地產博客 > 資深會員專欄 返回
瀏覽人次:39539    回應:78
資深會員專欄

港燦式茶餐廳(二) 唔係嘛?真係買大陸屋?

 

引刀一快

2015年12月10日

  大家好!上回講到引刀撞彩夾符碌有高校肯收,引刀梗係去馬喇,呢度先開個小岔,引刀好迷信,點解呢,係因爲好多經歷令引刀有迷信嘅聯想,入學果年,屋企棵鐵樹開花,第二年就萬年青開花,呵呵,係咪好蹺呢?唔講呢D住,入番正題先。

  一入學,當時我係全宿舍第一個人到步,交咗當年雜費,就去領草蓆、棉被、水桶、熱水壺,(充滿民工feel)第一件事就係入宿舍霸位,好好彩咁揀咗陽臺邊嘅上格床,點知揀好個靚位之後,個人行出去一陣,熱水壺就俾其它房嘅人換咗個爆膽嘅,之後,我下鋪嘅同學,幫我刻個名喺壺上面,佢話咁咪唔怕再俾人換 囉,我攞住個冇得換番嘅爆膽壺,好感激佢............

  呢件事,展現咗港人同大陸人之間,某些觀念上嘅鴻溝,一般嚟講,香港人邊有咁衰換走人地件嘢嘅吖,但係,又有幾多香港人咁親切咁神心幫個初相識刻名呢?喺大陸時間長嘅人,都會深有體會。

  一開學冇耐就開始軍訓,引刀學識咗一樣重要嘅謀生技能,唔係步操,唔係格鬥,更唔係射擊,係俾面!排長生日,大家要我企岀嚟用純正香港腔調清唱 Beyond同佢祝壽,大佬,唱得掂就去American idol都得喇,結果我夾硬唱咗羅文嘅前程錦綉,點知開腔一唱,先至從各人迷惘嘅眼光中發現,原來個個都未聽過呢首嘢,即時尷尬到面癱,好在有好多人夾硬拍手掌,令我充分體驗咗“俾面”嘅可貴。

  正式學期開始,問題亦開始,普通話!大家唔好以爲淨係引 刀一個聽課有問題,原來唔少老 一輩嘅老師係唔識普通話嘅,講得仲衰過香港D官員,大家亦唔好以爲淨係廣東人普通話差,原來其它省份上年紀嘅人一樣有部份講得嘛嘛,好幾個課我好開心咁睇見一班同學陪我R頭,世事無絕對呀!

  當年大陸嘅高校生活,條件完全同香港嘅生活無法比擬,如果今日仍然保持在當時的狀態,恐怕大量年青人會打退堂鼓,晚上11點開始停電、公用厠所、無門男浴室、民工級別飯堂等等,等等,正是如此,讓引刀感到自豪,因爲我能屈能伸。

  講到呢度,仿佛見到無數怒目而視嘅眼睛,喂,引刀口水佬,想呃飯食呃到幾時呀?樓呢!稍安毋躁,稍安毋躁,有足够嘅鋪墊,慢慢就會入正題:大陸屋有乜好?

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 歷史長河 2015-12-10 07:09:34
引刀早晨
2. 引刀一快 2015-12-10 07:11:52
早晨早晨,長河san真健康,咁早就起身搶沙發。
3. 打工仔 Andy 2015-12-10 08:06:53
引刀兄
你既内大經驗有 d 似坐監多 d 喎! 佩服佩服! 哈哈!
4. 歷史長河 2015-12-10 08:08:18
弓力兄,唔好漏咗點認識力嫂個段故事。農務系女生應該唔多。
5. 自我陶醉 2015-12-10 08:58:56
刀兄,慢慢講,唔洗急,樓日日都聽,真實生活經驗更有趣!
6. 魚蛋仔 2015-12-10 09:16:51

恭喜引刀兄再出文!

4/F 長河大師冇厘正經,屬虛症。睇來你要幫佢調理下至得!哈哈哈!

