地產博客 > 資深會員專欄 返回
瀏覽人次:42363    回應:65
資深會員專欄

專業機構投資者(七)遺憾

 

珍惜香港

法團專業投資者
SMIEEE.MSc(ICDE)
http://facebook.com/hongkongtruevalue/
2016年12月24日

上週日,地產論壇發生咗一件,令我非常遺憾嘅事。《長河亂話(十)- 加息與樓價》整篇文章連同所有回應,被作者一次過全刪。要睇番原文,連同首 20 個回應,恐怕只能夠引用唔知仲會保留幾耐嘅 Google 快取;至於我自己第二、三個回應,亦只可以透過,地產網嘅搜尋功能,見番一部份。

刪文嘅原因,大慨喺有人觸及咗作者嘅底線,至於喺乜嘢底線,我唔猜測,亦唔評論。一年前,我曾經慨嘆,所謂底線,恍惚,沒有最低,只有更低。今日,我仍然响地產網出文同回應,喺基於對網站同朋友嘅感情,但唔代表,我喺冇底線。

賺錢從來都唔簡單

記得上文一開始,我就提到今年五月初,一位非註冊回應者嘅留言。佢第一句喺話:「原本,地產論文是用來講解投資房地產的成功之道」。雖然所謂成功,喺冇標準,但任何一個人,做出咗成績,同大家分享,我地都應該抱住學習嘅態度去睇。有人眼見一啲投資者,通過買債賺錢,甚至上埋位,就冷嘲一句:早幾年買債嘅人,白痴都可以賺到大錢。真喺想唔到,呢種只有失敗者眼紅他人成功嘅言論,竟然會出自一個自命投資者嘅筆下。賺錢,從來都喺好難;擁有,亦唔喺必然。尋日,我問一位生意朋友:你會請一個幫你賺錢嘅白痴,定喺一個蝕你錢嘅專家?

經歷多年營商,多年管理下屬嘅生意人,一個問題,就已經睇穿咗我想講乜,仲好有共鳴。其實,我寫嘅文章,一啲都唔難明,不過有網友認為,投資嘢,樓就樓、股就股、債就債,搞乜一大堆隱喻,轉幾十個彎將簡單事情高深化?咁又喺!我寫一啲看似好合理嘅邏輯分析,跟住同你講,邊隻 NUMBER 嘅股票會升、邊隻債高息兼穩陣、邊個時刻樓市將會見底,你跟住我嘅「答案」入貨,賺咗錢;嘩!投資,真喺好簡單啊!

朋友,我老老實實話你知,就算你跟足我去買,我會贏,而你就會輸,點解?因為我同你,背景唔同、規模唔同、自身情況唔同,不過呢啲,都唔喺最重要。最關鍵喺,我同你,投資嘅心態,唔一樣。你執著嘅,喺一個答案,一個「預期」嘅答案,而我睇嘅,就喺所謂「現在嘅基礎因素」。所以當市場轉角,而你見到自己投資物個「價」回調果陣,就會觸發你祟尚果啲「止蝕」之類嘅所謂投資操作,跟手沽咗去。而長期投機,响市場嘅波浪之中浮沉,有輸有贏,就正如早前一位朋友話,最終都喺瞎忙

有如做生意嘅投資之道

至於我,既然已經睇清楚「現在嘅基礎因素」,所見到投資物嘅「值」,就自然唔會因為個「價」回調咗而改變。所以我喺可以瞓身,而我嘅風險管理,亦會側重於好努力咁,去確保自己嘅持貨,甚至喺增持嘅能力。呢個投資過程,喺持續性,同創業、搞生意一樣,通過行使投資物,為自己帶嚟最大嘅利益。

其實,我第一次提三個十倍,就已經帶出咗呢個概念,之後,仲公開埋我嘅操作,但我揀嘅題目,唔喺語出驚人嘅「三個十倍」喎,而喺「市場嘅角色」,點解?不如我反問大家,睇咗我嘅文章,喺唔喺就等於,可以隨便搞間投資公司,搭呢個棚出嚟?真喺做得到嘅,會唔會喺一個白痴?但「三個十倍」本身,唔喺最重要,我嘅目的,喺要通過自己嘅分享,帶出有如做生意一般嘅投資之道。只要心態正確,清楚了解同體現自己,响實體經濟裡面嘅角色,咁無論事業、生意、以及投資各方面,就算,只喺得三厘半,都一樣可以好成功。

所以話,我嘅文章,根本一啲都唔難明。點解我會花咁大篇幅寫《歸邊》?點解《明燈.答案》會成為《歸邊》嘅序?如果見到我嘅文章,引用咗一系列網友嘅回應,就認定我花咁多心機同時間,喺為咗啲唔知乜恩怨情仇,而睇唔出我為大家,帶出咗乜嘢訊息嘅話,咁好遺憾,請恕我直言:你真喺太膚淺!而唔單止喺咁,你仲俾我講中哂,即喺果句:一個答案嘅執著囉

物業投資嘅貢獻

可惜,更遺憾嘅喺,今時今日,社會上好多人,尤其啲主流媒體,都鼓吹呢種態度。難怪會有網友,否定物業投資對社會嘅貢獻,反而將啲金融嘢,同創業混為一談,仲美其名為「多元化」嘅發展喎!試問一個醉心股場嘅人,可以有幾創新?可以點創業?日日睇住個市,整日分析埋啲唔知會唔會跑得出嘅,所謂預測,仲剩番幾多時空去創新?俾你响股場撈咗一筆,真喺會腳踏實地咁,走去創業咩?

