树欲静而风不止,占领闹剧搞到香港七国咁乱,本来谂住清场之后,圣诞佳节可以过番几日安乐日子啦,点知「鸠呜团」阴魂不息,到处骚扰,导致商户生意受阻,街坊不胜其烦,警方疲於奔命,呢个圣诞烽烟四起,想快乐都几难。
即系咁,占领闹剧虽然已经收皮,但有人不甘失败,以各种名目纠众滋事,「鸠呜」、「跌钱」、「报佳音」,五花八门,无奇不有。寻日凌晨之嘛,大批示威者喺通菜街同警方对峙,期间有人冲入一幢大厦,拍打住客铁闸声称「借厕所」,有住客要报警求助。结果示威者同警方角力超过八个钟,搞到凌晨四点至鸣金收兵。唔使问阿贵,又有多人被捕,何必呢!
真系谂极都唔明,示威还示威,争取民主还争取民主,点解要搞到香港永无宁日呢?点解要半夜三更擅闯民居扰人清梦呢?试谂吓,如果掉番转头,有人骚扰呢班示威者嘅屋企,佢哋又会有乜嘢反应呢?有人就讲得啱嘞,示威者借「鸠呜」或「报佳音」之名,行流动占领之实,司马昭之心路人皆见,警方用文明方法请唔走示威者,咪惟有动用适当武力罗。
所以话啫,示威人士神憎鬼厌,所到之处商户拉闸、行人兜路、街坊闹爆,警方唔驱赶,唔通畀佢哋为所欲为咩?咁仲成世界嘅?最离谱嘅系,有位所谓副教授居然恶人先告状,声称示威者只系喺街上短暂逗留、打开黄伞,呢啲都系合法行为,警方以暴力驱散市民,令佢觉得唔开心,将会去信警务处处长曾伟雄,要求对方解释警方施暴嘅原因喎。
咁就奇嘞,身为学者,唔谴责违法者,反而谴责执法者,呢啲到底系咩逻辑?咁又难怪嘅,今日香港是非颠倒,黑白混淆,愈来愈多呢类匪夷所思嘅歪论。好似占中搞手咁吖,身为大学副教授,自己知法犯法就算喇,仲公然教唆学生违法,而且恐吓随时会有暴动,简直系误人子弟。加上反中乱港传媒同反对派政棍煽风点火,推波助澜,唯恐天下不乱,青少年纷纷被洗脑,有乜法子唔愈来愈偏激,愈来愈暴戾吖。
都系古人讲得啱∶禁而不止,则刑罚侮。占中搞手及幕后黑手固然要严办,鸠呜兵团一样唔可以姑息。嗱,咪以为一哄而上就法不责众呀,随时自毁前程。一句讲晒,天网恢恢,疏而不漏,出嚟行,迟早要还吖!