7. 新抱仔 2015-12-10 09:23:19
早!好有趣呀!好想睇落去!
8. Jerry 2015-12-10 10:00:49
刀兄果真是水王, 好野! ^^謝謝分享
9. 笑看人生 2015-12-10 11:21:24
引刀兄好嘢,你講完第一集之後,我就買咗張櫈仔返嚟啦,加油啊!
10. 物業初哥 2015-12-10 11:39:26
刀仔,睇你既文章真係愈睇愈起勁!
11. 物業初哥 2015-12-10 11:41:51
老實講,睇尼個"資深會員專欄"有一種如沐春風既感覺,謝謝!
12. 惜緣 2015-12-10 11:42:16
引刀兄

師兄彷彿把我帶返兒童時代,勾起我許多美好的回憶,那時聽人講故已經係很好的娛樂了, 係要自己擔櫈仔去聽的, 還有就係自制蜘蛛網去捉蜻蜓亦是一大樂趣,等等, 雖然無乜娛樂, 但也過得開心、充實。 我相信師兄的故仔一定比我兒時聽的故仔精彩百倍,熱切期待續集。
13. 引刀一快 2015-12-10 12:46:50
To 3樓 打工仔兄

坐監又唔至于,不過因爲89年嘅事情,某些方面的確揸得好緊,11點後唔止停電,仲關宿舍大門,我食宵夜,出入都要翻墻。
14. 引刀一快 2015-12-10 12:51:02
To 4樓 長河san

呢個部份,都幾有故事性,寫好唔寫好呢?寫又怕俾人打喎。

農務系三個字到我爲止,唔好拉到家人度,唔該。
15. 引刀一快 2015-12-10 12:57:03
To 5樓 自我陶醉兄

呵呵,我其實都係鋪墊緊,買大陸樓對香港人嘅實際價值,不過寫下嘢確實又幾過癮。

點解其它幾位咁快出文,我就尋日先出到第一篇呢,係文體嘅問題,最初我諗住正規D用標準白話文寫嘢,結果幾個題材都寫唔到100字就大腦塞車,把心一橫,寫粵語!咁就有貨交,可能係因爲近年都係喺度同大家打廣東話。
16. 打工仔 Andy 2015-12-10 12:57:28
啊 明白!

89年尾我有繼續上大陸工作, 真係好耐既事了, 當時去内地正苦部门跟工程, 佢地話無野呀, 一切正常喎!
17. 引刀一快 2015-12-10 13:00:07
To 6樓 魚蛋仔姐姐

好嘢喎,可以透過文字望聞問切,不過唔知佢陰虛定陽虛?
18. 引刀一快 2015-12-10 13:01:35
To 7樓 新抱仔

互勉互勉,我都等緊妳嘅新作。
19. 引刀一快 2015-12-10 13:03:40
To  8樓 Jerry兄

哈哈哈,水王?唔係我呀,邊個我就唔講,怕俾人打。
20. 引刀一快 2015-12-10 13:08:16
To 9樓 笑看人生兄

既然兄台買咗櫈仔,咁我就繼續呃篇幅喇。多謝多謝!
21. 引刀一快 2015-12-10 13:10:57
To 10,11樓 物業初哥兄

多謝多謝,有你呢句,我亦會越寫越起勁。
22. 引刀一快 2015-12-10 13:17:02
To 12樓 惜緣兄

多謝捧場,原來惜緣兄都有用蜘蛛網黐蜻蜓,你亦令我諗起一位民初嘅學者-豐子愷。


23. 引刀一快 2015-12-10 13:27:29
To 16樓 打工仔兄

廣東係比較自立,所謂冇事係你唔搞嘢就冇事咁解,學校裏面揸得好緊,師姐話我知,93年我學校某學院6月4日搞系內慶祝活動,就係冇同食肆講明搞乜活動,食緊飯都俾人入場調查。當時好著重思想管制。
24. 麗娜 2015-12-10 13:36:25
引刀兄

所以我話你唔容易!

