地產博客 > 資深會員專欄 返回
瀏覽人次:77811    回應:69
資深會員專欄
 
珍惜香港
法團專業投資者
SMIEEE.MSc(ICDE)
http://facebook.com/hongkongtruevalue/
2015年6月20日
政改,响一場鬧劇之下,終於被否決咗啦!

仲達兄話,香港市民嘅選擇權被剝奪咗,要票債票償;湯博士就話,政治呢味嘢,你估佢唔到喎!其實,背後嘅真相喺點,只有當事人至知;但我想問,個事實喺點,真喺咁重要咩?件事,總叫告一段落啦!

如果俾我揀,政改當然喺通過好啲,但依家否決咗,我又冇乜所謂噃!記得大聯盟搞反佔中簽名運動果陣,我响呢度極力呼籲各位參與;而最近嘅支持政改簽名運動,雖然我唔覺意都簽咗,但响呢度就隻字不題,點解?因為有啲嘢,絕對唔可以接受;但有啲嘢呢,就只喺見仁見智。

各種民調都指出,支持同反對政改嘅民意好接近。有人慨嘆,撐黃者嘅比例竟然咁高,但細心分析之下,其實反黃同撐黃者,兩邊民意裡面都有。支持政改嘅撐黃者,既然唔喺執著嘅一群,咁嚴格嚟講,唔算撐黃;至於反對政改嘅民意裡面,原來有唔少人,根本就唔讚成一人一票選特首,尤其喺响黃虫之患後,更加確定香港唔應該有民主,呢啲評論,响地產網留言箱度都見唔少。咁即喺話,真正嘅撐黃者,只屬少數。

其實,政改通唔通過,點解冇通過,唔喺最重要。關鍵喺,响政制發展嘅歷程之中,我地體會到啲乜嘢,心態有冇進步,還是仲喺執迷不悟。香港喺一個自由城市,香港人,從來都有得揀,問題喺,我地識唔識得揀,同願唔願意去揀。仲記唔記得理大全民投票嘅故事?就算喺用番 2012 年嘅選舉方案,要改變命運,亦唔喺冇可能嘅!

所以,點解我成日話,一定要積極正面。睇政治睇做人睇營商睇投資睇人生,都喺果句,一定要積極正面。心,可以死,但喺,千祈唔好成魔

到咗呢度,可能大家已經睇到一頭霧水,點解呢篇個題目,會叫做「序」嘅?

話說前幾日,湯博士同一個網站開戰,搞到幾乎要出動緊急披露令。其實,芳間亦有唔少評論博士言論嘅文章同留言,有啲都好激,唔單止喺邊個網站嘅,可能真喺只有當事人至知點解。不過,都喺果句,背後個事實喺點,唔重要嘅,最緊要,喺件事已經告一段落啦!

今日,我睇番 PP 嘅專欄,發覺原來第一篇文章,喺包括三傻在內,一眾網友嘅共同作品。唔知點解,我內心突然閃過一絲感慨;所謂,緣來緣去,裡面每一個作者,今日睇番呢篇作品嘅話,唔知會有乜嘢感受?但之後呢個專欄,就只有 PP 出文。點解冇咗法子、冇咗亮劍?點解,只喺留番 PP 响度?

講到三傻,我响呢個網站留言,都差唔多有兩年,同佢地亦有過一段經歷。今日,各位網友不時爭論關於冇註冊留言嘅問題,但原來响年幾之前,呢度全部留言都喺冇得註冊。後嚟法子兄提出雙軌制,而我就提議用另一種顏色或字體識別註冊者,結果網主採納,就變成依家咁。跟住冇幾耐,就出現咗地產論壇,目的喺俾資深網友,隨時出文,方便大家討論。當時,可以出文嘅,即喺高級會員,應該只有三傻。

不過,幾篇文章,包括兩個 CCL 競猜之後,個論壇就再冇新文。其實,地產論壇,喺有啲設計缺陷嘅;例如,只有响網站首頁,列出最新三篇文章嘅標題,而地產博客裡面就冇論壇嘅顯示,回應列表又冇包括論壇嘅回應,對讀者唔太方便。坦白講,我呢篇「序」,都唔知會有幾多人睇到。大家又不妨試下,揾一揾論壇嘅第一篇文章响邊?我都揾咗好耐:响呢度

前幾日,我向網主提議,將地產論壇嘅發文,提升成地產博客專欄顯示模式。即喺話,地產博客裡面,會顯示地產論壇最新嘅發文簡述,回應列表亦包括埋論壇嘅回應。而文章及留言箱格式,會同專欄一樣,包括作者可上載嘅簡介、照片,同論壇舊文嘅 PULL-DOWN LIST。當其中一位作者,响論壇度出文之後,二十四小時內,所有作者都唔可以出新文,令每一篇文章有最少一日嘅瀏覽時間。其實,我呢個提議,即喺將高級會員升格,同專欄作者睇齊,只喺呢班作者,分享緊同一個專欄啫。網主考慮將一位網友,提升為高級會員之前,就必須先對呢位會員有足夠信心,並確認佢有資格成為專欄作者至得。

結果,網主並冇回覆,但轉頭就升咗我做高級會員。坦白講,我自問冇資格,成為地產網嘅專欄作者,而我亦冇咁嘅意思。所以,我決定以呢篇「序」,回敬網主。

我認為,會員之中,三傻,喺最有資格。而我亦明白,三傻出文分享,只為興趣,但公開發文,難免會招來粉絲、招來敵人。呢啲敵友,因興趣而生,一日唔封筆,就算走到天涯海角,都會纏住你。所以,响其他平台出文,一樣會有人踩場,你可以响其他地方,當佢地透明,咁點解响地產網度,又唔可以當佢地透明?响呢度怕得罪人,難道响另一個場就唔怕咩?大家都喺成年人,亦唔喺撐黃者,點都唔會為咗興趣,或者乜嘢理想,就連基本嘅自我審查都唔做,隨便損害其他人嘅利益嘛?

