地產博客 > 資深會員專欄 返回
瀏覽人次:65638    回應:125
資深會員專欄

專業機構投資者(六)歸邊

 

珍惜香港

法團專業投資者
SMIEEE.MSc(ICDE)
http://facebook.com/hongkongtruevalue/
2016年12月5日
上回適逢加辣,中斷咗我呢篇正文,之後越延越長,再唔出就恐怕會寫爆字數嘅上限啦!其實呢次嘅靈感,喺嚟自今年五月初,一位非註冊回應者嘅留言。佢引發咗我一系列聯想,包括一啲往事,從而惹起我嘅衝動,想為幾位朋友,寫番篇文章。幾位嘅身份,或可以從內容估到,或隱藏响文字背後,又或者連當事人都未必睇得出。總之,見唔見得到,睇唔睇得明嘅,都喺隨緣啦!

電腦市場嘅歸邊

其中一位,喺香港好著名嘅工業家,我同呢位富豪級嘅老朋友,有過一段淵源,而我對佢嘅尊敬,亦非筆墨可以形容。或者換句話講,佢嘅層次,喺我認識嘅富豪之中最高。今日,好多人對佢所知,都只限於啲細路仔電子玩具,同室內無線電話。但原來,佢喺以電視遊戲機發跡,而佢嘅個人電腦,更紅極一時。記得我曾經分享過自己一段,自學寫程式,借同學部電腦返屋企嘅往事。果部電腦,就喺出自呢位工業家嘅企業。

如果只喺搞 IBM 兼容嘅話,當然冇乜特別,不過,開發蘋果兼容電腦,仲要贏埋蘋果對佢嘅知識產權訴訟,令全球嘩然,就真喺佢先至做得到啦!皆因佢從來都喺以逆向工程(REVERSE ENGINEERING)做兼容,唔會直抄。加上晨早就已經從微軟註冊咗蘋果冇獨家註冊過嘅 BASIC 語言,令人地冇辦法唔正式通過產品同佢競爭。當時佢响電腦界嘅地位,受到全球認可,而開發電腦系統芯片组(CHIPSET),亦比台灣更早。我仲依稀記得,當年聯想集團啲工程師,被派到佢公司取經果陣,都仲喺十下十下咁,但唔使多講,今時嘅聯想,已經唔同往日啦!

可惜,佢嘅電腦大業,就輸咗响一個錯誤嘅決定度,最終要全面退出市場。果陣,基於 IBM 嘅公開平台,出現咗 DIY 砌機市場,令主機板大行其道。台灣電腦業掘起,而佢集團响電腦方面嘅投資,就開始虧損。換咗幾次管理層都冇起色,結果決定放棄品牌,隨波逐流去搞主機板。其實所謂主機板,都只喺一件零件,以品牌包裝一件零件,根本就喺本末倒置,唔會持久。當市場歸邊,呢啲偽品牌之物,自然會被淘汰。果然跟手嘅,就喺價格戰,佢惟有壯士斷臂,退出市場,最後連台灣整個電腦業,亦難免衰落。而聯想集團,就以堅持守住品牌,發展品牌,終於成為一哥。

手機市場嘅歸邊

任何市場嘅發展,都喺趨向歸邊,而歸邊,喺可以响一夜之間發生。曾幾何時,NOKIA 嘅手機,雄霸天下,價錢高至過萬,低至幾舊水,包羅萬有。而我亦鍾情過佢嘅高檔系列,就好似 8910,同我最後果部 SAPPHIRE ARTE,設計都好精緻;今日我嘅手機,仲喺用緊 ARTE 嘅鈴聲。有邊個會諗到,一個智能手機嘅大浪之後,呢隻巨頭,會淪為阿婆手機嘅首選?

玩 TOP TO BOTTOM,可以好險,做人,真喺唔好太貪心,皆因資源有限,瞻得前時就顧唔得後。跟手呢,就梗喺搞埋哂啲資源共用之類嘅慳水嘢,令到高檔產品,失去咗創意,同對市場嘅應變能力。當年,台灣主機板一哥華碩,守住高檔市場,但又身痕出番隻低檔華擎噃。到最後呢,華碩華擎,就變成同一物,價格戰之下,齊齊走低囉!

响今日嘅手機市場裡面,蘋果堅守住佢個山頭,完全唔會多心。至於三星,就好似當年嘅 NOKIA 咁,甚至可以話,有過之而無不及,啲型號多到唔知邊隻打邊隻。所以响追趕新產品面世嘅情急之下,NOTE 7 電池爆大鑊呢家嘢,真喺唔可以話喺意外嚟。如果三星再唔肯痛定思痛,搞清楚自己嘅定位,集中番資源响最強果部份度,而只喺識得去怪罪為自己賣力果班勇將嘅話,咁當市場再歸邊嘅時候,恐怕未必可以過到骨啦!

歸邊.靠邊.再歸邊

好多人以為,歸邊,就即喺市場,盡入強者之手,弱者遭到淘汰。其實咁嘅講法,不外乎喺物競天擇,適者生存呢個自然定律嘅翻版啫,所以,都只喺啱咗一半。

歸邊嘅真正意思,喺市場嘅分家,即喺話,市場會就唔同嘅種類、檔次分割,而唔喺單以強弱分割。市場參與者,根據佢地嘅角色,被歸入唔同嘅區內,而各區之間嘅界線,亦漸趨清晰。要跨越界線,由一區跳入另一區,會越嚟越困難,或者因為冇足夠嘅誘因、冇足夠嘅實力、經驗,又或者喺機會成本太大之類。冇清晰嘅角色,或者角色錯配嘅,就會被淘汰。所以,強者一樣可以被拉落馬,弱者亦未必搵唔到生存空間嘅。

既然,任何市場發展,都喺趨向歸邊,咁我地應該點做?都喺果句,答案,每個人都唔一樣,甚至會喺相反。或者可以概括啲講,就喺:及早「靠邊」!

咁即喺點?正如我第二篇話,要搵到自己响市場裡面嘅角色,了解自己嘅角色,集中資源,做好自己嘅角色,呢個就喺所謂嘅「靠邊」。不過就算俾你靠咗邊,都唔等於可以安寢無憂嘅。以檔次分割嘅市場區間,喺縱向,而高區下游至低區嘅界限阻力,主要嚟自機會成本,即喺所謂,大雞唔食細米。但如果高區嘅參與者,因追唔上市場升階嘅要求,被新參與者乘勢取代,咁為免遭到淘汰,最直接嘅做法,就喺殺落去下游區間度。

呢個現象,大規模發生嘅話,就會令市場重新整合,區間亦會被重新劃分,即喺所謂嘅「再歸邊」。智能手機掘起,NOKIA 衰落,其實都喺再歸邊嘅一個例子。歸邊也好,再歸邊也好,亦可以响一夜之間發生。不過,任何市場突變之前,都總會蘊釀一段時間,其間不時發出訊息。所以我地要持續觀察市場,評估自己响區間之內嘅角色,有冇變得模糊,以及自己嘅優越性,會否開始下降。尤其喺响營運之間,特別就重大決策所面對嘅阻力,會唔會喺暗示緊,自己嘅基礎模式,已經過時?

講番果位老朋友,今日穩坐兩大山頭,其中一座,就喺已經冇乜增長,長遠只會逐漸萎縮嘅室內無線電話。佢做得成功,皆因响適當嘅時候,人棄我取,及早靠邊。不過電子市場,喺千變萬化,競爭亦非常激烈。當日冇人有興趣打嘅山頭,到上游參與者,受到被淘汰嘅壓力果陣,會唔會一個接一個,先喺 MOTOROLA,跟手 PANASONIC,甚至輪到三星,排住隊殺落嚟?响一個長遠只會萎縮,而品牌效應薄弱嘅市場區間裡面,自己嘅角色,又有幾穩固?

平嘢唔一定好

記得最後果次見面,佢同我講咗一句說話:「半導體,都只喺幾蚊貨色!」坦白講,我真喺有啲失望。難道,貢獻業界多年,就只得呢個結論?難道,所有產品,最終都只有剩低,原材料嘅價值?做電子產品,低價切入市場,甚至以本傷人,都喺常用嘅手段,不過呢一招,唔喺度度都可以攞嚟用。所以有次我話佢,遇人不淑,都只喺啱咗一半;搞廉航失敗,或者一開始就已經喺錯,唔可以完全賴哂個 CEO 嘅。

成本、價錢,固然重要,但成功,就唔可以單靠呢啲。就睇香港嘅私樓,講樓質,SHK 喺首選,唔知大家同唔同意?對自己有要求、有心去做好一件事,就自然會反映响個 OUTCOME 度。但如果只喺睇住個成本,揸盡下游嘅供應商同外判,結果搞到啲乜嘢出嚟,就真喺唔使多講。正如响香港,做到首富嘅,當然有佢成功之道,投資眼光準,低入高沽嘅賣橙故事,大家都知。不過,平嘢唔一定好,貴嘢又未必買唔過嘅。

近年眼見中國、香港啲嘢,越嚟越貴,再增持嘅話,就真喺會違反哂,首富低入高沽嘅原則啦!唔沽哂佢,已經好俾面,家陣歐洲低水,梗喺入番啲歐嘢。集團重組,變現買 O2,但最後俾歐盟否決咗;Victor 話,塞翁失馬,之後英國脫歐,唔知算唔算執番身彩?脫歐前夕,首富接受彭博專訪,都不忘呼籲英國留歐。其實,歐洲、英國市場嘅宏觀值,又點會因為一個「答案」而變天?分別,都只喺買貴咗,定喺買平咗啫!

但正如我响序文裡面話,歐嘢幾平,都唔代表可以買得過嘅。今日意大利公投,六成人反對修憲,總理將要辭職,唔知呢隻又算唔算喺黑天鵝?歐洲已經喺一個,燒錢嘅地方,了解呢件基礎因素嘅話,個公投結果喺點,根本就唔重要,亦唔應該影響到一個投資者嘅決策。早前,有人就一帶一路嘅概念,走去掃埋哂啲柬越嘢,有朋友一次過入十幾間,首期都只喺三百幾萬。值唔值得投資,我唔評論;或者可以咁話,以首富嘅 SCALE 去掃歐嘢,輸極,都只喺整體賺多賺少嘅問題,但作為小投資者呢,就唔好亂咁瞓身啦!

