地產論壇
登入名稱
密碼
頁數:
星架坡助香港一臂之力
瀏覽人次:24357    回應:4

星架坡助香港一臂之力

 

湯文亮博士

紀惠集團行政總裁
2018年7月11日

  有初級官員對我說非常擔心林鄭的「娥六招」會受到地產商的司法覆核,大家都知道地產商財雄勢大,莫講他們聯手,就算任何一個申請,政府將會非常頭痛,而地產建設商會亦表明有此可能,我本來想講,要擔心都未輪到佢,他又不是高級官員,最後我沒有說出來,因為沒有官員會認自己是初級官員,其實,我絕不相信有地產商夠膽申請司法覆核,即是叫法官批准他們囤積居奇,愈大聲叫的地產商反而會積極賣樓,口中反對,行動就是契弟走得摩。

  可能林鄭有運,星架坡在毫無先兆下推出壓抑樓市辣招,加徵各項已存在印花稅,力度之強,就算是星架坡地產商亦表示不排除以法律形式解決,我相信這是星坡架地產商心直口快之言,在星架坡同政府講法律,多多都唔夠輸,相比今次星架坡出招,林鄭的「娥六式」就顯得非常溫和,只不過叫各位地產商唔好囤積居奇,如果這樣做都會被申請司法覆核,特區政府以後就不用推出任何政策,不如摺埋好過,所以,我估計以後不會有地產商再提司法覆核,香港政府今次就要趁勢,除了「娥六招」之外,必須加快填海造地,收回棕地,甚至開拓郊野公園,至於黃遠輝說的不能夠以有迫切需要就忽略資詢環評,這只不過是他個人意見,不能夠以個人意見作為政府政策。

星架坡助香港一臂之力
1. 真真薯片
2018-07-11 12:09
娥六招,第一招空置稅已經變成標題黨,得個口號,實際作用極微

首先,空置稅要先立法後實施,同3D先實施後立法比差天共地,垃圾會要放暑假,放完假返黎排期再討論,我估隨時貿易戰打完,空置稅都唔知實施左未

第二,空置稅其實係幫所有一手盤設deadline,有入伙紙後一年內要賣晒,我留意到兄弟地產樓神話佢個北角海邊盤仲未攞入伙紙,google一下,北角地係2012年7月拍出,距今6年,樓神仍然鬆毛鬆翼話個盤未有入伙紙,以此引申,只要地霸有心拖,所有拍出既官地由拍出到有入伙紙時間唔會短過6年,有入伙紙後一年要賣晒,即係由拍地到賣晒最少要7年,咁代表乜?即係話正苦日日講既未來3,4年潛在供應達X萬伙,係空置稅推出後,界線變成7年,即係當下地霸手上所有潛在供應要係7年內賣晒,正苦個潛在數字,冇記錯好似伙9萬幾,我讓你少少當十萬,十萬個單位必須7年內賣晒,即係未來7年每年新樓供應14285伙,只要正苦新拍既地同一手賣出既地數量差唔多,呢條數雖不中亦不遠矣,咁私樓供應量同出招前有咩分別?

如果我係林鄭,我會大力快手狂推居屋樓花,既然批多9塊地起正苦樓,就拿拿聲劃圖當起樓,莊都未打就推晒d居屋樓花出黎賣先,一年推返一萬個居屋樓花,吸收購買力,要記著,對用家黎講,買得到既供應先至係供應,林鄭出招,同正苦之前出既招一樣,一出招,業主買家鬥等,睇下邊個頂唔順先,出完招一兩個月,買家發現仍然缺盤,就會追價買,樓價又升,林鄭出六招,有冇提供更多“買得到既供應”?有,新增居屋明年後年大後年你慢慢抽啦,咁就死得啦,娥六招只有9塊地轉正苦樓大打擊地霸賺錢商機(少左9個靚項目做,賺少幾千億),但對增加買得到既供應冇幫助,甚至本來六月抽既居屋都要拖到十月,買得到既供應越遲出,樓價越升多幾個月,想樓價跌都係要等貿易戰股災爆發,又係等運到
2. 十一哥
2018-07-11 15:24
四圍都趕客唔比炒樓、股又風高浪急、摷勻全世界…大舊真金白銀…來去自如…剩番香港、政府又最怕整冧磚頭、兇至稅特登攞去垃圾局等班友嗌下交、冇定期冇了期、揾阿黃軟揮鞭扮揾地…又詐諦同老細唱反調、冇似玻佬咁橫斑斑、打藤就打藤冇洗猶疑。

正苦柔柔Q…做就香港磚頭硬掘掘。

3. 腥港人
2018-07-12 16:42
政府熟地起樓約5年起貨,啱啱係公居屋斷崖式下跌時間。果9塊地只係剛剛冚左23/24年個缺口,後面仲有無麵粉政府都唔知,依三幾年都只係力保居屋4-5千、公屋1萬-萬2。
4. 真真薯片
2018-07-12 18:45
3樓講既係事實,如果冇果9塊地,23/24年公屋供應可能跌穿一萬,依家頂一頂,只係拖多幾年
頁數:
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

聲 明

所有議題/文章由其作者提供,大部份回應/留言是即時上載,少部份未註冊為會員的回應/留言會經我們的系統過濾,所有議題/文章/回應/ 留言/資訊及評論並不代表地產資訊網(Property.hk)立場和觀點。由於本【地產論壇】受到「即時上載留言」運作方式所規限,故不能完全監察 所有留言,若讀者及用戶發現有留言出現問題,歡迎以留言或電郵方式與我們聯絡(admin@property.hk),我們有權刪除/堵截任何留言 (刪除/堵截留言前不會作事先警告及通知), 如有任何爭議,本網站管理員擁有最終的詮釋權 。