睇過三傻响其他網站嘅分享文章,呢啲文章,放响地產網度,我唔見得有乜問題噃!好多嘢,睇穿咗,其實只不過喺一個心魔啫。正如,我唔移民,因為香港,就喺我嘅根,經歷過回歸、經歷過沙士、經歷過黃虫之患,都喺咁話。又正如,有人問我,點解用死一間銀行?點解投資得咁集中?點解唔分散風險、分散投資?我真喺唔知點樣解釋,只能夠話,如果唔喺咁,今日,我就去唔到呢個 SCALE。

其實,到呢一刻,邊個啱,邊個錯,根本就好難定。總之,行直線,講真話,從來都唔會有問題;輸贏,根本就唔重要。關鍵喺,大家响呢一段互動嘅歷程之中,體會到啲乜嘢,心態有冇進步,還是仲喺執迷不悟。心,可以死,但喺,千祈唔好成魔。憎恨一個人、討厭一件事物,喺好辛苦;放開執著嘅話,就會發現,自己從來都喺有得揀,問題喺,你願唔願意去揀。你要走,我冇權阻你,但千祈唔好話我知,你唔走唔得。

茫茫人海中,關係嘅建立,真喺好難;但關係嘅中斷,只喺瞬間

今日,我以最大嘅誠意,通過昵一篇「序」,邀請三傻回歸地產網,以地產論壇為出文嘅主要平台。而我亦希望網主,釋出誠意,將地產論壇既發文,提升至地產博客專欄顯示模式,為三傻,以及將來提升成為高級會員嘅網友,提供一個與其他專欄作者,對等嘅平台發文。他日,若成功令三傻回歸嘅話,咁我今日嘅文章,就喺呢個新專欄嘅「序」。

我要申明,三傻、網主、各位網友及專欄作者,同我冇任何利益關係或衝突,甚至連私人關係都冇,極其量,只能算喺泛泛之交。呢篇「序」,喺我自發寫,唔喺基於任何人嘅要求,亦冇其他目的,純粹喺盡一個朋友嘅責任,希望大家,開開心心。

不過,如果三傻,最終都喺拒絕回歸地產網嘅話,咁我呢篇「序」,就會成為我响地產論壇度,發表嘅最後一篇文章。

法子、亮劍、PP,雖然機會渺茫,但我會等嘅!

 
 
我要回應
我的稱呼
回應 / 意見
驗証文字
 
會員登入
登入ID 或 網名
密碼
1. 引刀一快 2015-06-20 04:29:43
珍港

知唔知點解我鍾意駁你?因爲你講嘢幾時都係好技巧咁側埋一邊。
2. 引刀一快 2015-06-20 04:33:43
不過,我依傢冇興趣再穿插回應lu,因爲我覺得你自己都未必有心機睇回應咗乜。
3. 八十後 2015-06-20 08:46:32
珍港兄,謝謝,其實我上黎都好大原因是想學習您和三傻好既人生和分析,希望三傻能因您而出現啦
4. 小小業主 2015-06-20 11:18:55
珍港兄,
有幸看到您這篇序。其實兄台也是小弟學習對像之一,您的言論啟發了小弟不少思維,每篇回應也很花心思,小弟拜服。萬一三傻師兄不回歸,希望您也會繼續出文,绝對是網友之福,敬請三思!
5. Ronald 2015-06-20 20:15:21
這編文章,是我們一班網友有緣相聚兩年的一份小總結,重啟我許多記憶,要詳細回應,看來我要分幾次以至幾天,單看文章附上的超連結,相信珍兄花了不少精神時間,先在此衷心致謝!

首先回應論壇的優化及顯眼位置的展示,我會全部接納,只可惜剛巧遇上兩天假期,除值勤的,其他同事都在放假,否則24小時完成及於雅虎等網站有大量Banner指過來,現唯有等下星期一了。

待續...