貴嘢未必買唔過

响香港,好多嘢都俾人話貴;地貴、樓貴、鐵路又貴,但我又唔覺得有乜咁大不了。就好似港鐵,直頭喺全球最優質嘅鐵路系統,我覺得已經收得好平,加價,我唔會有意見。有時真喺懷疑,幾分鐘一班車,班班爆滿,LOOK 足成日,條路軌會唔會變形?每日得果幾個鐘頭檢查加維修,唔爆鑊,簡直就喺奇蹟。其實,我地投資香港多年,就好似同一個戰友拍檔咁,共得患難嘅,點解唔可以共富貴?

記得我唔止一次提過,香港啲媒體,成日斷章取義首富嘅言論。就好似將佢講嘅,依家香港經濟,廿年嚟最差,仲衰過沙士,對樓市步步為營,三句抄埋一碟,又唔去睇清楚,人地講嘅每一句,喺回答緊記者嘅邊條問題。佢話對樓市步步為營,喺回答緊記者,關於赤柱豪宅地,俾中小型地產商投咗,同政府會否減辣呢兩條問題;至於香港經濟,廿年嚟最差,其實喺回應旺角暴亂,香港政治矛盾嘅議題,訓示唔好再搞衰香港;而衰過沙士呢,只喺講緊佢自己嘅地產同零售表現啫!

沙士果陣,你收五千蚊都冇人請,今日有最低工資,都請唔到人。同沙士比,依家嘅香港,簡直就喺天堂。所以點解我多次強調,香港嘅經濟,喺冇問題,仲奉勸大家,千祈唔好錯判形勢。而响彭博嘅專訪中,首富自己亦澄清咗,關於佢話廿年嚟最差,其實唔喺指 GDP 之類嘅經濟嘢,而喺講緊香港一般人經營嘅機會。我真喺想問佢一句:所謂一般人,包唔包括你自己?難道,你嘅王國,已經到咗頂?

低入高沽嘅層次

有次講開投資呢個議題,我話,低入高沽,响投資嘅範圍裡面,只喺好低層次。咦?咪住!呢一刻挖番出嚟講,唔通喺影射首富低層次?嘩!點敢?我諗冇乜邊個夠膽死,公然話首富低層次。不過層次呢味嘢,其實又喺相對嘅,即喺話,無論層次幾高,响更高嘅層次之下,都喺低層次。而我嘅層次,當然比首富低好多、好多、好多。

我只喺覺得,首富字裡行間,恍惚流露出一種,時不與我嘅慨嘆。啲中港嘢,只升不跌,加上個 CY 政府,不時同大地產商對著幹,又唔均真兼冇口齒,當年拔刀助你一把,換嚟可拆售嘅回報,點知到行使果陣就反哂口。不過話雖如此,香港嘅發展,仍然喺向前,而作為成功嘅生意人兼投資者,果啲所謂阻力,唔通真喺咁難克服?究竟喺時不與我,定喺冇與時並進?歸邊嘅力量,可以好驚人,有啲嘢,拱手讓咗出去,就唔會咁容易收得番嚟。尤其喺自己嘅地方,失去咗優勢嘅話,仲可以紮根响邊一度?

話說長實四年冇投過官地,但一起手,就以高市價三成,奪九肚山豪宅地,或者首富真喺諗通咗一啲嘢。香港嘅地產市場,本身就喺嚴重歸邊,要進,已經唔容易,退咗,亦好難進得番。唔好指望,仲可以再等,等一劑大幅度嘅週期性回落,又或者,等一隻都唔知會唔會出現嘅黑天鵝降臨。

推動歸邊嘅力量

我講市場區間果陣,話以檔次分割嘅,喺縱向,呢樣就好比唔同嘅層次。响市場歸邊嘅過程之中,除咗跨越界線跳上一層,即喺所謂嘅「上位」,會越嚟越困難之外,就算要保留响同一個層次,亦唔容易。恍惚自己嘅優勢同角色,越嚟越薄弱,正如以前嘅大學生,一畢業出嚟就好威,但今時今日,大學生,已經不外如是。我地唔應該怪罪個社會,唔俾機會年青人,唔俾香港「一般人」經營嘅機會,因為市場歸邊,喺無可避免。咁大家又知唔知,點解市場,一定要趨向歸邊?究竟喺乜嘢,推動緊呢個宏觀現象?

市場對質素同優化嘅渴求,就喺推動歸邊嘅背後力量。

就睇以前,香港嘅巴士,由熱巴轉哂做冷巴之後,車費唔通仲會平咗?港鐵,可以收你幾平?香港作為國際化商業城市,投入社會發展,以及保障市民基礎生活嘅資源,只會越嚟越多。連鎖效應之下,就算冇 QE,香港嘢,都一樣會越嚟越貴,經營、上位,都一樣會越嚟越困難。好多人,買唔起樓,就賴美國 QE,以為郁咗個聯匯,啲嘢就會平哂,呢種想法,何其幼稚!全球千份之一人口,集中哂响地圖上果一點度,資源短缺,有限嘅可用土地,供應不足,根本就喺必然,更何況對居住嘅質素、環境嘅質素,以及配套支援等需求,只會越嚟越高。

我經常提及嘅,環球經濟新常態,其中一個形成嘅主因,就喺各大經濟體嘅發展,趨向成熟,以致社會對生活水平嘅需求,以幾何級數增長,令到傳統嘅主流經濟理論,唔再有效。有人質疑話,既然喺咁簡單,日本就唔使一兩年就換一次首相啦!其實所謂新常態,只喺自然衍生嘅必然現象,我邊有話過喺「解決問題」嘅方法?生活水平提升咗,唔代表唔再有問題,因為人心,永遠都喺不足,就睇果班滿腦子黃色絲想嘅新一代,開口埋口講權利,咁義務呢?

不過話分兩頭,對質素嘅渴求,亦同時帶動市場優化。優化機制,除咗嚟自市場競爭之外,更會嚟自政策。各國政府,為咗要穩定社會,都會推出相應嘅政策,而呢啲政策,往往就成為市場歸邊嘅催化劑。又正因為政策喺人為,以致定出嚟嘅市場界線,特別清晰,而歸邊,亦會嚟得特別快。

金融市場嘅歸邊

就以金融市場為例,今年四月之前,散戶仍然可以只喺俾港幣四十幾萬,七成槓桿,就買到一張票面廿萬美金嘅債券。證監金管局分別發出咗通告同指引之後,香港嘅投資市場,正式分家,呢個就喺我响序文裡面講嘅,尾班車事件。依家,你唔喺專業投資者嘅話,莫講做槓桿,就算喺 FULL PAID 都唔再買得債券囉!

大家可能會覺得,呢次市場歸邊,只不過喺嚟自人為嘅政策啫。但香港嘅金融政策,又何嘗唔喺為咗穩定市場、優化市場而制定?散戶被拒諸門外之後,債券市場趨向穩定,而散戶嘅資金,就流哂去啲基金度,尤其喺高息債基,受到追捧,價格持續上升。記得响年半前,我提過有隻內房債基,急跌一成幾之後,有朋友問點算,我話冇有怕。如果當日佢肯 HOLD 住收息嘅話,到依家,已經賺息兼賺埋價啦!

市場持續優化、歸邊,同時間淘汰咗一系列走捷徑嘅機會。所以點解,我會响序文嘅最後,話樓市好友,一樣有誤區。佢地普遍認為,金管局嘅逆週期措施,阻住好多人上車,亦阻住好多人上位。我曾多次反問大家,喺唔喺要番去華探長年代?今日嘅香港樓市,之所以咁堅固,而實體經濟,之所以唔容易受到投機市場嘅直接衝擊,金管局,真喺功不可沒

物業及地代行業嘅歸邊

至於大家最關心嘅物業市場,歸邊嘅情況,尤其明顯。雖然我從來都喺反對 CY 嘅樓市辣招,但無疑响資源短缺同市場優化嘅壓力之下,就算唔喺辣招,都總會有其他對樓市收緊嘅政策推出,令上車難,上位更難。記得大約一年前,我响一篇回應度,提到樓市嘅主流持份者,都喺唔會點沽貨,冇佢地沽貨,喺推唔冧個市。跟住有人就話,呢班持份者,就算喺主流,揸住唔放,就即喺影響唔到個樓價啦,使乜計埋佢地入去個樓市度?無可否認,唔賣嘅,當然唔會造就出個成交價,不過問題喺,賣一件,少一件囉!

物業市場嘅歸邊,喺基於對持有優質資產嘅渴求,呢個就喺市場現實,而唔喺啲乜嘢,賺錢喺剛需中嘅剛需。睇淡嘅樓市磚家,往往掛在口邊,話購買力消耗殆盡,供應源源不絕。不過家陣似乎喺,供應消耗殆盡,購買力源源不絕噃!物業市場歸邊,亦引申至地代嘅歸邊,以致呢個行業,越嚟越難做。都喺果句,做好自己嘅角色,以優質嘅服務,成就交易,而唔喺用埋哂啲托價、鋤價之類,損害業界形象嘅手段。地代,喺冇責任,去成就樓市嘅升跌。

正如電腦行業,响市場歸邊之下,以品牌包裝一件零件嘅所謂主機板,自然會被淘汰。而响收窄咗嘅市場入面,再搞埋啲乜嘢,效能大比拼之類嘅新意思,亦唔會扭轉得到個大趨勢。今日,好多人將互聯網、手機 APPS 之類之類,視之為創新,視之為機遇,其實呢啲 CYBER 嘢,都只不過喺工具啫!就好似地代老大哥,中原地產,佢喺香港最大嘅地產代理,先至會有中原指數,而唔喺中原指數,令佢成為最大嘅地產代理,千祈唔好本末倒置。

客戶永遠喺人

記得十月底出席過一個 EVENT,同某銀行主席傾得好投契。佢話,今期嘅重點,喺大搞互聯網平台,而我就表示唔太認同。無論社會,點樣發展,點樣進步,客戶,永遠喺人,唔會喺機器。搞互聯網喺重要,但呢個唔喺企業,最增值嘅部份。就好似大學生咁,以前就好威,但最到終,都只會喺人有我有,不外如是。玩成本效益,只能夠達至薄利多銷,做唔到以人為本嘅話,喺唔會有希望响市場歸邊之下跑出,莫講話要真正、同長遠咁擴展啦!

