何謂啱價？

　　TVB替我拍一個特輯，當中有一個鏡頭是我用平板電腦寫文章，編導叫我隨便寫幾個字，於是我在不知不覺下寫了「何謂啱價？」，在休息時，編導問我，何謂啱價的意思，在買家而言，一定是愈平愈啱價，反之，賣家就會話愈貴愈啱價，我話唔係，如果啱價是這樣，就永遠不會做成交易，啱價的意思，就是啱買入或者賣出的人願意接受的價錢，大多數的時候，業主啱價買家唔啱，到買家啱，業主又唔啱，一個啱買賣雙方的價錢，的確是很難做到。

　　現在有個別業主在不知什麼原因之下，願意大幅減價，幅度甚至超過兩成，我有見及此，於是發表了一篇文章，有意買樓的人，從現在開始，隨時都可以買樓，只要啱價就可以，我的意思就是遇到一些大劈價物業，而又可以輕鬆負擔得起，根本毋需理會樓市以後走勢，亦毋需理會任何分析報告，這些對於那個買家來說，是啱價的物業，要買就可以買，千祈唔好問其他人，他們大多數會話市況未穩定，睇定一些，講咗等如冇講。

　　文章出街後不久，我在fb收到一個訊息，一位年輕朋友買了一個單位，我在恭喜之餘，順便問他點解會在樓市準備下跌的時候買樓，他的回答是啱價，並引用我所說的，啱價就可以買，原來，在半年前，那位年輕朋友打算買一個500萬物業，誰不知到臨簽約時，業主反價20萬，並限定他在當日答覆，最後，他沒有買到，業主到今日仍未能夠將物業賣走。

　　年輕朋友最近用400萬買了一個單位，比半年前打算買的單位面積，方向都是一樣，還高了幾層，所以，佢認為啱價，唔再等，誰不知，他的親戚朋友知道之後，話樓市還有得跌，仲話係我講，而年輕朋友亦講，啱價就可以買，何謂啱價？

　　年輕朋友對友人講，他今日買的單位比以前的更佳，但少付了40萬首期，每月供款又減少了2千5，對個人財務負擔輕鬆不少，又達成了置業宏願，仲唔啱價，他的朋友冇得駁。其實，啱價是沒有一個準則，因人而異，年輕朋友識得運用，俾個Like佢。