6. 引刀一快 2015-06-20 23:43:45
唔好諗歪咗,我等緊佢地架,佢地唔喺度真係少咗討論題材。
7. 歷史長河 2015-06-21 00:13:50
有幸看到珍惜兄這篇文章,一如既往的精彩。珍惜兄對人生睇法好深刻,也好正面。多謝分享!
8. 肥婆四 2015-06-21 20:32:12
珍兄是有心人,值得尊敬,值得學習。
9. CH 2015-06-21 22:32:30
珍兄好有心,希望好事成真。
10. Ronald 2015-06-22 12:24:50
呢篇「序」,嚴格來說的确算是第一編,我們以前也搞過論壇/討論區之類,發覺網友不熱衷建立題目,除一些地產版記者為了收料,所以當年我們也曾聘用全職雇員幫手一年前建立此壇,也是我主動要求亮劍及法子兄幫手建立了三個題目,可惜未能延續,今次得珍兄拔刀相助,寫下周詳建議為「序」,感激萬分。

至於珍兄提到「都唔知會有幾多人睇到。」,請放心,要幾多,有幾多,我們的設計師正在設計Banner放在Yahoo!及各大網站我們的程式員也正在多個網站加入Entry Point。

待續...
11. 蜕变中嘅懒人 2015-06-22 13:57:03
珍惜香港兄處世之道、永遠恰到好處,令懒人心悅誠服。

感於兄台有心人也,料想各方將會釋出善意誠意,願有缘人風雨飄搖後再聚首一堂,幸甚。
12. 惜緣 2015-06-22 14:00:34
[ 此內容只供會員閱讀 ]
13. 小師妹 2015-06-22 14:49:38
此地產網喜有珍兄的重情義有心而又心胸廣闊的網友, 實屬可幸!雖是君子雖是小人,一目了然!
14. 大寶二寶 2015-06-22 14:56:55
多謝珍港兄。期盼亮劍,法子,PP兄繼續出文,好讓地產論壇繼續發光,發亮。

共盼之,哈哈!
15. 亮劍 2015-06-22 15:02:20
珍惜香港兄……
你如果間唔中有睇小弟的留言,都知我雖然長氣,但絕對係有嗰句講嗰句的人。
我知自己级数去到边,因此小弟發表文章,只是談談己見,與大家分享下,無想過有無錢可幫補呢回事。
咁不涉及錢銀,我用筆名即又不涉及名聲,如此一來小弟寫唔寫、幾時寫同寫D乜,我就揸晒主動權。
今後兩叁年,小弟絕對睇好香港楼市,但如果我呢家高調走出來有碗話碗、有碟話碟,咁我呢鑊就真係横又死、掂又死!
如果真的是升市,我無錢收又得罪人。
如果個市不幸福佳,我肯定被人追殺九條街,寸到我反唇啦。
咁畀着你會否無事忙?
16. 小師妹 2015-06-22 15:04:26
誠心希望很快可以再見到三劍俠無私的分享,期待著風雨過後的彩虹出現!

希望集合眾人之念力促成此好事以不負珍兄之苦心及好意!
17. 小師妹 2015-06-22 15:11:28
等待法子和PP的回應....

劍兄,請問你還是認為2017年是樓市轉向之時嗎?多謝賜教!
18. 魚蛋仔 2015-06-22 18:31:07

謝謝珍惜香港師兄真誠的分享,我們期待三傻的回歸!珍港兄這份以小我成大我的勇氣,無私的精神,令人敬佩!

19. Joe 2015-06-22 20:57:56

珍港兄有心有力,何止屬高級會員,老早應成為地產網專欄作者,沒有你支持簡直係地產網及網友之大損失。




20. 元朗人 2015-06-22 21:23:36
珍惜香港兄

非常期待你的文章。支持支持!
21. 打工仔 Andy 2015-06-22 22:19:50
珍惜兄

多謝你的分享, 我們知道的! 
22. 打工仔 Andy 2015-06-22 22:21:35
Ronald,

多謝你的安排! 
23. 物業初哥 2015-06-22 23:56:22
珍兄,緣起緣滅既有定數,比時間三傻整理自己思緒吧

你經常提醒我們要態度、思想正面,我有時對某些事情心的確死了,也很懊惱自己以前沒有好好把握機會和時間,如何保持正面心態?唯有不斷提醒自己,機會只留給有準備的人,謝謝謝你的分享!
24. 灰夾克 2015-06-23 11:33:51
珍惜香港兄好有心去維繫多年的感情,緣份,以文會友,網友都非常認同。
但(引)出了訓導主任式的回應逢事過問,樣樣插手,唯獨天下第一。期望三子等網友繼續踴躍發言,看來荊棘滿途。
25. 活在當下 2015-06-23 15:51:13
睇了無數次,仍然好感動!多謝珍惜兄!
三劍俠,網迷一路都會等緊你們的出現,好難得此網站的緣份,希望大家好好珍惜!再次多謝珍惜兄!
26. CD ROM 2015-06-23 16:39:00
尋日睇完珍兄既出文, 反覆思量, 我這等沒甚份量的後輩, 應該回覆甚麼呢??? 最後一句話都沒回...

到左呢一刻, 我其實都沒甚頭緒, 但沒內容都好, 珍兄呢個靚set, 我地當然要接落去啦~~~
27. CD ROM 2015-06-23 16:51:22
亮劍兄, 你既然都話你無乜負擔, 你寫既野同主流唔同, 只要你有你自己既理據, 又可妨同大家分享一下呢???

畢竟你既回應, 由"王先生" 到 "亮劍"時代, 小弟都親歷其中. 特別係你之前回應我有關中西區小女準備要返學既一d逸事, 也被你言中一一兌現中~~~

期待你, 同PP法子既出現~~~
28. Jerry 2015-06-24 10:02:35
謝謝珍港兄的用心分享!