講詳細D,我非常期待你的續集


25. 引刀一快 2015-12-10 14:07:45
麗娜師妹

如果寫詳細,可以寫中篇呢,不過我唔敢太偏離樓市、物業題材,然而,香港人在廣州,面對適應、同化和保存自我,也許會值得年輕一代借鑒,而我輩就當作趣聞逸事吧。
26. CD ROM 2015-12-10 17:12:58
"俾面"文化確實係易學難精!!! 引刀兄若能傳授埋"飲酒"文化, 我等港燦自然北上時事半功倍!!!
27. 新抱仔 2015-12-10 17:18:49
引刀,

不同題材都分享下丫!好想睇呀!
28. Sammy 2015-12-10 17:20:37
引刀兄
Thanks for sharing
29. Jerry 2015-12-10 17:42:41
引刀兄和自醉兄:

你們說在這論壇給好友攻擊。但事實是,引刀一出文,何其受歡迎,沒有界別之分。

自醉兄,等待你既文章。
30. 自我陶醉 2015-12-10 18:14:03
回Jerry兄,

一如我們之前所料,人仔入SDR後就立刻腳軟,美國12月加息,又是難以避免的事實,加與不加,快將揭盅,相信可能只象徵式加八分一厘,來應酬一下大家,並給各方一個驚喜。

論市場局勢,還要看看美國的最終決定和之後的資金流動情況來判別,小弟之前承諾Oscar兄, 會在年低來個大總結,必定有拖冇欠。哈哈!

31. 向飯民說不 2015-12-10 18:22:27
樓上,人民幣貶值相信是壓倒香港經濟的最後一根稻草,難以港燦會甘興奮。
32. Oscar Lam 2015-12-10 18:42:22
醉兄,

如果真的如你所愿加息八分之一,那就皆大歡喜了!

乘你年底大总结,希望你另外出文Post。期待!期待!
33. 打工仔 Andy 2015-12-10 18:50:19
自醉兄

期待你的文章 ! 好野!
34. 魚蛋仔 2015-12-10 19:20:16

自醉兄,

我也很期待你的文章!快快快!

35. 引刀一快 2015-12-10 19:29:38
To 26樓 CD ROM兄

講到飲酒呢,如果文章好彩有人肯睇的話,往後會有一個個專題獨立篇,喺大陸,煙可以唔食,酒就多少要飲嘅。
36. 引刀一快 2015-12-10 19:32:30
To 27樓 新抱仔

如果人地睇得開心,咁我又寫得過癮喎!
37. 引刀一快 2015-12-10 19:33:31
To 28樓  Sammy兄

多謝捧場!
38. 引刀一快 2015-12-10 19:35:43
To 29樓 Jerry兄

好友淡友,鬥道理就夠,動氣實在無謂。
39. 引刀一快 2015-12-10 19:40:08
To 30樓 自我陶醉兄

年底先至出文?寫俾長頸鹿睇咩,得閑就開個頭先喇,萬衆期待呢!
40. 歷史長河 2015-12-10 21:28:56
14樓刀兄,力嫂有睇地產版?要先請示再寫為妥!
41. 引刀一快 2015-12-10 21:40:43
無需請示,我老細好支持我,好喇,同引刀點玩都得,咪同我老細起花名呀。
42. 80後小業主 2015-12-10 23:19:53
睇引刀兄寫成長經歷好開心,腦內不斷想像當時的實際情況。好吸引!! 其待下一篇!!
43. Ronald 2015-12-11 00:37:15
看其初歷,難怪刀兄文字功力深厚。
44. 引刀一快 2015-12-11 01:13:26
To 42樓 80後小業主兄

多謝捧場!
45. 引刀一快 2015-12-11 01:17:58
To 43樓 Ronald兄

過獎過獎,引刀獻醜,好高興多咗一個与各網友交流嘅新領域,還是要多謝Ronald兄。
46. c9仔 2015-12-11 04:33:04
拜讀引刀兄文章多時,宜家先知道,原來我c9仔仲比你大少少。