其實物業投資,對社會嘅貢獻,唔在於投資嘅本身,而喺在於物業對社會、對個人,衍生嘅一系列,有形以及無形嘅「值」。否定物業投資,即喺否定香港人,多年嚟建設香港嘅努力,亦即喺否定咗,香港嘅歷史。

我地呢一代嘅人,買物業自住,都只喺為咗一個「家」,而唔喺為咗乜嘢賺錢。穩定自己嘅家人,唔要佢地居無定所,同時鎖定支出,先至可以一心一意咁,投身响自己嘅事業同生意度。曾幾何時,我根本就唔知乜嘢喺負資產;買咗,就喺買咗;借咗,就喺借咗。欠銀行幾球,乜唔喺已經負咗咩?借錢買嘢,當然要依時歸還,個樓價升升跌跌,關我筆債乜事?唔通唔使還?既然從來都認為自己喺負咗,咁到沙士果陣,啲人講負資產,我都只喺一笑置之,反正都喺一樣咁住,一樣咁收租,一樣咁還錢。

其實好多生意人,都有買物業收租,佢地將自己嘅積蓄,放哂响啲磚頭度。創業嘅第一桶金,通常都喺嚟自好有限嘅儲蓄,或者同親朋戚友借,又或者抵押物業融資,唔夠,就幾個拍檔夾份。結果,離離合合,上得軌道嘅,可能只剩番一兩個老細。遇上周轉問題,好多時,都要舉自己啲物業出嚟,唔喺邊個肯借俾你?成功嘅,就成為出色嘅生意人,順帶成為出色嘅物業投資者;而失敗嘅,就連自己儲蓄多年嘅磚頭都敗哂,甚至搞到破產。過往幾十年,有幾多可歌可泣嘅故事,建設成今日嘅香港?香港人,似乎已經忘記哂呢啲往事。

曹伯眼中嘅青春

曹仁超話:年輕人,不要讓 500 尺綁住你的青春。一句說話,一個專訪,就抹煞哂香港人,幾十年嚟嘅努力。就好似,一對盲字都唔識多隻嘅父母,辛辛苦苦用一雙手,養大自己對仔女。跟住,對仔女同父母講:你地已經過時啦!各位唔好誤會,以為對仔女嘅意思,喺認為父母冇學識,不合時宜。佢地喺話,「努力」呢家嘢,已經過時啦!今日最時興嘅,唔喺義務,喺權利嘛

所以曹伯話,年青人冇創意,喺因為租金太貴,冇個車房俾佢地思考喎!而香港攞得台灣同 INTEL 果啲二手嘢,就話要搞半導體?嘥氣啦!冇頂級國防科技送上門,點開工呀?創業?使乜咁辛苦,左借右借,仲要清哂自己寶貴嘅積蓄,舉埋自己啲磚頭出嚟?OMG!梗喺要學下人地,搞個 IDEA 攞番一兩球美金洗洗先,天跌落嚟嘅錢,唔使負責,即喺冇壓力啦!皆因我地啲年青人,有壓力果陣,喺諗唔到嘢架!再加埋個車房,輕輕鬆鬆咁思考,容乜易搞咗個 FACEBOOK 出嚟?

當日我話,睇完曹伯果篇專訪,終於見識到,乜嘢喺「廢」,我諗我已經好俾面。無疑,曹伯對時下嘅年青人,寵愛有加,就好似有啲父母,溺愛自己嘅子女一樣;又有如董前前特首,呢位老人家咁,都唔知幾愛護香港市民,仲話要八成市民有自置物業,出埋錢幫佢地都冇所謂喎!或者佢有所不知,佢想,人地都未必想,做乜強行要八成人置業?雖然我亦好鼓勵,有能力嘅人,及早上車,不過唔上車,亦唔使死嘅。呢個世界,總有人買樓,亦總有人租樓,最重要喺,自己冇嘅,千祈唔好眼紅人地有,更加唔好眼紅人地有多幾件收租,話人地霸住哂啲資源。

曹伯對物業投資,作全面嘅否定,認為靠收租嘅社會冇前途。呢位故人,對好多香港人,影響深遠,但可惜最後留低嘅,卻喺抹煞香港人,幾十年嚟努力嘅言論,亦令到物業投資者,以及窮一生之力,貢獻社會嘅生意人,含冤受屈。最近湯博士出文,講新特首嘅首要工作,引嚟一番討論,當中有人提到內地「房子用來住,不是用來炒」呢個大方向。以前講炒樓,都喺泛指果班低入高沽,短期賺價嘅投機者。佢地空置物業,浪費資源,被冠以「炒家」嘅污名。今日,就連腳踏實地,買樓收租嘅長線投資者,都受到針對,俾人講成喺炒樓,真喺可悲。再加辣,最多叫佢地唔再入貨啫,但咁都唔夠,仲要玩乜新思維,搞乜租管、搞乜房產稅之類,強要人地嘔番啲貨出嚟?咁香港,仲可以有資格,叫做國際金融中心咩?