希望法子、PP及亮劍能回歸地產網
29. Admin 2015-06-24 10:13:20

Banner 已上Yahoo! 財經‧地產  多個不同版面



30. 占士 2015-06-24 11:51:43


珍惜香港兄,您是真是用心良苦 亮劍兄已經回歸。希望法子兄和PP兄放下疑慮,回歸地產網和大家分享您們的真真知灼見!



31. 亮劍 2015-06-24 11:57:31
CD ROM ……是否呢篇?

唔知阿嫂會否好似小弟老婆咁玩嘢:

1 明明中西區及湾仔D楼貴夹细,但係要搬過來,佢會同你講貪呢度校網好。

2 明明 11及12 校網你去考又好,你大抽獎又好,好多間免費名津校畀街坊子女任入,但唔知點解D女人,係要同你個细路報那些:「要畀錢又勁多人爭住入嘅學校」。

3 到你小朋友真的入咗呢D學校,你兩公婆亦發覺其他小朋友,唔少人的情況與你們相若,即係街坊但要跌錢讀書;而其餘的小朋友,就長途跋涉坐褓姆車 過江上学,學費連車費隨時夠供楼。


香港咁多怪獸家長,年輕人首置的首期點來還有懸念嗎?


Or 呢篇?
喺拾幾年前我見到有個朋友,送阿仔去讀國際學校,我覺得好奇怪,点解有D人有免費教育唔享用,而要送錢俾人洗?


直到七年前我阿女19個月大,老婆就送囡囡去某間國際幼兒班,每月使幾仟銀俾佢去玩遊戲,我問太太点解?她說第二時你就知!


到阿女兩歲幾,她去投考幼稚園,申請六間中五間,但我太太揀選了那間小學要俾錢嘅。


現在阿女要每年俾幾萬返學,而我睇倒有樣幾奇怪既嘢。如果要俾錢嘅學校係指國際、直資及私立,咁我身邊接觸得到嘅人的選擇係:

隣居街坊……因為我住在11校網,所以要俾錢返學的小朋友大约佔6成。

阿女的同學仔……老婆同阿女揀果間要俾錢嘅同學仔唔計,但她們的兄弟姊妹幾乎都讀緊要俾錢嘅學校,就唔提唔得,而且那兩叁個讀緊津校的小朋友並唔係唔想讀,只不過佢哋考唔倒要俾錢果D咋。

興趣班……小女亦有去跳芭蕾舞、弹豎琴、學游泳,非常奇怪,她8成以上同班,讀書要俾錢。

補習……囡囡中英数要找人私補,而果幾個補習老師的客仔,亦幾乎全部讀緊要俾錢的學校!


如果要讀國際、直資及私校,每年拾多萬「消費」只是最低要求,那麼培養一個小朋友的成本,咪幾百萬起碼?

幾百個都捨得跌, 咁當呢班小朋友第二時大個咗,他們的父母包括我,會否唔理佢哋死活,拒絕幫手為他們的下一代去置產?

我点解強烈睇好港楼,呢個係重要原因!

如果兄台你連同太太都喺港島北工作,第二時又希望D小朋友在11或12校網升學,那麼俾贵5成搬去中西區是合理的安排。

我有朋友的细路要乘校車及褓母車返學,呢幾年車费加幅拍得住楼價,如果加埋大人舟車費同通勤時間,每月幾仟起碼。

上述舟車费用,係支出。消耗喺旅程上的時間,係無價之寶。

就算你小朋友之後走去讀直資或私小,咁中西区亦有好多俾你揀。


32. Ronald 2015-06-24 15:21:59

還有,地產論壇的出現,除讓資深會員可新增題目/選寫文章之外,也讓所有會員可修改/刪除 當日自已的回應 


至於作者可上載簡介、照片,上載簡介容易,上載照片?因要遷就不同平台的顯示方式不同,我們的programmer仍在設計中...

 

33. 引刀一快 2015-06-24 15:26:50
Ronald兄

如果所有資深級嘅回應可以不限時修改,作者變相可以對自己言論不負責不承認,似乎其他對參與討論人士不公平。
34. Ronald 2015-06-24 16:22:41
引刀
果然反應快,的确有不公平,暫只有3名資深級,也未見他們修改,我們馬上修定為可 修改/刪除 當日自已的回應 

35. 占士 2015-06-24 16:27:26

Ronald兄,請問如何才能由初級升到資深級,是通過什麼的標準評價,及會員自己如何知道現在離升級有多遠?

36. Ronald 2015-06-24 17:21:41
占士兄,
暫時沒有甚麼機制 資深的分別只是可自行開新標題去寫文章,若你或有其他網友想開新標題去寫文章 第一次可電郵文章到 admin@property.hk 給我們看看先。

37. 引刀一快 2015-06-24 18:19:04
To 34樓 Ronald兄

多謝回應,引刀呢種反對派出身嘅網友的確會對呢類問題敏感D,希望大家只用呢個功能修改錯字同埋刪除重複發文,出文之前大家都諗清諗楚,對言論負責,維持論壇質素,引刀辣過唔少火頭,亦引以為戒。
38. 占士 2015-06-24 19:51:08

Ronald兄,好的,明白了,谢谢您的回复!

