地產博客 > 資深會員專欄 返回
瀏覽人次:24990    回應:17
資深會員專欄

港燦式茶餐廳 豬仔呀豬仔

 

引刀一快

2019年2月15日

呢排,社會上好多關於野豬嘅爭詏,引入天敵、殺與唔殺、送去海島、又或者引刀成一快,將豬閹鬼嗮。香港咁派系化,唔使講又係兩派人開始對壘,不過引刀兩邊都唔係,試試講下啲農務系嘅個人睇法。

由於長期蟄伏喺大灣區,香港新聞不一定日日睇,打開Yahoo一搜,真係嚇一跳,銅鑼灣都有野豬行街,咁就真係大問題,我唔係話怕野豬侵略人嘅地盤,而係恐怕香港嘅自然環境,已經暗暗被嚴重破壞。

野豬係雜食動物,千祁咪以為佢地淨係食番薯,就我所知,佢地好中意食蛇,而且對部分蛇毒可能免疫,以前我喺大陸某山做嘢,要同山佬打交道,佢地話我知,野豬肚(野豬胃)好值錢,而且食過五步蛇(即係蘄蛇)嘅最值錢,當野豬見到五步蛇,就會成條吞,蛇未死之前,會垂死反撲,用毒牙咬野豬嘅胃,留底印記,佢地打到野豬,個豬肚係睇牙印估價嘅,不過,我唔記得食咗補邊樣。有野豬嘅地方,恐怕蛇同龜首先遭殃,野豬唔會因為有人餵就唔食天然嘅嘢,番薯蘿蔔又點比得上蛇羹。


銅鑼灣大坑行街嘅野豬,估都估到邊度落街嘅喇,應該係禮賢會隔離條山坡樓梯行落嚟嘅,以前細個久唔久就行呢條樓梯上勵德邨、新法、胡文虎,聽聞有同學喺果度見過water monitor,當然,啲友仔可能見到大條嘅馬鬃蛇一嘢騰雞睇錯喇,再上去怡景道,以前有人收潲水養豬,雖然已經停養多年,恐怕野豬聚集仍不無關係。


講吓天敵,其實南中國嘅野豬天敵,除咗虎豹之外,仲有一種,而且香港一直都有,就係大南蛇,緬甸蟒。按道理,野豬咁多,即係豬仔都多喇,蟒蛇應該同樣肥仔,百子千孫,細蟒蛇就食青蛙、老鼠,大咗就唔該生生性性,幫手食多D野豬喇。


不過,南蛇食野豬,唔係十分得食,因為豬仔有大豬保護,香港大隻嘅野豬,恐怕要中南美洲嘅森蚺先搞得佢掂。另一方面,香港野豬大多群體行動,蛇咬住一隻,其他豬會攻擊蛇。地戰再有效,都不能抵擋兩個或以上嘅敵人。


送去孤島?先唔講野豬識游水,就係一個孤島忽然多咗幾十以至幾百隻野豬,整個島上生態馬上大浩劫,而且你仲要好似以前大鴉洲養住啲越南船民咁,日日送飯過去,否則食光個島之後,野豬就會食同類嘅屍體,到時一定成為國際新聞。


野豬氾濫,多多少少都同樓價扯上關係,咁都得?係呀,真㗎。樓價越來越貴,香港人住嘅屋越來越細,莫講養貓狗,就算養缸魚都要諗過度過,好多屋宛仲唔俾養貓狗,咁佢地寄情餵飼流浪動物、野生動物,一啲都唔奇怪,尤其是當一隻野生動物對人產生信任,同你交流,果種感覺真係妙不可言,個人睇法,所謂靈性,就係人類所未能掌握嘅互動,呢樣嘢完全凌駕於物種分歧,甚至係因為跨物種而放大。一旦產生,無數可以言傳及不能言喻嘅感覺滿溢於胸懷。


另一個原因,可能同宗教有關。香港每個禮拜咁多人去放生,有收錢組團有自發,個個善信莫非係求家人平安,自己發達之類,咁放生同救濟,都係差唔多啫,部分人餵流浪貓仔狗仔,部分人可能就選擇救濟D野豬。按道理,救啲野生嘢係應該功德大啲,因為人工養殖嘅動物,本來投胎今世就係要受一刀,而野生動物日日吸埋吸埋啲天地靈氣日月精華,報恩都夠力啲啲喇,係咪?