我大佬當年 A Level 好麻麻,限于家境,也同你一樣想法,去左華大。當年更少人返國内讀大學呢。我會考果年暑假去探過。你的分享,讓我想起在那兒的回憶。我老哥住港澳生樓,2人share一個房間,有自己的厕所,住得比屋企舒服。

講到樓宇投资,我真喺無做功課,白白錯過好多機會,终于在2009年比亜媽逼才上車買姑婆屋。轉個身就有拍结婚移民。自住樓變收租樓。樓龄高但去年有地鐵到又海景,希望唔會跌得好惨。

在我朋友圈中,大都只有自住樓,又要供细路,真喺無MUD錢再買多一間。佢地都會担心無錢退休。

如果當日早D讀到博士同埋各位师兄的文章,我宜家都唔需要爲退休愁。

見到各位师姐投資有道,羡慕羡慕!
47. 引刀一快 2015-12-11 08:47:50
c9仔女士

多謝支持,你哥哥喺邊間?廣州華字頭嘅高校有華工、華農、華師,其實兩人宿舍有利有弊,個人經驗,遇著同房人品唔好嘅情况,都幾困擾,而多人宿舍就大家都會收斂D,有乜唔好嘢會俾人圍剿,或盃葛。不過,有套內厠所,已經抵償咗好多嘢,我地以前個厠所,半夜去要小心,我親眼見過七八隻大老鼠伏喺橫走嘅汚水管上面,幾乎每隔個水箱都滴水,唔駛我講埋落去喇。

妳就好啦,09年被逼做業主,有時,人就係一兩個抉擇,造就一輩子嘅安樂,或者毀掉未來嘅機遇,恭喜你係前者。
48. yyfan 2015-12-11 11:50:52
刀兄

我地個廁所冇老鼠,但長期塞,屎尿橫流衰過農村,沖凉要行鬼咁遠買熱水返去沖,話時話你間野係咪係五山,見你文筆咁好會唔會出自華師大?
49. c9仔 2015-12-11 12:50:40
刀兄

我老哥喺泉州華大。雖然佢間房有厠所好方便,但間中會塞,一地污水我都見過。不過住喺5/F,好開揚,真喺好唔錯!果時,西瓜好平,半個半個挖肉食中間最甜部分,之後直接抛出前面爛地(附近農民會去執來餵猪),爽呀!佢果棟樓D香港生都好老死,食完晚飯就一齐吹水。依家仲有見面。同房(人品好好)知道我來,讓左個床位比我老哥,佢就去其他同學果度住。 

你講得 arm,“有時,人就係一兩個抉擇,造就一輩子嘅安樂,或者毀掉未來嘅機遇”。我有位朋友,賣左唯一自住樓等跌,等到依家!就快6年租金開支,早就嘔凸當年利潤。依家跌,都無能力再上車啦。

叫我c9仔就得啦~
50. 向飯民說不 2015-12-11 13:45:04
我也有堂兄弟系華大畢業,和太太移民去新加坡,生埋仔女,吾知幾幸福。反而土生土長的新加坡堂兄弟,有錢無錢都好,都吾結婚生仔,真系吾明。
51. 向飯民說不 2015-12-11 13:49:54
引刀,做人要知足,飲水思源,無大陸的比你機會,仲要補貼你學費,你邊有今日。
大陸人來香港讀書,香港人出美加等讀書,都系全費學費。
當然有獎學金例外。
香港學生搶走大陸人的資源,人地吾開心系正常。
要大陸人來香港讀書不同,因為他們要比全費,而且要尖子 ,不是引刀這些香港讀吾掂,要反大陸。
52. 引刀一快 2015-12-11 15:46:11
To 48樓 yyfan兄

讀邊間就唔公開嘞,我D文筆都未入流,大家俾面引刀打氣鼓勵啫,喺度再多謝一次。

我果度未至于屎尿橫流,後來搬咗去新宿舍,個厠所仲幾靚添。搬咗宿舍之後,用電水煲煲水都冇跳制,唯獨是11點斷電呢様最慘。

厠所長塞,諗到到怕,原來你仲慘!


