地產博客 > 文亮言 返回
瀏覽人次:28880    回應:25
文亮言

從量力而為到風大浪大

 

湯文亮博士

紀惠集團行政總裁
2019年3月26日

  如果誠哥還未退休,應該仍然由他主持長和系的週年股東大會,估計仍然會叫買樓的人小心,最緊要是量力而為,今次由小超主持,我以為他一定會講樓市欣欣向榮,大把水位,有買就要趁手,結果我大跌眼鏡,小超提醒打算買樓的人要小心,外面風大浪大,老實說,小超的說話比誠哥更實在,甚至可以說倒自己米,不過,小超繼續說,集團仍然以發展地產為主,友人對小超的言論感覺到很迷茫,其實,友人不了解地產商心態,小超提醒打算買樓的人,因為他們都是潛在買家,他們能夠生存,地產商才可以生存,如果好似有一些物業代理將買家推上絕路,他日受到傷害的又會是地產商,很多人不明白這個道理,他們應該向捕漁業了解一下,放生一些細魚,其實是捕漁業的永續性方法,所以,我對那些賣細魚的漁民,他們是破壞行業的永續性,卻白有沾沾自喜,其實,他們正在打爛自己飯碗。

  現在市場上的售樓方法,就是推那些未夠資格的人上車,除了為了自己荷包收入的物業代理之外,還有部分地產商,他們以超高成數付款辦法吸引買家上車,例如一個兩年後入伙新樓盤,買家在期間只需付10%,便可以等到新樓入伙後才付清尾數,就算當時沒有銀行承造按揭,買家只需多付5%便可以入伙,而事實上那些買家根本是魚毛,絕對捱不起風浪,兩年後入伙,如果利息上升2%,他們每月供款便會多一倍,勉強捱下去,最終物業有機會變成銀主盤,由地產商收回,地產商絕對沒有損失,除了殺了15%首期之外,單位亦由新樓變成二手樓,不受新樓空置稅限制,地產商想囤幾耐都可以,但唔忘記,那個業主就變得一毛所有,唔知道等到何年何月何日才有機會買樓,大家記唔記得小超提醒大家外面風大浪大,即是叫大家唔好咁博,否則最後的受害人就是地產商,因為不見了很多潛在買家。

 
 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

會員登入
登入ID 或 網名
密碼
1. 真真薯片 2019-03-26 09:52:57
今日博士講放生魚毛論

好耐之前在下岩岩出黎做野,老闆有日帶大家去食飯,坐上老闆發表“一雞死,一雞鳴”既做生意理論:不論員工定顧客,都應該揸乾揸淨,員工你唔做大把人做,萬零蚊請人做,20歲做到30幾,炒左,又請過個20零歲頂上,顧客方面輪得劏要劏到最盡,根本唔洗理佢會唔會回頭,總之所有野呢刻有得食一定要食到盡,你唔食人地都會食,之後既事之後再算

我雖然已經冇再跟佢,但據聞果短老闆今日做到風生水起,證明佢既理論某程度上係正確
2. 食到盡 2019-03-26 10:07:01
我有朋友做小生意,也是食到盡。專請平價新人,不滿意人工的歡迎自動離職。用最平的成本。十多年後的今天,他生意越做越差。
3. To 1 2019-03-26 10:10:01
馬雲請伙記兩個禮拜唔對路就請佢走, Lucy 請伙記每季出獎金唔得嘅唔該自己走, 睇吓六叔六嬸走之前同走之後...
4. 20歲做到30幾 2019-03-26 10:12:33
不過如果廿幾到卅幾都係皮幾野, 一早應該轉行或者去提升自己...
5. 占士 2019-03-26 10:29:24
6. 香港土著 2019-03-26 10:41:15
薯片兄,

你所講故事,係典型中國生意人心態。破壞"環境",最後未必係自己第一個受害。但哩個唔係破壞環境理由,亦唔係高手風範。發左未不佳就代表理論正確,哩個係歪理。
7. 典型中國生意人心態 2019-03-26 10:45:21
但若不頂爛市, 美帝沒有唉風用, 血汗民工也不能坐上發展的快車
8. 真真薯片 2019-03-26 11:36:55
我只係舉我認識中既其中一例,我亦認識有類似想法既人係外資大企業用一雞死一雞嗚既做事手法扶搖直上,依家做到高層,佢當年為左上位甚至走去報官拉自己老細,再講可能有人知我無邊度做高了………

我唔係話一雞死一雞嗚係絕對正確,不過我認為睇野應該退後多幾步,質疑下自己既既有慨念,一般人認為做事唔好太盡,體恤前線,思考貼地,咁既皇道做法自然好心有好報,生意必定成功,但係抬頭望下班藍血人有幾多個係貼地?由低層上位既又用過咩手段?皇道唔係唔得,你坐穩機之後行咩道都得,未坐穩機撕殺緊既時候,照計未行皇道已經死左n次
9. 湯瑪斯 2019-03-26 12:36:27

誠哥講過「唔會賺最後一個銅板」,算係好有良心既商人。重有,誠哥係信佛既。佢都唔想有人防守力唔夠郤以高成數按揭上車。萬一樓市下調隨時變負資產。負資產既心理壓力極大,如果因而自尋短見。於心何忍!

我佛慈悲!誠哥一定咁樣教仔。我唔止一次講:唔買樓既風險只係捱貴租(其實住郊區租金平好多,香港集體交通運輸又唔錯,政府而家又有資助),唔使死人。買樓既風險可以大到死人架!