所以,靠嚴管餵飼去減少野豬數量,基本上唔會有幾多成效,你喺呢個黑點裝cam,佢轉去第度話都冇咁易,只要係有人心念山上幾隻豬仔肚子餓,就會有人諗計突破監控,又唔係傷天害理,完全唔會有道德約束。


既然已經有大量市民對野豬產生感情,咁就應該順應民意,將果啲有名有姓嘅寶貝豬豬,由善信及動保人士帶路,用麻醉槍全部捕捉,檢疫絕育之後,揾個地方養起佢,俾人繼續餵,飼料都慳返,其他冇人識得嘅咖哩啡,就要適當地捕捉,最好打咗之後全部俾長者進補,由深水埗明哥主理,搞個一年一度或半年一度嘅耆英山豬節,老人家一定食得好開心,而最重要係動物身體冇被浪費,合乎對待野生動物嘅道德操守。

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. G 2019-02-15 09:51:18
好文采.
不過野豬食垃圾,香港老人重健康,耆英山豬節,如有人食完疴到震,又有排上頭版新聞.

2. 野豬的天敵 2019-02-15 09:52:36
相關圖片

豬肚煲雞好好味

 

整煲野豬肚煲雞係蘋果日報籽子賣吓廣告,一年半載後野豬問題立即解決


3. 自我陶醉 2019-02-15 09:54:01
很有趣味的文章,野豬最可怕敵人係人,如果放寬獵豬兩年,保証問題很快就解決。哈哈哈!
4. 引刀一快 2019-02-15 10:57:56
To 1樓 G兄

多謝!野豬肉除咗未必過到檢疫一關之外,其實應該冇問題,而且係非常優質食品,過去香港人食嘅豬,部分係潲水餵,以前怡景道山坡有運輸帶送潲水入山,附近強烈酸臭味瀰漫,啲豬食咁嘅嘢,豬肉都好食過飼料豬呀。最重要係烹調處理嚴謹啲,野味必須十成熟,咁就冇問題嘞。
5. 引刀一快 2019-02-15 11:02:22
To 2樓 野豬的天敵兄

香港嘅野豬係堅嘢,成隻都係寶,香港D冰鮮雞,襯佢唔起㗎。


6. 引刀一快 2019-02-15 11:10:21
To 3樓自我陶醉兄

多謝!開放打野豬兩年可以,不過必須嚴格監控,最怕班友食野豬食厭咗,走去打赤麂。
依家最大問題係已經有部分野豬同市民發生咗情感上聯繫,D豬又表現好溫順,好地地,打死佢好似好殘忍咁,如果再多啲YouTuber拍野豬,咁就會越來越難搞,所以盡早將餵熟咗果批野豬同大群割離,係當務之急。
7. 醉未醒 2019-02-15 12:08:40
一晚攪掂.當野豬非法越境居留,出動各路精英搜山活捉,交洗頭艇解走.(笑話一則)
8. 引刀一快 2019-02-15 12:54:07
To 7樓 未醒君

睇怕洗頭艇都要一百幾十隻。
9. 望東樓 2019-02-16 13:20:20
我上兩個月係禮頓山門口見到隻,可惜轉頭返去想同佢合照就已經走咗。

係一個BB車/孭帶主要用嚟載狗、淡水龜擗落鹹水海放生嘅社會,你仲可以有乜期望?
10. 引刀一快 2019-02-16 21:55:14
東樓兄

禮頓山一帶係香港其中一個近鬧市嘅野生動物天堂,可能係因為地段比較高檔,捉嘢嘅人比較顧忌,怕俾差人逗卦?附近嘅天主教墳場,係伊甸園嚟㗎,附近D達官貴人走失嘅鸚鵡,喺果一帶有可能已經形成自然種群,我連鮭色鸚鵡都見過。東樓兄果一次冇合照,下次可能集體照☺。