搞互聯網,最大嘅誤區,就喺神化一件工具,正如當日我評 UBER,話佢唔喺真正嘅創新。一個平台,全世界通用,即喺人人都做得到,咁你個值响邊度?因為平?要成功,就應該照顧唔同地區,唔同嘅文化、制度,配合當地嘅需要同規範,而唔喺去走捷徑、穿漏洞。都喺果句,客戶,永遠喺人,唔會喺機器。

講到走捷徑、穿漏洞,令我諗起迷你倉事件。正如我早幾段提及過,任何市場突變之前,都總會蘊釀一段時間,其間不時發出訊息。而違規,根本就喺「現在」嘅問題。所以响營運之間,特別就重大決策所面對嘅阻力,話唔定就已經喺一個好強烈嘅訊息。另一個例子,就喺細價樓爆煲論出台之後,政府開始對財務公司,作多方面嘅規管,令到財仔行業,走向歸邊。有人怪罪於湯博士,但其實,財仔嘅風險問題,中介公司嘅問題,乜唔喺响爆煲論未出之前,就已經存在緊咩?呢啲根本就喺「現在」嘅問題。越早肯去面對現在,就越有條件响市場歸邊之下生存。

現在嘅基礎因素

好多人,唔甘心於「現在」,不惜押注於「預測」,因為佢地以為,只要心目中嘅「答案」跑出,就可以跟自己「預期」一樣,突破「現在」嘅規範。但原來,佢地最唔甘心果啲,先至喺最能夠引領佢地,成功靠邊嘅重要元素。所以點解「明燈.答案」一文,會成為呢篇正文嘅序,就喺要帶出「一個答案嘅執著」呢個普遍心態。摒棄唔到一個答案嘅執著,就唔會睇得穿「現在嘅基礎因素」,更枉論可以响市場歸邊嘅大環境之下跑出啦!

對任何一個投資者而言,自己,就喺最大嘅投資,而自己嘅個別情況,以及自己嘅週邊情況,當然就喺「現在嘅基礎因素」裡面,首要考慮嘅部份。有網友話,自住樓喺消費品,天下之大何愁無處容身喎!如果,連成就一個「家」,同紮於一個「」嘅觀念都冇,咁人生嘅值為何?自己嘅值又為何?有啲人,為押注一個對樓市嘅預期答案,連自住樓都沽埋去炒跌,結果浮沉於投機嘅波浪之中,不能自拔。記得我買第一個物業上車,就喺為咗一個「家」,而經歷金融風暴、沙士,仍然繼續增持,都喺因為對香港呢個「根」有信心。我之所以能夠就物業為基礎,成就三個十倍,絕對唔喺靠運氣就得。

近年有內地企業,响香港插緊旗,佢地以天價買入甲級物業。唔好笑人地接火棒,更加唔好「預期」人地會蝕錢沽番出嚟俾你,佢地喺睇得到連香港人自己都睇唔到嘅值。尋日湯博士,遇上一位國內知名人士之後,就話要重新評估香港嘅地產價值喎!我覺得好奇怪,作為香港人,點會唔「知道」自己嘅地方,喺一處匯聚人才同投資嘅福地?呢個一向都喺「現在嘅基礎因素」啦!使乜要個內地人,俾埋個「答案」出嚟先至睇得出?

時不與我.與時並進

任何市場嘅發展,都喺趨向歸邊。我地投資香港多年,就好似同一個戰友拍檔咁,共得患難嘅,點解唔可以共富貴?今日你拱手讓咗出去,他朝就唔好慨嘆時不與你。

時代,喺永遠向前,唔好期望一個倒退,可以俾到啲乜嘢著數你。香港人,似乎走在世界嘅前列。就喺呢一句,引發咗我寫呢篇文章嘅靈感

呢個世界,喺唔會有時不與我,只會有與時並進。
 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2016-12-05 11:04:00
沙發
2. 打工仔 Andy 2016-12-05 11:44:39
沙發 × 2 
3. Sugar 2016-12-05 11:55:24
沙發 × 3 ^^
4. 無奈 2016-12-05 11:58:37
咁都得?
沙發X4

看得出來,很用心大作,需要先消化一下。
5. 自我陶醉 2016-12-05 12:20:49
原來珍兄的家要由金錢物質堆砌出來的,小弟同珍兄剛剛相反,我嘅家係由人組成,只要家人相處融洽,生活愉快,就係一個好的家。

如果珍兄有時間,何不抽些少時間教教我們如何可以無須預測,一買物業就能判斷物業嘅值何時會用完,這些技巧比空談更實際,最好舉些實例,讓我等見識下什麼是高層次嘛。

有時真係好唔明盲好嘅思維,有網友覺得冇樓炒,香港經濟就要崩潰,我諗世界上無幾多個經濟體會咁窩囊,唔炒樓經濟就會死,都唔知係政府嘅錯定社會嘅錯,唔怪之得引刀兄話會有愈來愈多大陸人睇唔起香港人,我係香港人都睇唔起自己。 
6. 七十後小弟 2016-12-05 12:30:51
好忙碌的星期一上午,偶爾看到珍兄出文,小弟看了一小段,就暫時把手上工作放下,看完了整遍,又看多一遍,獲益良多。

小弟也是搞科技產品的,在市場上找到了一點點空隙,請了幾十個夥計,生產销售一些電子玩具,面對來自海外及國內的激烈的競爭,越來越難經營,小弟就像茫茫大海上一隻小船上的小小船夫,間中會失去方向,身心疲累。

看到珍兄的文章,很有共鳴,也找到了一些問題思考的方向,多謝珍兄無私奉獻。
7. 長期糧尾 2016-12-05 12:36:39
沙發X5
謝分享
8. 引刀一快 2016-12-05 12:38:31
自我陶醉兄

請你留意自己嘅言論,講說話要小心D!

今朝喺隔離篇博文收到料,原來炒家蝕水會打人架!好驚呀好驚呀…… 
9. 有質素的文章 2016-12-05 13:14:32
有質素的文章真感謝!不過往往被些蒼蠅在評,真感慨!
10. 自我陶醉 2016-12-05 13:16:58
引刀兄,

我估呢單嘢唔係咁簡單,我估呢位師奶係初次學人揸鑊鏟,地代唔知同佢吹過啲咩說佢入場,先會咁激。 都係嗰句喇,輸唔起做咩要去賭。

11. Eclipse*~ 2016-12-05 13:24:56
這是一篇很有深度嘅文章。多謝分享!

12. To樓上,結尾是重點 2016-12-05 14:10:53
個世界,喺唔會有時不與我,只會有與時並進。
14. 2011年開始 2016-12-05 16:06:06
多謝珍兄分享,同意保持不易,上位更難
15. 大少 2016-12-05 17:13:38

記得讀書時, 張五常教授說過, 最不學無術同無出息的事, 莫過於自己寫不出文章, 卻只懂批評別人文章的人. 真的不能同意更多.

一直記著教授教訓, 從不批評其他人的大塊文章. 可惜, 論壇中卻有三數老鼠橫行.

16. 占士 2016-12-05 17:30:39


珍港兄,謝謝好文分享! 我想我應該認識您的那位工業家朋友,他也可以說是同行師兄(我們是同一個專業的),也是我非常尊敬的前輩。 學習的榜樣!



17. 引刀一快 2016-12-05 17:59:55
X大少係懂得自我批判嘅米奇老鼠。

呢鋪咁得意自己批評自己嘅?
18. MSK 2016-12-05 18:35:43
多謝珍兄用心分享,猶如一股清流排走濁水!
19. 自我陶醉 2016-12-05 18:41:23
所以話呢度啲讀者IQ 高呢,原來幾千字嘅文,12樓用幾個字可以講完。

其實珍兄說得對,閣下同首富層次的確係有一段很大距離,分野就在於視野上,係香港人都知,首富係真正價值投資高手,睇嘅係全世界不同地區,不同類別嘅資產,而動作永遠都快市場一步,因為睇嘅往往係一般人睇唔到嘅未來價值,所以永遠都走在市場前面,當然和停留在與市場同步與時並進階段的人會有一定距離,在投資境界上也顯然是天淵之別。

20. 雨總會下完的 2016-12-05 18:47:39
好文
21. 向飯民說不 2016-12-05 19:58:36
電子科技是極具競爭的一個行業,同時沒有市場和政府支持是很快被淘汰。看到這裡很多廢佬的言論,也明白到香港曾經比台灣和南韓先進,為甚麼最後輸。
香港要重建科技產業,只有儘快和深圳合併。否則只有繼續做高級雞的服務性行業。
還有首富這幾年的投資方向是錯誤的。香港廢人只看到人民幣貶值,卻沒看到英國,euro貶的更嚴重。
22. CD ROM 2016-12-05 20:02:43
珍兄令我想起,可持續性,這一個漸見重要的課題。企業甚至要成立獨立部門針對此事。

我自已認為,市場出現歸邊,大多出現在熟透既市場而已。
23. 引刀一快 2016-12-05 21:31:29
一個倒退,會俾到唔著數你,就係咁簡單。
24. 歷史長河 2016-12-05 22:10:41
凝神靜氣出精品。