10. 行咩道都得 2019-03-26 12:41:53
有人當伙記係債仔, 有人當伙記係債主, 如果你係澳牛老闆, 會不會有另一番領會?
11. 引刀一快 2019-03-26 15:51:49
真真薯片兄

乜嘢理念就要配乜嘢人用,搭啱就OK,要分析亦好簡單。
孤寒度縮老細,本來孤寒就係佢本能,唔使諗唔使考慮,出手自然孤寒,孤寒得好有效率,送一億俾佢叫佢做闊佬嘢,反而三千萬收效都未必有,反之亦然,要一個厚道嘅老細做縮骨嘢蠱惑嘢,做埋做埋唔夠衰一鋪,因為佢系統唔兼容,執行效率低兼唔穩定,隨時死機重啟。
方法對,性格對,最後就係睇運氣。

12. 真真薯片 2019-03-26 18:20:39
刀兄講得好,呢個世界只有夾唔夾,冇好唔好
13. 球迷 2019-03-26 18:21:32
見到有D留言真係笑左..
長實講慈悲..根本痴9線..特別近10年..
係入面做過..無論物業/ 物管部都知..

唔好淨係睇人開價平定貴..去斷定誰有冇賺到盡..
14. 富不過三代 2019-03-26 18:40:30
從種種跡象睇,李超人家族頂籠富多一代,現今社會以快打慢,還用舊經濟迎戰新思維新時代,資產只會越來越縮,邊個縮就邊個輸,最後一代比一代差,李氏王朝只會有人識李嘉誠的。
15. 真真薯片 2019-03-26 19:22:25
如果睇開價,除左信和近排既凱匯,華懋近年三個大盤,其他基本上都係賺盡,長實係平少少,不過真係少少,睇海G戀個價就知

香港地霸/正苦同你講良心,你驚唔驚?
16. 林太 2019-03-26 19:49:47
有一位地產代理叫我買樓,而家我安居樂業。
17. 大陽春 2019-03-26 20:04:03
大家都是成年人,應明白在投資的世界里沒有零風險。成年人應該對自己的投資行為負則。

有好多叻仔2008年都不上車,更叻的一批甚至落車,是否自己攞來衰?明明是在自制貧窮,却日日怪政府,怨地霸,恨炒家,夜夜在咀咒樓市,何苦呢?
18. 引刀一快 2019-03-27 02:07:42
真真薯片兄

大佬,咪咁誤解我喇,孤寒度縮蠱惑都有個底線,過咗底線就唔係夾唔夾嘅問題,一定唔好。
19. 引刀一快 2019-03-27 02:26:05
To 17樓 大陽春

你犯咗一個此論壇中人日日有嘅通病,點解提親賣樓都係舉2008做例?完全係事後孔明啫,如果1997賣樓又如何?再者,人家實實在在賺咗錢,你又憑咩假定人家賣樓所得冇作為冇得益?假如人地係有急事賣樓?或者對利潤已經好滿意要止賺呢?又係俾市場“懲罰”?使用“懲罰”一詞,你要搞清楚人家有冇犯錯先!
20. 大陽春 2019-03-27 06:05:23
回引刀一快。

你犯了此論壇好多淡友的一大好重大失誤。提起樓市就只提1997。點解唔講2008,2012,1967,1973,1984,2001, 2003?香港地絕大多數時間買樓都可以致富,而事實上香港人發逹多數靠投資物業,你為什麼要否認此一事實?

香港私樓7成已經供完,屬於現契樓。靠發展商二案上車的只屬少數。

在2008,2003,1967,1989,1984这些危机四伏的年代,一樣大把專学者官员勸人不要買樓。當其時的樓價也被認為不可負担。

美孚一期現價比開盘時升了200倍。香港地長期做租租眞的就是無風險?

21. 大陽春 2019-03-27 06:11:52
香港樓市過去近百年大多數的時侯都面對風大浪大,狂風暴雨的日子。

風平浪靜似乎同香港無缘。
22. 十一哥 2019-03-27 11:54:44
輸家…論述/論據永遠經天緯地、自己錢袋已跌…梗要扮嘢…憂人錢袋跌…。



24. 引刀一快 2019-03-27 17:29:28
To 20樓 大陽春

我冇犯錯,我只係舉出你嘅犯錯,因為你只係舉一個2008年落車事件,甚至連例都舉錯,人家落車賺到錢,點解一定要買返?唔俾人賺到錢做生意、移民?
美孚一期果時D普洱同陳皮,依家價錢升幾十萬倍喇,你有冇投資呢?
俾錢供美孚一期果班人,好多都作古喇,升幾多已經唔關佢地事。
講來講去其實好簡單,低位入貨就大賺,高位接貨就拖住人生嘅步伐,以香港繼續維持呢種低工資高樓價,就必然係導致香港價值下跌,香港價值下跌係不可逆嘅,到時仲想樓價好似幾十年前咁升?除非全世界陸沉,剩番香港喇。
想維持過去幾十年優越性,唯一生路就係飛地。
25. Bos fan 2019-03-27 18:11:27
我好後悔早五年冇用四叔嗰啲高成數按揭入市,嗰陣時賣緊千五,依家2800。
26. 引刀一快 2019-03-28 06:28:33
唔明,據某權威地產組織聲稱,入貨唔使睇價,以前點升將來就點升,駛乜後悔?