攞淡水龜去大海放死係衰,未係最衰,放識得繁殖果啲外來入侵物種,比害死D龜帶來更壞後果。


11. 望東樓 2019-02-16 22:33:38
請教小刀:傳銷/直銷係內地唔係非法嘅咩?
12. 引刀一快 2019-02-17 09:14:43
東樓兄

傳銷絕對係犯法,除非你愛國喇,明未?畫埋腸會招向飯㗎。
傳銷有好多種,細細檔有捆又打嘅北派,必掃。
X碧詩之類,走嚹落香港“上課”,依家走高檔路線,好似轉行賣奶粉紅酒。
仲有一D,根本傳銷直銷都唔係,連揾D貨做幌子都慳番,直情種金,完全冇事,因為“自動轉賬”,東樓兄一定明解。
無極有限公司,識得同D大當家、總舵主飲兩杯,當年直銷傳銷定義隨佢嗡,呢個係比較關鍵。
13. 向引刀‧土著‧自醉‧浪子說不 2019-02-17 21:39:33
引刀一快叻叻豬‧‧‧‧‧‧

相關圖片

Time is slipping away, do you (引刀‧土著‧自醉‧浪子) got WHAT you want ?



14. 引刀一快 2019-02-18 00:01:37
說不女,你係時候換洗髮水喇。
15. 引刀一快 2019-02-18 00:04:33

東樓兄


就講我近兩三年見到嘅,傳銷嘅人,不一定當下線係豬,有D係以拯救心態發展下線,真人真事。我識得一對夫婦,就係做咗傳銷,而且就係冇貨賣直接交卅六個六果種南派,佢地俾上線洗腦,認為收下線係扶對方一把,帶領對方脫貧,利人利己。而佢嘅上線,係一個德高望重嘅六十幾歲“年輕人”,咪以為佢係老狐狸,佢都係俾人洗腦,想提攜後輩,而佢自己亦真係豬籠入水,一炮買兩部靚車俾自己對仔,百幾皮,咁啲細嘅睇見,乜都信嗮佢喇,兩夫婦一齊去咗某省會嘅一個偏僻地區,好似一個大型廉租屋邨咁,成個區都唔係商品房,入去之後,兩公婆同個仔嘅手機都俾人監控咗,人就好似著魔咁,佢地個仔揾親戚朋友求救,佢地就揾親戚朋友傳道,最恐怖係,哪怕你已經分析到佢地明白,呢樣嘢有問題,基本上一世都未做到出局,但係佢兩公婆依然依依不捨、遊戲繼續!最後係出咗嘅戲劇性結局,阿叔可能有日發現一啲端倪,主動出手解散下線,叫嗮佢識得嘅返屋企,阿叔之後日日以淚洗面,據說幾個月唔瞓得,講到呢度,我睇到幾點:


1,呢個阿叔係處世非常好嘅人,有人信賴佢係好正常嘅事。


2,呢個阿叔嘅做法,引起連鎖反應,據講佢分支之外,亦有好多人睇住佢頭走咗,成個區空咗一批屋出嚟,不過阿叔冇俾人傷害,即係話南派做嘢真係非常克制。


3,阿叔咁世故都落疊,佢上線功底何其高深


4,呢樣嘢明顯完全駕馭人性,洗腦未必係被動過程,可能好似一粒種子咁,外面見到第一片葉時,根已經幾吋深。


5,呢兩公婆亦非等閒之輩,一個係某範疇業界精英,一個學歷好高,雙劍合璧做咗傳銷近一年,居然一個下線都收唔到,笑爆嘴!

16. 望東樓 2019-02-18 11:31:28
例外嘅可能係未了解事實本質?咁係咪其實更加可悲?又或者無極限真係例外掛。
17. 引刀一快 2019-02-20 05:04:05
東樓兄

最可怕嘅嘢,係理解與不理解之間,事物被人性慾望貪念牽引而朝住圈套所預設方式去理解,甚至自我催眠自找各種理由去理解。
無極有限公司是否傳銷並不重要,因為社會上形形色色嘅傳銷千奇百怪,無極已經係最“規範”嘅一類,就好似大陸嘅六合彩咁,以前人人話佢地害人不淺,直至福利彩票單嘢揭露之後,先至發現原來六合彩莊家係良心企業!