補地價有突破性進展

　　在新年第一日返工，有老友到公司吹水。佢話曾智華在一份報章撰文，如果想知道樓市真象，一定要睇大炒家湯文亮文章。咁大頂高帽，以後寫文更加要醒醒定定。老友又問我對今年樓市預測，但唔好講窄幅上落，先升後跌，或者先跌後升那些廢話，而是實實在在，尤其是房屋政策。如果可以實行，對樓市一定有幫助。

　　 一向以來，香港房屋問題就是供應不足，搞到政府要推出什麼明日大嶼填海計劃。老實說，就算政府全力推行，都要在15年之後才見到成效，正是遠水不能救近火，最簡單的解決方法莫過於與地產商協商補地價，將地產商手上農地轉換為住宅或者商業用地，但補地價工作知易行難，政府每年從補地價得到的供應量是很少，主要是雙方大纜都攪唔埋，政府話地產商出價太低，而地產商會話政府要價太高，而雙方亦知道就算達成補地價協議，仍然擔心被人話官商勾結。所以，雙方寧願不攜手解決房屋供應不足問題，也不退讓半步，但我估計今年會有突破性進展。

　　房屋問題如此，遊行人數問題也是如此。每一次遊行，主辦機構與警方所公布的數字亦是大纜都攬唔埋，尤其以今年為甚，以往大約是1比5，即是警方公布有20萬，主辦機構是100萬。今年更加離譜，警方公布有6萬人遊行，民陣是103萬。我相信雙方的數字都不準確，既然如此，政府何不花些少錢，聘請顧問公司獨立調查。以現在科技，數字準確可以去到個位數，大家亦不用爭駁。如果由政府出錢，我相信主辦機構亦沒有異議。

　　再講補地價，如果政府與地產商同意仲裁，聘請世界級的測量師，所得出結果雙方得要接受，這樣補地價是一件簡單的事，供應充足，房屋問題基本解決。所以我認為在今年內補地價有突破性進展，第三個預測是將會有地產商與政府達成補地價仲裁協議，老友唔信，仲話仲裁是天馬行空的事。佢唔敢同其他人講，驚笑死人冇命賠。