珍港兄肯定是個孤獨者,因為不停地思考意味著孤獨,這個苦差事在當今浮躁喧囂的社會沒有太多人願意干的。

你堅持地思考著也必定要堅決地孤獨著。哈哈


談到超人,湊下熱鬧。在下以為超人這幾年的部署不能簡單以投資角度來睇,更似處理未來之事。超人對小超們的能力心中有數,對未來只求一個穩字,所以戰略上要盡可能攤開來,務求達到可以相互協調,相互支援,東方不亮西方亮。退出中國非不看好,不能也!小小超們不願意或玩不轉大陸,實是無奈之舉。

對於金官局的措施,私下已探討過。我的觀點沒有改變 - 風險管理應該留給銀行和個人。如果覺得金融系統有潛在風險,大不了可以通過提高資本准備金之類的來規管,而不是干涉別人做生意,每家銀行,每個投資者的情況都不一樣,一刀切不是很好。另外金管局的壓力測試全世界最嚴厲,如果不是為了配合政府壓樓價,就是誤判形勢,低估了低息的長期性,高估了樓市的波動性,從投資者角度看是進取不足,保守有余。外匯基金的投資回報乏善可陳,可窺一斑。


其他都同意,尤其是關於二個蛋大的低買高賣及剛需論。哈哈

25. 向飯民說不 2016-12-05 22:35:29
90年之前,香港的电子工业是好过台湾和韩国。90年后,没有政府的支持加上因为大陆的低成本劳工,结果令港商不思进取,只是懂得去做低成本的OEM产品。到了今时今日,港商只有被淘汰的命运。

今日要重建工业,只有和深圳合并。利用大陆的市场,资金,加上政府的支持,先有可能在激烈的竞争下生存。

26. 肥婆四 2016-12-05 22:47:54
夜咗,坐地板添!謝謝好文。
27. AH-HO 2016-12-06 00:01:49
地板X2。謝謝珍港兄好文章。努力消化中。。。
28. 向飯民說不 2016-12-06 00:58:39
香港人吾識乜叫轉型,工業上只懂降低成本。電腦主板生產商MSI前幾年仲非常之差,但是這幾年轉型做電競電腦,profit margin。又走出了困境。

樓主講的香港早期主板商,完全沒有轉型的決心,最後輸是正常。

香港好在是大陸的窗口,所以可以依靠金融業令到這裡的人買股票,買樓發達。如果沒有這個窗口的功能香港人肯定不是台灣的對手。
29. 引刀一快 2016-12-06 02:39:41
點解唔見X二少嘅?呢篇等你寫分享呀,喂。
30. Taiwaner 2016-12-06 09:22:40
下一個明星產業, 應該是與機器人有關。
31. 二少 2016-12-06 16:16:31
珍兄好文, 睇回應便知同d引咩刀咩d傻B茶餐廳不在一個層次.
32. 二少 2016-12-06 16:30:02
嘩!我個名都有人冒,真俾面,多謝!睇來想唔註册都唔得.
33. 二少 2016-12-06 16:32:55
對於無恥師徒的留言,我係唔會回應嘅!
34. yyfan 2016-12-06 17:31:43
多謝珍兄好文,電子廠買少見少,就算擴充到幾大,一個浪打來就打柴,呢行越來越難做
35. Small Potato 2016-12-06 18:18:23
多謝珍惜兄無私分享,小薯又學到野喔😊
36. Sugar 2016-12-06 18:50:01
#34 Fan老闆所言甚是, 高見^^
37. 引刀一快 2016-12-06 19:09:32
X二少,快D,讀書會,體驗分享,你睇到乜呀?快D分享。
38. 八十後 2016-12-07 08:24:36
喜歡看珍港兄的文章, 總能給我提醒, 謝謝珍港兄! 
39. 金樓玉衣 2016-12-07 11:16:27
引刀, 好心你唔好咁小學, 你望下上面咁多論壇藍字人回覆多謝珍兄鴻文, 而你望下自己d文既回應就知分野. 唔好妒忌人寫得好, 自己再努力好過.
40. 引刀一快 2016-12-07 11:41:07
就係鴻文先要分享嘛,金縷玉衣,你都可以寫個讀書報告大家睇下咯,你咁大學雞,俾D高見嚟睇下至得架。

我寫果D嘢,簡單直接,暫時回覆57個,扣除我自己回覆答問,可能真係少D喎,呵呵呵。
加油,喺度寫多D感謝狀,好快就可以過百,我都會幫手嘅,你睇睇先,沙發都係我嘅。
41. 大少 2016-12-07 14:23:12
好得很, 引刀既然知道自己不如人, 以後就要虛心一點了.
42. 引刀一快 2016-12-07 15:33:31
X大少,讀書報告呀,咪拉咗去第度喇。

我咁努力喺度幫手起樓,何止引刀樓數不如,分分鐘破埋記錄添。
43. 大少 2016-12-07 15:40:59
引刀, 所以話要你長進d, 係要人寫讀書報告先明人寫d咩. 不同層次即是不同層次
44. 引刀傻Q左 2016-12-07 15:50:46

嘩, 有條友係香港讀唔成書, 想做小學教師想到傻左, 周街伸手問人拎讀書報告, 當做過下小學教師引, 可憐可憐.

引刀不用怕, 我隔離屋班小朋友很喜歡玩老師遊戲, 你很適合同佢地玩, 你可以問佢地拎讀書報告. 另外再教佢地大浪理論, 佢地會好buy你, 地產呢d野唔適合你的. 哈哈哈!

45. 引刀一快 2016-12-07 15:59:46
咁講,即係話你地都睇唔明?怪之叫個個寫讀書報告都支吾以對喇。
46. 金樓玉衣 2016-12-07 16:24:38
從前,有個引刀一快,每天都去地產論壇溜連。


幾年前的一天,他覺得十分無聊,就想了個捉弄大家尋開心的主意。 他向著論壇大聲喊:「大陸浪來了!浪來了! 救命啊! 」淡友們聽到喊聲急忙賣樓或停止投資物業,淡友們邊跑邊喊:「引刀話浪來了!浪來了!」


好友們氣喘吁吁 地問浪在哪裡? 引刀一快哈哈大笑:「大陸浪一定會來的! 」好友們走了。


第二年,引刀一快故伎重演,善良的論壇朋友們又沖來問,可還是沒有見到浪的影子。


引刀一快笑得直不起腰: 「 哈哈!大陸浪一定會來的! 哈哈!」


論壇大夥兒對引刀一快一而再再而三地說謊十分生氣,從此再也不相信他的話了。


過了幾年,浪真的來了,引刀一快害怕極了,拼命地向論壇喊:「浪來了!浪來了! 快救命呀!浪真的來了!」


論壇大夥兒聽到他的喊聲,發現原來浪只在大陸,沒有來香港, 結果在大陸的引刀比浪淹沒了, 在香港的論壇大夥兒繼續品酒論蛋大。





47. 自我陶醉 2016-12-07 16:42:26
引刀兄,

你冇玩過扭計骰咩? 愈玩唔到先愈過癮呀嘛!咁都唔明?
睇嚟小學雞之中都係金樓最乖,冇報告交起碼都交篇二次創作俾你,算係咁喇。哈哈哈!
48. 小小小業主 2016-12-07 16:43:20
金兄, 很生動的比喻, 比個讚
49. 引刀一快 2016-12-07 16:52:41
自我陶醉兄


咁又係呀,人家咁勤力,寫篇嘢字數唔少架。不過,睇怕都要有人捱義氣寫讀書報告,我都唔知佢篇二次創作寫乜。
50. 引刀一快 2016-12-07 17:01:50
金縷玉衣應該叫做大學雞,有字數,冇內容,冇功勞都有苦勞吖。


51. to 46樓 2016-12-07 17:06:18
金樓兄, 多謝總結了引力過去幾年的大浪論, 謝謝!
52. 歷史長河 2016-12-07 17:33:49
金樓兄,2017快到了,你的那篇文好快要加多二段啦。哈哈
53. 引刀一快 2016-12-07 17:49:15
咁就順手頒埋工展會小姐最佳勤工獎過你喇!
54. 珍惜香港 2016-12-09 21:41:54
珍惜香港TO:24/F 歷史長河

長河兄言重啦!

思考,固之然喺一個,自我嘅過程,但亦唔代表好孤獨嘅。

網站出文,全地球都睇到,而呢個世界,總會有人 BUY 你,亦總會有人唔妥你。就好似我話,如果連成就一個「家」,同紮於一個「根」嘅觀念都冇,咁人生嘅值為何?自己嘅值又為何?但竟然有人會將我寫嘅嘢,演繹成啲乜乜,金錢物質堆砌出嚟,真喺九唔搭八。不過諗真,如果對方嘅腦海裡面,除錢之外,就冇其他,咁你講乜嘢「值」,人地都只會諗到錢。因為「價值」呢個詞語嘅字面,喺「價」字行先嘛

所以同一篇文章,唔同嘅人,會睇到唔同嘅意思。出文,唔喺一個單向嘅動作,你公開分享自己嘅體會,亦同時就唔同讀者嘅反應,了解唔同人嘅諗法,大家各有得著。市場嘅組成,唔喺基於錢、唔喺基於數字、唔喺基於乜嘢波浪、方程式、或者乜嘢經濟學之類,而喺基於「人」

要睇穿市場嘅行為,就必須要睇得穿人嘅行為

我嘅思考、體會,都喺以人為基礎,即喺與世人連成一體。我,即喺世人,而世人,亦即喺我。既然與世人同在,咁又點算喺孤獨?

不過,長河兄提到孤獨,又令我回想起自己一個分享,原來已經整整有一個週年。

Natalie Cole:Someone That I Used To Love


真正嘅孤獨,莫過於一廂情願嘅真情。
55. 引刀一快 2016-12-09 22:16:34
睇穿人嘅行為,不外乎

住,係剛需

賺錢,係剛需中嘅剛需

唔想蝕錢,就係剛需剛需剛剛需

buy唔buy,都係咁喇。
56. 回樓上 2016-12-09 23:22:12
樓,係剛需
有錢買,係剛需中嘅剛需
冇錢買,就係樣衰樣衰樣樣衰

57. 歷史長河 2016-12-09 23:47:46
高人曾經一語道破珍港自醉二位大師一年多的討論,曰:價和值之爭也!