39. 珍惜香港 2015-06-24 22:38:28
珍惜香港TO:32/F、34/F Ronald

關於作者簡述同照片,可以跟專欄嘅做法,歸納於 "article-header" 入面顯示,同內容分開。至於照片上載嘅兼容性問題,亦可以通過規定作者上載圖片嘅格式解決。

我「序」裡面建議,响地產博客度,顯示地產論壇最新嘅發文簡述,而文章及留言箱嘅格式同專欄一樣,包括作者可上載嘅簡介、照片,同論壇舊文嘅 PULL-DOWN LIST。响技術上,可以保留 "forum_content.php" 作為會員出文或修改嘅平台,但就開一個新嘅專欄,例如 "article_content.php?author=FORUM",將地產論壇嘅發文放入去,咁就可以兼容現有嘅專欄。

其實,網站會員分三級制,應該喺基於對會員留言嘅種類及操守而定。高級會員可以出文,喺因為網主確認呢個會員嘅資格同操守,等同一個專欄作者。一個專欄作者,必須對自己嘅言論負責,網主對佢呢方面要信任,先至會將佢提升為高級會員,所以對修改及刪除文章同留言方面,應該給予最大彈性。

一個中立嘅網站,喺唔應該為咗作者「有機會」講過唔算數,就限制佢地處理自己文章嘅權利,畢竟果啲都喺佢地自己嘅知識產權。正如湯博士,若要求網主,將佢任何一篇舊文修改,甚至刪除,網主都唔會有異議,因為呢個喺博士嘅專欄,佢有權對自己嘅出文,依佢自己嘅意願處理。講過算唔算數,喺專欄作者自己負責,而唔喺網站強行要佢地負責。

我响「序」裡面提出,將高級會員升格,同專欄作者睇齊,除咗為三傻回歸釋出最大嘅誠意之外,亦為網主開闢另一條物色專欄作者嘅渠道。各位網友,只要响留言質素,同操守各方面,得到網主嘅認同,就可以提升為中級會員,享有同專欄作者一樣,隨時修改及刪除留言嘅權利。呢個權利,鼓勵中級會員响留言區內,作高質素嘅分享,甚至以文章形式留言,同時試鍊出佢地嘅操守。到網主認為,一個中級會員,响留言區嘅發揮,已經達到地產網專欄作者嘅水平,而留言操守又合乎資格嘅話,就可以將佢提升為高級會員。高級會員,除咗隨時修改及刪除留言之外,更可以同專欄作者一樣,發表真正屬於自己嘅文章,同接受讀者留言。

所以,我讚成保留依家中高級會員,可以冇限制修改及刪除留言嘅做法。如果認為唔公平嘅,就倒不如所有註冊會員都冇限制,反正芳間嘅討論區都喺咁。其實,網主將會員升級、降級,已經喺最大嘅把關。不過,初級會員只能修改及刪除當日留言,就應該改為出言一段時間內,例如十二或廿四小時,咁就可以避免晚上十一時五十幾分出言就改唔到嘅問題。

當然,呢啲只喺我個人意見,最終都要網主衡量過嘅。

網站喺中立平台,得以成功,喺基於互信同尊重,唔喺基於規限。

(呢句喺後加:多謝網主响「序」度加嘅照片)
40. 引刀一快 2015-06-24 22:47:14
珍港兄

你又主動符合咗我喺一樓對你嘅評語喇,thx
41. 引刀一快 2015-06-24 22:48:26
如果一個人咁守規矩,咁駛咩咁怕D規矩?係咪?
42. 肥婆四 2015-06-24 23:05:14
珍兄果是自由開放人,既公平,又公開。唔認數?唔使驚,大家都睇到,唔認即是認錯咁解囉。
43. 安全駕驶 2015-06-24 23:14:06
to 41/F,

The issue in discussion here is what sort of environment the forum shall provide to authors. An author not bothered by rules set does not mean the forum has an environment that respect authors' right.
44. 引刀一快 2015-06-24 23:58:58
肥婆四兄

咁就冇必要搞呢種特權,如果一個人講嘢要留後路删除,即係對自己言辭有保留。
一言既出,駟馬難追,如果一個可以追,一個唔可以追,呢種不對等討論已經稱唔上討論。
45. 引刀一快 2015-06-25 05:21:30
To 43樓

唔好意思,兄台你介唔介意按原文打個中文版?當係教引刀英文喇,多謝。
46. 引刀一快 2015-06-25 07:46:18
珍惜香港兄

我就兄台此文深感詫異,甚至質疑自己世界觀,點解有人講好話庇護嘅文章,我會無法認同嘅?

我試試抽幾點岀嚟討論下,若珍兄希望引刀逐點反駁的話,請直接告知引刀。

其實,網站會員分三級制,應該喺基於對會員留言嘅種類及操守而定。高級會員可以出文,喺因為網主確認呢個會員嘅資格同操守,等同一個專欄作者。一個專欄作者,必須對自己嘅言論負責,網主對佢呢方面要信任,先至會將佢提升為高級會員,所以對修改及刪除文章同留言方面,應該給予最大彈性。”

給予高級會員出文自由度,當然可以理解,但係要求隨便删改言論嘅特權,到底用意何在?
你所講嘅“信任”,若果係等同于爲所欲爲的話,咁就即係建基于對其它網友嘅“不信任”,希望呢句話嘅意思你能充份理解。

一個中立嘅網站,喺唔應該為咗作者「有機會」講過唔算數,就限制佢地處理自己文章嘅權利,畢竟果啲都喺佢地自己嘅知識產權。正如湯博士,若要求網主,將佢任何一篇舊文修改,甚至刪除,網主都唔會有異議,因為呢個喺博士嘅專欄,佢有權對自己嘅出文,依佢自己嘅意願處理。講過算唔算數,喺專欄作者自己負責,而唔喺網站強行要佢地負責。”

請問有邊間學術機構邊間高校出咗正式文章會改?發現問題之後加補充文件就會有!唔通人地嘅文章就唔係知識産權?每個人都要為自己言論負責,要麼不發表,發表咗就要承擔。
湯生連書都出埋,當然對出文負責喇,請唔好亂拉人做擋箭牌。奇就奇在點解你文都未寫,就要先為刪文搵後路?