輸打贏要嘅歪風

由金融風暴、沙士、金融海嘯,到依家呢十幾二十年間,香港人,都有好多置業嘅機會。可惜有唔少人,因為執著個預期,執著個答案,屢次錯過時機;而有部份人,更沽咗自住樓等跌,搞到上唔番車。積怨之下,就遷怒於物業持份者,仲要影響埋啲年青人,令佢地覺得,自己買唔到樓,就喺社會嘅錯,就喺物業投資者嘅錯,政府應該要打擊佢地,逼佢地平價嘔番啲貨出嚟。原來呢個世界,真喺幾荒謬都有,自己失敗,就要成功嘅人埋單。果然,努力呢家嘢,已經過時啦!今時今日,只要夠大聲,夠人多就得。

呢種輸打贏要嘅歪風,似乎已經充斥著整個社會,甚至喺全球,尤其以成熟發展嘅經濟體,最為嚴重。話說 CY 响餘下呢半年任期裡面,會盡力完成佢果三項競選承諾。呢三味嘢,真喺不敢恭維,就睇當中嘅,取消強積金對沖,我三年前都話過,根本就喺輸打贏要。老闆供果 5%,本身就喺薪酬以外,儲定錢將來賠俾你,只不過勞工界扮失憶,當咗呢啲喺人工嘅一部份啫。家陣反口唔俾攞嚟賠,咁點解要供多 5%?即喺變相加薪 5%?咁都得?香港人,似乎已經忘記咗,以前打工近兩年就擔心俾人裁嘅日子。市場現實,唔喺你夾硬嚟,就可以改變得到。今日,你輸打贏要,他日,就唔好埋怨小企業受打壓,年青人創唔到業,財團話哂事,打工仔 NO SAY。

向周光暉致敬

幾日前,選委會會計界,選舉落敗嘅建制候選人周光暉,寫咗一篇文章。佢話「會計師公會的新年輕會計師大部份都未置業或未能置業,他們同時亦因為年資、職位及薪水較低要受氣而投反建制一票」。唔使多講,文章一出,即刻惹嚟劣評如潮。啱啱講開輸打贏要呢個話題,大家千祈唔好誤會,以為我影射佢,人地只不過講出咗落敗嘅原因,冇話過要改變或者否認選舉嘅結果,點會喺輸打贏要?相反,我仲非常敬佩,佢嘅勇氣同承擔。佢對手民綷派關梓謙話佢離地,而我就話,人地都唔知幾貼地。當今社會,敢於响年青人面前,直接講出啲咁逆耳嘅事實嘅人,真喺已經買少見少。

話時話,我都喺屬於專業界別,記得早前,亦有慨嘆過資訊科技界嘅選舉結果,但都冇寫得咁直接。我只喺話「IT 界啲選民喺乜嘢人,真喺唔使多講」啫,至於喺「乜嘢人」呢,心照算啦!既然功能界別啲選民,投票嘅標準,根本就唔喺睇佢地界別長遠發展嘅利益,而只喺為咗表達對自己遭遇嘅不滿,咁呢班選民,根本就稱唔上喺專業人士。即喺話,功能界別,已經發揮唔到平衡各界利益嘅作用,可以取消得啦!

社會嘅精英

我後生嘅年代,香港只有兩間大學,大學生,專業人士,都喺社會嘅精英,而今日呢,大學生,已經不外如是,而好多界別嘅專業人士,亦開始出現供應過剩嘅現象。呢啲,唔通又喺社會嘅錯?政府嘅錯?財團嘅錯?十幾年免費教育、N 間專上學院提供學位課程,搞到通街都喺大學生,個個以為自己好叻。無論社會、政府、財團,响教育同人才培訓方面,投入嘅資源,只會越嚟越多。歸根究底,都喺好多香港人,尤其喺年青人,唔肯面對一個,幾十年嚟,以及打後幾十年,都唔會改變嘅所謂,現在嘅基礎因素。吓?乜又喺「現在嘅基礎因素」?

只有社會嘅精英,先至有能力上到位,而精英,亦只會喺少數。呢個就喺所謂,現在嘅基礎因素,即喺唔會隨便受市場變化影響嘅長期因素。一張證書,一個專業資格,唔代表你就喺精英。既然今日,一個可觀數量嘅大學生,都只喺有如當年一個文員嘅層次,咁我地就唔可以基於,大學生買唔到樓,而判定今日嘅樓價喺太高。

同樣地,真喺白痴嘅,就唔會賺到錢,更加唔會上到位。一個唔起眼,冇乜大志嘅磚頭塔利班,當年幾十萬買咗個地舖,今日身家過億,月收幾十萬租。書獃子解釋唔到嘅成功之道,就冠以幸運之名,但原來,投資呢家嘢,根本就唔可以單從書本上學到,亦唔喺乜嘢經濟學理論可以解釋,因為投資要成功,最重要嘅,喺心態!只有,腳踏實地嘅人,先至有能力,睇得穿「現在嘅基礎因素」,唔會因為個「價」嘅波動而動搖。冇動搖,絕非喺賺唔夠、唔肯離枱,亦絕非喺唔夠專業、止唔到蝕,而喺明白到,好多事物嘅「值」,都喺唔可以用「價」去衡量