磚頭的「值」雖然也會隨著環境的變化而改變,但這種改變只是反映了這個地方的生產力、創造力、競爭力的改變。這種改變是一個漫長的過程,趨勢清晰可見,比如過去二十年的日本,北上深等(刀兄,對唔住,沒有廣)。歸根究底,磚頭的值來自於其居住功能。同一間面積結構用料等完全一樣的房子在西藏和在香港的値不同是因為住在裡面的人的生產力不同。長河曾提到過用大學畢業生平均收入的倍數來衡量樓的相對價值,就是基於這個觀點。如果現在大學畢業生平均收入是16,000,你剛好買入一間480萬的房子出租,房價是大學畢業生月收入的300倍。那麼你便可以預期30年後,你的房子仍然值大學畢業生月收入的300倍,只不過那時的收入很可能是16萬一個月。

明白了這一點,你就會放棄一年一轉角的短線思維,就不會再把加息、誰誰上台落台、意大利公投、美債息抽升、發展商怎樣部暑、怎樣推盤、番禺動物園那隻老虎的建康狀況等等太當一回事。因為這些因素是不會影響到30年後那位出初茅廬青年才俊靚仔引力的月收入。

反過來,如果眼裡只有「價」,你便很容易迷失在短期的各種變幻的因素裡。陶醉大師在美股一萬八時曾經講過美股同港樓一樣是隻老牛,我不清楚他的原因是因為美國企業不再有增值能力,香港失去競爭力而導致港樓失去價值?還是基於一個簡單原因:價格太貴?不管怎樣,美股港樓的走勢是不同意大師的講法的。

58. 引刀一快 2016-12-10 01:52:37
貓膩就喺呢度:

如果現在大學畢業生平均收入是16,000,你剛好買入一間480萬的房子出租,房價是大學畢業生月收入的300倍。那麼你便可以預期30年後,你的房子仍然值大學畢業生月收入的300倍,只不過那時的收入很可能是16萬一個月。

1,大學生在社會中身價非固定不變。300倍絕非固定不變,可以變成600倍,亦可變成150倍。

2,1988年至今28年,大學畢業生收入未升三倍,點解30年後要升十倍?(你寫呢一大堆嘢,迷暈處在此!)

3,香港在中國競爭力排名只會跌,冇得升,除非跌好多年之後喇。

4,“同一間面積結構用料等完全一樣的房子在西藏和在香港的値不同是因為住在裡面的人的生產力不同。

一派胡言,其一,建築人工、地價都唔同,其二,你以爲西藏人窮?邊個話西藏人一定窮過香港人㗎?西藏平均工資仲高過四川,果邊大把土豪,攞西藏做例係因爲你唔瞭解,想當然以爲西藏全部係野人。

5,“北上深等(刀兄,對唔住,沒有廣)”,唔駛對唔住,你去北上深好嘞,廣未必啱你。對于香港人嚟講,北上深係拼搏嘅好地方,廣就祇係去嘆嘅,冇前途㗎。

結論:講嚟講去又係果D咁嘢。(陪你寫咁多,都對得你住喇卦?)
59. 歷史長河 2016-12-10 08:44:37
刀兄果然是好友,好友思維,不過唸淺咗幾層。

我不知1988年大學畢業生的平均工資是多少,我只知道88年至今樓價升了十倍。不過你得對,樓價應該「跑蠃」大學生平均工資才對,因為樓價升幅是反映高收入一群的收入增幅,而如今大學生已不能再和精英等同。


樓價受制於地價,建筑費用等,啱。為何西藏的地價,建築人工低於香港?是否因為當地人的生產力不如居住在這塊土地上的人的生產力?

60. 引刀一快 2016-12-10 09:32:02
我就知你會嗡呢樣,你話“ 西藏和在香港的値不同是因為住在裡面的人的生產力不同 ”

西藏地大人少,起屋好多係外勞,以前好多西藏人一身飾品就夠你喺廣州買幾棟別墅,你去西藏打個白鴿轉先,不過小心高原反應。下次舉呢D例,考慮東北喇。

大學生收入都遠遠落後于樓價增幅嘅時候,邊個因素可以補上?依傢係大陸走資潮,往後呢?
樓價再十倍,大學生收入要幾多倍先補償到?低息係咪可以再三十年?

1980年到2004年,廿四年都係升兩倍半啫,1992年到2002年,又十年同價喎,點解又硬要中間落墨,搵個97嚟入市呢?
61. 自我陶醉 2016-12-10 09:45:44
河兄,

所以話你師傅一日到黑喺度亂吹呢,連一點點價值投資概念都冇就扮專家,唔睇現在咩市價,你又點知你件貨買得值唔值呀? 所謂價值投資係價同值相輔相成,互相比較,咩睇值唔睇價,全是BS。

講到九唔搭八,你師傅認第二,呢度冇人敢認第一。

1. 問佢沽走“即將”喪失值之物, 又算唔算預測未來呢? 佢就話咩好似知道鉛筆即將用完,層樓就快供完,唔洗預測。 九唔搭八, 我呸!佢咁有道理,不如你代佢解,或者搵個網友同佢解,睇下有冇人知佢噏乜! 哈哈!

2. 唔夠人講,就話自己乜XXXX投資者,人哋冇資格同佢拗,但係又話自己最後冇攞九號牌,但之後又打正旗號話自己XXXX投資者, 咁係咪即係無牌亂吹XXXX投資者?九唔搭八, 我呸!不如攞個牌出嚟睇下先再繼續吹!冇? 唔緊要,去買個喇,幾百萬啫,呢度好多師兄都有,呃得下人㗎。

3. 佢話靠聽消息買賣就係投機者,贏十次輸一次就玩完。專業XX投資者, 我呸!到底佢認識唔識分咩係投資咩係投機?

此等九唔搭八,多不勝數,恕我不能盡錄。

至於咩係老牛,咩係嫩牛,就睇你睇緊咩time horizon.  如果你係短炒,日日個價都升,你咪覺得個市係嫩牛囉,如果你睇中長線,咪老牛囉,不過老牛都有一個特點同人一樣,死之前會回光反照,講多你都唔會明,無謂嘥大家時間喇,不如講番你師傅啲鉛筆論喇,我估呢度冇一個人會明,相信連佢自己都唔明,呢啲咪高人囉! 哈哈哈!


62. 歷史長河 2016-12-10 10:08:52
三呸兄,

「至於咩係老牛,咩係嫩牛,就睇你睇緊咩time horizon.  如果你係短炒,日日個價都升」

咦,短炒王睇走眼變成長線投資者?咁不如講下點解入香港地產股,難道是長線睇好?


63. 歷史長河 2016-12-10 10:18:53
60 樓刀兄,一言弊之,長期樓價跑贏大學生起薪點。至於大學生起薪點長期走勢如何,如果你不打算走出去,長河認為不太重要。你買入一層樓,這層樓就好似一個新入職的新鮮人一樣,他一輩子幫你打工,養老金也歸你,至於他未來薪水如何?隨大市囉!
64. 引刀一快 2016-12-10 10:48:47
哇,哈哈哈哈,聽落好似唔駛畀錢。

到底,邊個幫邊個一輩子打工,係重點。

粗略算之,買入之後十年內,價格走向係關鍵。

大學生唔係輸俾樓價,係輸俾喺內地搵容易錢嘅大陸土豪,同埋就此衍生嘅香港富人,可惜雨露不均。

大學生咩時候可以嬴番?
65. 自我陶醉 2016-12-10 11:23:29
轉話題兄,

做咩同親你兩師徒講鉛筆論,你哋就講東講西啫? 到底係唔識講,定唔敢講? 講完一樣先一樣嘛,唔好諗住可以轉話題啊! 其實我都好想跟你師傅學下嘢㗎,可惜冇咩邊次知佢噏乜,要請師兄多多指教啊! 哈哈哈!
66. 歷史長河 2016-12-10 11:45:16
陶醉兄,裝睡的人是叫不醒的!
67. 自我陶醉 2016-12-10 11:51:14
河兄所言甚是,請兩位自便,繼續裝睡吧!

68. 歷史長河 2016-12-10 22:57:52
刀兄,
你話「粗略算之,買入之後十年內,價格走向係關鍵。」

可這關鍵點你能抓到嗎?118何時來到?真是等到花兒也謝了!
69. 珍惜香港 2016-12-11 00:39:00
70. 引刀一快 2016-12-11 01:55:46
珍港兄

我終於睇明!你意思係,唔想蝕錢,就係剛需剛需剛剛需。
71. 引刀一快 2016-12-11 02:00:45
長河san

捉唔捉,同捉唔捉到,完全兩回事。

憑咩話買間屋返嚟就一直獲利?唔睇價唔睇形勢?
72. 引力一快 2016-12-11 02:02:25
樓,係剛需
有錢買,係剛需中嘅剛需
冇錢買,就係樣衰樣衰樣樣衰
73. 引刀一快 2016-12-11 08:25:56
對你嚟講,匿名分身先係剛需,哈哈哈

如何可以有錢買?真係剛需中嘅剛需,冇錯呀。

唔睇價入市呢?就分分鐘樣衰樣衰樣樣衰。

好,剛需論修訂篇。
74. 自我陶醉 2016-12-11 08:34:30
珍惜香港,

1. 寫得長唔代表你有道理,事實你係亂噏無論,根本全網站嘅人冇一個人知你嘅鉛筆論講乜Q,你只係想自圓其說,冇道理就係冇道理,就算你寫篇論文出嚟,冇一個人明的話,都只係嘥自己時間,亦嘥人時間,咁嘅文千祈唔好寫俾我,我冇興趣睇。你有興趣,可以自己問你圍內嘅人,有邊個知你鉛筆論噏乜。

2. 上次討論投資投機嘅定義,我寫嘅內文如下,唔該你自己再睇清楚:
“其實我哋上次討論咩係投資同投機, 大家定義上冇咩衝突,因為我講嘅係專業投資者同專業投機者, 而你寫嘅係失敗嘅投資者同最低層嘅投機者, 大家講嘅完全唔同層次喎!”