講過算唔算數,喺專欄作者自己負責,而唔喺網站強行要佢地負責。”
呢兩句可謂經典。
請問如何負責?隨意刪文嘅特權本意就係避責。
不單寫嘢嘅人要對言論負責,就算係刊登嘅網站亦可能會負上相關責任,對自己言行負責係本份,係爲人處世最起碼要求,何謂“强行”?








47. 亮劍 2015-06-25 09:27:19
珍惜香港兄……
點解呢個網加咗修改及刪除選項,可能與小弟有關。
你都知我是一個不學無術的半文盲,不時貼文之後,經朋友發現文句不通、邏輯混亂、數據有錯,咁之前我就打電話或電郵畀L小姐,同我更正删減。
可能網主見咁攪法,佢真係請多個人招呼我呢D半文盲都似,因此他增加咗呢個修改及删除功能,等我自行增減改錯修飾。
引刀兄,你不要大敏感啦,我同珍港兄呢D都係頂天立地嘅男子漢,一係唔寫、寫咗唔會唔找数或改到呀妈都唔認得咁衰仔!
48. 珍惜香港 2015-06-25 10:23:34
珍惜香港TO:47/F 亮劍、46/F 引刀一快

關於修改或刪除留言呢個 TOPIC,喺見仁見智,亦唔喺我嘅著眼點,但既然引發討論,就作最後補充。

我每次出文,尤其喺長嘢,都會作多次修改,主要喺用詞、錯字、文句組織、及加減藍色連結之類,但通常唔會玩超過一日。只喺有時睇番一堆舊留言,發現有啲 YOUTUBE 影片同連結唔再 WORK,就 UPDATE 番哂佢地啫,邊有閒情關心講過算唔算數呢味嘢。如果真喺要為修改及刪除設限,就請改為出言一段時間內,例如十二或廿四小時,以避免晚上十一時五十幾分出言就改唔到嘅問題啦。

其實無須詫異,亦唔關個別留言者事嘅。睇番外面各大討論區,FACEBOOK 也好,其他公開網站也好,都喺俾註冊者修改或刪除自己嘅留言,最多只喺响留言度標示曾經改過、最後幾時改過。坦白講,我睇唔出點解地產網嘅討論區,有必要响呢方面,同其他討論區唔一樣,要另設限制。

我响 39/F 度以湯博士為例,應該已經一目了然吧。專欄作家,對自己嘅作品,無可否認,的確有自主權,呢樣嘢唔可以抹煞。莫講話湯博士有權修改或者刪除自己任何一篇舊文,甚至有權將成個專欄關閉添。不過,佢對自己嘅言論,當然亦必須認真同負責,但唔喺要網站幫佢負責,就喺咁簡單。

所以,會員三級制,作為提升成專欄作家嘅標準,以修改或刪除留言嘅彈性分級,自然就順理成章。39/F 對會員分級標準嘅建議,亦喺嚟自呢個概念。不過,如果認為呢種做法唔公平,或有乜特權之類,咁都喺果句,倒不如所有註冊者都冇限制,跟外面各大討論區一樣,响改動過嘅留言度,標示曾經改過,同最後幾時改過就算。

BY THE WAY,今朝發現地產論壇文章,提升成地產博客專欄嘅顯示模式,原來已經初步完成。

大家可以 CLICK 呢度,就睇到提升後嘅效果啦!真喺要再三多謝網主!
49. 引刀一快 2015-06-25 10:27:46
亮劍兄

我對你幾時都祗係討論問題,咁耐都未對你投訴過咩,因爲就算唔同意你講法,都認同你爲人同處世態度。亦因爲亮劍兄你說話實在,從未需要過同你翻舊賬,討論過了就過了。
删改功能呢様嘢,本來作用就祇係作爲勘誤之用,因爲網文寫作冇必要同論文一般嚴謹,各網友間應該係平等并且有時限性。
既然你話“一係唔寫、寫咗唔會唔找数或改到呀妈都唔認得”,咁點解要咁強調保有不限時刪文特權?
若果要大部份人以實牙實齒嘅態度,同有權隨時反口嘅特權階層進行討論,即使實際出文之後大家都唔改,其實喺意義上已經大打折扣,呢點我相信亮劍兄必然心領神會。
50. 肥婆四 2015-06-25 10:29:48
回44引刀兄,
咁執著做乜,呢啲係規矩者,網站自有法律考慮,大家守同一個規矩咪叫公平囉。有時删改未必係作者本意,不時之須人皆有之。況且,要删改即是之前有缺陷。
51. 引刀一快 2015-06-25 10:39:27
如果討論內容關乎預測、或者有較强正反兩方嘅特性,單方講完可以隨時改嘅話,可以講討論都冇乜意思。
至于全部人都可以隨時改文的話,係相對地合理,不過有損出文嚴謹性,要考慮所作犧牲。
其實呢個問題有D似購物嘅無條件退貨期,表面文明,實則損害消費市場。
52. 引刀一快 2015-06-25 10:50:31
肥婆四兄