53. 引刀一快 2015-12-11 20:28:33
To 49樓c9仔

咁我就直呼c9仔喇,其實叫新抱仔都係直呼嘅,冇咁翹口。

妳講到呢度,我第三篇第四篇會俾到個清晰嘅回覆你。
54. 惜緣 2015-12-11 21:59:41
To 49樓c9仔及50樓向飯兄

我二哥和三哥都係謮泉州華大,二哥係83屆機械系畢業生,現居於新加坡,三哥係87屆計算機系畢業生,現居於深圳做教師,那時的我因為一心要來香港,否則,我都有可能讀呢間。
55. 引刀一快 2015-12-11 23:18:29
惜緣兄

華大好多台灣人同日本人讀架,不過你哥哥畢業比較早,當時台灣來華學習未開放,否則有個台灣嫂子都唔出奇。
56. 朗晴 2015-12-12 00:03:24
刀兄,
多謝精神食量,精彩精彩
你D打字速度同當年賊王葉繼歡用嘅AK47有過之而無不及,你繼續努力寫,我地會不停用心睇.
57. 引刀一快 2015-12-12 00:10:19
朗晴兄

真係過獎,我打字未入流呢,大陸呢度有D女仔,幫人輸入,可以一日打兩百張A4紙,我老細以前都過百張。

有你地做讀者,係寫手嘅福氣。
58. c9仔 2015-12-12 00:11:12
惜緣兄

泉州華大,當年我老哥叫我 A level 後去讀外語系,雖然我去住過2星期,知道學校不錯,不過我怕普通话追唔上,所以無報讀。當年香港只得HKU CU,學位唔够,去讀大專.80年代尾能够掛起"大專生"個名,都有光環 ga ! 其實,讀書喺一個阶段,出來做事,又是另一回事。我見過有D大學生,做人做事唔够專生甘好。可能佢地太顺利啦。

講返華大,记得喺飯堂見到有些農家子弟,買幾两飯加一份炒菜就一餐。我老哥話佢地好清苦,但讀書好發愤,要向佢地好好學習呀。
59. 朗晴 2015-12-12 00:18:47
無錯,我二十年前都見識過,佢地用五筆輸入法,快到無影,應該快過倉頡.
我用緊手寫,即係點三八左輪.
60. c9仔 2015-12-12 00:20:35
To 53/F 刀兄

耐心等候你的大作。

真喺好后悔當年唔懂得投資。宜家唯有靠我D租客啦。呢班姐姐仔來港讀書,仲帮埋我供樓,難爲佢地住得甘逼。有時同佢地 Whatsapp, 我寫簡體,佢地用繁體,真喺覺得佢地好掂!
61. 引刀一快 2015-12-12 00:27:49
To 59樓 朗晴兄

依家手寫嘅識別率高咗好多,已經唔係以前蒙恬嘅水平,不過我比較推薦用拼音,因為可以keep住D普通話,五筆最好嘅地方係唔使揀字,個個字都係直接打出嚟。
62. c9仔 2015-12-12 00:34:25
To 61樓     引刀

我多年一直用拼音,真喺可以keep住D普通話。

不過post 文時,要用D時間選繁體字。
63. 引刀一快 2015-12-12 00:36:30
To 60樓 c9仔

嚟得讀書都係過江龍,用拼音打字係繁簡自己揀嘅,冇難度。

做人嘅嘢,後悔冇用,向前看,未來仲有大把投資機會,冇人可以把握所有身邊出現嘅投資機會,亦唔係有意識去留意就一定會成功,總之,謀事在人,成事在天。
64. 引刀一快 2015-12-12 00:36:31
To 60樓 c9仔

嚟得讀書都係過江龍,用拼音打字係繁簡自己揀嘅,冇難度。

做人嘅嘢,後悔冇用,向前看,未來仲有大把投資機會,冇人可以把握所有身邊出現嘅投資機會,亦唔係有意識去留意就一定會成功,總之,謀事在人,成事在天。
65. c9仔 2015-12-12 03:14:42
To 63樓     引刀

喺!向前看。

期待你的新文章~
66. 惜緣 2015-12-12 08:50:41
To 55樓 引刀兄,早晨!

