大個餅。建地下城，做人工島，填海，撇3D重稅，

撤限奶令，大量輸入外勞。(這些因由和好處，博士你一定知道，若心血來潮，小弟亦會略述)。只消看看星加坡和澳門，就知道.

而不是見逢插針，搶社區用地等的低智行為。昨日，與星加坡人提起政府見逢插針時，友人笑到面黃。前日和內地友人談及限奶令時，友人拍案大罵XYZ(以下略走689個字)。

可惜，CY個人沒有魄力，手下沒有人材。為人又獨斷獨行，民望插水。開局極大不利。剩下三年任期，已好難有所作為。

博士方當壯年，若念及蒼生，實宜為下屆特區出謀獻策。山高雖已風燭殘年，亦銘記博士恩惠。

蜕变中嘅懶人-----

你一樓所寫的經歷同我好相似，但我好彩的是跟倒一个好師傅，拒教我的方法係：『睇月結單做買賣！』

呢个運作方式有如恆指成份股選秀一樣

首先係買幾隻心水藍籌股

之後在月尾沽出你張月結單之中最屎嗰隻

然後將資金再投入另一隻心水

簡單到有小學程度嘅人都知點運作

想像一下你咁玩，就可食倒求其一隻十倍股的七八成升浪

小弟以呢个方式咁玩，幾年就班倒首期。

TO 亮劍兄

懶人早年運滯，無緣遇到高人，所以行錯好長冤枉路，所以我對法子兄講，我只想行對嘅路係有感而發；你提出嘅『睇月結單做買賣！』好吸引，而且係亮劍兄嘅成功經驗，好想問多句，呢條好橋對現在股市生態重可唔可以照行，因為我唔買股票好多年，好想報番一箭之仇，我會認真諗，懒人又貪心啲，希望亮劍兄有多啲提供俾懒人參考，我會明白任何投資都係自己負全責，非常感激亮劍兄提供。

你一開始先買藍籌股-----

我 87 年股災後入貨名單包括長實、和黃、新地及太古等，買入價大約十元一股！

而教我玩嘅高人，喺 70 年代初開始，就持有三電一煤、恆生、匯豐及一D地產股，近十多年代表作，係十零弍拾入東方海外、港交所及騰訊等，我強調以上股票，佢不少仲持有中，憑此使她可多次 FP 買樓收租。

我呢個汰弱留強揀股法，在呢度公開講過好多次，祥情請查看我呢幾年的回應。

王先生 2011-09-21 10:11:28

由 0至10萬要聚沙成塔，集腋成裘；而由 10萬至 100萬唔投資唔得。    

香港人玩股票好多；但俾股票玩翻轉頭重多，大約 7成人輸、2成打和、只有 1成人有錢落袋！ 
散户已經資金不足、消息不靈、投資智識貧乏，咁如果連投資基本法都唔識，   
唔輸致奇！

小弟不才，得高人指點過幾招，玩落都行得通，大家不妨研究下：-   
『散户通常買 2、3、4線股，重要贏粒糖、輸間廠，好股執少少就走，衰股就望明天會更好留翻係度！ 
最終成個組合隻隻股都捱緊價，心情好至奇，而且就算有贏硬嘅機會出現，都因為成手蟹貨而無錢買！
散户要贏錢就要好似恆生指數選股咁做，要藍籌或紫籌股，要有盈利，要有息派。  
最重要係汰弱留強，保留强勢股、將弱勢股清除，賣出股票不論盈虧、只論强弱！  
唔識就用月結單做準則，每個月選一隻最雞嘅股黎沽，然後再買心水貨，當自己係基金經理咁做買賣！
唔信大家試吓，或攞翻啲舊月結單出黎做模擬測試。不出兩年成個組合會靚好多，咁起碼心情都好啲！
最好揾啲投資課程學吓，例如揾埋陰陽燭幫手，例如連出三支陰燭走、連出三支陽燭入！  
贏大錢嘅股就走幾成貨鎖定利潤，再贏到夠首期就買樓。

TO亮劍兄

以前我有股票恐懼感，講股票嘅野我唔多睇，所以忽略咗亮劍兄呢方面嘅文章，而家樓市講真懶人係睇窄幅上落到年尾，買賣都無得諗，收租繼續收，跟從湯博士嘅歩歩為營新法行事，暫時堅守不出；先前逢二退一變現嘅現金，嘗試小部分以火中取粟嘅心態，睇吓有無機會喺股市報番少少仇，祝我好運，更多謝亮劍兄。

大家要明白，樓價走勢取決於多項因素，包括土地及樓宇供應、購買力、人口結構、按揭借貸成本、及投資者對樓價和以上因素的預期等。= from hkma chairperson mr chan .

發展商需興建日間護理中心及護老中心, 即係話有部分成本要轉嫁落可供出售樓宇度, 咁發展商自然要將地價再壓低少少, 造成今次屯門地價比上次震寰路與良德街交界的地皮更低. 不過又咁, 地價係低少少, 又睇下發展商開賣時口價是如何?

懒人自小就出社會捱世界，幾辛苦嘅工都捱過，幾苦嘅環境都挺得過，當年每個人揾食都唔容易，教育行精英制，平均學歷唔高，DT都係以中學畢業程度晉身特首之路，當然佢不斷努力增值自己，嗰個年代係香港每個人都咬緊牙根嘅拼搏年代，遇到高人扶持機會唔高，拼命捱努力增值望有出頭天係好普通嘅想法，埋怨世態炎涼唔多，只覺得係理所當然，懶人都係萬千中一人，盡量做盡想諗只想明天會更好，若說人間有情，我相信现在嘅人間比以前嘅人間好，呢個網站己經係人間縮影，懒人感謝每一位網友。

引刀一快兄，你呢段富有哲理嘅忠告，我意會神領，但係一時間我唔知點反應，衷心多謝。

多謝小陽師妹, 健康是最大的財富.

TO小楊小師妹

我斗胆跟惜缘兄稱呼妳小師妹，我覺得妳人叻又溫情，心地好又孝顺。

你先生真有福，祝生活愉快、工作顺利。

TO笑爆咀兄

和田美玉只堪配與有緣人，唔講得笑；好彩我都有件緬甸翡翠，玉石賣手都唔蝕底，今勻係講笑。