上文題要,引刀搏到咗磨爛蓆嘅機會,不但可以繼續伴君側,仲可以轉新宿舍,至于進修、深造、充實、上進之類嘅講法,則不太在意,引刀認爲學校社會各有所學,只要學術基礎到位,所有願意動腦嘅人,任何時候都係學習中,不過呢D係學渣思維,千祁唔好俾細路仔睇到。
今次去到新宿舍,我係最後一個進駐,宿舍格局好得意,兩房共用一個厠所,一邊兩張床,一邊四張床。四張床果邊已經滿人,兩張床呢邊有位!同房係舊同學,雖然同呢位仁兄四年來都冇乜交集,但係好歹都係多年同窗,睇怕又可以交個新朋友。
入住新宿舍幾日,發現有個好得意嘅現象,呢位仁兄日日放一粒搣開咗嘅糖喺我床頭窗邊,我丟咗佢又再放一粒,問佢就支吾以對。
引刀好鐘意養魚,兩個人住嘅房,每人有一個大鐵架,人家用嚟放雜物,我就用嚟放魚缸,又有個好得意嘅現象,只要引刀走開兩日,魚缸就會出現古靈精怪嘅事故,次次都有死傷。
慢慢,我發現遇上魔鬼室友,怪之佢本科冇乜人同佢好,呢種心理唔平衡嘅人,好可怕,當出現喺群體嘅時侯,由于受到多數人嘅制約,礙于壓力而隱藏自己,當佢同人單對單嘅時侯,大部份嘅陰暗面都會表露岀嚟。
不久前,復旦投毒案凶手正法,呢類事件喺大陸學界唔係第一次發生,轟動与不轟動我地一直都聼唔少,主要係冇搞出人命就未必會傳到香港。相見好同住難唔係呢種事件嘅唯一原因,甚至唔係主因,主因往往係二人“較勁”(比較)。
如果一大班人一齊住,當中有一個係學霸,那麽其它幾個人齊齊無緣問鼎,有人陪冇所謂,比上不足比下有餘。如果有一個係學渣(比如引刀),咁又係冇事,因爲個個考試成績都好過我,唔通嬲咗成村人咩?早就認命。但係二人宿舍就有一個問題,大家只有勝負,任何一方面,都係只有勝負!非勝則負。
學生之間,最攀比嘅一點,無可置疑就係頭腦,呢樣嘢男生緊要D,但係女生都差無幾,然後依次大概係拖友嘅水平、家庭背景、個人外貌、人緣及交際能力、運動天分.....等等。因爲高校裏面嘅人,大多都係相信智商支配未來人生格局規模。
引刀貴為 當年級中八大學渣之一,本來就可以與世無爭,不過呢位港燦同學都唔係完全身無長物,雖然大部份科目考筆試都徘徊於榜末,但係入到實驗室,引刀係王者,動手能力以及對實驗嘅規劃能力,非但授課老師欣賞,連學院內冇帶實驗課嘅老師都知道引刀嘅表現,所以改卷都會補貼多少印象分,否則引刀分分鐘畢唔到業!當年港澳生讀我地呢科甚少,以至造成一種港澳生答題差而偏重於動手能力嘅假像,老師們問我,從實作表現我應該充份理解學科,係唔係因爲唔識中文所以答題寫得咁差呀?我梗係忍住笑順水推舟話係喇,唔通照實講話我讀書屎咩!好歹總算冇太丟英女皇嘅架。
言歸正傳,當年班中強手如雲,天資敏悟者比比皆是,呢位魔鬼室友想做學霸當然排唔上號,如今見到有學渣同佢同房,心裏自然涌出一股期待,以爲自己有壓倒性優勢,未來三年都可以顧盼自豪,可惜初步接觸之後,佢完全嚐唔到甜頭,越係嚐唔到甜頭,就越係急切去證明自己,因爲,聰明唔過學渣,係呢種人無法想像兼無法接受嘅事情,別人一切稍爲靈巧嘅表現,都會觸及佢神經,視爲威脅。
慢慢,本來小打小鬧嘅小動作,演變成每每有寵物傷亡嘅爆陰毒,引刀覺得極爲困擾,加上對方兩次追女仔失敗,面容日漸陰暗,引刀已經開始擔心人身安全,因爲大家都要做實驗室工作,而對方嘅實驗室,毒物真不少。
有那麽一點相似,復旦投毒案凶手獨身、完美主義、內向、多面性格、勤學,而且膽大手黑。官方發佈凶手嘅供述,大部份都係律師精心為免死而鋪排嘅,經常要思考同設計實驗嘅人,也許會好容易推斷勾劃出另一個一石數鳥嘅惡毒計劃,凶手係犧牲對方身體健康作爲自己寶貴實驗資料,人如何能够如此賤待一個熟悉嘅人?就係恨。既生瑜,何生亮,周瑜谷死自己,林某就毒死人地。每次諗起呢件事,引刀“後怕”。
恨,使力量變成無限大,當時引刀差D想同佢死過!忽然,眼前出現一個轉機,到底係乜好嘢?唔賣關子,下篇就係引刀敗走買大陸樓。