昨日早上回到公司，HR同我講，所有員工已經打了疫苗。我覺得很奇怪，疫苗推出已經超過100日，公司員工的接種剛剛達到五成，當中包括老闆與管理層，如果唔計，我相信只得四成，點解可以在幾日間全部員工打了疫苗。
HR話，多謝今年的暑期工，所有應徵者都已經打了兩針疫苗，他們話如果唔打，根本冇機會面試，即使老豆同老闆很熟都係咁話，老闆一定同老豆講做暑期工冇問題，不過麻煩叫個仔先打疫苗，否則有乜冬瓜豆腐就一鑊翹起，HR靈機一觸，在午餐時發放了一個訊息，如果公司打算裁員，一定會裁那些仍未打疫苗的同事，這並不是歧視，從17歲確診少女可以睇到，萬一有同事確診，公司仝人可能要入隔離營21日，公司又怎樣運作，為求安心起見，一定先解僱那些未打疫苗同事，同事收到訊息，未打疫苗的全部都拿拿臨走去打疫苗。
有老友同我講，半島酒店限時三個月，如果未達到七成接種率就要裁員，估計有不少大公司會做同樣的事，換句話說，失業率會大幅飆升，我話少擔心，今次就算出現裁員潮，失業率都不會上升，以半島酒店為例，假設現在的接種率是一半，代表有五成人仍未接種，半島只要裁走兩成仍未接種的職員，同時在市場吸納相同工作的員工，唯一要求就是要打了疫苗，不用威迫利誘，員工接種率已經達到七成，而且解僱與聘用的人數相同，失業率又點會上升。不過，失業率在未接種的人就會急劇上升，到最後，堅持不接種的人都要接種，條頸點都唔夠張刀硬。
App下載