我寫嘅都係針對大家寫嘅投資者,投機者定義分野有咩唔同,我邊句有話我自己專業?唔該你講清楚,閣下寫嘢請慎重啲,你亂嚟,只會有失你自己身份。你腦裏睇到嘅嘢只係你自己心中有鬼,關我何事?

3. 乜原來閣下真係覺得PI好叻㗎咩? 按定義手持100萬美元嘅投資者,都可以係PI, 可以自行投資一啲冇經詳細審核嘅投資項目,對有錢冇知識嘅人,難聽啲講PI 即係“水魚”, 你唔係真係以為叫做PI 就真係知識上好專業咁幼稚呀嘛? 唔好講我同你,呢度嘅師兄有幾多個身家冇100萬美元?  PI? 專業投資者? 我呸!

4. 阿專業投資者,你到底識唔識中文? 押注嘅意思係押上賭注,瞓咩身? 瞓身同押注係同一個意思咩? 請問喺邊度學番嚟?  所以話你講嘢永遠都以偏概全,語無倫次,請問你識得邊個專業投機者每次都會瞓身? 有邊個專業投機者係靠聽消息做買賣? 請問佢係咪都好似你一樣咁“專業”? 

仲有,我再重申,「價」同「值」係相輔相成。呢個世界好多專業知識一早已經有哂定義,唔係好似你咁不學無術,樣樣亂噏就當係真,唔想被人窒,最簡單嘅方法就係先認認真真學識一樣嘢先好出嚟扮專家,扮權威,否則只會繼續有失你身份。請閣下自重!

75. 歷史長河 2016-12-11 21:58:28
三呸兄,


珍兄的鉛筆論只是一個比喻而已,你若不明可能又要去見褝師了。

有些事我們知道,比如不管美國何人當選總統,其資本主義的自由市場經濟不會改變,他和中國的已敵已友關係也不會輕易改變。香港無論誰做特首,一國二制不會改變,她背靠祖國面向世界的獨特位置不會改變。


而誰會贏得美國總統,誰會成為下屆特首則有很大不確定性。如果投資決定是基於對選舉結果的預測,以及哪個板塊會受惠受損,基本上是投機行為。

投機未必一定輸,有時可能會贏大錢。這也許是你今年10月份時的戰果。但我認為靠投機是不可能走得太遠,也不可能做大。這裡有一個辯證關係:如果你鋪鋪壓上,則很容易一鋪蛋大,如果分攤開來鋪鋪小心,則最終是瞎忙。



76. 珍惜香港 2016-12-12 00:38:16
77. 香港土著 2016-12-12 00:44:48
75/f歷史先生,

似乎你習慣概括其他人所有非物業買賣都喺投機。
78. 引刀一快 2016-12-12 01:03:15
香港土著兄

高度概括!高度準確!

補充一點,必須只買不賣,否則長河san都將之歸類投機。

逢三退一?都係投機。


79. 香港土著 2016-12-12 01:03:52
76/f珍香先生,

下面理論實在喺高深。一d現在基礎因素,唔容易受市場變化影響,能夠長期維持…… 哩個唔喺預測咩?

<<<作為長線投資者,根本就唔可以依賴短期嘅預測,但越長期嘅預測,又越難好準確喎!所以我地睇嘅,喺
「現在嘅基礎因素」,即喺唔會隨便受市場變化影響嘅長期因素。就好似長河兄 57/F 提到「這種改變是一個漫長的過程,趨勢清晰可見」,以及 75/F 第二段果一系列因素,我地都喺「知道」,唔須要走去「預測」。>>>
80. 香港土著 2016-12-12 01:13:46
如果有人話有一系列因素,喺已經知道之事情,哩系列因素會造成一個長期可遇見結果,唔需要預測,似乎哩個喺講緊愛因斯坦相對論,而唔喺任何投資!
81. 引刀一快 2016-12-12 01:19:22
珍惜香港兄係定義大師,一切定義,變化萬千,隨心所轉,要跟得上,必須完全拋開心內原有定義,佢話乜就乜,咁你就一定學到嘢,雖然唔知係乜嘢。

期待緊長河班靚嘅讀書報告。
82. 自我陶醉 2016-12-12 09:51:31
珍惜香港,

有證有據你都可以繼續撐飯蓋,真係佩服到五體投地,閣下比CY 更勝一籌,往日寫咩可能你唔記得,唔緊要,等我提提你:

1. 你今日講:“我從來冇話過 PI 好叻”

但事實係你話:
89. 珍惜香港 2015-10-03 18:05:28
- “你同我講層次?講專業?我喺一個專業投資者,簡稱 PI,亦同時喺一個機構投資者。”

- “你對住一個機構投資 PI,班門弄斧吹投資?閣下落筆之前,有冇用過大腦,諗過應該點寫?”

69. 珍惜香港 2016-12-11 00:39
- “你响任何一個 PI 面前,班門弄虎...”


2. “自命專業嘅人,往往就衰咗响啲最基礎、最簡單嘅事物度。”  唔通係話你自己???  記憶中,成個論壇除咗你話自己專業之外,從來冇其他人咁講過,包括博士都冇,唔該自己睇睇你嘅大作打住咩牌頭。 嘿嘿!  

3. 你自己都識講,“賭注可以喺一蚊,亦可以喺成副身家”, 你就話人輸一次就玩完,咁我話你以偏概全,絕對精準,錯就係錯,我真係冇興趣繼續陪你撐飯蓋。


4. 你話:
- 投機者,最失敗嘅,就喺高價買入,低價先至嚟沽;
- 投機者係靠聽消息做買賣

我話:

專業投機者係懂得在買賣前衡量風險同回報,最失敗係連止蝕都唔識,而再差嘅投機者都仲有, 就係嗰啲明明想短炒,點知睇錯市變長揸,仲拿住件蝕本貨同人講自己係投資者咪更不堪,最失敗嘅投資者, 就係連自己買嘅嘢都唔知值唔值就買。

咁我話大家講緊嘅投資者、投機者定義,係講緊唔同層次嘅人,咁又有咩問題?

至於對價值投資嘅看法,我已經講過好多次,唔打算再重複,有興趣了解真理嘅網友,我建議佢哋搵啲真正權威專業嘅書繼續修行,以免走火入魔。

83. 自我陶醉 2016-12-12 10:01:33
81樓 引刀兄,

佢係大師兄,梗係盡得真傳喇,乜你唔覺得 “使唔使劃出腸”呢句, 似曾相識咩?  至於班靚嘛...  哈哈哈!
84. 珍惜香港 2016-12-13 02:17:07
珍惜香港

TO:79/F 香港土著

你可以參考一下長河兄 75/F 第二段話,有些事我們「知道」果啲,就喺所謂現在嘅基礎因素。而佢第三段講嘅,就喺須要「預測」嘅不確定因素。兩段之間,有好強烈嘅對比,你睇得出個分別嘅話,就應該明白我地嘅意思。

有啲未來嘢,喺可以「知道」,唔須要「預測」,果啲因素,通常都喺好基礎性,亦好簡單。只不過佢地响短期之內,唔會點變化,所以往往為投機者所忽略。長期不變嘅因素,喺唔可以令短線投機者受惠,不過對長線投資者而言,就非常重要。

85. 引刀一快 2016-12-13 06:21:17
珍港兄,你話:

TO:82/F 自我陶醉

閣下 QUOTE 果幾節回應,完全唔見得我有話過 PI 幾叻啫

珍港兄所言甚是,果幾個回應除咗認叻之外,更重要係向大家表達PI嘅“尊貴”,自我陶醉兄你居然唔提到呢點,實在太可恨了。


86. 二少 2016-12-13 08:54:14
點解仲要同D無"值"嘅無賴浪費時間呢?
87. 自我陶醉 2016-12-13 09:13:47
引刀兄,

我真係冇佢咁好氣,呢位兄台嘅辯論風格同投資風格係非常一致,都係唔輸得,因為佢覺得贏十次輸一次就即刻玩完,佢講得啱就係佢有道理,佢講得唔啱就係人哋誤會、屈佢、捉佢字蝨,真係救命!

今次二少就醒目喇,同佢鋪埋下台階,無謂再死撐。
88. 自我陶醉 2016-12-13 11:46:10
84樓 珍惜香港,

你話我捉你字蝨,令我想起小時候和弟弟下棋的情境,有一次佢輸了不服氣,向爸爸哭着說只是我食了他盲棋他才會輸,如果他可以再行過就一定會贏,爸爸當時跟他說,“舉手不回真君子,技不如人,就算再來一次,結果也是一樣。”  當時我見佢哭得咁可憐,就俾咗次機會佢翻手,但正如爸爸所料,最後結果依然是一樣。

不過,我當然一早知你唔係君子:

我話“乜原來閣下真係覺得PI好叻㗎咩?”  你就改成小學鷄講嘅 “好叻咩?”  然後就話人唔成熟, 就好似你今次嘅態度一模一樣: “你捉我字蝨之嘛,好叻咩!”  呢啲咪係幼稚囉!呢句我弟弟六歲已經識講:“你食我盲棋之嘛,好叻咩!” 7歲後已經唔會講。

看在弟弟的面,就俾你翻手一次,不過,就算我今次俾你翻手,你依然係錯,因為世上根本唔會有一個專業投機者每次買親都瞓身,所以就算你話 “你次次都瞓身,贏十次輸一次就玩完。” 呢個只係唔會發生嘅假設,即係廢話。就等於我同你講 “你阿媽若有齊男人特徵同男性器官,就算幾靚都好,佢一定唔係女人。”毫無分別。

即係話,就算你邏輯上冇錯,都唔代表唔係廢話。

89. 引刀一快 2016-12-13 15:52:42
自我陶醉兄

有冇發現我依家唔再陪珍港兄逐句辯論,逐段辯論都少,因為珍港兄吸收咗長河san嘅催眠心法,將人地質疑嘅錯處,不斷重複,重複之餘,又冇得反駁,總之不厭其煩,存心積非成是。

