地產商是否應該蝕本賣樓

　　老C是生意人，知道殺人的生意有人做，蝕本的生意冇人做，點解會撰文叫地產商蝕本賣樓，令到所有地產商不滿意，認為老C做地產代理生意，冇理由為了自己有生意而叫地產商蝕本賣樓。老C再撰文解釋，他雖然是做地產代理生意，但以個人身份睇淡樓市，叫地產商蝕本賣樓亦是一番好意，今日唔賣明日可能蝕得更多。不過，倘若地產商真的是蝕本賣樓，在通關之後，購買力湧至，樓價不跌反升，老C又如何面對地產商，我覺得老C唔撰文仲好，無謂得罪伙記的衣食父母，千祈唔好以為自己出糧畀伙記，攞真金白銀出糧的是地產商。

　　是否賣樓甚至是蝕本賣樓，是有一條物質不變定律，就是業主實力不足，欠債太多，唔賣樓隨時會變成負資產者，就有機會蝕本賣樓，不過都只是機會，不少負資產者只要按時供款，銀行都不會迫他們蝕本賣樓。如果講實力，香港地產商如果認第二，冇人敢認第一，如果地產商蝕本賣樓，是否能夠賣到一個好成績是其次，但就會俾到一個負面訊息給所有業主，連地產商都睇淡，樓市一定會大冧，唔賣樓就笨，如果太多小業主有這個心態，樓市唔大冧就出奇。嚴格來說，地產商蝕本賣樓是損人不利己，我相信地產商從不考慮蝕本賣樓，賺少一些或者會有可能，老C想多了。

　　在二手樓市場的情況也是一樣，現在劈價賣樓的業主大多數只得一個自住單位，由於按揭成數太高，如果樓市繼續下調，他們很容易會變負資產者，賣樓亦無可厚非，但持有超過一個單位的業主，按揭成數限定在四成以內，以這個借貸比率，銀行根本沒有風險，冇風險當然不會迫業主賣樓，所以，大家在市場不時見到將唯一自住單位賣走的業主，很少見持有幾個單位的業主都要劈價賣樓，既然小業主都不用劈價，大地產商又點需要蝕本賣樓。