我自己都成日用删改功能,我祇係反對不限時删改同特權制啫,作爲勘誤,冇必要無限時,少量字誤,亦唔會有人翻岀嚟講,舉個貼身嘅例,如果我删除咗我上年買CCL唔過118嘅所有帖話自己冇估錯過,或者運輸工人刪完帖之後話自己冇言語觝觸過其他人,論壇就變得好兒嬉。
53. 肥婆四 2015-06-25 11:13:36
回引刀兄,
你唔會咁做,相信大多數網友也不齒去做。網上交流學習,目的增加知識,唔係自己有幾啱,對方有幾錯。
54. 引刀一快 2015-06-25 11:24:58
肥婆四兄

簡而言之,如果論壇冇好友淡友間嘅針鋒相對,一切都變得簡單。
55. 肥婆四 2015-06-25 12:00:11
引刀兄,
有好淡才有睇頭 ,自己睇唔到的,對方睇到,咁就相得益彰啦 。就算唔認同對方,最少都有諗一下道理,對自己大有好處,發揮到風度就更顯高尚了。
56. Ronald 2015-06-25 12:35:14

各位:

我們不分初/中/高先,只分「初級會員」和「資深會員」 兩級,因為我們未有提供甚麼福利, 僅僅讓所有會員可修改/刪除當日自已的回應,資深會員雖可新增題目/選寫文章,也不值一提。

資深會員專欄
http://www.property.hk/article_content.php?author=PHK_FORUM&type=&com=&id=38466

讓我們先評估下可否撥更多資源,搞個會員俱樂部,提供更多資訊,如:我們提供數據給學者選寫的報告、過濾出業主的免佣放盤、法定實用面積、凶宅準確樓層,甚至是網民搜尋樓盤指數走勢及分享我們部份的收費項目...

到時再分多級。

57. 珍惜香港 2015-06-25 13:06:03
珍惜香港TO:56/F Ronald

其實,關於留言刪改方面,我仲有另一個方案,不過這兩日都用唔到電腦,且呢個議題又唔喺咁重要,我到明晚至提出啦。
58. 路人甲 2015-06-25 16:42:30

E?
呢度係做乜架?
59. 小小業主 2015-06-26 18:58:21
有會員俱樂部,舉腳讚成!
珍港兄,期待您的發文!
60. 珍惜香港 2015-06-26 23:04:43
[ 此文於 2015-06-27 23:06:03 刪除,按此顯示出文後 24 小時之原稿 ]
61. 引刀一快 2015-06-27 00:30:46
珍惜香港續 57/F

坦白講,我真喺好討厭只能當日修改呢個做法。我寫嘢嘅時空好有限,通常都喺响黃昏打後至寫,如果寫長嘢,午夜前 POST 個稿,就修改到超過午夜後至完成。依家即喺迫我一定要响午夜之後至 POST,再改埋真喺想我死咩!

如果唔喺有個別人仕,對其他留言者有 N 咁多個 CONCERN,就唔使咁麻煩啦!

回正題,我呢段留言,喺要展示一個超過廿四小時之後至刪除嘅例子。

一個留言者,於出言後廿四小時之內,刪除自己嘅留言,整個留言就會被刪除,不再顯示。

但如果出言超過廿四小時之後至刪除,咁就會留低一段空白嘅留言,但裡面會顯示刪除嘅時間,及一個連結俾大家睇番呢段留言初出廿四小時後嘅版本。

我會响下一段留言詳細解釋整個方案。
================================================

平心而論,兄台所羅列嘅兩個理由,都好個人化。
其實冇必要將規矩高度複雜化,搞到新人老手大家都唔識得用,咁又點會有親和力呢?

62. 珍惜香港 2015-06-28 16:31:06
珍惜香港

呢篇,出咗成個禮拜,喺時候打完場啦!

首先要同引刀兄講聲道歉,60/F 個 DEMO,背後隱藏嘅刪除內容,誘使咗引刀回應,仲將成篇隱藏內容抄番哂出嚟添。我先道歉,喺因為將會就呢件事做例,借題發揮。

留言或發文者,刪改文章,可能嘅原因,真喺數不完。或者,講咗唔適宜講嘅嘢、爆咗唔應該爆嘅料,挑起咗太多矛盾,想收番文章,想平息紛爭,想停止有人再被傷害;難道連咁基本嘅權利,都唔可以有咩?

正如 60/F,刪除咗自己嘅留言,結果俾 61/F 成個挖番哂出嚟,何必呢?

我呢篇打完場,亦同時喺關於修改留言嘅另一個 DEMO,背後隱藏嘅編輯前內容,唔知又會唔會被挖番出嚟?唔好以為,我花咁多心思搞兩個 DEMO,真喺為咗要推銷呢個令網站程式員,增添咁多麻煩嘅「完美方案」。坦白講,我根本唔認為網站須要為刪改文章設限,極其量好似香討咁,加番啲刪改標示,就已經仁至義盡。

咦?點解編輯前編輯後,語氣同立場,好似有啲唔同嘅?究竟邊句真架?

