如果驚加息就一世唔敢買樓

　　有基金經理在報章表示，香港利息上調，港樓易跌難升，我覺得題目很武斷，於是睇埋內容，原來是半年內，港樓易跌難升，這又難怪，因為股市投資者與物業投資者的睇法是不同，辣招都有三年時間，物業投資者睇樓市升跌會以一個較長時間，如果擔心樓價下跌就根本唔會買樓，而不是擔心樓市在半年內易跌難升而唔買樓，這是行內行外人的分別。

 　　在某個程度上，半年內樓市易跌難升有八成準確，但股市投資者可能不知道，樓市下跌才是入市良機，樓價較平還在其次，最緊要是可以買到較優質物業，而且買家可以享受箇中樂趣，不但可以肆意還價，而且隨時有意想不到的收穫，千祈唔好一定是樓市上升才是買樓良機，業主亦識得反價封盤，地產商亦不會將優質單位推售，所以，如果利息上升而令到樓市下跌，反而制做了一個買樓良機，其實不用擔心。

 　　如果有人話擔心利息上升而唔敢買樓，可以說根本唔了解利息，所有人都知道，最唔能夠承受加息壓力的就是可以決定加息的美聯儲局，不少分析員亦表示，今次加息快，減息亦快，半年後美聯儲局如果放風話通脹已經受到控制，不但不用再加息，甚至會作出下調，樓市豈不是作出反彈，現在唔買樓，到時不但享受不到買樓樂趣，仲要受業主氣，而且只會買到一些又貴質素又不好的物業。換句話說，又錯失了一些買樓良機。

　　 有很多有能力買樓的人至今仍然租樓，如果問原因，他們唔會話擔心打仗、制裁、疫情、全球供應鏈失衡，只會話擔心加息，尤其是過去十幾年的低息環境，利息走勢只有升不會跌，因為已經跌無可跌，如果擔心加息，就一世唔會買樓，所以，擔心加息唔敢買樓只是一個偽命題，基本上是擔心孭上一身債唔敢買樓。