有老友話女兒移民去英國，只帶她的子女，將佢同佢老婆留在香港，嬲到發癲，我話有甚麼問題，樑上有雙燕，子女帶他們的子女去移民是正常不過，而且符合達爾文進化論。我叫老友睇開啲，唔好成日講子女要回報父母，如果子女要回報父母，不理會他們的子女，這個世界不會進化，甚至人口下降，世界滅亡，就算三孩政策都冇用。
老友話我講得太誇張，他自問對父母很好，很孝順，並不是樑上有雙燕，今日女兒咁樣對佢，認真唔抵，我話我好彩，我阿媽自少叫我唔好咁孝順，將資源留給下一代。我包拗頸，雖然唔敢講自己孝順，但好似泥水佬做門口，過得人過得自己，其實，孝唔孝順由別人講，就算晨昏定醒都會俾其他人話不孝順。
我同老友講，他應該多謝他的女兒，去到英國不但人地生疏，又住到山旯旮咁遠，去飲餐茶已經很大件事，平日主要的工作是湊孫仔孫女，表現好是他們的天份，如果表現唔好，或者有頭暈身㷫，是祖父母責任，不如留在香港，退休之後做一些自由工作或者義工，將自己的經驗傳給其他人，人生才有意義，去到英國就真的會變廢佬，女兒其實是為他著想，千祈唔好怪她，否則連女兒都唔見埋，舉翅不回顧，隨風四散飛。
還有一個理由，今日女兒帶埋你去移民，當女兒子女大學畢業，回歸香港，就未必會一起回歸，有可能客死異鄉，不如留在香港守住自己家園，女兒或者孫仔孫女回歸都有一個屬於自己的竇。
App下載
