地產論壇
登入名稱
密碼
頁數:
有利庫房的高成數回贈
瀏覽人次:20919    回應:4

有利庫房的高成數回贈

 

湯文亮博士

紀惠集團行政總裁
2019年3月11日

  中原指數連升四個星期,有老友話我又跌眼鏡。其實,在一片唱好聲音之下,樓市小陽春之中,連升四個星期又有何出奇。不過,總共只升得大約1.3%就似乎太少。而且,現在賣樓的透明度太低,有心買樓的人要打醒十二分精神。否則,很容易買貴樓。老友唔同意,佢話香港賣樓有完善監管,我只不過不服輸,搵一些理由替自己辯護。老友咁講我亦沒有辦法。

  香港樓價不斷飆升,其中一個理由就是高成數按揭。金管局雖然推出了8次逆週期措施,但對於地產商為賣家提供的免壓力測試高成數按揭卻表示無能為力。有了金管局這番說話,地產商就有持無恐向買他們新樓盤的買家提供高按,那些買家當然是要付出溢價。最近,有一些在三年前採用高按買樓的業將物業賣走,即使樓價指數在這段期間升了30%,那些業主仍然是得個桔。唔需要蝕本已經是好好彩,現在還有不知幾多兩三年前採用高按買樓的業主不知幾頭痛。因為如果高按不能轉到銀行,他們就要付昂貴利息,最低限度比現在的多一倍,這是一個很難解決問題。

  地產商如果現在賣樓,除了提供高按之外,還要有大幅折讓才可以做到好成績,大家都可以睇到凱匯表現。不是,信置在推出凱匯時是沒有顧慮。因為是全新樓盤,如果在減價出售前早已賣走了兩三成,信置減價推盤亦沒有那麼瀟灑,或者會暗地裡減價,就是提供高成數回贈。

  在凱匯推盤時,曾經帶出一個現實情況,就是地產商給予物業代理的回贈由3至13%不等,物業代理可以自由回多少給買家,或者買家可以選擇回贈最多的物業代理代表他入票買樓。當大家正在迷惑時,EAA表示回贈是生意手法,不會特別監管。有了EAA的保證,回贈已經變成合法化,而且愈回愈多,最新的是大約25%。EAA立刻補鑊,表示會密切留意。其實,既然買樓的人願意付高樓價而又博取收高成數回贈,而又唔介意付回贈金額的印花稅,EAA又何需阻止他們貢獻庫房,更何況這是一個大數目。如果禁止高成數回贈,要用折實價買新樓,那麼以往用高樓價高按買了那些單位的人就慘了。所以,EAA一動不如一靜,市場是會懂得自動調節。

有利庫房的高成數回贈
1. 真真薯片
2019-03-11 12:20
回佣係一樣好煩既野黎,地代有所謂回佣紙,要地代同佢對上既分行經理/董事之類簽,上面寫明買家係邊個,買咩單位,回幾多%

如果係搶爆既訓盤,揀樓時兵慌馬亂,買前唔會知買咩單位,揀樓時地代既阿頭當然唔會簽,結果買家只可以係未簽齊回佣紙前就落訂,成交後買家搵地代回佣,地代就話未簽齊名之類既廢話去推塘,做成好多爭呦

但係賣貨尾又唔同,成個售樓部得一個買家,可以揀家好單位,地代唔簽齊回佣紙就唔買,簽晒先買冇得推

地代係香港唯一可以光明正大合法收回佣既行業,非常古怪




2. 非常古怪
2019-03-11 12:37
香港古怪嘅野何止一二, 比如正苦隧道要調節價位控制流量又話唔得, 老花眼鏡廿蚊副吹到佢有眼疾要平光爛鬼太陽眼鏡二三千要管又話唔得, 正苦場劏車位送商場又冇人理, 跟住又要二百億買返街場, 等等
喂真真, 貨尾回佣會唔會勁啲架?
3. 古怪
2019-03-11 12:59
仲有啲咩古怪嘅野呢? 話說早幾年在下有一個物業, 自算都夠期驗窗, 咁既然換客不如直情換晒所有啲較同有隻問題窗成隻連框換左, 完成之後個零月就收到驗窗通知, 咁工程公司一個星期內就出返張 cert, 寄返俾屋宇, 等左半年都冇回覆, 收條都冇一張, 我驚佢告吖嘛, 咪打電話去屋宇, 佢話收到但處理唔切, 遲啲會覆架啦禾, 但到而家已經差唔多四年嘞, 紙都冇寄過一張黎, 咁啫係點呢? 
4. 湯瑪斯
2019-03-11 15:14

金管局對於地產商為賣家提供的免壓力測試高成數按揭竟表示無能為力。唔係話今屆特首好打得既咩。點解金管局咁無能?

有金管局「無能為力」既承諾,一手樓高成數按揭就陸逐有黎。二手樓趁勢反價。如果中原城市領先指數再升多兩週,到時唔到博士唔承認睇錯市,因為樓價真係止跌回升。不過而家認錯就早左一啲。我支持博士的睇法,到時惟有一齊認錯。不過如果中原指數下星期不升反跌既話,就輪到話「止跌回升」既大好友冇話可說了!

頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。