佢講嘅不外乎就係日日出街,俾車撞一次就冇命,冇咩錯吖,因為佢地主張大家只買不賣,睇住部車撞埋黎就硬食,唔准避開唔准卸力,總之要有信念瞓低三日之後復活。


90. 引刀一快 2016-12-13 15:56:18
X二少,“賴無”
91. 自我陶醉 2016-12-13 17:47:46
引刀兄,

知唔知點解我弟弟7歲後唔會再講:“你食我盲棋之嘛,好叻咩!”  ?  我哋4歲開始學下棋,自小明白一個道理,棋無論行啱行錯,每步都係自己決定,況且勝負乃兵家常事,懂得接受失敗,從失敗中學習,人先會成長,贏要贏得光彩,輸要輸得有風度。

如果為咗要贏人,歪曲別人說話,講過扮失憶,講錯賴地硬,我哋做唔出,亦不屑做,因為人格遠比勝負重要。

92. 回樓上自醉 2016-12-13 19:11:12
有風骨,撑你。
93. 引刀一快 2016-12-13 20:39:54
自我陶醉兄

我以前會為呢種事情忿忿不平,當然,今日依然維持呢種是非觀念,但係近幾年就開始好樂意面對呢類局面。

可能係喺大陸經常陪人飲酒,酒桌上見盡人生百態,有豪爽,有賴皮,有公道,有蠱惑,有真心,有借酒行事。最初,大家對賴皮滑頭者義憤填膺,後來我就體悟,如果個個咁忠直,酒過三巡全部瞓低曬,玩鬼咩。

酒桌也好,論壇也好,都係社會局部小縮影,當人地話catch me if you can嘅時候,多謝佢俾我地扮貓囉。
94. 歷史長河 2016-12-13 22:28:53
二位, 再寫落去應該冇乜人能懂了。

我同珍兄有過幾面之緣,知佢為人正面謙卑低調,樂於分享。如今的樓評大都著眼於短期因素,看的是幾個月的升跌,而樓市投資是長線投資,短線思維加上羊群效應只會增加短期波動,浪費機會。珍兄的分享向來是從本質來睇事物,從宏觀睇走勢,不僅限於樓,更有自己事業生活中的各種點滴,可謂彌足珍貴,煩囂鬧市中的一股清流。

珍兄今次的主題是歸邊,從回應來睇,大家都同意并感激。你可以不同意,但不要太離題。 何不以「歸邊的謬論」來出文反駁呢?這樣大家都有得著。
95. 引刀一快 2016-12-13 23:28:22
自我陶醉兄寫嘅嘢個個都睇得懂啦,咁直白。
96. 引刀一快 2016-12-13 23:31:26
大家都同意并感激。

不過等極都等唔到“大家”份讀書報告呢。
97. 自我陶醉 2016-12-14 00:03:06
引刀兄,

他已將在84樓寫給我的無賴言論隱藏,是真心收回也好,毀滅證據也好,正在努力刪改也好,就此算吧,公道自在人心,再拗無益。河兄話再說別人看不懂,可能就是這意思。
98. 珍惜香港 2016-12-14 00:40:08
珍惜香港TO:94/F 歷史長河

既然偏離咗理性討論,我亦唔想再浪費時間。

歸邊一文,恐怕已經破咗我出文嘅最長紀錄。可惜我之後花咗太多時間,响啲同文章內容無關嘅爭拗度。我諗自己都有責任嘅,一開始就唔應該受到某啲言論嘅挑釁。

我已經將自己相關嘅回應隱藏(69/F76/F84/F),亦唔會再直接回應任何攻擊或者單打。我知道一定會有人借此我話寫過唔算數,所以隱藏嘅部份喺可以 CLICK 番出嚟,不過先要從我網誌果邊 LINK 過嚟至得。

我寫歸邊嘅目的,喺要帶出任何市場嘅發展,都喺趨向歸邊呢個宏觀現實。從唔同嘅市場個案裡面,都可以睇得出呢個共通點。

當大家面對時代嘅變化、市場嘅變化、政策嘅變化果陣,好多時都會感到乏力。有啲人,選擇逃避、選擇走捷徑,或意圖繞過呢啲改變,又或者好天真咁,去盲等呢啲改變週期性咁倒返轉頭;而到最後,見大勢已去,就惟有慨嘆一句,時不與我

但原來,成功之道,根本就喺觸手可及。我地要相信,時代,喺永遠向前,唔好奢望會倒番轉頭。必須認清變化,認同變化,通過改善自己,去配合呢啲變化,與時並進,先至有條件响市場歸邊嘅大環境之下跑出。

呢個世界,喺唔會有時不與我,只會有與時並進
99. 引刀一快 2016-12-14 00:47:22
所以我兩年前極力反對高級會員無限時隨意刪改文章,就係呢個原因,會出現不公情況,果然果然。

當年亮劍仲講好話,話唔會有人講過又刪咁XX嘅。

好在X少冇呢個權限。

珍港兄,係好漢就攞返出嚟,我地亦願意停手結題,唔好破壞呢個論壇嘅良好原生態。
100. 引刀一快 2016-12-14 01:05:47
自我陶醉兄

一切刪改應該喺對手回應之前,別人回應之後,有錯就係承認,而唔係隱含。

我以前打錯個term字,俾個友仔長期夾硬話我人品差,我都冇改,正係因為有人提出,所以我唔會修改,就算修改都要註明,若果冇人留意而自己發現的話,反而改之無妨,因為已經有人提出,我刪改就唔係修正,而係掩飾。
換一個角度,就係冤枉指出錯處嘅人,指錯人為對手尤甚。
所以我越係俾條友仔執住,我就越唔能夠刪改。
101. 珍惜香港 2016-12-14 01:34:21
珍惜香港TO:99/F 引刀一快

引刀兄要明白,我冇刪文,亦冇改文,只喺隱藏,大家喺可以 CLICK 番出嚟睇。

不過,我可以將「先要從我網誌果邊 LINK 過嚟至得」呢個條件刪除。

至於隱藏嘅原因,好簡單,唔鍾意啲無關主題嘅爭拗回應,塞住個回應箱。

呢個喺我最後一次對無謂爭拗嘅回應。
102. 惜緣 2016-12-14 02:19:27
珍港兄

非常感謝師兄一路以嚟用心的文章分享, 真的難為師兄了, 在下唔知講乜嘢好, 但肯定的係, 對於師兄的無私付出, 在下除了感恩之外,都係感恩。
103. 惜緣 2016-12-14 02:25:27
早兩日聽到有位時事評論員講過這樣嘅一段說話, 係呢度分享下:
「 狹路相逢勇者勝, 勇者相爭智者勝, 智者相爭忍者勝」
104. 給100樓大話精 2016-12-14 02:26:14
你仲講大話,你唔係打錯字,你係講大話,打錯字會打錯三次?錯完又錯?英語水平不如小學生,仲講大話話自己ringring地先打錯,你又有否坦白承認你的小學雞英文?我嗰次不是話你人品差,係話你講大話,而現實亦相信你是人品差,斤斤計較怕餂底之人。
105. 引刀一快 2016-12-14 03:37:27
梗係喇,忍者識分身術嘛,哈哈哈
(講笑)

惜緣兄,久違了,惦念得很。
106. Desmond 2016-12-14 09:23:53
惜緣兄:

我聽的
時事評論員跟你所講的不知是否同一位, 但略有出入,如下:

「 狹路相逢勇者勝, 勇者相爭智者勝, 智者相爭仁者勝,仁者無敵」
107. 引刀一快 2016-12-14 09:59:42
104樓

你呢篇嘢譯英文嚟睇下,睇下你咩大學雞雞咁巴閉。
哈哈哈
108. 回107樓大話精 2016-12-14 10:15:51
依家係話你講大話呀,又狡辯,阿死雞,使唔使譯埋德文呀。
109. 香港土著 2016-12-14 11:05:10
108樓某位先生之陰暗面,

閣下一貫作風, LOGIN就偽君子, 匿名就真小人, 哈哈... 

如果要討論什麼講大話、言行人品之類, 不如先檢討下你(地)或你契哥D隱晦曲折、轉彎抹角之討論態度啦。

投資事情簡簡單單, 樓就樓, 股就股, 債就債, 偏偏就係要用埋一大堆隱喻, 轉幾十個彎將件簡單事情高深化。哩D藏頭露尾講野風格, 正就係你(地)幾位高人LOGIN/匿名兩個樣的狐狸尾巴。(自古以來, 不論中西, 鼠輩就是這德性。)

110. 引刀一快 2016-12-14 14:41:28
香港土著兄


果然X光眼,連人家套金玉馬甲都睇得通透。

佢都好慘嘅,幾個月就淨係捉到一次打錯英文,佢想整埋條強姦罪俾我添喎,哈哈哈。
111. 回109樓香港土著 2016-12-14 16:09:25


我從來沒有任何login名字

但亦會細讀你的留言,你的留言都是理性

我亦有表揚所謂淡友,所謂淡友如自我陶醉,我也多次讚揚他立論正確,92樓就是我撑他有風骨

至於引刀一快,他屢次混淆termteam,仲講大話話自己ringring地打錯字,不斷狡辯,如你能脱下有色眼鏡,又會怎評論引刀一快的言行

呵呵,110樓的他又講大話了


112. 引刀一快 2016-12-14 18:22:02
我就係ringring地打錯字,吹呀?