引刀兄對華大那麼熟悉,莫非……?

期待續集!
67. 惜緣 2015-12-12 08:52:33
To 58樓 c9仔,早晨!

我曾經去華大探三哥時,都在那里住過兩日,校園環境真係唔錯。
68. 引刀一快 2015-12-12 09:11:30
惜緣兄

引刀唔係華大嘅人,邊間就無謂公開嘞,我去過福建幾次,幾乎都有遊歷當地高校,福建嘅高校都好有校園味,古雅而幽,又帶點洋味,感覺當地對保護舊建築好有共識。
69. 2011年開始 2015-12-12 18:41:02
引刀兄,學生宿舍偷竊問題中外都有,同事的女兒讀港大時俾人偷衫,姪仔在美國費城讀大學剛被人偷ipad
70. 向饭民说不 2015-12-12 20:42:11
楼上,所以我成日叫引刀,要扩宽自己的眼光,我起初仲以为他系港毕业的黄丝,原来他反大陆读书,而且发展也不是很差。大陆比了机会给他,并没有欠他。做人要饮水思源。

费城,就是传说中的,宾州大学吧,ivy league 大学哦,都被人偷ipad. 不过美国的治安真系不比大陆好。最近有华裔女学生系校园内跑步,一样被强奸,一样系名校大学。

71. 向饭民说不 2015-12-12 20:51:33
还有埋怨思想管制,“93年我學校某學院6月4日搞系內慶祝活動,就係冇同食肆講明搞乜活動,食緊飯都俾人入場調查。當時好著重思想管制。”

家父新加波中学,前几年去海南搞学生会活动,大部分都已经70,80岁的老人家,新加波政府一样吾放心,一样要派特工过去监视。
72. 引刀一快 2015-12-12 21:18:52
To 69樓 2011姐

講到宿舍偷竊問題,引刀可以寫小說,講個幾得意嘅逸事,當年軍訓,隔離宿舍有個同學成個行李箱俾人偷咗!結果佢冇晒衫褲淨得身上果套解放裝,沖完涼內衣褲未乾,真空上陣操練,當年好多人家境都困難,佢等咗成個月先等到屋企寄衫過嚟俾佢。

好,一於用呢個題材又寫一篇!
73. 引刀一快 2015-12-13 05:12:33
Admin兄

網頁Banner似乎漏了自我陶醉兄未補上。
74. 引刀一快 2015-12-13 05:14:32
蛻變中的懶人兄

見字可否露露面,該放下時得放下,地球還在轉,大家掛住你呢。
75. 惜緣 2015-12-13 11:06:42
引刀兄

大家真係心有靈犀, 昨晚我在重溫去年文章及回應的時候, 睇到懶人兄幫順民兄及CH兄改中文卷,兩位得同分及兩位都得第一名,最後話, 差點忘記, 全班只有兩位同學。 懶人兄的幽默總會令人開懷大笑。

懶人兄, 大家真係好掛住您! 在下仲係度等緊您的開班呢。
76. 歷史長河 2015-12-13 22:41:32
回72樓刀兄,

「真空操練」,笑了。
你應該借內衣褲俾佢用先啊!
77. 引刀一快 2015-12-14 03:17:24
To 75樓 惜緣兄

共待之!
78. 引刀一快 2015-12-14 03:27:19
To 76樓  長河san

當時我同呢位同學唔熟,亦非同室,回想當時,就算借錢俾佢都冇用,我估佢唔捨得喺廣州買底褲嘅。