最難明之解

响《歸邊》一文裡面,我話:好多人,唔甘心於「現在」,不惜押注於「預測」,因為佢地以為,只要心目中嘅「答案」跑出,就可以跟自己「預期」一樣,突破「現在」嘅規範。但原來,佢地最唔甘心果啲,先至喺最能夠引領佢地,成功靠邊嘅重要元素。

唔知上面呢段,算唔算喺《歸邊》最難明嘅部份?對現狀不滿嘅人,多不勝數。例如,點解要用「我」啲錢賠番俾我?取消對沖咪得囉!咁「預期」打工仔就會更有保障啦!又例如,點解大學生、專業人士都買唔起樓?加辣咪得囉!咁「預期」樓價就可以跌到個個大學生都買得起啦!又例如當年,點解得咁少人上到大學?加多幾間大學,開多啲學位課程咪得囉!知識,改變命運嘛!到時個個都喺大學生,「預期」個個都賺到錢啦!又例如,買咗樓自住,樓價就下跌,人地遲買嘅,住大咗,仲供少咗喎,好唔抵啫!梗喺「止蝕」沽咗去,租住先,等樓價「預期」跌番三五七成,再入番咪得囉!

以「改變」,以「CHANGE」作為旗號上場嘅政治家,多不勝數,但到頭來真喺改變到啲乜嘢?到最後,果啲咁渴望改變嘅人,可以得到佢地「預期」嘅結果咩?CY 上場,順應民綷,搞消極施政,同大地產商對著幹,將地產霸權拉落嚟;今日,中資高價投地。或者大家唔滿意地產霸權,FINE,NO PROBLEM,換咗做中資霸權囉!各位滿意未?都喺果句,任何市場發展,都喺趨向歸邊,夾硬嚟,喺唔會有作用。失敗者,唔肯面對現實嘅話,永遠都只能做失敗者。

其實呢個世界,有好多嘢,都喺因為須要存在而存在。就好似老闆供果 5%、樓價嘅高企、學位嘅有限供應,仲有你自己住緊果間自置物業等。對於呢啲現狀,你可能覺得唔甘心,但原來,你肯面對、接受、同配合呢啲現狀,改進自己嘅話,咁你最唔甘心果啲嘢,反而就成為引領你,成功靠邊嘅重要元素。就好似,周光暉寫嘅第三點:「你有否考慮拿着會計師專業銜頭及相關工作經驗及人脈網絡,會加快為你在離開會計師事務所後的晉升機會及薪酬」?所以點解我話,呢位自稱已退休兼無求嘅,會計師公會前會長,都唔知幾貼地啦

告別回應箱

回看刪文事件;回看曹伯留低果篇,令時下年青人鼓掌嘅專訪;再回看周光暉被人唾罵嘅文章,除咗遺憾之外,就只有遺憾。現實,從來都喺咁唔啱聽,而勇於發表嘅人,亦已經越嚟越少。記得我曾經話過,網站,只喺社會嘅縮影,社會要變化,網站亦會隨之改變。我諗起《》,諗起《十四篇後感》,而到咗今日,已經喺第三個里程碑,真喺好唏噓。

三年光景,昔日良朋,以文深交,不再

想當年,有朋友話,睇回應箱,甚至比起睇原文,穫益更多。

滾滾長江東逝水,浪花淘盡英雄,是非成敗轉頭空。青山依舊在,幾度夕陽紅。
白髮漁樵江渚上,慣看秋月春風,一壺濁酒喜相逢。古今多少事,都付笑談中。

各位,我要告別回應箱啦!

不過告別回應箱,唔代表告別論壇嘅。我仍然會繼續出文,就好似其他作者咁,唔回應,就避免咗好多同議題無關嘅爭拗,咁我有限嘅時空,就可以集中番响出文嘅主題度,而唔出文果陣,亦唔好阻我同屋企人溫馨嘅寶貴時間。至於高調宣佈,千祈唔好誤會,我唔喺要引起爭論,只喺為咗封印自己,唔想自己將來忍唔到手啫。

希望大家明白我嘅難處,並繼續擁躍回應,擁躍討論,就算只喺,路過留一聲招呼,我已經好感激。你地所有回應,我保證一定睇哂。雖然唔會立即回覆,但一切疑問同討論,將會响下一篇交代,以及成為我之後出文嘅題材。

長期嘅祝福

呢個決定,亦意味著,我一年兩次新年祝願嘅習慣,已經劃上句號。

不過臨近聖誕,都要同大家講聲,聖誕快樂!

雖然冇咗新年祝願,但我仍然會响心裡面,永遠祝福大家!等等 ...「永遠」似乎誇張咗啲,再者,我喺「長線」投資者,唔喺「永遠」投資者嘛

咁我就响有生之年,長期祝福大家啦!