我想反問一句,重要咩

所謂,虛則實之,實則虛之。呢個世界,好多嘢,背後真正嘅原因,你喺永遠都唔會知。單憑一片畫面,就以為自己洞悉一切,咄咄逼人,先至喺最無知。正如法子兄描述嘅個案,由懷疑,變成相信,再變成肯定,以致萬劫不復;又有如最近有網友懸崖勒馬,大徹大悟,我再贈惜緣

或者呢度有人,仲未諗得明,點解我篇,會由政改寫起?關政改乜事?其實,重點所在,我已經寫咗兩次:背後真相喺點,根本唔重要,是非對錯,亦好難定;關鍵喺,大家响整個歷程之中,體會到啲乜嘢,心態有冇進步,還是仲喺執迷不悟。心,可以死,但喺,千祈唔好成魔

記得雙軌制實施之前,所有留言都喺冇註冊。回想當日,你,都唔知喺唔喺你;我,亦唔知喺唔喺我。反正都喺唔知,倒不如將重點放响議題度,那管你你我我,討論氣氛反而仲好過依家。雙軌制賦予網站最大嘅進步,喺一個可持續發展嘅會員制度,而唔喺要解決乜嘢是是非非。有人話,不如只有註冊者可以留言,我認為喺多餘。若人心不變,是非,喺永遠得唔到解決,疑慮,亦永遠得唔到滿足。唯一嘅方法,就喺大家將焦點,集中番响個議題度,唔好再執著是非,唔好再執著你我。

今次,網主已經釋出咗最大嘅誠意,我萬分感激,亦多謝 Admin 同網站程式員嘅配合。會員制度得以優化、得以發展,將會喺網友之福、網站之福。

呢篇打完場,喺嘅總結,亦喺我响嘅回應箱裡面,最後嘅回應,希望大家真喺明白,嘅真正意思。今日見到湯博士嘅文章,話網友離去,小事一件,不值介懷,隨遇而安。所謂,緣來緣去,適當嘅討論環境同氣氛之下,相信佢地會隨時回歸嘅。

我會遵守承諾,之後,三傻未肯响呢個專欄出文之前,我亦唔再出文。不過,請 4/F 小小業主唔好誤會,只喺唔响呢個專欄度出文啫,有 MOOD 嘅話,我仍然會好似以前咁,响各回應箱度寫下長嘢嘅。

法子、亮劍、PP,我仲等緊架!

[ 此文最後於 2015-06-29 16:33:03 編輯,按此顯示出文後 24 小時之原稿 ]
63. 引刀一快 2015-06-29 05:21:19
珍港兄

你上面篇嘢我睇咗第一段,唔明你道歉D乜,不過點都好,我諗唔駛道歉,該道歉嘅你又唔道歉。
後面嘅我得閑會睇埋佢,唔好意思。
64. 永远是朋友 2015-06-30 22:11:10
65. Ronald 2015-07-11 15:13:37

於這編文章,我的最後回應是,「序」在地產論壇度,一定不會是最後一篇發表嘅文章,稍后後陸續有來。

在此再次向珍兄致以最衷心的感謝!

66. 新淡友 2015-07-24 12:46:44
問珍港兄
http://hk80captain.blogspot.hk/2015/07/blog-post_22.html#comment-form
starman所說的係唔係你既做法?
如果只得3百萬港紙, 有冇得玩?
67. 珍惜香港 2015-07-25 04:00:09
珍惜香港TO:66/F 新淡友

留魚再取熊掌嘅操作,其實即喺押磚融資,再買槓桿債套息差。呢盤嘢,我經營多年,可以算喺先鋒。之前寫得比較間接,喺因為涉及頗複雜嘅技術細節,同埋要抵抗當中一系列嘅投機誘惑。如果有人睇唔明,或者一知半解,又或者投資風格唔同,就貿然根據我提供嘅資訊作出投資決定,咁就真喺分分鐘會累死人。

我嘅做法,喺有規有矩,借受嚴格監管之下嘅優質平錢,以一盤生意嘅模式去做。至於回報率有幾高,我後來亦响數字上舉過例。可惜,,始終喺人嘅天性;之後基於呢個操作,就衍生咗一系列抄襲同變種個案,結果觸動金管局嘅神經,就喺我早前提過嘅金融扭曲第三波

閣下問到,Starman 留言嘅內容,喺唔喺我嘅做法。我可以答你,數字上嘅操作,喺,但响具體運作方面,佢果種手段,就不敢恭維啦!我都話,要有規有矩嘛!紙喺包唔住火,掛羊頭賣狗肉,後果可以好嚴重。

至於你話,三百萬港元,既然喺 CASH,唔喺借貸,咁就好簡單。美元債嘅單位,一般喺十萬或廿萬美元,而關於槓桿債,可以參考呢篇舊文,當中亦有提及揀債嘅標準,唔重複啦。
68. 瀨西一塊 2015-07-25 12:03:47
有瀨西一塊喺度永遠有是非,晒氣啦,去第度玩算吧!
69. 引刀--快 2015-07-25 12:37:26

68

今次我又捉到你,你又係撈波弟。