我講咩大話?你講嚟聽下。
113. 引刀一快 2016-12-14 18:43:41
傻仔,玩離間你未到家,同你果位師公惡補一下喇,自認IQ低於50果個就係你?
114. 珍惜香港 2016-12-14 19:01:17
珍惜香港TO:102/F 惜緣

三年光景,昔日良朋,以文深交,不再;
寫心出文,雖若孤身,說之難為,不敢;
願各良朋,有緣路過,打聲招呼,足矣!
115. 向引刀‧土著說不 2016-12-14 21:00:10
『昔日良朋,以文深交,雖若弧身,說之難為』: 
TELL ME WHY?點解妳著錯阿媽對鞋?
TELL ME WHY?點解你鍾意飲埋啲過期嘅花奶?(郭天皇飲歌新詞搞笑版)。

Tell you why:不必為那幾個異形而改變自我既有的 Theory, Actually, you are not along!
好文推薦,睇完明晒。

樓市點評汪敦敬
樓市中的沉默螺旋 誰人打壓了沉默的大多數? 2016-11-18

  英國脫歐、香港年青人取代資深泛民議員進入立法會、樓價繼續上升、特朗普奪美國總統寶座,黑天鵝不斷出現,當意料之外是常態時,黑天鵝還有意義嗎?人類是否應檢討一下,我們的社會出了甚麼岔子?無人去反省,無人去檢討,人們好像失去了自我修正的功能一樣!

 

  在美國大選結果出現了黑天鵝後,美國有人以「沉默的螺旋」(Spiral of silence)來解釋出人意表的結果,如果這個答案是對的話,引起沉默螺旋的原因才是真正社會要面對及解決的問題。事實上,進化後的沉默螺旋效應已深入香港,令香港不斷出現失控的異象,包括在樓市、政治,甚至民族的層面上,我們不可以總是以驚訝、陰謀論去面對異變,我們應要從理論基礎,找到形成的結構,這才可以有層次地了解,問題才可以得到解決及優化! 

 

  沉默的螺旋(Spiral of silence), 主要概念是:「如果人們覺得自己的觀點是公眾中的少數派,他們將不願意傳播自己的看法,媒體通常會關注多數派的觀點,輕視少數派的觀點。於是少數派的聲音愈來愈小,多數派的聲音愈來愈大,形成一種螺旋式上升的模式。」以上世紀70年代發表理論的確可初步解釋到各種黑天鵝的出現,群眾面對強大的主流輿論下感到自己不被認同,於是成為沉默一群,直至到有機會如不記名投票才顯露出來。 

 

  但我覺得西方輿論還未深入剖析「沉默螺旋」現象對世界的影響,忽略了眾多的事實顯示有關理論正伸展發展中,及反映了世界在失控中!

 

  誰人打壓沉默的大多數?是媒體!70年代德國女性傳播學者-諾爾紐曼,以自身的經驗發表「沉默螺旋理論」,導出人類如透過傳媒及輿論去壓制沉默一群!問題是,沉默的一群極可能不是小眾,當一場所謂公平的選舉,在未投票前已發生了群眾欺凌的時候,真理何在?在政治上長期存在,就算在樓市上, 「沉默螺旋」也近年不斷出現。2015年10月,香港樓市在資金泛濫及二手放盤量不斷收縮下出現了「劈價勢」,我不斷撰文強調這其實是「樓市哈囉喂」(負面情緒引起的市場衝擊),是假跌! 是傳媒迎合社交網站及群眾認為「樓價應該跌」而來,最後,樓市在二手放盤量進一步「乾塘」、租金更高、資金泛濫下重新顯著回升,政府要再次推出樓市辣招,在期間,唱好樓市的人不斷被譴責,於是大部份原本「好友」日益被主流征服成為「淡友」或者沉默者,這正正是沉默螺旋的現實範本,另外,人類的思想在沉默螺旋所導出的這股力量未必一定產生正義,也產生了不少樓價跌、「港獨」等不真實海市蜃樓! 

 

  70年代已有學者察覺政客掌控傳媒令沉默小眾感孤立而禁聲,而40多年後的今天傳媒結合網上世界力量之大已是人所難以控制了,本文沒有政治立場,事實上任何政府體系也可透過掌握傳媒迷惑人心!現在的大問題是大部份傳媒已被網上新媒體所征服,報紙標題受到網上入門網站的主流主導並跟著尾走,新常態其實已失控,人已掌握不到社會的變化及前路,一切也在虛假及扭曲下變得意料之外!任何歧見已不重要了,找回自己才是重中之重!看沉默螺旋的理論結構,大家可體會更深了! 

 

(1)準統計官能(quasi-statistical organ) 

 

  「當人長久處在媒體訊息之下,久而久之自然會具備一種準統計官能,即察覺媒體所呈現的主流意見,並且這些意見會轉化為個人對於社會主要價值的認知。」 對!被改變思想後更加當了自己的光環,利害吧!看官閣下,令你驕傲的信仰可能不是你自己的,這是長期被改變了「準統計官能」卻不自知而已。 

 

  博客「靚姐」說得好:

 

  「在網路時代的潮流觀念轟炸下,就算成年人也不容易察覺自己的所謂「自由意志」實在是羊群智慧吧了。」

 

(2)多數的無知(pluralistic ignorance) 

 

  「人們把帶有自己傾向的感知與媒體過濾的感知混合為一個結論,但他們覺得這個判斷是來自自己的思考和經驗,並對多數人意見錯誤判斷,這稱為「多數的無知」。在沉默的螺旋中,多數的無知者,即使原本個人對於某事情持不贊成的意見,但如果大眾傳播對這種意見持贊成態度的話,他們便會錯誤的以為這種贊成態度是大多數人的意見。」 

 

  一切由傳媒作了主,但人們卻毫無保留地接受及被左右,於是…… 

 

  入不敷支已數十載的美國永遠也是不死的神! 

 

  高速成長不斷強大的中國過去廿年永遠也在「即將崩潰」的預告中。 

 

  反中央就等於民主。 

 

  高呼自己不是中國人就是香港精英。 

 

  反華辱華才是議會新時代。 

 

  愈來愈反智,筆者不想責怪年輕人,問題其實在香港人的「準統計官能」出現了問題,生了病,失控了。 

 

(3)中堅分子(hard core) 

 

  「在沉默的螺旋旋轉過程中無視孤立的威脅的人」,被稱為中堅分子。他們是一群願意為自己的公開言論付出代價的人,這些特立獨行的人通常與主流意見有所衝突, 縱使過去幾年樓價不斷上升也好,但預測樓市向好的人(當然包括筆者)往往會被批判的。 

 

  今天的傳媒融合了網上世界,力量何以數以倍增,「沉默的螺旋」的威力,已不局限在令沉默者的思想被征服而不自知,任何本來小眾的也因為網上有足夠的社群的共鳴及支持,人人也是中堅分子(hard core),個個以為自己是大多數,沉默螺旋,由征服沉默的群眾,改變為人人自我覺得自己是主流,變為自我催眠!社會決裂, 於是到投票那最後一刻才能見真章,黑天鵝也不斷出現。 

 

  沉默螺旋理論,由70年代導出「傳媒製造主流民意,沉默一群由被欺凌逐漸被征服,然後更覺得被植入的觀念是自己的核心思想」但到了今天,沉默者由被欺凌變為自我膨脹!表面雖沒有被主流所欺凌,卻其實一樣在同道社群內被同化而失去自己,也一起脫離現實,既然自覺是主流,也只有互相抗拒及撕殺,失去了妥協,社會因此進入分裂。 

 

  今天我們的社會變成怎樣? 

 

  選舉已失去了委任代表去建設社會的初衷,而變成不滿者選出反抗的代理人。當自由成為放任,民主成為禍根的時候,大多數人反被忽視民意的「公義」所欺負時,所有社群及持份者也成孤立的碎片,就如我們見到的立法局情況一樣,失控、身不由已,背棄了自己的概念,最後,沉默的大多數便支持強人,甚至由狂人去領導,我們看看,世界已由習近平、普京等強人及特朗普、杜特爾特等被世人認為的狂人來帶領,這不是偶然,是時代的洪流及常態! 

 

  為何梁振英司法覆核會被公眾支持?辱華言論令民反彈支持政府作施法司法覆核,也是另一種沉默螺旋製造的黑天鵝,就如特朗普當選一樣。

 

  本文只想用學術的角度探討及嘗試剖析虛假無常的世道,我們不要互相仇視了,其實大家也只是大時代身不由己卻不自知的小角色而已,不如好好認清世局,尋回自己獨有的思想和風格,掌握生命吧。 

 

  處世如是,理財也如是,認清了虛假,合理回報本來就是平常事了!

 

  結筆時剛好身在倫敦海德公園,在多個公園的湖面也遇上了白天鵝,但願世界和平,世事令人心想事成,黑天鵝不要經常出現了! 


116. 歷史長河 2016-12-14 23:07:59
珍兄,

「雖若孤身,說之難為」

30幾個網友回應中,只有三個不認同,30:3,大過二八定律,怎能算孤身?
118. 珍惜香港 2016-12-15 01:58:24
珍惜香港TO:116/F 歷史長河

「孤身」並非指認同者少,而是對應前句「昔日良朋,以文深交,不再」。

昔日良朋不再,如今孤身出文。

惜緣兄說難為,我話不敢當」,只願昔日良朋,路過留字,心滿意足矣!

此為 114/F 之解。
119. 引刀一快 2016-12-15 03:06:37
應該係31:2

讀書報告等到頸都長,睇都睇唔明又點唔認同唧?
120. 惜緣 2016-12-15 07:45:55
對於珍港兄的分享就算不心存感恩,亦不應該整天雞蛋裏挑骨頭吧!
121. 引刀一快 2016-12-15 08:33:20
我早就話願意停手結題,點知人家唔收手不特止,仲增加人手,反而要求別人單方面停火?

惜緣兄你睇清楚再講都唔遲。
122. 安全駕驶 2016-12-15 08:43:51
我也認同珍港兄,所以是31:3
123. 引刀一快 2016-12-15 08:47:52
睇到未?一面叫人停手,一面攞尾綵。
124. 小小小業主 2016-12-15 09:28:46
珍惜兄,精彩文章,獲益良多,引刀之流,一搞笑匹夫而已。
125. 路過的人... 2016-12-15 09:37:57

To 114/F,

你的意思应该是 you are not alone , 而不是along ?

趁引刀未发觉之前快快改左佢啦 ……

126. 引刀一快 2016-12-15 10:32:56
乜咁冇團隊精神,打返自己友呀?!

放心,佢錯中文字我都冇捉過吖。
127. 方太 2016-12-18 11:09:57
真是受益良多!