Natalie Cole:Someone That I Used To Love

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 原來如此 2016-12-24 02:35:08
若有戰,召必回。
2. 元朗人 2016-12-24 04:15:46
多謝珍惜兄出文。

十分同意珍惜兄告別回應箱做法,博士大致也如此。

双星報喜開場白,可能幾落後但是依然過瘾:

點到你吾服

點解我要服


3. 引刀一快 2016-12-24 07:11:26
果然犀利,一面隊人一面講明唔回應。




4. 引刀一快 2016-12-24 07:43:39
文章抨擊他人,又要掛免戰金牌,珍港,你都得架喇你。

記住,細路仔都應該要識嘅規矩,想免戰就唔好撩人,呢D唔係常識,係教養。

然而,你唔回應唔表示人家唔可以駁你,呢度幾大嘅博主都會俾人反駁,你唔好奢望一個超然嘅地位。

攞得尾彩,就應該預咗俾人追數。
5. 路人xx 2016-12-24 09:08:22
刀兄,人家花時間花心機分享經驗,啱聽嘅咪睇下囉,唔啱聽嘅咪唔好睇囉,又要睇又要鬧,點解要咁作賤自己呀?而且仲係為咗鬧而鬧,冇point,好似街市啲八婆喺度講是非咁樣,唔夠人哋講又爆人哋私隱,你幾多歲啊?成年人嚟架你,你好得閑咩?再唔係,自己有料嘅,咪自己寫返篇文章囉。睇吓有冇咁多人Like? 有冇咁多人尊重你?你留言咁耐,一直睇錯市,事實擺在眼前,你方向錯,方法又錯,你有冇料,大家有眼睇㗎!
6. AH-HO 2016-12-24 09:51:52
聖誕快樂。
以現在回應箱的普遍情況來說,支持你這個決定。
7. 費青舊友 2016-12-24 10:39:04
支持,珍重。
8. 向飯民說不 2016-12-24 10:43:15
5楼,你同个食假米食到傻下傻下的黄尸认真,你就输啦。
9. 八十後 2016-12-24 11:08:35
謝謝啊!
珍港兄!
10. MMC 2016-12-24 11:16:19
感激丶無言、無奈!
11. 引刀一快 2016-12-24 11:39:28
路人xx

等你做評判,郭晶晶就一個金牌都攞唔到,我講得好明,“文章抨擊他人,又要掛免戰金牌”“想免戰就唔好撩人

明顯你都冇睇博文內容喇,唔係點會有咁嘅問題?
12. 順民 2016-12-24 11:41:12

論文章和見地﹐珍港兄可說是在此論譠﹐誰與爭鋒 ? 令人佩服 !

若有心挑戰者須自知量力 !

13. 向飯民說不 2016-12-24 11:56:58
不过精英,你还是要觉醒,5年叙利亚的黄尸精英,在Aleppo发动颜色革命,为什么选择Aleppo,因为这里就像香港比较开放,又很多接受了西方思想的年轻人。他们反对体制,所以在老美的支持下,和提供武器之下,发动颜色革命,结果呢?今日Aleppo变成点。

香港的两年前的占中,其实都是一样,幸亏老美只是提供雨伞,不是武器。不然香港现在肯定变成了大陆和美国人的新式武器实验厂。

CY无错,以为玩民粹,就可以提升民望,这是传统共产党夺权的方式,不过时代不同。他玩民粹,结果被饭民的更大民粹玩返转头。至于SSD,BSD也不要怪他了,事实上台北,加拿大,澳洲,大陆和新加波很多大城市都实施了这样的政策。其实讲返转头,这其实是去杠杆化的手段,在美国的QE之下,你没有SSD和BSD政策,好容易被美国佬刮毛。有钱佬,不要那么自私和无知啦。可能你们以为可以杀鸡取卵,因为香港崩溃,你们可以在加拿大,澳洲美国,不过放过我们,我们还是要在香港生活。

还有关于租管,他应该是抵挡了政府内部和饭民民粹的压力,所以没有推出租管。

黄尸,比条路我们行,每次看到阿拉伯之春,伊拉克,叙利亚,利比亚,乌克兰,那些被老美黄尸玩的颜色革命,现在人民的生活,我就庆幸香港有CY,有人民解放军。虽然不支持什么限奶令等等民粹政策。
14. 引刀一快 2016-12-24 11:57:59
係咁勁駛咩一面抨擊人,一面掛免戰金牌?

自知量力?論壇就如此,不能面對辯論者更須“自知量力”。
15. 小明 2016-12-24 13:17:22
引刀,你可能唔明,或者覺得唔順氣,但你似永遠唔會明,沈默的大多數包括小弟,欣賞珍港的不只是經驗或理念,而係一顆將自己認為正確的想法分享的勇氣及熱情。我只可以講,他那每篇包連結的文章,顯示的,只是想將他的一路思想架構清楚的作出敍述,不論同意否,這是其的網友也是不能不比下去的。

每個人也可以有自己的理念,你不同意他的,冇問題,但問題係,你的理念又是什麼?就是什麼剛需嗎?對不起,那頂盡是一個點子或看法,不是一個思想架構。你又叫其他人支持你什麼?而最重要是你給了什麼心機讓人支持你呢?

曾經,有人話過...
It is not the critic who counts; not the man who points out how the strong man stumbles, or where the doer of deeds could have done them better. The credit belongs to the man who is actually in the arena, whose face is marred by dust and sweat and blood; who strives valiantly; who errs, who comes short again and again, because there is no effort without error and shortcoming; but who does actually strive to do the deeds; who knows great enthusiasms, the great devotions; who spends himself in a worthy cause; who at the best knows in the end the triumph of high achievement, and who at the worst, if he fails, at least fails while daring greatly, so that his place shall never be with those cold and timid souls who neither know victory nor defeat.

呢個有少少似小弟對你的感覺。當然你可以唔同意。
16. 2011年開始 2016-12-24 13:20:48
多謝珍港兄無私分享,受益良多.
17. 回樓上引刀 2016-12-24 13:26:03
唔洗急,筆者已承認冇引刀咁勁:今時今日,只要夠大聲,夠人多就得。睇怕仲要加埋“夠多時間". 引刀嚟此晝夜洗板、宇宙無敵



18. Goal Keeper 2016-12-24 13:41:24
感激珍兄!
19. 葉子 2016-12-24 14:00:44
謝謝珍港兄,
我同你一樣都係價值投資者, 睇你篇文章後好有共鳴
我同身邊既朋友講投資, 十個有九個都唔會明價值投資
大部份都係想低買高賣, 所以最後都無興趣同佢地講
唯有等佢地自己參透, 橫點賺蝕都唔關人地事
見到佢地,吹吹水就算, 
你咁有心機寫文, 真係佩服
20. 魚蛋仔 2016-12-24 14:03:53

尊重珍兄決定,感謝過去分享!受益良多!

21. 打工仔 Andy 2016-12-24 15:37:04
珍兄

講得好! 其實係呢到真係學到好多野, 無論是好是淡都有各自嘅論點! 

謝謝珍兄 
22. 小師妹 2016-12-24 16:18:04
感謝珍港兄出文及分享亦尊重您不回應的決定!一切盡在不言中,多多珍重!
23. 引刀一快 2016-12-24 17:58:47
小明

呢個一直係好友場,淡友長期俾人惡意攻擊,分享咩?你會唔會要求笑爆嘴同拉拉隊同你分享?唔通你敢話笑爆嘴唔係有血有肉有思想嘅人?淨係好友IQ正常?咪幼稚喇。

喺論壇寫得嘢,就要有被否定、反駁嘅準備,呢個係蒲論壇嘅基本素質,遇到反駁就只會埋怨反駁者唔俾面。

作為淡友,想喺好友場得到嘅唔係恭維,而係答案,當你地寫出漏洞百出嘅帖,我自然會提問,通常得到嘅都唔係答案,而係更多嘅疑問。
呢度所有淡友以及部分看官一定有同感。

臨尾仲要攻擊一下對手跟住話免戰,呢種下三濫手段得到全面包容,只因呢個係好友場。
24. 榮仔 2016-12-24 19:22:36
珍兄,一直有睇你的文章
很感激你無私的分享,願意花咁多時間打咁長的文章
你的文章很能刺激讀者的思維,
看你和其他高手(歷史長河兄、亮劍兄、PP兄等)的文章和回應,不是求一個預期的答案。
高手一個接一個離開,確實有點可惜
我同意網站是社會的小縮影,現在的社會確實很民粹,支持珍兄的決定,希望可以很快再讀到你的文章,謝謝!聖誕快樂!!

PS我很小在論壇留言,但以前每天都會在本網站吸收各高人的分享,應算是沉默的一群吧,哈哈
25. 亮劍 2016-12-24 20:37:17
與珍港兄相比,小弟只係蛋散一件,能結識倒真正高手如珍港兄,係我畢生的榮幸。

26. 也是路過 2016-12-24 22:11:28

珍港兄,

謝謝過往分享。雖然有時覺得你的文章太長篇,有點沉悶,但可看到你用心的分享,再次謝謝。

刀兄,

覺得論壇無需分所謂好友、淡友,希望大家回應多寫觀黠看法,無須理會不友善之言論。

27. Sugar 2016-12-24 22:16:23
多謝珍港前輩分享 !
28. 認同引刀自我 2016-12-24 22:50:37
超,樓主不過係有幾個錢好彩就以為可以扮勁,PI好勁咩!
打交,一橫一直
投資,低買高賣,就係咁多,駛乜扮高深。
早幾年買債買樓,C9都變高人啦!
我估引刀同自醉如果同樓主同一起點,一定有錢三個十倍!
29. 榮仔 2016-12-25 00:36:32
亮劍兄,你太謙虛了
小弟80後,2013年中有緣在本網站讀到你們的文章
被你們啟發了,2013年年尾買了第一層樓(小弟當時只是個廿零歲的黃毛小子)
到今天已經有2.5層樓,小弟真的很感激這論壇的高人無私的分享
多謝你們!!
(剛才遺忘了另一高手法子兄)
30. MSK 2016-12-25 01:02:36
多謝珍兄一路以來的分享亦支持你的決定,我一向係價值投資策略的擁護者,在下睇咗論壇三年時間從真正有戰績及經驗的投資者身上分享獲益良多,而非靠把口連香港置業都搞唔掂留言離晒題的所謂投資者身上學嘢,每逢呢位八婆留言近半年已必飛唔睇,因為感覺上佢似我以前曾追看但已罷買的壹傳媒一樣靠大聲發放負能量達到收視目的,簡單的講係無恥。
正所謂同枱食飯各自修行,啱聽就學唔啱聽就算這是個人修養問題,珍兄相信已看清大局,願你繼續分享好文章。
31. 引刀一快 2016-12-25 04:18:46
路人xx

我依家先睇到,我幾時爆人隱私?你咪屈人喇,下流。
32. 命中財 2016-12-25 09:51:15
凡人往往認為財富是靠自身學識投資技巧而得,而不知命中根本是有的。
故自以為了不起,偏執自己的見解,不能回答就肆意批評攻擊,也不知這會減損自己的福報。
33. 可惜的聖誕 2016-12-25 10:57:45
本人也是靠此綱的C兄鼓勵 一位叫Oscar ,挨了幾年完成一生三宅,有盡力有能力去馬,但是鼠輩橫行,多位前輩棄壇而去,真可惜。
34. 路人xxxx 2016-12-25 15:14:43
引刀的回應一定不看。自己會舒服D。但這個引刀只是為反駁而反駁。完全沒有中心主旨。
珍惜前輩的文章識得仔細閱讀。獲益良多。
35. 引刀一快 2016-12-25 19:01:08
哈哈哈哈
36. 路人xxx 2016-12-25 21:13:38
引刀你幾時都厚面皮。又賴皮,成日想118,又話同人被印花稅,又無了影。。。
37. 歷史長河 2016-12-25 22:22:32
一點傷感,些許無奈,不變的的仍是犀利同摯著。

也許,選擇性的回應效果會好一點。從今次的回應箱留言來睇,讀者可謂心如明鏡,分得清楚什麼是合理提問求證,什麼是無理挑釁惡意攻擊。對前者可以通過回應嚟深化自己的論點,對後者則可以 ignore.

原來刪除的文章還可以揾到,如此我就重新發出吧,畢竟是自己一字一句寫出的,反映了當時的想法。多謝珍兄。
38. 引刀一快 2016-12-26 00:23:24
什麼是無理挑釁惡意攻擊。

長河san駕輕就熟喇。
39. 小米米 2016-12-26 00:38:35
選委会,係選特首,應該以全港利益為依歸;選委会委員若只强調各自功能界別的利益,當立法会议員咁選,當然好难被選上!
40. 歷史長河 2016-12-26 00:44:32
刀兄,歡迎對號入座,哈哈
41. 歷史長河 2016-12-26 01:02:46
榮仔,

恭喜你先。
小弟自認同珍港及「三傻」不在同一層次,不過相同的是對磚頭的熱愛及樂於交流。以後還望多多上來交流。

42. 引刀一快 2016-12-26 01:23:07
長河san,邊個可以撼動你嘅寶座吖。
43. 元朗人 2016-12-26 08:55:42
愚見認為論壇氣氛不應圍住任何人來轉,有壯志凌雲好,有收租收冇大志好,觀點放在這裡,時間便做見證。

政府屡出辣招,強力阻止新收租公/婆加入,現有收租人士要多多珍惜,就算今天話你冇鬼用乜投資都吾識,希望將來受人尊敬多少少啦。

百忍成金,忍耐忍耐,博士都話收租行業好悶㗎,互勉之!


44. 自我陶醉 2016-12-26 09:09:51
42樓 引刀兄,同君子講嘢就唔洗攞證據,不過同呢度某幾個人講嘢,最好就攞埋佢講嘅說話出嚟佢面前,然後睇佢繼續撐飯蓋個樣,有時都幾有趣。哈哈! 

例如:
 "5. ....,引刀兄繼續等浪。" 唔知算唔算係挑釁呢?



47. 惜緣 2016-12-26 11:41:44
好同意43樓元朗人兄所講, 在下認為, 搞到論壇回應箱如斯地步的雙方個別人士只不過係「半斤」與「八兩」之分, 唔客氣講句,對於這些人的言論除了討厭,還是討厭!!!

另外,謝謝珍港兄的分享,在下除了感恩,還是感恩!
48. 向飯民說不 2016-12-26 12:17:03
43樓,你話引刀死雞撐飯蓋。同意。不過你地幾個黃屍集團互相撐。都幾搞笑。
49. 引刀一快 2016-12-26 12:39:38
惜緣兄

請問你討厭先發動攻擊者,還是討厭還擊者?還是兩個都討厭?還是要求被攻擊者不還擊?

我相信佛祖會同意,凡事應該講道理。
50. 自我陶醉 2016-12-26 13:11:09
49樓 引刀兄

佛祖有割肉餵鷹的故事,耶穌也說:“有人打你的右臉,連左臉也 轉過來由他打。” 還手當然係錯,罪過罪過! 不如你都試試。

清代金纓格言聯壁亦有云:“靜坐常思己過,閒談莫論人非。” 這已經是最簡單要求,一樣好多人做唔到。哈哈哈!

51. 引刀一快 2016-12-26 13:16:51
自我陶醉兄

人家都開始用刪題嚟毀滅證據,好明顯根本冇諗過以理相搏。刪題、人海戰術、選擇性失明、選擇性失憶、選擇性失踪,然後湧一堆粉絲岀嚟搖旗呐喊,最後必然有人岀嚟慨嘆論壇淪落全因淡友。

不如我地扮埋好友算啦,一係乾脆唔再用藍色注册筆名發言,等佢地開心下。

浪嚟咗都一直夾硬唔認,祗因爲長河san佢最怕睇論壇嘅人感受到大陸嘅隱憂,所以我對佢呢類輕佻舉措表示理解,佢一心靠激人希望對手失態,呢類慣技就係呢類人嘅特色,我又點可以要求佢唔用呢?
52. 引刀一快 2016-12-26 13:30:07
To 50樓 自我陶醉兄 

有人打我右邊臉,我就打返佢左邊臉,因爲右手好力D。


53. 懷念以前的論壇回應和博士的觀點互相辉映 2016-12-26 22:30:54
懷念以前的論壇回應和博士的觀點互相辉映,一个初哥每天必看的!
54. 引刀一快 2016-12-27 05:04:04
最後必然有人岀嚟慨嘆論壇淪落全因淡友。
55. 講真 2016-12-27 06:10:10
最後必然有人岀嚟慨嘆論壇淪落全因引刀一快。
56. 引刀一快 2016-12-27 07:47:56
榮幸榮幸!
57. 正本清源 2016-12-27 09:11:04
論壇日日嘈嘈閉,此乃貧富之爭,請對号入座。
58. 亮劍 2016-12-27 15:44:34
歷史長河兄,小弟只係亂咁噏,對樓市只限於低層次的評論而矣。
喺呢5~6年,我對香港嘅楼市睇法始終如一,就係政府出錯招、落錯藥!
回想二十多年前,香港因為有中英聯合聲明的每年 50 公頃批地限制,引致樓市熾熱,回歸後特首董建華希望「撥亂反正」人人可上車,怎知踫上亞洲金融風暴,令到樓市徹底崩潰,間接引發中產上街。
中央政府不想香港沉淪,就找曾蔭權出來收拾爛攤子,曾特首的方案就係「一刀切」。佢首先大減公私营樓宇及土地供應,然後放寬信貸甚至連地都唔做去力挽狂瀾,這又引致由一個極端去到另一個極端。
呢七八年香港樓價升到阿媽都唔認得,追源究始內部原因係土地供應不足,而外在原因係美國引發金融海嘯,搞到全球爭相量寛,熱錢四處流竄之下,個個爭持磚頭自保。
因此呢幾年小弟不斷提出,一個年輕人買唔買到樓,不是看你的收入而係看你的家底,有無「父幹」!
其次係政府你要同地產商有商有量,才能令佢哋嘅農地儲備變成樓宇。
最後係政府要將某部分土地的地價,以分期付款方式向小業主收取,以免地價被人為搶高到不合理水平!

59. 屯門廠佬 2016-12-27 15:57:51

珍港兄,

獲益良多

珍重!

60. 肥婆四 2016-12-27 16:51:52
感謝珍兄鴻文,多年的文章回應,获益良多。不回應就多保重身體吧,渴望見到您的文章!
61. 香港土著 2016-12-27 18:45:32
好友言論就應該啱就聽唔啱聽都唔好出聲;淡友言論就令論壇好友唔出聲。高見!攣攣的心真係容不下不同聲音?
62. 二少 2016-12-27 19:05:56
如果連邊個係小人邊個你君子都分唔出,又點能夠做出正確投資,珍兄又何必為咗無恥師徒而影响心情呢?不值啊!
63. 引刀一快 2016-12-27 22:11:20
香港土著兄

我剛嚟呢個場嘅時候,淡友真係超弱勢,得笑爆咀久唔久講兩句,記憶中其他淡友都唔多,少有固定筆名長駐者。
冇幾耐之後自我陶醉兄來了,跟住其他淡友逐一出場,淡友嘅聲音先開始受到注意。
不過,基本上係敵視式注意。我記得有次講識得一個烏坎村嘅人,咁平常嘅事都會俾人連番質疑,任何分享,都會俾人攞嚟做話柄攻擊。
基本原因,係因爲呢幾年樓市癲,佢地已經習慣高高在上,睇淡會觸動佢地神經。
我希望呢種情况可以維持落去,



好玩呀!
64. 不明白 2016-12-27 23:24:32
真很難明白到底這是好友場還是淡友場。
現時好友已經很少發言及分享,大部份由個別看淡人士洗板。
65. 小鳳 2016-12-28 11:40:12

珍港大師告別回應真是可惜呀。不過您大概會像這篇文章一樣, 以出文章的方式回應反駁對手的觀點吧。 遠離泥漿混戰,以作者姿態予以還擊,這招真是高招啊! 支持您!!

66. 引刀一快 2016-12-28 13:38:50
再高招都可以拆你,就睇願唔願意花時間啫,新年大把時間,拭目而待。
67. Jerry 2016-12-28 15:17:54
珍港兄:

字數足夠出小說了,哈哈!^^謝謝用心分享,堅持己見!

無論係投資者、投機者、創業者、打工仔,要成功,怎可能只靠運氣?


成功的人,總有值得學習既地方。感謝!